Ol Blesing We Gud Nius i Karem
“[“Jeova,” NW ] i jusumaot mi, . . . blong mi kam talemaot gud nius long ol puaman. Hem i sanem mi, blong mi kam mekem ol man we tingting blong olgeta i foldaon olgeta, oli harem gud bakegen, mo blong . . . leftemap tingting blong olgeta we oli harem nogud, oli stap krae.”—AESEA 61:1, 2.
1, 2. (a) ?Jisas i talemaot se hem i hu, mo hem i mekem samting ya olsem wanem? (b) ?Gud nius we Jisas i talemaot, i karem wanem blesing?
LONG wan Sabat dei, taem Jisas i jes statem minista wok blong hem, hem i stap long wan haos prea long Nasaret. Baebol i talem se, “oli givim buk blong Profet Aesea long hem, blong i rid long hem. Nao hem i openem buk ya, i ridim tok ya we Profet Aesea i raetem, we i talem se, ‘Hae God i jusumaot mi, mo paoa blong Spirit blong hem i kam fulap long mi blong mi talemaot gud nius.’ ” Jisas i gohed blong ridim sam narafala haf blong profet tok ya. Ale, hem i sidaon mo i talem se: “Tede, long taem ya we yufala i stap lesin long ol tok ya blong Baebol, God i stap mekem ol samting we tok ya i talem, oli kamtru.”—Luk 4:16-21.
2 Long toktok ya, Jisas i soemaot se hem nao i man blong prij we profet i bin tokbaot se bambae i kam blong talemaot gud nius mo mekem ol man oli harem gud. (Matiu 4:23) !Yes Jisas i gat wan gudfala nius blong talemaot! Hem i talem long olgeta we oli lesin long hem se: “Mi nao, mi olsem laet blong ol man long wol. Man we i biaen long mi, bambae hem i no save wokbaot long tudak. Hem bambae i gat laet blong laef.” (Jon 8:12) Mo tu hem i talem se: “Sipos yufala i obei long ol tok ya blong mi, yufala i prapa man blong mi. Nao bambae yufala i save trutok, mo trutok ya bambae i mekem yufala i fri man.” (Jon 8:31, 32) Jisas i holem “ol tok blong laef ya we i no save finis.” (Jon 6:68, 69) !Tru ya, laet, laef, mo fasin fri oli ol blesing we i sas tumas!
3. ?Wanem gud nius we ol disaepol blong Jisas oli talemaot?
3 Afta long Pentekos 33 K.T., ol disaepol oli gohed long wok ya blong prij we Jisas i bin statem. Oli talemaot “gud nius blong kingdom” long ol man Isrel mo long ol man we oli no laen blong Isrel. (Matiu 24:14, NW; Ol Wok 15:7; Rom 1:16) Ol man we oli lesin long gud nius ya oli gat janis blong save se Jeova God hem i hu. Oli kam fri long ol skul mo oli joen long wan niufala nesen long saed blong spirit, hemia “Isrel blong God.” Ol memba blong Isrel ya oli gat hop blong rul olwe long heven wetem Masta blong olgeta, Jisas Kraes. (Galesia 5:1; 6:16, NW; Efesas 3:5-7; Kolosi 1:4, 5; Revelesen 22:5) !Hemia ol nambawan blesing tru!
Wok Blong Prij Tede
4. ?Olsem wanem oda ya blong talemaot gud nius i stap gohed yet tede?
4 Tede, ol Kristin we tabu spirit i makemaot olgeta, wetem “bigfala hip” blong “narafala sipsip”, oli stap gohed blong folem oda ya we i go long Jisas fastaem. (Revelesen 7:9; Jon 10:16) From samting ya, gud nius i stap goaot naoia long plante moa ples i bitim bifo. Long 235 kantri mo aelan, ol Witnes blong Jeova oli goaot blong ‘talemaot gud nius long ol [“kwaet man,” NW ], . . . mekem ol man we tingting blong olgeta i foldaon olgeta, oli harem gud bakegen, talemaot long olgeta we oli stap wok slef long narafala kantri, se oli save gohom, mo tekemaot olgeta we oli stap long kalabus, blong oli save gofri. [Oli] talemaot [“yia ya we Jeova i makem blong soemaot gladhat blong hem long ol man mo dei ya we God i makem blong givimbak,” NW ] mo oli leftemap tingting blong olgeta we oli harem nogud, oli stap krae.’ (Aesea 61:1, 2) Taswe, Kristin wok blong prij i gohed blong karem blesing long plante man mo i gohed blong mekem ol man oli harem gud nomata long “olgeta trabol” we oli stap kasem.—2 Korin 1:3, 4.
