Ripot Long Wok Blong Kingdom
Hem i Kasem Ol Samting We Hem i Nidim Long Saed Blong Spirit
SAEPRAS i wan aelan we i stap long not is blong Mediterenian Si. Long taem blong Baebol, Saepras i wan ples we i gat fulap bras mo ol nambawan timba. Pol mo Banabas, tufala i talemaot gud nius blong Kingdom long ples ya long faswan misinari trep blong tufala. (Ol Wok 13:4-12) Tede, gud nius i stap gohed yet blong gat paoa long laef blong ol man Saepras. Samting ya i tru long saed blong Lucas, wan man we i gat 40 yia. Hem i talem se:
“Mi bon long wan famle we i gat seven pikinini, mo mifala i laef long wan fam blong buluk. Taem mi mi pikinini yet, mi laekem tumas blong ridim buk. Buk we mi laekem tumas, hemia wan smol Kristin Grik haf blong Baebol. Taem mi gat ten yia, mi wetem sam fren, mifala i stanemap wan smol grup blong stadi Baebol. Be smol grup blong mifala i no gohed longtaem, from we sam olfala man long vilej oli kolem mifala se, ol man we oli lego bilif blong jos.
“Biaen, taem mi go skul long Yunaeted Stet, mi mitim ol man blong plante defren jos. Samting ya i pulum intres blong mi bakegen long ol samting long saed blong spirit. Mi spenem plante dei long laebri blong yunivesiti, blong faenemaot moa long saed blong ol narafala skul. Mi traehad, mi go visitim sam jos, be mi no kasem yet ol samting we mi wantem long saed blong spirit.
“Afta we mi finisim skul blong mi, mi kambak long Saepras mo mi wok olsem daerekta blong wan ples blong stadi long meresin. Wan Witnes blong Jeova, Antonis, we i wan elda, i stap visitim mi long ples blong wok. Be ol Grik Otodoks oli savegud se hem i stap kam visitim mi.
“Smoltaem biaen, wan tija blong ol skul i kam luk mi mo i blokem mi blong no toktok wetem ol Witnes blong Jeova. Taem mi pikinini, oli tijim mi se Jos blong Grik Otodoks i holem trutok. From samting ya, mi folem wanem we tija ya i talem, mo mi no moa storian wetem Antonis long saed Baebol. Nao mi stat tokbaot Baebol wetem tija ya blong jos. Mo tu, mi visitim plante ples blong wosip long Saepras. Mi go tu long not blong Gris mo mi visitim Hil Athos. Long tingting blong ol Otodoks we oli talem se oli Kristin, hil ya i tabu tumas. Nating se i olsem, mi no kasem ansa blong ol kwestin we mi gat long saed blong Baebol.
“Ale, mi prea long God blong i halpem mi blong faenem trutok. I no longtaem biaen, Antonis i kam visitim mi bakegen long ples blong wok, mo mi luksave se hemia ansa blong prea blong mi. Taswe mi no moa storian wetem tija ya blong jos, mo mi stat stadi Baebol wetem Antonis. Mi gohedgud long stadi blong mi, mo long Oktoba 1997, mi baptaes long wota blong soemaot se mi givim laef blong mi finis long Jeova.
“Fastaem, waef mo tufala gel blong mitufala, wan we i gat 14 yia mo narawan we i gat 10 yia long taem ya, oli agensem mi. Be from gudfala fasin blong mi, waef blong mi i mekem disisen blong kam long wan miting long Haos Kingdom. Hem i sapraes tumas long kaen fasin mo lav we ol Witnes oli soem long hem. Antap long hemia, hem i sapraes blong luk olsem wanem oli yusum gud Baebol. Gudfala frut i kamaot. Waef blong mi mo tufala bigfala gel blong mi, oli glad blong stadi Baebol wetem ol Witnes blong Jeova. !Mi mi glad bigwan taem trifala i tekem baptaes long asembli ya “Profet Tok We i Kamaot Long God” long 1999!
“Yes, mi faenem trutok we mi stap lukaot. Naoia famle blong mi, hemia waef mo fofala pikinini blong mitufala, mifala evriwan i stap joen tugeta long klin wosip blong Jeova.”