?Hu Bambae i Tekemaot Yumi Long God We i Lavem Yumi?
“Yumi stap lavem God mo ol narafala man, from we God i lavem yumi fastaem.”—1 JON 4:19.
1, 2. (a) ?From wanem i impoten long yumi blong save se narafala i laekem yumi? (b) ?Lav blong hu we yumi nidim moa?
?YU YU ting se i impoten blong save we narafala i laekem yu? Yumi evriwan i nidim lav. Stat long taem we yumi smol, go kasem taem we yumi kam bigman, lav nao i givhan long yumi blong grugud. ?Yu yu luk finis wan bebi we mama blong hem i holem i stap klosap long hem? Hem i stap lukluk fes blong mama blong hem we i stap smael long hem, nao tingting blong hem i kwaet. Nomata wanem samting i stap gohed raonabaot long smol bebi ya, be hem i harem se i stap sefgud long han blong mama blong hem we i lavem hem. Mo tu, ?yu yu tingbaot yangtaem blong yu yet, taem we yu bin gotru long plante strong traem? (1 Tesalonaeka 2:7) !Sam samtaem, ating tingting blong yu i fasfas, yu no bin save wanem samting yu wantem mo yu no kasem save long filing blong yu tu! Be long taem ya, i impoten tumas long yu blong save se papa mama blong yu i lavem yu. Ating yu bin glad blong save se tufala i stap oltaem blong lesin long ol problem mo kwestin blong yu. Tru ya, long ful laef blong yumi, samting we yumi nidim moa, hemia lav. Lav olsem i mekem yumi harem se yumi impoten.
2 Taem papa mama blong yumi oli soemaot oltaem se oli lavem yumi, oli givhan bigwan long yumi blong gruap gud mo wetem tingting we i stret. Be blong harem gud long saed blong spirit mo filing, samting we i impoten moa i blong sua fulwan se Papa blong yumi long heven, hemia Jeova, i lavem yumi. Sam long yumi we oli ridim magasin ya, maet oli no gruap wetem ol papa mama we oli rili kea long olgeta. Sipos yu yu wan long olgeta ya, yu no mas letem tingting blong yu i foldaon. Nating sipos papa mama i no bin soem lav long yu nating no oli no givim naf lav long yu, be trufala lav blong God bambae i fulumap nid blong yu.
3. ?Olsem wanem Jeova i mekem ol man blong hem oli sua se hem i lavem olgeta?
3 Jeova i yusum profet Aesea blong talemaot se maet wan mama i save “fogetem” bebi blong hem, be Hem i no save fogetem ol man blong hem. (Aesea 49:15) Long sem fasin, Deved i sua fulwan taem hem i talem se: “Papa mo mama blong mi, maet tufala i save lego mi, be yu [Jeova], oltaem nomo bambae yu stap lukaot gud long mi.” (Ol Sam 27:10) !Tok ya i mekem yumi harem gud tumas! !Nomata wanem samting i kamaot long laef blong yumi, be sipos yumi givim laef blong yumi i go long Jeova God finis, yumi mas tingbaot oltaem se lav we hem i gat long yumi i bitim lav we eni man i save gat long yumi!
Save Oltaem Se God i Lavem Yu
4. ?Wanem samting i mekem ol Kristin long faswan handred yia oli suagud long lav blong God?
4 ?Yu yu save tingting bak long taem ya we yu jes stat blong save se Jeova i lavem yu? Ating long taem ya yu harem i sem mak olsem ol Kristin blong faswan handred yia. Long japta 5 blong leta we Pol i raetem long ol man Rom, hem i eksplenem gud olsem wanem ol sinman, we fastaem oli stap longwe long God, oli stat blong save se Jeova i lavem olgeta. Long vas 5, hem i talem se: “Tabu Spirit ya we hem i givim finis long yumi, hem i stap mekem yumi save samting ya long hat blong yumi.” Mo long vas 8, Pol i gohed se: “God i lavem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet.”
5. ?Olsem wanem yu bin kasem save mo gat tangkiu long bigfala lav we God i soemaot?
5 Long sem fasin, taem yu harem trutok blong Baebol fastaem, mo yu stat soem bilif long hem, tabu spirit blong Jeova i stat wok long hat blong yu. Nao, yu stat blong kasem save mo gat tangkiu long bigbigfala samting we Jeova i mekem taem hem i sanem gudfala Pikinini blong hem i kam blong i ded blong sevem yu. Yes, Jeova i halpem yu blong luksave olsem wanem hem i lavem ol man tumas. ?Yu bin harem olsem wanem taem yu luksave se, Jeova i wokem rod blong bambae yu save kam stret man long fes blong Hem mo blong yu save gat laef olwe, nating se taem yu bon yu wan sinman finis mo yu stap longwe long God? ?Yu yu glad? ?Save ya i mekem yu yu harem se yu laekem Jeova?—Rom 5 :10.
