Laef Stori

Oltaem Jeova i Stap Blesem Olgeta We Oli Stap Tru Long Hem

VERNON DUNCOMBE I TALEM STORI YA

Mi finis kakae long sapa mo mi laetem wan sigaret olsem we mi mekem oltaem. Biaen mi askem Aileen, waef blong mi, se: “?Tunaet wanem i kamaot long miting?”

HEM i stop smol mo hem i talem se: “Oli ridim wan leta wetem ol nem blong ol niufala brata, we oli putumap olgeta blong mekem sam wok long kongregesen, mo nem blong yu tu i kamaot. Bambae yu yu lukaot long saed blong saon. Laswan tok we i stap insaed long leta ya i olsem: ‘Sipos sam long olgeta ya oli stap smok tabak yet, hem i wok blong olgeta blong raet i go long Sosaeti blong talem se oli no save akseptem wok ya.’”a Mi pulum win bigwan mo wetem wan klia voes mi talem se: “!I tru! Hemia nao wanem we leta ya i talem.”

Mi kakae tut blong mi mo mi smasem sigaret ya long ases plet we i stap narasaed long mi. “Mi no save from wanem oli jusum mi blong mekem wok ya. Be mi neva talem no long olgeta yet, mo mi no wantem mekem olsem.” Mi mekem disisen se bambae mi neva smok bakegen. Disisen ya i gat bigfala paoa long laef blong mi olsem wan Kristin mo man blong plei miusik. Bambae mi tokbaot sam samting long stori blong mi go kasem disisen ya we mi bin mekem antap.

Laef Blong Famle Bifo

Mi bon long Toronto, Kanada, long Septemba 21, 1914. Mi nao mi faswan pikinini blong Vernon mo Lila. Tufala ya, papa mama blong mi oli soemaot lav, mo oli hadwok blong givim evri samting we fofala boe mo tu gel insaed long famle blong mifala oli nidim. Faswan biaen long mi hemia Yorke, biaen i gat Orlando, Douglas, Aileen, mo Coral. Mama blong mi i givim wan vaeolin long mi taem mi gat naen yia nomo, mo i sanem mi blong lanem miusik long Harris Skul blong Miusik. Laef i no isi, be Mama mo Papa oli faenem rod blong pem trak we i karem mi i go long skul, mo skul fi blong mi. Biaen mi stadi long ol rul mo not blong miusik long Royal Conservatory of Music long Toronto. Taem mi gat 12 yia, mi joen long wan kompetisin blong miusik. Kompetisin ya i tekem ples long Bigfala Haos blong Massey, impoten haos we ol man oli kam luk ol pleplei long hem, long taon ya. Oli jusumaot se mi mi win, mo oli givim wan vaeolin we paos blong hem i skin blong algita.

Biaen, mi lanem tu blong plei long piano mo bas vaeolin. Plante taem grup blong mifala i plei long ol smol lafet long ol Fraede mo Sarede sapa, mo tu long taem we ol grup blong studen oli mekem sam danis. Hem i long wan long olgeta danis ya, we mi mitim Aileen. Long laswan yia blong mi long hae skul, mi plei wetem sam grup blong miusik long ol defren ples long taon. Afta long mared blong mi, mi kasem invetesen blong joenem wan grup blong miusik, we nem blong hem Ferde Mowry. I tru se hem i wan gudfala grup mo hemia nao wok blong mi go kasem 1943.

Lanem Blong Save Jeova

Papa mama blong mi oli jes lanem trutok bifo we Namba Tu Bigfala Faet Blong Wol i stat. Long taem ya, Papa i stap wok long wan stoa long taon blong Toronto, olsem wan man blong flasem windo. Long medel dei, long rum blong kakae, hem i lesin long ol storian bitwin tu narafala man blong wok, we oli Baebol Studen (nem we Ol Witnes blong Jeova oli karem long taem ya), mo taem hem i kambak long haos long sapa, hem i tokbaot wanem we hem i harem wetem mama. Sam yia biaen, long 1927, ol Baebol Studen oli holem wan bigfala asembli long Toronto, long wan bigfala stad long graon blong Canadian National Exhibition. Mifala i tekem 25 man we oli kam long Ohio, Yunaeted Stet, blong slip long haos blong mifala we i no stap longwe tumas long wes saed blong stad ya.

