Haremgud Blong Olwe—?Long Heven No Long Wol?

?GLAD blong yu i dipen nomo long ples we yu stap long hem? Plante man bambae oli talem se glad i dipen long wan gudfala helt, wan laef we i gat mining, mo gudfala fasin fren wetem ol narafala. Wan waestok long Baebol i talem se: “Sipos man i stap kakae drae nomo wetem ol man we oli lavem hem, hemia i moa gud, i winim we i stap kakae gudfala mit wetem ol man we oli no laekem hem nating, oli agens long hem.”—Ol Proveb 15:17.

Be, sore tumas, histri i soemaot se hom blong yumi, wol ya, i bin fulap wetem fasin blong no laekem narafala, raf fasin, mo ol narafala rabis fasin. ?Be olsem wanem long heven, no ples blong ol spirit man, we ol man oli hop blong go long hem afta we oli ded? ?Heven i bin stap oltaem olsem wan paradaes we i gat pis mo i kwaet, we i no gat wan samting nating blong spolem hem, olsem we plante man oli ting?

Baebol i tijim se God i stap long heven wetem plante milian spirit man, we nem blong olgeta ol enjel. (Matiu 18:10; Revelesen 5:11) Baebol i tokbaot olgeta olsem “ol pikinini blong God.” (Job 38:4, 7, NW) Ol enjel oli no olsem ol mesin, oli fri blong mekem prapa jus blong olgeta long sem fasin olsem ol man. Samting ya i minim se olgeta tu oli save jusum blong mekem samting we i stret no samting we i rong. ?Bambae ol enjel oli jusum blong mekem rong samting? Sam bambae oli sapraes blong lanem se, plante taosen yia bifo, bigfala namba blong ol enjel oli mekem sin agens long God—oli rebel agensem hem.—Jud 6.

Ol Rebel Long Heven

Sin i kamaot long ples blong ol spirit man from wan enjel we i rebel, nao hem i karem nem ya Setan (man blong agens) mo Devel (man blong spolem nem blong narafala). Enjel ya, we bifo i gat fasin obei, hem wan i jusum blong mekem samting we i rong. Biaen, hem i pulum ol narafala spirit man blong kam nogud. Taswe, bifo we bigfala wota i ron long taem blong Noa, bigfala namba blong ol enjel oli joenem Setan blong rebel agensem God.—Jenesis 6:2, futnot; 2 Pita 2:4.

God i no sakemaot ol enjel ya we oli kam nogud, wantaem nomo oli kamaot long heven. Defren olgeta, hem i letem olgeta i fri blong wokbaot long heven—blong plante taosen yia—be i klia se long semtaem hem i blokem olgeta long sam samting.a Be nao kam kasem en blong taem we God i letem ol rabis spirit ya oli wokbaot long heven, hem i “sakemaot” olgeta long heven blong i finisim olgeta blong olwe. Wan voes we i kamaot long heven i talem se: “Nao from samting ya, yu heven, mo yufala evriwan we i stap long heven, yufala i mas harem gud.” (Revelesen 12:7-12) !I klia se ol enjel we oli stap tru long God oli harem gud bigwan, from we naoia heven i no moa gat ol rabis enjel ya blong mekem trabol!

Taem yumi tingbaot ol samting ya we plante man oli no save long hem, i klia nomo se i no save gat trufala pis, enitaem we ol man oli sakemaot ol loa mo ol rul blong hem. (Aesea 57:20, 21; Jeremaea 14:19, 20) Be long narasaed, taem olgeta evriwan oli obei long ol loa blong God, pis mo kwaet fasin i save stap. (Ol Sam 119:165; Aesea 48:17, 18) Taswe, ?sipos olgeta man oli obei long God mo oli laeklaekem olgeta, bambae wol ya i kam wan ples blong harem gud? !Baebol i ansa se yes!

?Be olsem wanem long ol man we oli tingbaot olgeta nomo mekem se oli no wantem jenisim ol rabis fasin blong olgeta? ?Bambae oli gohed blong spolem pis blong olgeta ya we oli rili wantem mekem ol samting we God i wantem? Nogat. God i bin mekem wan samting long ol rabis enjel long heven, mo bambae hem i mekem sem mak tu long ol rabis man long wol ya.