6. ?From wanem yumi harem samtaem se Jeova i stap farawe long yumi?
6 Lav we Papa blong yu long heven i soemaot long yu i pulum yu i kam long hem, mo i pulum yu blong jenisim laef blong yu blong mekem i stret wetem wanem we hem i wantem. Ale, yu givim laef blong yu i go long God. Naoia yu glad tumas blong gat pis wetem God. ?Be, sam samtaem yu harem olsem se Jeova i stap farawe long yu? Samting ya i save hapen long yumi evriwan. Be tingbaot oltaem se God i neva save jenis. Lav blong hem i stap oltaem, olsem we san i stap oltaem mo i neva stop blong sanem laet blong hem i kam long wol. (Malakae 3:6; Jemes 1:17) Defren olgeta, yumi ya, yumi save jenis—nating se i blong smoltaem nomo. Taem wol ya i stap tanraon, wan haf blong hem i stap long tudak. Long sem fasin, sipos yumi tanem baksaed long God, nating se yumi tanem smol nomo, be bambae yumi harem se fasin fren blong yumi wetem hem i kam kolkol smol. ?Yumi save mekem wanem blong stretem samting ya?
7. ?Olsem wanem fasin blong lukluk gud long laef blong yumi i save halpem yumi blong stap oltaem we God i lavem yumi?
7 Sipos yumi harem olsem se yumi stap gowe long God we i lavem yumi, yumi mas tingbaot se: ‘?Maet lav we God i gat long mi i wan samting we mi no bin tinghae long hem? ?Mi mi stap tanem baksaed blong mi sloslou long God ya we i laef mo i gat lav, mo mi stap soem long sam fasin blong mi se bilif blong mi i slak? ?Mi mi stap putum tingting blong mi i stap long ol ‘fasin we tingting blong mi nomo i wantem,’ i bitim ol ‘fasin we tabu spirit i wantem’?’ (Rom 8:5-8; Hibrus 3:12) Sipos yumi bin gowe lelebet long Jeova, yumi save stretem rod blong yumi mo frengud wetem hem bakegen. Jemes i pulum yumi se: “Yufala i mas stap klosap long God, nao hem bambae i kam stap klosap long yufala.” (Jemes 4:8) Yumi mas folem ol tok ya blong Jud, se: “Ol fren. Yufala i mas wok strong blong mekem bilif blong yufala i kam strong moa. Bilif ya i kamaot long God mo i klin gud. Mo oltaem yufala i mas prea long paoa blong Tabu Spirit. Yufala i mas stap long laef ya we oltaem yufala i save se God i stap lavem yufala.”—Jud 20, 21.
Laef i Stap Jenis Be Lav Blong God i No Jenis
8. ?Wanem ol jenis we oli save hapen wantaem nomo long laef blong yumi?
8 Plante samting i stap hapen long wol ya we i mekem se laef blong yumi i save jenis. King Solomon i talem se “samting we yumi no tingbaot, i save kamaot long yumi enitaem nomo.” (Prija 9:11, NW ) Maet wantaem nomo wan samting i save hapen we i jenisim laef blong yumi fulwan. Tede maet yumi gat gud helt, be tumora maet yumi sik bigwan. Tede yumi gat wan gudfala wok, be maet long nekis dei yumi lusum wok blong yumi. Long taem we yumi no tingbaot, maet wan famle no wan gudfala fren blong yumi i ded. Long wan kantri we i gat pis, maet wantaem nomo, ol man oli girap oli agensem ol Kristin bigwan. Maet sam man oli sakem giaman tok long yumi, ale, yumi harem nogud tumas from. Tru ya, laef blong yumi i neva stap sem mak oltaem, mo yumi no save stap sef fulwan.—Jemes 4:13-15.
9. ?From wanem i gud blong tingbaot Rom japta 8?
9 Taem sam nogud samting oli hapen long yumi, maet yumi harem se God i lego yumi, mo maet yumi stat tingting tu se God i no moa lavem yumi. From we ol samting olsem oli stap hapen long yumi evriwan, i gud we yumi tingtinggud long ol tok blong leftemap tingting, we aposol Pol i raetem long Rom japta 8. Hem i raetem ol tok ya i go long ol Kristin we tabu spirit i makemaot olgeta. Be, bigfala tingting we i stap long ol tok ya i stret long ol narafala sipsip tu. Olgeta ya tu oli olsem stret man long fes blong God, mo oli fren blong hem, olsem Ebraham we i laef bifo long taem blong ol Kristin.—Rom 4:20-22; Jemes 2:21-23.
