Lukaot Long Ol Pikinini We Oli No Gat Papa Mama Mo Ol Wido Taem Oli Kasem Trabol

I no hadwok blong luksave se yumi stap laef long wan wol we i no gat lav. Taem aposol Pol i stap tokbaot ol man we oli laef long ol ‘lasdei,’ hem i talem se: “Laef long wol ya bambae i kam strong tumas. Bambae ol man oli save tingbaot olgeta nomo, . . . bambae oli no man blong gat sore long man.” (2 Timoti 3:1-3) !Ol tok ya oli tru nomo!

OL FASIN nogud long taem blong yumi oli mekem se plante man oli no gat sore long narafala. Ol man oli no moa tingbaot ol nid blong narafala. Samtaem, oli no moa tingbaot ol samting we prapa famle blong olgeta i nidim.

Samting ya i rili spolem laef blong plante man we ol defren hadtaem oli mekem se oli trabol bigwan. I gat ol faet, ol disasta, mo ol man we oli ronwe long ples blong olgeta blong go haed long narafala kantri. Ol trabol ya oli mekem se i gat fulap pikinini we oli no gat papa mama mo plante wido. (Prija 3:19) United Nations Children’s Fund i talem se: “Faet i mekem se bitim 1 milian [pikinini] oli no gat papa mama, no oli seraot long famle blong olgeta.” Mo i gat fulap mama we oli no mared, man blong olgeta i lego olgeta, mo oli divos. Olgeta ya oli stap traehad tumas blong lukaot long famle blong olgeta. Long sam kantri, trabol ya i kam mowas, from we i hadwok tumas blong winim mane. Samting ya i mekem se plante man oli pua we oli pua.

?Olsem wanem? ?Olgeta we oli stap harem nogud long ol trabol ya bambae oli haremgud? ?Olsem wanem blong givhan long ol wido mo ol pikinini we oli no gat papa mama? ?Wan dei bambae problem ya i finis?

Kea Long Narafala Wetem Lav Long Taem Blong Baebol

Longtaem i kam, ol man blong God oli givim ol samting we ol wido mo ol pikinini we oli no gat papa mama oli nidim long saed blong bodi mo spirit. Fasin ya i impoten tumas long wosip blong God. Taem ol man Isrel oli pikimap ol wit no ol frut, oli no mas pikimap olgeta we oli folfoldaon long garen. Ol wit mo frut ya we oli folfoldaon, oli “mas livim i stap, i blong ol strenja, wetem ol pikinini we papa blong olgeta i ded, mo ol wido.” (Dutronome 24:19-21) Loa blong Moses i talem klia se: “Bambae yufala i no mas spolem ol widowoman mo ol pikinini we papa blong olgeta i ded.” (Eksodas 22:22, 23) Ol wido mo ol pikinini we oli no gat papa, we Baebol i tokbaot, i minim olgeta we oli pua, from we taem hasban mo papa no mama tu i ded, maet ol memba blong famle oli stap olgeta nomo mo oli trabol. Man ya Job we i laef longtaem bifo i talem se: “Taem ol puaman oli stap krae blong man i givhan long olgeta, mi mi stap halpem olgeta, mo mi stap givhan long ol pikinini we papa blong olgeta i ded, mo we oli no gat man blong lukaot long olgeta.”—Job 29:12.

Taem Kristin kongregesen i jes stanap, fasin ya blong kea long nid blong olgeta we oli trabol i wan impoten haf blong trufala wosip. Olgeta ya, i gat ol pikinini we oli lusum papa mama blong olgeta mo ol woman we oli lusum man blong olgeta. Disaepol Jemes i tingbaot nid blong olgeta ya. Hem i raetem se: “God i Papa blong yumi, mo prapa fasin blong ona long hem, we hem i luk se i klin gud mo i stret gud i olsem. Man i mas givhan long ol pikinini we oli no gat papa [mama] blong olgeta, mo long ol widowoman, long ol trabol we i kasem olgeta. Mo hem i mas lukaot gud long laef blong hem, blong i stap klin oltaem, we bambae ol rabis fasin blong wol i no spolem hem.”—Jemes 1:27.

Jemes i tokbaot ol pikinini we oli no gat papa mama mo ol wido, be tu hem i soem se hem i wari bigwan long nid blong olgeta we oli pua mo we oli trabol bigwan. (Jemes 2:5, 6, 15, 16) Aposol Pol i tingbaot ol wido mo ol pikinini we oli no gat papa mama. Taem oli sanem hem mo Banabas i go prij long wan ples, oli givim oda long tufala se tufala i mas “tingbaot ol puaman.” Pol i talem stret se: “Hemia, mi mi luk finis olsem wan wok blong mi.” (Galesia 2:9, 10) Smoltaem afta we Kristin kongregesen i stanap, Baebol i tokbaot ol wok we hem i mekem se: “I no gat wan man long grup blong olgeta we i sot long sam samting . . . Nao biaen, ol aposol oli stap seraot ol mane ya long ol man ya we oli bilif long Jisas, we oli sot long sam samting.” (Ol Wok 4:34, 35) Yes, ol man Isrel bifo oli kea long ol pikinini we oli no gat papa mama, ol wido, mo olgeta we oli trabol. Mo fasin ya i stap tu insaed long Kristin kongregesen.