5. ?Olsem wanem wok blong talemaot gud nius i soemaot se ol Witnes blong Jeova oli defren long ol narafala jos blong Krisendom?
5 I tru se ol jos blong Krisendoma oli folem sam kaen rod blong prij. Plante long olgeta oli sanem ol misinari oli go long narafala kantri blong pulum man blong joenem jos blong olgeta. Eksampol, buk ya The Orthodox Christian Mission Center Magazine i tokbaot wok we ol misinari blong Otodoks Jos oli mekem long Madagaska, Saot Afrika, Tansania, mo Simbabwe. Be, bighaf blong ol narafala memba blong Otodoks Jos, oli no joen long wok ya. Mo yumi faenem sem samting tu long ol narafala jos blong Krisendom. Long saed blong Witnes blong Jeova i defren. Evri man we oli baptaes blong kam Witnes oli mas traehad blong joen long wok blong prij. Oli save se taem oli joen long wok ya blong talemaot gud nius oli pruvum se bilif blong olgeta i tru. Pol i talem se: “Taem yumi bilif long hem long hat blong yumi, God i mekem yumi kam stret man long fes blong hem, mo taem yumi talemaot tok ya, God i sevem yumi.” Sipos wan man i talem se hem i gat bilif be bilif ya i no pusum hem blong mekem wok, bilif blong hem i ded nomo.—Rom 10:10; Jemes 2:17.
Gud Nius We i Karem Ol Blesing Blong Olwe
6. ?Wanem gud nius we i stap goaot long ol man tede?
6 Ol Witnes blong Jeova oli talemaot beswan nius we man i save harem long wol tede. Oli yusum Baebol blong soemaot long ol man we oli wantem lesin se, Jisas i givim laef blong hem olsem wan sakrefaes blong openem rod blong oli kam klosap long God, kasem fogif from sin blong olgeta, mo gat hop blong laef we i no save finis. (Jon 3:16; 2 Korin 5:18, 19) Oli talemaot se Kingdom blong God i stanap finis long heven mo Jisas Kraes i King we God i jusumaot. Mo i no longtaem Kingdom ya bambae i karemaot ol rabis fasin long wol ya mo i mekem we Paradaes i kambak bakegen. (Revelesen 11:15; 21:3, 4) Olsem profet tok blong Aesea i bin talem, ol Witnes oli talemaot long ol man raonabaot se naoia hem i “yia ya we Jeova i makem blong soemaot gladhat blong hem.” Hemia i min se man i gat janis yet naoia blong obei long gud nius. Mo tu, ol Witnes oli talemaot woning se i no longtaem “dei ya we God blong yumi i makem blong givimbak” bambae i kam blong finisim ol rabis man we oli no wantem lego fasin nogud.—Ol Sam 37:9-11.
7. ?Wanem stori i soemaot we ol Witnes blong Jeova oli joengud, mo from wanem oli joengud olsem?