Biaen long taem ya, Ada Bletsoe, wan long ol Baebol Studen i stat blong kam storian oltaem wetem Mama, mo i livim sam buk wetem hem. Wan dei hem i talem se: “Misis Duncombe, plante taem finis mi bin lego ol buk wetem yu. ?Yu stap ridim sam long olgeta?” Long taem ya nomo, Mama i stat blong ridim ol magasin, mo hem i neva stop, nating se hem i bisi blong lukaot sikis pikinini. Be, mi no bin intres long ol buk ya. Mi stap traehad blong kasem stefeket long skul, mo mi joen plante long miusik.

Aileen mo mi i mared long Jun 1935, long wan jos blong Anglikan. From we mi lego Yunaeted Jos taem mi gat 13 yia, mo biaen mi no moa joen long wan narafala jos, mi saenem rejista blong mared se mi mi wan Witnes blong Jeova, nating se mi mi no wan Witnes yet.

Mitufala i plan blong gat wan famle samtaem long fiuja, mo kam olsem gudfala papa mama. From samting ya, mitufala i stat blong ridim Niutesteman tugeta. Be ol narafala samting i blokem mitufala, nating se mitufala i gat gudfala tingting blong mekem samting ya. Biaen ol semfala samting oli kamaot taem mitufala i traem bakegen. Long 1935, mitufala i kasem wan presen blong Krismas, wan buk we i karem taetel ya The Harp of God. Waef blong mi i talem se: “Man, hemia i wan Krismas presen we i narakaen, we mama blong yu i sanem long yumitu.” Nating se i olsem, afta we mi mi go long wok, hem i stat blong ridim buk ya, mo hem i laekem wanem we hem i ridim. Sloslou taem i pas, be mi no save nating we waef blong mi i stap intres long buk ya. Ol plan blong mitufala blong gat wan famle i no kamtru. Long Febuwari 1, 1937 bebi gel blong mitufala i bon, be hem i no laef. !Mitufala i harem nogud tumas!

Long taem ya, famle blong mi i stat blong joen plante long wok blong prij. Mi harem we long olgeta we oli pablisa long famle blong mi, papa hem wan nomo i no mekem sabskripsen wetem wan man long magasin ya Consolation (naioa Wekap!) yet. Hemia nao mak blong wok blong prij long manis ya. Mi sore long hem, nating se mi no ridim wan buk blong Sosaeti yet, mo mi talem se: “OK, Papa, mekem sabskripsen long mi; mo bambae yu sem mak wetem ol narafala pablisa.” Long hot taem, grup blong miusik i muf aot long taon mo i go plei long wan risot. Mi kasem Consolation tru long postofis. Biaen, klosap long koltaem, grup blong miusik i gobak long Toronto. Ol magasin ya oli gohed blong kam long adres blong mifala, be mi no karemaot wan nating long pepa we i kavremap olgeta.

Be biaen, long taem blong spel long Krismas, mi luk hip blong magasin ya mo mi talem se, sipos mi bin pem olgeta, mi mas ridim sam long olgeta blong luk se oli tokbaot wanem. Faswan we mi openem i mekem mi mi sapraes. Hem i tokbaot ol trik blong politik mo ol kruked fasin long taem ya. Mi stat blong tokbaot wanem we mi ridim long olgeta we oli plei miusik wetem mi. Be olgeta oli agensem ol tok ya se oli no tru, taswe mi mas gohed blong rid blong mi save sapotem wanem we mi stap talem long olgeta. Long taem ya mi no luksave, be mi stat blong tokbaot Jeova long ol narafala. Mo long taem ya i go, mi no moa stop blong ridim ol nambawan buk blong Baebol we i kamaot long “slef we i stret mo waes.”—Matiu 24:45, NW.