10, 11. (a) ?Samtaem ol enemi oli agensem ol man blong God olsem wanem? (b) ?From wanem ol Kristin oli no wari long ol tok ya we man i sakem agensem olgeta?
10 Ridim Rom 8:31-34. Pol i talem se: “God i stap wetem yumi, mo i no gat man nating we i strong moa, we bambae i save agens long yumi.” Tru ya, Setan mo rabis wol blong hem oli stap agensem yumi. Maet sam enemi blong yumi oli talem ol giaman tok agensem yumi, mo maet oli talemaot ol giaman tok ya long kot tu. Sam man oli tok agensem ol Kristin papa mama se oli no laekem ol pikinini blong olgeta taem oli no letem dokta i givim blad long pikinini, from we fasin ya i agensem loa blong God. Maet oli tok agens tu from we ol papa mama oli no letem ol pikinini blong olgeta oli joen long ol hiten lafet. (Ol Wok 15:28, 29; 2 Korin 6:14-16) Samfala oli tok agensem ol Kristin we oli holemstrong long bilif blong olgeta, se oli stap rebel agensem gavman from we oli no wantem kilim man i ded long faet mo oli no wantem joen long politik. (Jon 17:16) Sam man we oli agensem yumi oli talemaot plante giaman stori long nius blong spolem nem blong yumi, mo oli talem tu se ol Witnes blong Jeova oli wan grup we i denja.
11 Be yu no mas fogetem se long taem blong ol aposol, ol man oli stap talem se: “Mifala i save we olbaot long evri ples, ol man oli stap tok nogud long grup ya.” (Ol Wok 28:22) ?Be, ol giaman tok ya we ol man oli sakem agensem ol Kristin, i rili impoten? No gat. God nao i stap mekem ol trufala Kristin oli kam stret man long fes blong hem, folem bilif we oli soem long sakrefaes blong Kraes. Jeova i givim finis wan nambawan presen long ol man blong hem, hemia stret Pikinini blong hem we hem i lavem tumas. ?Afta we hem i mekem samting ya, yu ting se hem i save stop blong lavem ol man blong hem samtaem? No gat. (1 Jon 4:10) Naoia we Kraes i laef bakegen long ded mo i stap sidaon long raetsaed blong God, hem i stap toktok long God oltaem from ol Kristin. ?Hu i gat raet blong agensem ol tok we Kraes i talem blong sapotem ol gudfala man blong hem? ?Hu i naf blong agensem tingting blong God blong laekem ol gudfala man blong hem? !I no gat wan man i save mekem olsem!—Aesea 50:8, 9; Hibrus 4:15, 16.
12, 13. (a) ?Wanem samting we i no save karemaot yumi long lav blong God? (b) ?From wanem Setan i givim hadtaem long yumi? (c) ?From wanem ol Kristin oli stap win?
12 Ridim Rom 8:35-37. Yumi wanwan i save gowe long Jeova. ?Be, i gat wan narafala man no wan narafala samting we i save karemaot yumi long lav we Jeova mo Pikinini blong hem, Jisas Kraes, tufala i gat long yumi? Setan i save yusum sam man long wol ya blong mekem fulap trabol long ol Kristin. Long handred yia we i pas, ol man oli bin mekem i nogud tumas long plante Kristin brata mo sista blong yumi olbaot long wol. Long sam ples, ol brata blong yumi oli fesem hadtaem long saed blong mane. Sam long olgeta oli harem nogud from we oli no gat naf kakae mo klos. ?From wanem Setan i stap givim hadtaem long ol Kristin ya? Wan risen hemia se, hem i wantem daonem trufala wosip blong Jeova. Setan i wantem pulum yumi blong bilif se God i no moa lavem yumi. ?Be olsem wanem? ?Samting ya i tru?
13 Yumi stadi long Tok blong God, olsem Pol we i talem bakegen ol tok blong Ol Sam 44:22. Yumi save se ol trabol we i stap kasem yumi, ol “sipsip” blong God, i blong leftemap nem blong God. God i wantem leftemap tabu nem blong hem mo i wantem pruvum se hae rul blong hem nomo i stret. From tufala impoten risen ya nao, God i letem ol traem oli kasem yumi, be i no from we hem i no moa lavem yumi. Nomata wanem trabol i kasem yumi, yumi save sua fulwan se, lav we God i gat long ol man blong hem, mo long yumi wanwan, i no save jenis. Maet wan hadtaem i mekem yumi safa mo i luk olsem se i winim yumi, be sipos yumi holemstrong long God bambae yumi win. Yumi kasem paoa mo yumi kam strong moa taem yumi sua fulwan se i no gat wan samting i save mekem we God i no moa lavem yumi.