I tru, help we ol wanwan kongregesen oli givim i no mas bitim mak mo i mas stret wetem wanem we ol wanwan kongregesen ya oli gat. Ol kongregesen ya oli no spenem mane olbaot, mo oli givhan long olgeta we oli rili trabol tru. Wan Kristin i no yusum plan ya blong kasem ol samting blong hem nomo. Mo plan ya i no mekem baden long kongregesen. Samting ya i klia long tijing we Pol i givim long 1 Timoti 5:3-16. Ol vas ya, oli soem se sipos hemia we i trabol i gat sam famle we oli naf blong halpem hem, ol famle ya nao oli mas givim ol samting we hem i nidim. I gat rod blong makemaot ol wido we oli rili nidim help. Ol samting ya oli soem waes rod we Jeova i stap folem blong halpem olgeta we oli trabol. Be tu, fasin ya i soem se i impoten blong skelem gud ol samting blong bambae i no gat wan man i ting nating long kaen fasin we ol kongregesen oli soemaot.—2 Tesalonaeka 3:10-12.

Kea Long Ol Pikinini We Oli No Gat Papa Mama Mo Ol Wido Tede

Ol rul we ol man blong God oli folem bifo oli stret yet long ol Witnes blong Jeova tede. Yes, ol Witnes oli mas tingbaot mo givhan long olgeta we oli trabol bigwan. Fasin blong lavem ol brata sista i makemaot yumi. Jisas i talem se: “From we yufala i stap lavlavem yufala, bambae olgeta man oli luksave se yufala i man blong mi.” (Jon 13:35) Sipos samfala oli safa from disasta, faet, no fasin agens, ol brata sista raonabaot long wol oli gat strong tingting blong lukaot rod blong givhan long olgeta long saed blong spirit mo bodi. I gud yumi luk sam stori long taem blong yumi we i soem olsem wanem ol brata sista oli bin givhan long olgeta we oli trabol.

Pedro i no rimemba plante samting long saed blong mama blong hem we i ded taem hem i gat wan yia haf nomo. Taem Pedro i gat faef yia, papa blong hem tu i ded. Taswe, Pedro i stap nomo wetem ol brata blong hem. Ol Witnes blong Jeova oli bin stap visitim papa blong hem. Taswe, Pedro wetem ol fasbon brata blong hem oli stat blong stadi Baebol.

Pedro i talem se: “Long wik we i kam biaen, mifala i stat go long ol miting. Taem mifala i joen wetem ol brata sista, mifala i haremsave lav ya we oli soemaot long mifala. Kongregesen i wan sefples blong mi from we ol brata sista oli soem lav mo filing long mi. Oli kam olsem papa mo mama blong mi stret.” Pedro i talem se wan long ol Kristin elda i singaot hem i go long haos. Long ples ya, Pedro i joen wetem famle blong storian mo spel. Hem i talem se: “Hemia ol samting we mi no save fogetem.” Hem i stat blong talemaot bilif blong hem taem hem i gat 11 yia mo hem i baptaes taem hem i gat 15 yia. Ol brata blong hem tu oli gohedgud long saed blong bilif. Ol brata sista long kongregesen oli givhan bigwan long olgeta.

Tingbaot stori blong David. Hem wetem sista blong hem, tufala i twin. Papa mama blong tufala i seraot mo i lego tufala. Ale olfala bubu mo wan anti blong tufala i lukaot long tufala. “Taem mitufala i stat blong luksave trabol blong mitufala, mitufala i fraet mo mitufala i sore. Mitufala i nidim wan samting blong halpem mitufala. Anti blong mi i kam wan Witnes blong Jeova, mo from samting ya, mitufala i lanem trutok blong Baebol. Ol brata sista oli soem filing long mitufala mo oli frengud wetem mitufala. Oli lavem mitufala tumas mo oli leftemap tingting blong mitufala blong kasem sam mak mo gohed blong wokbaot wetem Jeova. Taem mi gat ten yia, wan man blong givhan i stap pikimap mi blong go long wok blong prij. Wan brata i pem rod blong mi blong go long ol asembli. Mo wan narafala brata i givhan long mi blong mi save putum presen mane long Haos Kingdom.”