I no longtaem, mi wetem Aileen, mitufala i stat blong kam long ol miting long Sande, nating se mi bisi long wok blong mi long ol dei blong wik. Taem mitufala i kasem miting long wan Sande long 1938, tu olfala sista oli kam mitim mitufala mo wan long tufala i askem se: “?Yangfala Brata, yu jusum finis blong stap long saed blong Jeova? !Yu save se Amagedon i klosap!” Mi save we Jeova nomo i trufala God, mo mi bilif strong se hemia nao ogenaesesen blong hem. Mi wantem joen long ogenaesesen ya, taswe long Oktoba 15, 1938, mi baptaes. Sikis manis biaen Aileen i baptaes. Mi mi harem gud tumas blong talem se evriwan long famle blong mi, oli givim laef blong olgeta i go long Jeova olsem ol man blong wok blong hem.

!Mi luk se taem mi joen wetem ol man blong Jeova mi kasem bigfala glad! I no longtaem, mi haremgud blong stap wetem olgeta. Nating se samtaem mi no save go, be mi wantem save wanem i stap hapen long ol miting. Sapa ya we mi bin tokbaot long stat, i jenisim laef blong mi fulwan long saed blong wok we mi mekem long Jeova.

Taem Laef Blong Mitufala i Jenis Bigwan

Long Mei 1, 1943 wan impoten jenis i kamaot long laef blong mitufala. Mifala i bin go long faswan asembli blong mifala long Cleveland, long Septemba 1942, we nem blong hem Niufala Wol. Long taem ya, faet i stap gohed yet, mo i luk olsem se bambae i no gat en blong hem. Sem taem we nogud faet ya i stap gohed, Brata Knorr, we i presiden blong Watch Tower Society long taem ya, i no fraet nating blong givim wan pablik tok we i pulum intres, hemia se “Pis—?I Save Stap Blong Olwe?” Mitufala i rimemba gud olsem wanem hem i tokbaot Revelesen japta 17, se bambae i gat wan taem blong pis afta long faet ya, mo long taem ya, bambae oli mekem wan bigfala wok blong prij.

Samting we i gat bigfala paoa long mitufala hemia faswan tok we Brata Knorr i bin mekem, se “Jeftaha mo Promes blong Hem.” !Long tok ya hem i askem sipos i save gat moa paenia! Aileen mo mi, mitufala i lukluk mitufala, mo mitufala i talemaot tugeta (wetem ol narafala long asembli ya) se: “!Hemia i mifala ya!” Kwiktaem nomo mitufala i stat blong mekem ol plan blong mekem wan wok we i moa impoten.

Stat finis long Julae 4, 1940, oli blokem wok blong ol Witnes blong Jeova long Kanada. Taem mitufala i stat blong paenia long Mei 1, 1943, gavman i no wantem se mifala i tokbaot Jeova no seremaot ol buk blong Sosaeti long wok blong talemaot gud nius. Olsem ol Kristin, mifala i yusum King James Version Baebol nomo long wok ya. Biaen, branj ofis i sanem Stewart Mann, wan paenia we i gat moa ekspiriens, blong wok wetem mifala long wok blong talemaot gud nius. Brata ya i kamtru jes sam dei afta we mitufala i kasem faswan ples blong wok, hemia long taon blong Parry Sound, long Ontario. !Hemia wan nambawan samting we i soemaot lav! Brata Mann i gat wan nambawan fasin mo i smael oltaem. Mitufala i lanem plante samting long hem, mo mitufala i harem gud tugeta wetem hem. Mitufala i stap mekem plante Baebol stadi finis, be biaen Sosaeti i sanem mitufala bakegen i go long bigfala taon blong Hamilton. I no long taem biaen, nating se yia blong mi i bitim taem we mi mas joen long ami, gavman i singaotem mi bakegen blong go joen long ami. Oli putum mi long kalabus long Desemba 31, 1943 from we mi no wantem joen long ami. Afta we mi pas long kot, oli putum mi long wan kalabus blong olgeta we oli no wantem yusum tul blong faet. Mi stap long ples ya go kasem Ogis 1945.