14. ?From wanem Pol i sua fulwan se hadtaem we ol Kristin oli kasem, i no save karemaot lav we God i gat long olgeta?
14 Ridim Rom 8:38, 39. ?From wanem Pol i sua fulwan se i no gat wan samting i save karemaot lav we God i gat long ol Kristin? Ating ol hadtaem we Pol i fesem long wok blong prij oli mekem we hem i sua moa se, ol trabol we yumi kasem oli no save jenisim lav we God i gat long yumi. (2 Korin 11:23-27; Filipae 4:13) Mo tu, Pol i save stamba tingting we Jeova i gat long saed blong laef we i no save finis, mo hem i save tu olgeta wok we God i mekem finis long ol man blong hem. ?Ded i save tekemaot lav we God i gat long olgeta we oli bin stap tru long hem? !No gat! Ol man we oli holemstrong long bilif gogo oli ded, oli laef yet long tingting blong God we i stretgud olgeta, mo bambae hem i mekem olgeta oli laef bakegen long stret taem blong hem.—Luk 20:37, 38; 1 Korin 15:22-26.
15, 16. Talem sam samting we bambae oli neva stopem God blong lavem ol man blong hem we oli holem bilif.
15 Nomata wanem nogud samting i save hapen long laef blong yumi tede—maet wan aksiden we i mekem yumi handikap, wan sik we yumi mas ded from, no bigfala hadtaem long saed blong mane—be i no gat wan samting we i save karemaot lav we God i gat long ol man blong hem. Ol strongfala enjel olsem stronghed enjel ya we i kam Setan, oli no save blokem Jeova blong i no moa lavem ol gudfala man blong hem. (Job 2:3) Maet ol gavman oli putum tabu long wok blong God, no maet oli sakem ol man blong God long kalabus mo mekem i nogud long olgeta, no maet oli tingbaot yumi olsem “rabis nomo.” (1 Korin 4:13) Taem ol gavman oli no laekem yumi olsem, maet oli pulum plante man blong agensem yumi, be samting ya i no save pulum Haefala Rula blong heven mo wol blong lego yumi.
16 Yumi ol Kristin yumi no mas fraet long ol samting we Pol i talem se oli “stap finis,” hemia ol trabol mo ol samting we oli stap hapen long laef blong yumi mo long wol naoia. Mo yumi no mas fraet long “samting we bambae i kam” long fiuja tu. I no gat wan long ol samting ya we i save spolem lav we God i gat long ol man blong hem. Ol strong man blong wol ya mo ol rabis spirit man long heven oli mekem faet agensem yumi, be God i stap lavem yumi, mo samting ya i stap givim paoa long yumi. Olsem Pol i mekem i klia se, i no gat samting “antap mo i no gat samting daon” (NW ) we i save blokem lav blong God. Yes, ol samting we oli save mekem tingting blong yumi i foldaon, mo ol samting we maet oli leftemap yumi, be i no gat wan we i save pulumaot yumi long lav blong God. Mo i no gat wan samting we God i wokem we i save brekem fasin fren blong hem wetem ol man blong hem. Lav blong God bambae i no save finis samtaem; hem i blong olwe.—1 Korin 13:8.
Tinghae Olwe Long Lav Mo Kaen Fasin Blong God
17. (a) ?From wanem yumi wantem moa we God i lavem yumi i bitim we yumi “wantem stap laef”? (b) ?Olsem wanem yumi soemaot se yumi tinghae long lav mo kaen fasin we God i stap soem long yumi?