David i baptaes taem hem i gat 17 yia, mo biaen hem i wok long branj ofis blong ol Witnes blong Jeova long Meksiko. Naoia tu, hem i talem se: “Sam elda oli givim tijing long mi mo oli givim ol gudfala advaes. Long rod ya, mi winim ol filing ya blong fraet mo se mi stap mi wan.”

Abel, wan elda long wan kongregesen long Meksiko we i gat sam wido we oli trabol, i talem se: “Mi bilif se faswan help we ol wido oli nidim, hemia blong halpem olgeta taem oli trabol long filing. Samtaem, tingting blong olgeta i foldaon; oli gat filing ya se oli no gat fren. From samting ya, i impoten tumas blong givhan mo lesin long olgeta. Mifala [ol elda blong kongregesen] i visitim olgeta plante taem. I gud we yumi tekem taem blong lesin long ol problem blong olgeta. Samting ya i mekem se oli haremgud long saed blong spirit.” Be tu, samtaem i nidim blong givhan long olgeta long saed blong mane. Abel i gohed i se: “Naoia mifala i stap bildim wan haos blong wan sista we i wan wido. Long sam Sarede mo sam aftenun long dei blong wik mifala i kam wokem haos blong hem.”

Wan narafala elda i bin givhan bigwan long ol wido mo ol pikinini we oli no gat papa mama. Elda ya i talem se: “Mi bilif se ol pikinini we oli no gat papa mama oli nidim moa we narafala i soem Kristin lav long olgeta i bitim ol wido. Mi kasem save se ol pikinini olsem oli filim se narafala i no laekem olgeta i bitim ol pikinini mo ol yangfala we oli gat ol papa mama. Oli nidim we ol brata oli soem lav long olgeta. I gud blong lukaot long olgeta afta long miting blong save se oli olsem wanem. I gat wan mared brata we hem i bin lusum papa mama blong hem taem hem i pikinini nomo. Oltaem, wetem kaen fasin, mi talem halo long hem long ol miting, mo hem i putum han blong hem i goraon long mi taem hem i luk mi. Samting ya i mekem se lav we i stap bitwin ol brata i kam strong moa.”

Jeova “Bambae i Stap Sevem Ol Puaman”

I impoten tumas blong trastem Jeova taem yumi stap kea long ol wido mo ol pikinini we oli no gat papa mama. Baebol i tokbaot Jeova i se: “Hem i stap lukaot gud long ol strenja we oli stap long ples blong yumi, mo i stap givhan long ol wido, mo ol pikinini we papa blong olgeta i ded.” (Ol Sam 146:9) Kingdom blong God we Jisas Kraes i rulum, hemia nomo i rod blong winim olgeta problem. Man blong raetem Ol Sam i tokbaot rul blong Mesaea, i se: “Hem bambae i stap sevem ol puaman we oli stap singaot i go long hem, mo bambae i stap givhan long olgeta we oli sot long ol samting, mo i no gat man blong lukaot long olgeta. Hem bambae i gat sore long ol puaman, mo long olgeta we oli no strong, mo i stap sevem laef blong olgeta we oli sot long ol samting.”—Ol Sam 72:12, 13.

Taem en blong wol ya i stap kam moa klosap, olgeta Kristin oli fesem moa hadtaem. (Matiu 24:9-13) Evri dei, i gud we yumi ol Kristin, yumi soem moa se yumi tingbaot ol narafala mo yumi ‘lavlavem yumi.’ (1 Pita 4:7-10) Ol Kristin man, antap moa, ol elda, oli mas soem se oli tingbaot mo oli sore long ol pikinini we oli no gat papa mama. Mo ol woman long kongregesen we oli strong long bilif oli mas givhan long ol wido mo leftemap tingting blong olgeta. (Taetas 2:3-5) Yes, yumi evriwan i save joen blong givhan long olgeta we oli trabol.

Ol trufala Kristin ‘oli givhan’ taem oli ‘luk wan Kristin brata no sista blong olgeta i sot long sam samting.’ Oltaem oli lukaot gud blong folem advaes ya blong aposol Jon se: “Ol pikinini blong mi. I nogud yumi lavem man long toktok blong yumi nomo. Yumi mas mekem samting blong givhan long hem, blong soemaot we yumi lavem hem tru.” (1 Jon 3:17, 18) Ale i gud yumi “givhan long ol pikinini we oli no gat papa [mama] blong olgeta, mo long ol widowoman, long ol trabol we oli kasem olgeta.”—Jemes 1:27.

[Tok blong makem poen long pej 11]

“I nogud yumi lavem man long toktok blong yumi nomo. Yumi mas mekem samting blong givhan long hem, blong soemaot we yumi lavem hem tru.”—1 Jon 3:18

[Tok blong pija long pej 10]

Ol trufala Kristin oli lukaot long ol pikinini we oli no gat papa mama mo ol wido long saed blong bodi, spirit, mo filing