?Ol Samting We i Mekem Man i Handikap Bambae i Finis Olsem Wanem?

!TRAEM tingbaot se ol blaenman oli save lukluk, ol man we sora blong olgeta i fas oli save harem evri noes, olgeta we oli no save toktok oli singaot from glad, olgeta we leg blong olgeta i nogud oli kam strong mo oli save wokbaot! Yumi no stap tokbaot frut we i kamaot from niufala save blong ol dokta, be frut we bambae i kamaot taem God i mekem ol samting blong givhan long ol man long wol. Baebol i talem se: “Long taem ya, ol blaen man bambae oli save lukluk, mo olgeta we sora blong olgeta i fas, sora blong olgeta bambae i open bakegen. Olgeta we leg blong olgeta i nogud, bambae leg blong olgeta i kam gud bakegen, nao oli jamjam olbaot, oli danis, mo olgeta we oli no save toktok, bambae oli toktok, nao bambae oli glad, oli stap singsingaot from.” (Aesea 35:5, 6) ?Be olsem wanem yumi save sua se profet tok ya we i mekem yumi sapraes bambae i kamtru?

Faswan samting, taem Jisas Kraes i stap long wol, hem i mekem ol man we oli kasem ol defren kaen sik oli kamgud bakegen, wetem ol handikap ya tu. Mo tu, plante man oli bin luk bighaf blong ol merikel we hem i mekem, ol enemi blong hem tu oli luk. Long wan taem, ol man we oli agensem hem mo we oli no bilif long hem, oli wantem save moa long saed blong wan man we Jisas i mekem hem i gud bakegen. Be oli wantem save nomo blong oli spolem nem blong Jisas. Sore tumas long olgeta, evri samting we oli faenemaot i pruvum se merikel ya i rili hapen. (Jon 9:1, 5-34) Afta we Jisas i mekem wan narafala merikel bakegen, oli harem nogud mo oli talem se: “?Bambae yumi mekem olsem wanem? Man ya i stap mekem plante merikel ya.” (Jon 11:47) Be i no olgeta man we oli olsem, plante oli luksave mo oli stat blong bilif long Jisas.—Jon 2:23; 10:41, 42; 12:9-11.

Ol Merikel Blong Jisas Oli Soemaot Se Bambae Ol Man Oli Save Kam Gud Bakegen

Ol merikel blong Jisas oli no jes pruvum se hem i Mesaea mo Pikinini blong God. Oli mekem tu we ol man oli save bilif long ol promes blong Baebol se long fiuja, olgeta we oli gat fasin obei bambae oli kam gud bakegen. Profet tok blong Aesea japta 35, we yumi tokbaot long stat blong haf ya, i joen wetem ol promes ya. Aesea 33:24 i tokbaot helt we bambae ol man we oli ona gud long God oli gat, i se: “Bambae i no moa gat man olbaot long kantri ya we i save talem se hem i sik.” Mo tu, Revelesen 21:4 i promes se: “[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo [ol trabol mo hadtaem blong tede] oli lus olgeta.”

Taem ol man oli ripitim prea blong Jisas, oli stap prea blong ol profet tok ya oli kamtru. Wan haf blong prea ya i talem se: “Letem Kingdom blong yu i kam. Letem samting we yu yu wantem i kamaot long wol, olsem we i kamaot finis long heven.” (Matiu 6:10, King James Version) Yes, wol mo ol man oli joen wetem ol samting we God i wantem. Nating se God i letem ol sik mo ol samting we i mekem man i handikap oli stap from wan risen, be klosap nao bambae oli lus; oli no save spolem blong olwe ‘ples we God i putum leg blong hem antap long hem.’—Aesea 66:1.a

Oli No Pem Mo Oli No Harem i Soa

Nomata wanem sik we ol man oli gat, be wantaem nomo Jisas i mekem olgeta oli kamgud bakegen we oli no harem i soa from, mo oli no pem hem from. Toktok i goraon kwiktaem long saed blong samting ya, mo biaen, “plante man oli karem ol sikman i kam long hem. Hemia ol man we leg blong olgeta i nogud, mo olgeta we oli blaen, mo olgeta we samting i rong long bodi blong olgeta, mo olgeta we oli no save toktok, mo plante narafala sikman bakegen. Ol man ya oli tekem ol sikman ya i kam klosap long hem, nao hem i mekem olgeta evriwan oli gud bakegen.” ?Wanem filing blong ol man long saed ya? Matiu we i bin stap long taem ya i talem se: “Nao ol man we fastaem oli no save toktok, oli save toktok, mo ol man we samting i rong long bodi blong olgeta, bodi blong olgeta i gud bakegen. Ol man we leg blong olgeta i nogud oli save wokbaot gud, mo ol blaenman oli save lukluk. Mo taem ol man oli luk ol samting ya, oli sapraes tumas, nao oli stap presem God blong ol laen blong Isrel.”—Matiu 15:30, 31.