7 Long wol ya we i fulap long rabis fasin mo trabol, i gat wan gud nius ya nomo we i tokbaot ol blesing blong olwe. Olgeta we oli lesin long gud nius ya oli save joen long wan kampani blong ol Kristin brata we oli joengud long ful wol. Long kampani ya i gat ol man blong olgeta kantri mo laen, sam oli rij mo sam oli pua, be oli no letem ol samting olsem i seraotem olgeta. Oli ‘tekem fasin blong lav, olsem we hem i klos blong olgeta, from we fasin ya i nambawan blong joenem ol man oli kam wan.’ (Kolosi 3:14, NW; Jon 15:12) Pruf blong samting ya i kamaot las yia long wan kantri blong Afrika. Long wan moning, ol man blong bigfala taon blong kantri ya oli wekap from bigfala noes blong masket we i stap faerap. Noes ya i kamaot long wan grup blong man we i wantem kafsaedem gavman. Taem faet ya i kam antap, ol man we oli blong wan laen oli stat agensem olgeta we oli blong narafala laen. Ale, sam man oli tok nogud long wan famle we i Witnes blong Jeova, from we famle ya i stap haedem wan narafala famle blong defren laen, we olgeta tu oli Witnes. Be, famle ya i talem long olgeta se: “I gat ol Witnes blong Jeova nomo long haos blong mifala.” Long lukluk blong ol Witnes ya, i no impoten se man i kamaot long wanem laen. Kristin lav mo fasin blong givhan long olgeta we oli harem nogud, hemia nao samting we i impoten. Wan woman we i no Witnes, be i famle wetem olgeta ya, i talem se: “Ol man blong narafala jos oli no kea long ol memba blong jos blong olgeta. Ol Witnes blong Jeova nomo oli mekem defren.” I gat plante stori olsem hemia, we i hapen long ol kantri we faet i seraotem ol man. Mo samting ya i soem se ol Witnes blong Jeova oli rili “laekem olgeta evriwan long kampani blong ol brata.”—1 Pita 2:17, NW.
Gud Nius i Jenisim Ol Man
8, 9. (a) ?Ol man we oli lesin long gud nius oli mekem wanem jenis? (b) ?Wanem stori i soem se gud nius i gat paoa?
8 Gud nius ya i joen long wanem we Pol i kolem “laef ya long wol, mo bakegen, long laef ya we bambae i kamtru biaen.” (1 Timoti 4:8) Gud nius i givim wan gudfala tingting we yumi sua long hem long saed blong fiuja. Be tu, gud nius ya i save mekem laef blong wan man i kam gud moa naoia. Evri Witnes blong Jeova wanwan oli letem Tok blong God, Baebol, i lidim olgeta blong jenisim laef blong olgeta folem wanem we God i wantem. (Ol Sam 199:101) Fasin blong olgeta i kam niuwan bakegen taem oli wokem ol fasin olsem stret fasin mo fasin blong stap tru long God.—Efesas 4:24.
9 Tingbaot eksampol blong Franco. Problem blong hem se hem i stap kros kwik. Enitaem we wan samting i no ron gud, Franco i faerap long kros mo i brebrekem ol samting. Woman blong hem i stat stadi Baebol wetem ol Witnes blong Jeova, mo sloslou, gudfala Kristin fasin blong ol Witnes i givhan long Franco blong luksave se hem i mas jenis. Hem i stadi Baebol wetem olgeta nao hem tu i naf blong soemaot ol frut blong tabu spirit olsem pis mo fasin blong bos long tingting. (Galesia 5:22, 23) Hem i wan long olgeta 492 man we oli baptaes long Beljiom long sevis yia 2001. Mo tu, tingbaot Alejandro. Hem i wan yang man nomo, be i slef long drag. Samting ya i mekem we hem i lusum evri samting gogo i laef long ples blong sakem doti, i stap faenem eni samting we i save salem blong winim mane blong pem drag nomo. Taem hem i gat 22 yia, ol Witnes blong Jeova oli askem sipos hem i wantem stadi Baebol, ale hem i agri. Hem i ridim Baebol evri dei mo i go long olgeta Kristin miting. Hem i kwik blong stretem laef blong hem, mekem se i no sikis manis yet, be hem i rere finis blong joen long wok blong prij. Hem i wan long olgeta 10,115 man long Panama we oli joen long wok ya las yia.
Gud Nius i Wan Blesing Long Ol Kwaet Man
10. ?Hu olgeta we oli lesin long gud nius, mo olsem wanem tingting we oli gat long laef i jenis?
10 Aesea i talemaot se gud nius ya bambae i goaot long ol kwaet man. ?Ol kwaet man ya oli hu? Hemia ol man we buk blong Ol Wok i tokbaot se oli “stret blong kasem laef blong olwe.” (Ol Wok 13:48, NW ) Ol man ya oli kamaot long ol defren kaen laef, mo mesej blong trutok i kasem hat blong olgeta. Oli lanem se taem ol man oli mekem wanem we God i wantem oli kasem plante blesing we oli gud moa i winim olgeta samting we wol ya i stap givim. (1 Jon 2:15-17) ?Be, olsem wanem ol Witnes blong Jeova oli kasem hat blong man taem oli prij?
