?I Gat Wan Man We i Save Sevem Yumi?
Olgeta man long wol oli luk we blad i ron moa long ol yia 19 handred, i bitim long ol narafala yia bifo. Fasin blong brekem loa, wo, faet bitwin ol laen, ol drag, stil, mo raf fasin oli kam moa nogud long ol laswan yia. Antap long hemia, fasin blong kam olfala, sik, mo ded i mekem ol man oli harem nogud mo oli safa. ?Hu i no wantem tumas blong kam fri long ol bigbigfala problem we i stap long wol tede? ?Taem yumi lukluk i go long fiuja, i gat wan man we i save sevem yumi?
TINGTING gud long vison we aposol Jon i luk samwe 2,000 yia bifo. Hem i raetem se: “!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” (Revelesen 21:3, 4) Profet Aesea tu i bin talem wan profet tok we i klosap sem mak, i se: “Hae God i Masta blong yumi, mo long taem ya, hem bambae i mekem we ded bambae i go lus olgeta. Bambae hem i ravemaot wota blong ae blong yufala, mo bambae i tekemaot sem we yufala evriwan i stap kasem. Hem i Hae God, mo hemia tok blong hem.”—Aesea 25:8.
!Traem tingbaot laef blong yumi sipos ol promes blong God oli kamtru! Bambae ol man long wol oli save sef, no oli kam fri, long ol trabol mo raf fasin, mo long ol samting we i stap mekem oli safa mo wari. !Yes, ol sik, fasin blong kam olfala, mo ded tu, bambae oli no moa save spolem yumi! Tok blong God, Baebol, i promes se bambae ol man oli save gat laef we i no save finis long wan wol we i stret gud olgeta. (Luk 23:43; Jon 17:3) Mo olgeta we oli wantem, oli save kasem laef ya. “God ya, hem i wantem sevem olgeta man, mo i wantem we olgeta man bambae oli save trutok blong hem.”—1 Timoti 2:3, 4.
Be sipos yumi wantem haremgud long ol promes ya blong God, yumi mas kasem save long wok we Jisas Kraes i mekem blong sevem yumi, mo yumi mas soemaot bilif long hem. Jisas hem wan i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Aposol Pita i makemaot bigfala wok we Jisas Kraes i mekem long saed ya, i se: “I no gat wan narafala man nating we i save sevem yumi, from we olbaot long wol ya, God i no givim nem blong wan narafala man nating long yumi, we hem i stap yusum blong sevem yumi.” (Ol Wok 4:12) Taem wan man we hat blong hem i stret i askem kwestin long aposol Pol mo fren blong hem Saelas, tufala i ansa long hem se: “Yu mas bilif long Jisas ya we i Masta blong mifala, nao God bambae i sevem yu, mo ol famle blong yu tu.”—Ol Wok 16:30, 31.
Yes, Jisas Kraes hem i “Bigfala Man we God i yusum blong givim laef,” mo tru long hem nomo God i save sevem yumi. (Ol Wok 3:15, NW ) ?Be olsem wanem wan man i save stap olsem stamba rod blong sevem yumi? Tingting ya se God bambae i sevem yumi i save kam moa strong taem yumi kasem save gud long wok blong Jisas long saed ya.
[Foto Credit Lines blong pija long pej 2]
Page 3: Bombers: USAF photo; starving children: UNITED NATIONS/J. FRAND; burning battleship: U.S. Navy photo