Makemgud se Jisas i no folem fasin blong ol man we oli stap giaman se oli mekem merikel. Olgeta ya oli trikim ol man, oli jusumaot sam man fastaem blong mekem oli kam gud bakegen. Defren olgeta, plante man we famle mo fren blong olgeta oli sik, oli “tekem ol sikman ya i kam klosap long [Jisas], nao hem i mekem olgeta evriwan oli gud bakegen.” Naoia bambae yumi tokbaot sam man we Jisas i mekem olgeta oli gud bakegen.

Blaen man: Long Jerusalem, i gat wan man we “taem hem i bon, ae blong hem i blaen,” nao Jisas i mekem man ya i kamgud bakegen. Ol man blong taon ya oli save gud man ya se hem i wan blaen man we i stap asaskem mane olbaot. !Taswe traem tingbaot bigfala glad mo noes we ol man oli mekem taem oli luk we man ya i save lukluk mo i wokbaot! Be, i no olgeta evriwan we oli glad. Jisas i bin talemaot ol rabis fasin blong sam memba blong wan skul blong ol man Isrel we oli kolem Farisi. Ol Farisi ya oli harem nogud, mo oli wantem tumas blong faenem poen long Jisas blong traem soemaot se hem i stap trikim ol man. (Jon 8:13, 42-44; 9:1, 6-31) Taswe oli askem kwestin long man ya we Jisas i mekem hem i gud bakegen, biaen oli askem kwestin long papa mama blong hem, mo long man ya bakegen. Be ol Farisi oli kam kros from we samting we oli wantem save long hem i jes soemaot gud se Jisas i rili mekem merikel. Man ya we Jisas i mekem hem i gud bakegen i sapraes long fasin tu fes blong ol man blong skul ya, mo tingting blong olgeta we i no stret, nao hem i talem se: “I stat long taem we God i mekem wol ya, i kam kasem tede, i no gat nius nating blong man we i mekem ae blong man we i blaen taem i bon, i kam gud olsem. Sipos man ya i no kamaot long God, bambae hem i no save mekem wan samting nating.” (Jon 9:32, 33) From we man ya we fastaem hem i blaen i toktok wetem bilif mo i talem samting we i stret, ol Farisi oli “putumaot hem long haos blong prea.” Hemia i minim se oli sakemaot man ya long haos prea mo hem i no moa save kam insaed bakegen.—Jon 9:22, 34.

Sora i fas: Taem Jisas i stap long Dekapolis, wan ples long Is saed blong Jodan Reva, ol man “oli tekem wan man i kam long hem we sora blong hem i fas, mo we hem i no save toktok gud tu.” (Mak 7:31, 32) Jisas i no jes mekem man ya i gud bakegen, be hem i soemaot tu se hem i save filing blong ol man we sora blong olgeta i fas. Olgeta oli save sem long fored blong ol man. Baebol i talem se Jisas i tekem man ya we sora blong hem i fas, “tufala i gowe long ol man, we tufala nomo i stap” mo Jisas i mekem hem i gud bakegen. Ol man we oli stap oli “sapraes tumas long hem,” oli talem se: “Man, olgeta samting we hem i stap mekem oli gud tumas. Man we fastaem sora blong hem i fas, be naoia hem i save harem toktok, mo man we fastaem i no save toktok, be i save toktok.”—Mak 7:33-37.

Haf bodi i ded: Taem Jisas i stap long Kapaneam, ol man oli karem wan man i kam we i stap slip long bed blong hem, from se haf bodi blong hem i ded. (Matiu 9:2) Vas 6 kasem 8 i tokbaot wanem i kamaot i se: “[Jisas] i talem long sikman ya se, ‘Yu stanap, yu tekem bed blong yu, yu wokbaot, yu gohom.’ Nao man ya i girap, i wokbaot, i gohom. Mo taem ol man oli luk samting ya, oli fraet, mo oli leftemap nem blong God, from we hem i givim paoa long man blong mekem olsem.” Jisas i mekem merikel ya tu long fored blong ol disaepol mo ol enemi blong hem. Makem se ol disaepol blong Jisas oli no letem fasin blong no laekem nating narafala mo fasin blong jajem narafala i satem tingting blong olgeta. Taem oli luk ol samting we Jisas i mekem, “oli leftemap nem blong God.”