Wan Wol We i No Moa Doti Long Ol Rabis Fasin

God i talem se: “Heven i olsem bigfala jea blong mi, we mi mi King, mi sidaon long hem blong rul, mo wol i olsem ples blong mi, blong mi putum leg blong mi antap long hem.” (Aesea 66:1) God hem i stamba blong fasin tabu, taswe hem i no save letem we ol man oli mekem ‘ples blong leg blong hem’ i doti blong olwe wetem ol rabis fasin. (Aesea 6:1-3; Revelesen 4:8) Ol vas blong Baebol, we oli kam biaen, oli soem se bambae God i karemaot ol rabis man long wol, olsem we hem i bin klinim heven blong i no moa gat ol rabis spirit long hem:

“Olgeta we oli trastem Hae God bambae oli tekem graon ya i blong olgeta, be ol man nogud, Hae God bambae i ronemaot olgeta.”—Ol Sam 37:9.

“Ol stret man bambae oli stap long wol, mo ol man we i no gat poen long olgeta, bambae oli stap. Be ol rabis man, God bambae i tekemaot olgeta long wol. Mo ol man blong tanem baksaed, bambae hem i pulumaot olgeta long wol.”—Ol Proveb 2:21, 22, NW.

“Be long olgeta ya we oli stap mekem yufala i harem nogud, i stret nomo blong God i givimbak fasin ya long olgeta. Mo i stret nomo blong God i givim spel long yufala, we naoia yufala i stap harem nogud, mo long mitrifala tu. Hem bambae i mekem olsem long taem ya we Jisas, Masta blong yumi, bambae i aot long heven, i kamtru long yumi, wetem ol strong enjel blong hem, mo faea we i laet. Hem bambae i kam blong givim panis long olgeta we oli no save ona long God, mo long olgeta we oli no save obei long gud nius blong Jisas, Masta blong yumi. Panis we olgeta bambae oli kasem long Dei ya, bambae i no save finis samtaem. Masta blong yumi bambae i putumaot olgeta, nao bambae oli no save kam klosap long hem, oli no save kasem bigfala paoa blong hem we i blong heven.”—2 Tesalonaeka 1:6-9.

“Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.”—1 Jon 2:17.

?Bambae Pis i Stap Oltaem Long Wol?

?Nating se ol vas blong Baebol oli soem se ol rabis fasin we God i letem oli stap, bambae oli gat en blong olgeta, olsem wanem yumi save sua se ol rabis fasin ya bambae oli no moa save kamaot bakegen? Tingbaot se, afta long bigfala wota we i ron long taem blong Noa, rabis fasin i kam antap bakegen go kasem mak ya we God i mekem lanwis blong ol man i fasfas blong spolem ol rabis plan blong olgeta.—Jenesis 11:1-8.

Bigfala risen blong yumi trastem se rabis fasin i no moa save kamaot bakegen, hemia se ol man bambae oli no moa rulum wol ya olsem we oli bin mekem afta long Bigfala Wota. Defren olgeta, Kingdom blong God bambae i rulum wol. Kingdom ya nao, we i stap rul long heven, bambae hem i olsem wan gavman nomo blong fulwol. (Daniel 2:44; 7:13, 14) Bambae hem i kwik blong spolem eni man we i stat blong mekem rabis fasin. (Aesea 65:20) Tru ya, i no longtaem bambae hem i spolem man ya we i stamba blong ol rabis fasin—Devel Setan—wetem ol rabis spirit, ol rabis enjel ya we oli folem hem.—Rom 16:20.

Antap long hemia bambae ol man oli no moa trabol from klos, haos, mo wok—hemia ol samting we tede plante man oli sot long hem, mekem se oli joen long ol fasin blong brekem loa. Yes bambae ful wol i kam wan nambawan paradaes we i gat fulap samting blong evriwan.—Aesea 65:21-23; Luk 23:43.

Samting we i moa impoten se, Kingdom bambae i tijim ol man we oli stap aninit long hem blong oli lanem fasin blong laef long pis. Long semtaem bambae hem i mekem oli kam stretgud olgeta. (Jon 17:3; Rom 8:21) Biaen bambae ol man oli no moa nidim blong faet agensem ol slak fasin mo sin we i stap pulum olgeta. Long rod ya, bambae ol man oli save obei long God long fasin we i stretgud olgeta mo we i givim glad, olsem stret man ya Jisas i bin mekem. (Aesea 11:3) Tru tumas, Jisas i bin fasgud long God nating we hem i fesem bigfala traem mo oli kilim hem—be ol samting ya bambae oli no moa hapen long laef long Paradaes.—Hibrus 7:26.