11. ?Man we i talemaot gud nius i mas gat wanem fasin, olsem Pol i soemaot?
11 Tingbaot eksampol blong aposol Pol we i raet i go long ol man Korin i se: “Ol brata mo sista. Bifo, taem mi kam luk yufala, mi kam blong talemaot plan ya blong God we fastaem i blong haed. Be mi no kam blong talemaot long ol flas tok mo long ol waestok blong man, nogat. Taem mi stap wetem yufala, mi putum tingting blong mi i stap strong long wan samting nomo. Mi stap tokbaot Jisas Kraes nomo, mo antap moa, mi stap talemaot we hem i ded long [“pos,” NW ].” (1 Korin 2:1, 2) Pol i no traem mekem ol man oli sapraes long hem from gud save we hem i gat. Hem i tijim ol samting we oli kamaot long God, ol samting ya oli tru mo tede yumi save ridim long Baebol. Tingbaot wanem we Pol i talem long fren blong hem Timoti, we i man blong prij tu: “Yu mas talemaot tok blong hem . . . oltaem yu yu mas strong blong talemaot.” (2 Timoti 4:2) Timoti i mas prij blong talemaot “tok” ya, hemia mesej blong God. Mo tu, Pol i raet long Timoti i se: “Yu mas traehad long evri rod, blong yu kam prapa man blong wok we God i stap harem gud long yu we long fes blong hem, yu no gat sem long wok blong yu. Yu yu mas kam wan man we yu stap tijim ol man long trutok blong God long fasin we i stret gud.”—2 Timoti 2:15.
12. ?Olsem wanem ol Witnes blong Jeova tede oli folem ol tok mo eksampol blong Pol?
12 Ol Witnes blong Jeova oli folem eksampol blong Pol mo ol tok ya we hem i talem long Timoti. Oli luksave se Tok blong God i gat paoa mo oli yusum hem fulwan blong talem toktok we i save leftemap tingting mo givim hop long ol man raonabaot long olgeta. (Ol Sam 119:52; 2 Timoti 3:16, 17; Hibrus 4:12) I tru se oli yusum plante buk we oli tokbaot Baebol blong givhan long ol man we oli intres blong oli save kasem moa save long Baebol long eni ples. Be, oli lukaot rod oltaem blong ridim ol tok blong Baebol long ol man. Oli save se Tok blong God i save kasem hat blong ol kwaet man mo pusum olgeta blong mekem wok. Mo taem oli yusum Baebol long fasin ya, oli mekem bilif blong olgeta tu i kam strong moa.
“Leftemap Tingting Blong Olgeta We Oli Stap Krae”
13. ?Long yia 2001, wanem samting i hapen we i mekem se plante man oli nidim blong harem gud bakegen?
13 Yia 2001 i gat ol trabol blong hem tu, mo from samting ya, plante man oli nidim blong harem gud bakegen. Long ol trabol ya i gat hemia we i bin hapen long Yunaeted Stet long manis Septemba. Ol teroris oli bin spolem tufala stori haos ya we oli kolem Wol Tred Senta long New York, wetem Pentagon klosap long Washington, D.C. !Ol man blong kantri ya oli sek bigwan! Long taem ya, ol Witnes blong Jeova oli gohed blong folem oda ya we oli kasem, hemia blong “leftemap tingting blong olgeta we oli stap krae.” I gat sam gudfala stori we oli soemaot olsem wanem oli mekem samting ya.
14, 15. ?Olsem wanem ol Witnes oli gat janis blong yusum Baebol blong leftemap tingting blong olgeta we oli harem nogud?
14 Wan Witnes we i mekem wok blong prij fultaem, i luk wan woman long saed rod nao i kam long hem mo i askem wanem tingting blong hem long ol trabol ya we ol teroris oli mekem. Woman ya i stat krae. Hem i talem se hem i harem nogud tumas mo i wantem tumas blong faenem wan rod blong givhan. Witnes ya i talem long hem se God i laekem yumi evriwan, ale hem i ridim Aesea 61:1, 2. Woman ya i luk se Baebol i tok stret nomo, from we hem luksave se plante man oli stap krae naoia. Hem i tekem smol pepa we Witnes ya i givim long hem mo i glad we oli kam visitim hem long haos blong hem.