17 ?Yu yu tinghae long lav we God i stap soem long yu? ?Yu yu gat filing olsem Deved, we i raetem se: “Oltaem yu yu lavem mi, mo fasin ya, mi mi wantem moa, i winim we mi wantem stap laef. From samting ya, bambae mi presem yu. Bambae mi stap talem tangkiu long yu oltaem long laef blong mi. Bambae mi leftemap han blong mi, mi mekem prea long yu”? (Ol Sam 63:3, 4) ?Tru ya, i gat wan samting long wol ya we i moa gud i bitim lav blong God mo janis ya blong frengud wetem hem? Tingbaot: ?Wan wok we i givim bigfala mane long yumi, i moagud i winim pis long tingting mo glad we i kam taem yumi fren gud wetem God? (Luk 12:15) Sam Kristin oli mas mekem jus ya se bambae oli lego Jeova no bambae oli ded. Hemia i disisen we plante Witnes blong Jeova oli bin fesem taem oli stap long ol rabis kalabus blong Nasi long Seken Wol Wo. Smol nomo oli jus blong lego, bighaf blong ol Kristin brata ya blong yumi oli jus blong stap olsem man we God i lavem olgeta, hemia i min se oli rere blong ded from bilif blong olgeta. Olgeta we oli stap tru long God mo oli gohed blong stap olsem man we hem i lavem olgeta, oli suagud blong kasem laef blong olwe we God bambae i givim, hemia wan samting we wol ya i no save givim long yumi. (Mak 8:34-36) Be ol man blong God oli no stanap strong jes blong kasem laef blong olwe.
18. ?From wanem laef blong olwe bambae i gud tumas?
18 I tru se yumi no save laef olwe sipos i no gat Jeova. Be traem tingbaot se wan longfala laef olsem, bambae i olsem wanem sipos i no gat God. Laef olsem bambae i blong nating nomo, i no save mekem man i harem gud. Long ol lasdei ya, Jeova i givim wan wok long ol man blong hem mo wok ya i mekem oli harem gud. Taswe yumi save sua se taem Jeova, Man ya we i mekem ol tingting blong hem oli kamtru, i givim laef olwe, bambae laef ya i fulap long ol samting we yumi intres long olgeta, ol gudfala samting we yumi save lanem mo mekem. (Prija 3:11) Nomata hamas samting yumi lanem long ol taosen yia we oli kam, bambae yumi neva kasem save fulwan long “ol gudgudfala fasin blong God, [wetem] waes mo save blong hem, [we] oli dip tumas.”—Rom 11:33, NW.
Papa i Lavem Yu Tumas
19. ?Wanem lastok we Jisas Kraes i talem long ol disaepol blong hem blong leftemap tingting blong olgeta?
19 Long Naesan 14, 33 K.T.,a Jisas i spenem laswan naet blong hem wetem ol 11 gudfala aposol blong hem. Hem i talem plante samting blong mekem oli strong blong fesem wanem we bambae i hapen. Olgeta ya oli bin stap wetem Jisas long ol hadtaem we hem i kasem, mo oli harem save stret, se hem i lavem olgeta. (Luk 22:28, 30; Jon 1:16; 13:1) Nao Jisas i leftemap tingting blong olgeta i se: “Papa blong mi, hem i lavem yufala tumas.” (Jon 16:27) !Ating ol tok ya oli halpem ol disaepol blong luksave se Papa blong olgeta long heven i kea bigwan long olgeta!
20. ?Wanem samting we yu yu gat strong tingting blong mekem, mo yu save suagud long wanem samting?
20 Plante long yumi we i laef tede, yumi bin holemstrong long wok blong Jeova plante yia finis. I sua se bambae yumi fesem plante traem yet, taem en blong rabis wol ya i kam klosap moa. Yu neva mas letem ol traem mo hadtaem ya oli mekem tingting blong yu i hafhaf long saed blong lav we God i gat long yu. I no gat tok we i naf blong makem tingting ya se: Jeova i lavem yu tumas. (Jemes 5:11) I gud we yumi evriwan i gohed blong mekem wok we God i askem long yumi, mo obei long ol tok blong hem. (Jon 15:8-10) I gud yumi yusum evri janis we yumi gat blong presem nem blong hem. Yumi mas mekem tingting blong yumi i strong moa blong kam klosap long Jeova tru long prea mo tru long stadi blong Baebol. Nomata wanem samting i hapen tumora, sipos yumi traem bes blong yumi blong mekem Jeova i glad, bambae yumi gat pis, mo yumi sua fulwan long lav blong God we neva i save lus.—2 Pita 3:14.
[Futnot]
a K.T. i minim Kristin Taem.
?Bambae Yu Yu Ansa Olsem Wanem?
• ?Blong harem gud long saed blong spirit mo filing, hu man we yumi nidim lav blong hem moa?
• ?Wanem ol samting we bambae oli neva save blokem Jeova blong lavem ol man blong hem?
• ?From wanem yumi wantem moa we Jeova i lavem yumi i bitim we yumi “wantem stap laef”?
[Tok blong pija long pej 13]
Sipos yumi harem se God i no moa lavem yumi, yumi mas mekem wan samting blong stretem tingting ya
[Tok blong pija long pej 15]
Pol i kasem save from wanem ol man oli stap agensem hem