Taem mi kamaot long kalabus, oli askem mi mo Aileen blong go mekem wok blong paenia long Cornwall, Ontario. Smoltaem afta, Ligal Dipatmen blong Sosaeti i sanem mitufala i go long Quebec blong mekem wan spesel wok long saed blong ol bisnes blong kot. Hemia stret long taem ya we oli kolem se Duplessis. Hemia sam yia we fasin blong agensem ol Witnes blong Jeova i kam strong long Quebec. Long plante dei long wan wik, mi mas go long fo defdefren kot blong givhan long ol brata blong mifala. Hemia ol nambawan taem ya we i mekem se bilif i kam moa strong.

Biaen long asembli blong Cleveland long 1946, oli askem mi blong mekem seket mo distrik wok. Mi mo waef blong mi, mitufala i visitim ol ples wan saed long Kanada go kasem narasaed. Ol samting oli hapen kwiktaem. Long 1948 mitufala i kasem invitesen blong go long namba 11 klas blong Wajtaoa Baebol Skul blong Gilead. Long klas blong mifala i gat 108 studen, insaed long namba ya i gat 40 we tabu spirit i makemaot olgeta. Brata Albert Schroeder mo Maxwell Friend nao oli tija blong mifala. !Hem i wan sas mo nambawan blesing we mifala i kasem, from se ol man we oli wok blong Jeova longtaem finis, oli stap wetem mifala tu!

Wan dei Brata Knorr i aot long Brooklyn i kam visitim mifala. Long tok blong hem, hem i askem 25 volontia blong lanem lanwis Japan. !Olgeta 108 studen oli wantem blong lanem! Hem i wok blong presiden blong jusum hu nao bambae i lanem lanwis ya. Ating Jeova i lidim wok ya blong jusum olgeta, from hem i rili wok gud. Plante long olgeta we oli stap long grup blong 25, we oli jusum blong openem wok blong prij long Japan, oli stap mekem wok ya yet. Nating se sam oli olfala finis, be oli stap long Japan yet. Sam olsem Lloyd mo Melba Barry oli go mekem wok long ol narafala ples. Lloyd i wan memba blong Hed Kampani go kasem we hem i ded las yia. Mifala i glad wetem olgeta from nambawan blesing ya we Jeova i givim long olgeta.

Dei blong kasem stefeket i kam, mo biaen oli sanem mitufala blong go wok long Jamaika. Be, from we sam bisnes blong kot oli no finis yet long Quebec, oli talem se mitufala i mas gobak long Kanada bakegen.

!Plei Moa Miusik!

Nating se mi lego miusik blong joen long wok blong paenia, miusik i no lego mi. Long yia we i kam biaen, presiden blong Sosaeti, Nathan Knorr, mo sekretari blong hem, Milton Henschel, tufala i kam long Maple Leaf Gardens long Toronto. Tok we Brata Knorr i mekem, stamba blong hem se “!En i Klosap, Bitim We Yu Tingbaot!” i mekem evriwan i sapraes. Hemia faswan taem, we oli invaetem mi blong lidim wan grup blong plei miusik long asembli. Mifala i rerem ol miusik blong waltz blong sam singsing long Kingdom Service Song Book (1944). I luk olsem we ol brata oli laekem miusik ya. Mifala i tren bakegen, from program blong Sande, afta we asembli i finis long Sarede aftenun. Mi luk we Brata Henschel i wokbaot i kam long ples we mifala i stap plei long hem, mo mi stopem miusik blong mekem se mi save go luk hem. Hem i askem mi se, “?I gat hamas man we oli stap plei miusik wetem yufala long ples ya?” Mi ansa se, “Taem evriwan i stap, hem i raonabaot 35.” Hem i talem se: “Yes, nekis yia, long hot taem long New York bambae namba blong yufala i dabol long hemia we yufala i gat naoia.”