15 Tu Witnes we tufala i stap prij, tufala i mitim wan man we i stap wok long garaj blong hem. Tufala i talem long hem se tufala i wantem serem sam gudfala toktok blong Baebol folem wanem we i jes hapen long Wol Tred Senta. Hem i agri, ale tufala i ridim 2 Korin 1:3-7 long hem. Wan haf blong vas ya i talem se: “Kraes . . . i stap mekem [yumi] harem gud tumas.” Man ya i glad we ol Witnes oli stap goraon blong serem gudfala toktok long narafala mo i talem se: “God bambae i blesem nambawan wok ya we yufala i stap mekem.”
16, 17. ?Wanem tufala stori we i soem se Baebol i gat paoa blong halpem ol man we oli harem nogud no we oli sore from sam bigfala trabol?
16 Wan Witnes i go mekem visit bakegen long sam man, nao hem i mitim pikinini boe blong wan woman we bifo hem i bin intres long trutok. Yang man ya i talem se from trabol we i hapen hem i wari long olgeta we oli stap klosap long hem ale hem i wantem kam luk se oli stap olsem wanem. Hem i sapraes we Witnes ya tu i tekem taem blong visitim ol man blong luk sipos oli oraet. Hem i talem se hem i bin wok klosap long Wol Tred Senta long taem we trabol ya i kamaot mo hem i wajem evri samting we i hapen. Ale, hem i askem from wanem God i letem man i safa olsem. Witnes ya i ridim sam vas blong Baebol long hem, olsem Ol Sam 37:39 we i talem se: “Oltaem Hae God i stap sevem ol stret man, i stap lukaot gud long olgeta long taem blong trabol.” Man ya i soem kaen fasin, i askem olsem wanem long Witnes ya mo famle blong hem, mo i askem hem blong kambak. Hem i rili glad we Witnes ya i kam mo storian wetem hem.
17 Long ol dei biaen long trabol ya we ol teroris oli mekem, ol Witnes blong Jeova oli toktok wetem plante taosen man we oli harem nogud. Wan long olgeta ya hem i wan woman we ol Witnes oli mitim taem oli stap visitim ol man klosap long olgeta. Woman ya i harem nogud tumas long wanem we i hapen mo i lesingud taem oli ridim Ol Sam 72:12-14 long hem: “Hem bambae i stap sevem ol puaman we oli stap singaot i go long hem, mo bambae i stap givhan long olgeta we oli sot long ol samting, mo i no gat man blong lukaot long olgeta. Hem bambae i gat sore long ol puaman, mo long olgeta we oli no strong, mo i stap sevem laef blong olgeta we oli sot long ol samting. Olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta. Long fes blong hem, laef blong ol man olsem bambae i gud tumas.” !Ol tok ya oli gud tumas! Woman ya i askem ol Witnes blong ridim vas ya bakegen long hem, nao i singaot tufala i kam insaed long haos blong hem blong storian moa. Tufala i statem wan Baebol stadi wetem hem.
18. ?Olsem wanem wan Witnes i halpem ol man raonabaot long hem taem oli askem hem blong prea?
18 Wan Witnes i wok long wan restoron blong wan eria we i gat plante rijman long hem mo plante long olgeta oli neva soem intres long gud nius blong Kingdom. Be afta long trabol we ol teroris oli mekem, ol man long komuniti ya oli sek. Long Fraede naet afta long trabol ya, maneja blong restoron i singaot evriwan i go afsaed wetem ol kandel blong stanap kwaet mo tingbaot olgeta we oli ded long trabol ya. Witnes ya i respektem filing blong olgeta, mo hem i go afsaed tu be i stanap kwaet nomo long saed blong rod. Maneja i save se hem i wan Witnes blong Jeova, ale afta long smoltaem ya, hem i askem Witnes ya blong mekem wan prea blong evriwan. Witnes ya i agri. Long prea blong hem, hem i talem se plante man oli stap krae, be i gat hop i stap. Hem i tokbaot taem ya we bambae olgeta trabol oli finis mo i talem se olgeta man oli save kam klosap long God, blong hem i mekem oli harem gud sipos oli kasem stret save blong Baebol. Afta we oli talem “Amen,” maneja ya—wetem bitim 60 long ol man ya we oli stanap afsaed long restoron—i kam long Witnes ya mo i talem tangkiu long hem, i holem hem mo i talem se hemia beswan prea we hem i bin harem.