From Wanem Samfala Oli Go Long Heven

Plante man we oli ridim Baebol oli savegud ol tok blong Jisas se: “Long haos blong Papa blong mi, i gat plante rum i stap. . . . Bambae mi mi go mekemrere ples blong yufala.” (Jon 14:2, 3) ?Be olsem wanem nao? ?Ol tok ya blong Jisas oli no agensem hop blong laef we i no save finis long wol we bambae i kam paradaes?

Ol tijing ya oli no agensem olgeta. I tru se, wan i sapotem narawan. Fastaem i gud blong save se Baebol i tokbaot wan smol namba nomo blong ol trufala Kristin—hemia 144,000 evriwan—we bambae oli kasem bodi olsem ol spirit man blong laef long heven. ?From wanem oli kasem nambawan presen ya? From we oli haf blong grup ya we Jon i luk long wan vison se “oli laef bakegen, oli joen wetem Kraes, we hem i King, nao oli rul wetem hem, gogo wan taosen yia i pas.” (Revelesen 14:1, 3; 20:4-6) I tru se ol 144,000 oli rili wan “smol kampani” nomo skelem wetem olgeta bilian man long wol. (Luk 12:32, NW) Mo tu, oli pastru finis long ol hadtaem we man i stap kasem tede, taswe, olsem Jisas, oli “savegud we yumi no gat paoa, nao [“bambae oli,” NW] gat sore long yumi,” taem oli lukaot long wok ya blong mekem ol man mo wol ya i kam gud bakegen.—Hibrus 4:15.

Wol—Ples Blong Man Blong Olwe

God i stat blong hivimap olgeta 144,000 klosap 2,000 yia bifo finis tru long ransom sakrefaes blong Jisas Kraes. Mo naoia i klia se namba blong grup ya i fulwan finis. (Ol Wok 2:1-4; Galesia 4:4-7) Be sakrefaes blong Jisas i no blong olgeta 144,000 nomo, be i “blong olgeta man long wol” tu. (1 Jon 2:2) Taswe, olgeta we oli soem se oli bilif long Jisas oli gat jans blong kasem laef we i no save finis. (Jon 3:16) Olgeta we oli stap slip long beregraon, God i tingbaot olgeta mo bambae hem i mekem olgeta oli laef bakegen, i no blong go long heven, be blong laef long wan wol we i kam klin. (Prija 9:5; Jon 11:11-13, 25; Ol Wok 24:15) ?Wanem samting i stap we bambae oli save kasem?

Revelesen 21:1-4 i ansa se: “!Yu luk! Naoia God i mekem ples blong hem wetem ol man. . . . Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” Tingbaot—!ol man bambae oli fri long ded, mo ol soasore mo krae from man we i ded bambae oli finis blong olwe! Yes, bambae tingting we Jeova i gat fastaem long saed blong wol ya mo olgeta man, i kamtru fulwan long wan fasin we i nambawan tumas.—Jenesis 1:27, 28.

Jus Blong Yumi—Laef No Ded

God i neva letem Adam mo Iv oli jusum blong go long heven. Tufala i save jus blong obei long God mo kasem laef olwe long wan paradaes wol, no tufala i save jusum blong no obei long hem mo kasem ded. Sore tumas we tufala i jusum blong no obei, from samting ya tufala i gobak long “graon” olsem we God i bin talem long tufala. (Jenesis 2:16, 17; 3:2-5, 19) God i neva gat tingting ya se bambae ol man oli mas ded, go long beregraon mo biaen fulumap heven. God i wokem plante milian milian enjel blong oli laef long heven, ol spirit man ya oli no ol man long wol we oli ded mo laef bakegen blong go long heven.—Ol Sam 104:1, 4; Daniel 7:10.

?Yumi mas mekem wanem blong kasem blesing ya blong laef foreva long paradaes long wol? Faswan mak hemia blong stadi long Tok blong God, Tabu Baebol. Jisas i talem long prea se: “Hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes, we yu yu sanem mi mi kam.”—Jon 17:3, NW.

Narafala mak blong harem gud blong olwe long paradaes, hemia blong mekem ol save ya oli wok long laef blong yumi. (Jemes 1:22-24) Olgeta we oli folem tok blong God long laef blong olgeta, oli gat jans blong luk wetem prapa ae blong olgeta ol nambawan profet tok olsem hemia we i stap long Aesea 11:9 i kamtru, we i talem se: “Long Saeon ya, tabu hil blong Hae God, bambae i no moa gat we man i save mekem i nogud long narafala man, mo i no moa gat wan samting we i save spolem man. Kantri ya bambae i fulap gud long ol man we oli savegud Hae God, olsem we solwota i fulap gud long ples blong hem.”

[Futnot]

[Tok blong pija long pej 7]

“Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:29