Be, bifo we hot taem i stat, oli invaetem mi blong go long Brooklyn. Aileen i no save kam wetem mi from sam samting i blokem hem. Niufala bilding blong 124 Columbia Heights i no finis yet, taswe oli givim wan bed long mi we i stap long olfala bilding, long wan smol rum wetem tu brata we tabu spirit i makemaot. Wan olfala, Brata Payne mo narawan Karl Klein, mo hem i fastaem blong mi blong mitim tufala. ?Rum i fasfas? Yes. Nating se i olsem, mifala i joen gud tugeta. Ol olfala brata oli gat longfala tingting mo oli glad blong wet. !Mi traem blong no blokem tufala long wok blong tufala! Hemia wan gudfala lesen, blong luk wanem we spirit blong God i save mekem. !Mi kasem ol nambawan blesing from we mi mitim mo wok wetem Brata Klein! Hem i kaen oltaem mo i givhan plante. Mitufala i wok gud tugeta mo mitufala i frengud bitim 50 yia.

Mi kasem wok ya blong givhan blong lukaot miusik long ol asembli long Yankee Stadium, long 1950, 1953, 1955, mo 1958. Mo tu blong serem wok blong lukaot miusik wetem Al Kavelin long asembli blong 1963, we i tekem ples long Rose Bowl, long Pasadena, California. Long 1953, long asembli long Yankee Stadium, mifala i mekem wan spesel program blong miusik bifo we pablik tok i stat. Erich Frost i talem long Edith Shemionik (biaen hem i Weigand) blong i statem singsing wetem voes we i soprano. Hem i singsing long haf ya se “!Gohed Yufala Witnes!” mo long sem taem mifala i plei miusik blong joen wetem hem. Biaen mifala i sapraes, hem i fastaem blong mifala i harem naesfala voes blong ol brata mo sista blong mifala blong Afrika. Misinari, Harry Arnott i karem wan kaset long Not Rhodesia (naoia Sambia) we hem i rikodem singsing blong olgeta long hem, mo mifala i haremgud blong lesin long hem. Saon blong singsing blong olgeta i kasem evri ples long stad ya.

Rikodem Singsing Buk blong 1966

?Yu yu rimemba singsing buk ya, “Singing and Accompanying Yourselves With Music in Your Hearts” we i ping? Taem klosap buk ya i finis, Brata Knorr i talem se: “Yumi mas rikodem sam miusik. Mi wantem yu blong stanemap wan smol grup blong plei miusik. Long grup ya bambae i gat sam vaeolin wetem sam bambu paep nomo. Mi no wantem we wan man i ‘blu long pupu blong hem’!” Ples blong rikodem miusik bambae hem i long Haos Kingdom we i stap long Betel. Be mifala i wari lelebet blong yusum ples ya, from we i no gat kaliko i kavremap ol wol mo floa, olsem wan prapa rikoding studio. ?Wanem bambae i hapen taem ol saon i jamjam long ol wol, tael floa mo ol aean jea? ?Hu nao bambae i save halpem mifala blong winim problem ya long saed blong saon blong miusik? Wan i talem se: “!Tommy Mitchell! Hem i wok long ples blong rikodem miusik long ABC Network.” Mifala i tokbaot problem ya wetem Brata Michell mo hem i glad blong givhan long mifala.