Wan Blesing Long Komuniti
19. ?Wanem stori i soemaot se sam man oli luksave we ol Witnes blong Jeova oli traehad blong holem ol gudfala fasin?
19 Plante man oli talem se taem i gat ol Witnes blong Jeova long komuniti blong olgeta, oli harem gud. Hemia i tru moa tede. Yes, ol man we oli mekem pis, we oli no stil mo giaman, mo we oli tinghae long fasin we i gud, oli karem plante gudfala frut long ples we oli stap long hem. Long wan kantri blong Sentrol Esia, ol Witnes oli mitim wan olfala man we i ritae finis long wok blong hem olsem ofisa blong sekuriti polis. Hem i se, wantaem oli bin givim wok long hem blong lukluk moa insaed long wok blong ol defdefren skul. Taem hem i jekem wok blong ol Witnes blong Jeova hem i sapraes blong luk we oli no man blong stil mo giaman, mo oli holem gudfala fasin. Hem i tinghae long olgeta from we oli holem strong long bilif mo evri tijing blong olgeta i stanap long Baebol. Man ya i agri blong stadi Baebol wetem ol Witnes.
20. (a) ?Wok we ol Witnes blong Jeova oli mekem las yia i soemaot wanem? (b) ?Wanem i soemaot se i gat plante wok yet blong mekem, mo wanem tingting we yumi mas gat long saed blong wok blong prij?
20 Ol stori we yumi jes ridim long stadi ya oli sam nomo long plante moa stori we oli kamaot long sevis yia 2001, mo oli soemaot klia se ol Witnes blong Jeova oli bin bisi gud long yia ya.b Oli storian wetem plante milian man, oli leftemap tingting blong plante man we oli stap krae, mo wok blong prij we oli mekem i karem gudfala frut. I gat 263,431 man we oli givim laef blong olgeta long God mo tekem baptaes. Long fulwol, namba blong ol man blong prij i kam antap long 1.7 pesen. Mo i gat plante moa wok yet blong mekem from we 15,374,986 man oli kam long Memoriol blong tingbaot ded blong Jisas. (1 Korin 11:23-26) I gud yumi gohed blong lukaot ol kwaet man ya we oli rere blong lesin long gud nius. Mo sipos “yia ya we Jeova i makem blong soemaot gladhat blong hem long ol man,” i gohed, bambae yumi gohed tu blong leftemap tingting blong olgeta we “oli sore tumas long hat blong olgeta.” !I rili wan blesing blong joen long wok ya! I sua se yumi evriwan i wantem talem sem tok ya we Aesea i talem i se: “Yes, bambae mi mi harem gud tumas long Jeova. Bambae sol blong mi i glad tumas from God blong mi.” (Aesea 61:10, NW ) I gud sipos God i gohed blong yusum yumi taem hem i mekem profet tok ya i kamtru se: “Hae Masta Jeova bambae i mekem stret fasin i kam plante mo i leftemap nem blong hem long fored blong olgeta nesen.”—Aesea 61:11, NW.
[Ol Futnot]
a Ol skul we oli giaman se oli Kristin.
b Jat we i stap long pej 19 kasem 22 i givim ripot long wok blong ol Witnes blong Jeova long sevis yia 2001.
?Yu Yu Rimemba?
• ?Ol kwaet man we oli lesin long gud nius we Jisas i talemaot oli kasem wanem gudfala frut?
• ?Ol man we oli lesin taem ol disaepol blong Jisas long faswan handred yia oli prij, oli kasem wanem blesing?
• ?Wanem blesing we sam man tede oli kasem from we oli lesin long gud nius?
• ?Wanem tingting we yumi gat long nambawan janis ya blong prij?
[Ripot 2000 pej 19-22]
RIPOT BLONG OL WITNES BLONG JEOVA LONG FULWOL LONG SEVIS YIA 2000
(Lukluk niuspepa)
[Tok blong pija long pej 15]
Ol Witnes blong Jeova oli neva fogetem se wok blong olgeta i blong prij
[Tok blong pija long pej 17]
Ol man we oli lesin long gud nius oli save kam haf blong wan kampani blong ol brata we oli joengud long fulwol