Faswan Sarede blong mifala blong rikodem miusik i kam. Olgeta man blong plei miusik oli tekem taem blong save gud olgeta. Long taem ya, wan long ol brata i gat wan paos blong trombone wetem hem. Mi rimemba woning blong Brata Knorr se: “Mi no wantem we wan man i ‘blu long pupu blong hem’!” ?Bambae mi mekem wanem nao? Mi lukluk gud taem brata ya i tekemaot trombone blong hem long paos blong hem, i joenem gud haf blong hem, mo i statem blong plei. Brata ya hem i Tom Mitchell, mo ol faswan not blong miusik we hem i plei oli naes tumas. !Hem i plei long wan fasin we i mekem se saon blong trombone ya i kam olsem wan vaeolin! Mi tingting se, ‘!brata ya i mas plei wetem mifala!’ Brata Knorr i neva talem no.

Long grup blong miusik ya, mifala i gat sam nambawan man blong plei miusik mo tu oli brata mo sista we oli soemaot lav. I no gat wan long mifala we i tinghae moa long hem wan bitim narafala. Rikodem miusik i had wok, be no gat man i komplen. Ol wota blong ae oli folfoldaon, taem wok ya i finis; mo gudfala fasin fren blong olgeta we i joen blong plei, i kam moa strong. Mifala evriwan i harem gud long blesing ya, mo tangkiu long Jeova, from we mifala i finisim gud ol wok ya.

Sam Nambawan Blesing Bakegen

Afta we plante yia i pas, mi gohed blong harem gud long fultaem wok blong prij. I gat 28 yia evriwan we mi mekem seket mo distrik wok—mi glad long olgeta taem ya evriwan. Biaen long hemia i gat faef yia we mi mekem wok blong lukaot long Haos Asembli blong Norval, long Ontario. Aileen mo mi, mitufala i bisi from i gat seket asembli evri wiken, mo tu sam asembli blong olgeta we oli toktok lanwis blong narafala kantri. Long 1979 mo 1980, ol man blong wokem niufala branj blong Sosaeti long Halton Hills, oli yusum ol samting we i stap insaed long Haos Asembli ya blong mekem plan blong branj ya. Afta we mifala i wok long Haos Asembli ya, mi kasem wan narafala wok bakegen. Wok ya hem i long saed blong miusik bakegen, i stat long 1982 go kasem 1984, long Brooklyn.

Waef blong mi we mi laekem tumas, i ded long Jun 17, 1994, jes 59 yia afta long mared blong mitufala. Mitufala i spenem 51 yia evriwan long laef blong mitufala, blong mekem wok blong paenia tugeta.

Taem mi tingtingbak long olgeta ekspiriens we oli kamaot long laef blong mi, mi luk se Baebol i wan nambawan tul blong lidim man. Samtaem mi yusum Baebol blong Aileen blong lukluk long ol vas, sam haf long vas, mo sam tok we hem i makem, we i rili tajem hat blong hem. Samting ya i mekem se mi harem gud. Olsem Aileen mi tu mi gat sam vas we mining blong olgeta i spesel long mi. Wan hemia Ol Sam 137, we i tokbaot naesfala prea ya we i go long Jeova se: “!Jerusalem! !Sipos mi mi fogetem yu, i gud mi no moa plei long gita bakegen! !Sipos mi no moa tingbaot yu, no mi mekem we yu yu no moa nambawan samting blong mekem mi mi glad, i gud blong mi no moa save singsing bakegen samtaem!” (Ol Sam 137:5, 6, Today’s English Version) Nating se mi laekem miusik tumas, bigfala glad we mi kasem hemia blong fasgud long wok blong Jeova. Hem nao i mekem se mi kasem ol blesing ya blong harem gud long fulwan laef blong mi.

[Futnot]

[Tok blong pija long pej 28]

Wetem Aileen long 1947

[Tok blong pija long pej 30]

Wan long ol faswan taem we mifala i rikodem miusik