Sik: “I gat wan man we i gat wan rabis sik blong skin, i kam luk Jisas, i nildaon long fes blong hem, i krae long hem blong i givhan long hem. Hem i talem se, ‘Plis, sipos yu yu wantem, mi mi save se yu yu gat paoa blong mekem mi mi gud bakegen.’ Nao Jisas i sore tumas long hem, i putum han blong hem long hem, i talem long hem se, ‘Yes, mi mi wantem. !Yu klin!’ Nao wantaem nomo, sik ya i finis, bodi blong man ya i klin bakegen.” (Mak 1:40-42) Makem se Jisas i no fosem hem wan blong mekem man ya i kam gud bakegen, be hem i rili sore long man ya, nao hem i tekemaot sik blong hem. Traem tingbaot sipos yu yu gat leprosi. Rabis sik ya, sloslou i stap spolem bodi blong yu mo i mekem se ol man oli stap longwe long yu. ?Bambae yu harem olsem wanem sipos yu yu kam gud wantaem nomo mo yu no harem i soa from? I sua se yu kasem save from wanem narafala man ya we i gat leprosi we Jisas i mekem merikel long hem, i “nildaon long graon long leg blong Jisas, i talem tangkiu long hem.”—Luk 17:12-16.

Kil long bodi: Laswan merikel blong Jisas bifo we ol man oli holemtaet hem mo nilim hem long pos, hemia se i mekem bodi blong wan man i kam gud bakegen. Taem ol man oli rere blong holem Jisas, aposol Pita i wantem blokem olgeta. Hem i stap “karem naef blong faet blong hem. Nao wantaem nomo, hem i pulumaot naef ya, i katemaot raetsaed sora blong slef blong hae pris.” (Jon 18:3-5, 10) Luk i talem se Jisas i “putum han blong hem long sora blong man ya, i mekem hem i gud bakegen.” (Luk 22:50, 51) Bakegen, ol fren blong Jisas wetem ol enemi blong hem, hemia olgeta we oli kam blong holem hem, olgeta evriwan oli luk merikel ya we i soemaot sore blong hem.

Yes, moa yumi tingting gud long ol merikel blong Jisas, moa yumi luksave se oli tru. (2 Timoti 3:16) Mo olsem yumi talem finis, stadi i mas mekem bilif blong yumi i strong long promes ya blong God blong mekem ol man we oli gat fasin obei oli kam gud bakegen. Baebol i tokbaot Kristin bilif se “i soemaot long yumi we olgeta samting ya we yumi stap putum tingting blong yumi i strong long hem, olgeta oli tru. Mo hem i soemaot long yumi we olgeta samting ya we yumi no save luk, be oli stap.” (Hibrus 11:1) I klia nomo se God i no wantem we yumi bilif long samting we i no gat pruf blong hem, no samting we yumi jes wantem nomo se i kamtru. No gat. Hem i wantem se yumi gat wan strong bilif we i stanap long ol samting we oli tru. (1 Jon 4:1) Taem yumi stap kasem bilif ya, yumi luk se yumi stap kam moa strong long saed blong spirit, helt blong yumi i kam moa gud, mo yumi glad moa.—Matiu 5:3; Rom 10:17.

!Kam Gud Long Saed Blong Spirit i Moa Impoten!

Plante man we bodi blong olgeta i helti gud, oli no hapi. Samfala oli traem blong kilim olgeta wan i ded from oli ting se i no gat wan gudfala fiuja no from we oli gat plante tumas problem. Olgeta ya oli handikap long saed blong spirit. Hemia i wan samting we i moa nogud long ae blong God i bitim we oli handikap long bodi. (Jon 9:41) Defren olgeta, plante man we wan haf blong bodi blong olgeta i nogud, olsem Christian mo Junior we yumi tokbaot long faswan haf, oli kasem glad mo oli harem gud long laef blong olgeta. ?From wanem? From we oli strong long saed blong spirit mo oli kasem paoa from ol promes blong fiuja we Baebol i tokbaot.

Jisas i tokbaot wan samting we yumi ol man i nidim, se: “Man i no save laef long kakae nomo. Evri tok we God i talem, hemia nao samting blong mekem man i laef.” (Matiu 4:4) Yes, ol man oli defren olgeta long ol anamol, oli no jes nidim kakae we i halpem bodi nomo. God i wokem yumi olsem “pija” blong hem, taswe yumi nidim ol kakae long saed blong spirit, hemia save long saed blong God mo save we i soemaot olsem wanem yumi joen wetem stamba tingting blong hem mo mekem samting we hem i wantem. (Jenesis 1:27, NW; Jon 4:34) Save blong God i soem long yumi from wanem yumi stap laef mo i givim paoa long yumi long saed blong spirit. Mo tu, save ya i putum wan fandesen blong kasem laef we i no save finis long paradaes long wol. Jisas i talem se: “Laef ya, hem i min se man i save yu, we yu nomo yu tru God, mo i save mi, se mi, Jisas Kraes, we yu yu sanem mi mi kam.”—Jon 17:3.

I gud blong makem se ol man long taem blong Jisas oli no singaot hem se “Man blong Mekem Merikel,” be “Tija.” (Luk 3:12; 7:40) ?From wanem? From we Jisas i tijim ol man long saed blong Kingdom blong God we bambae i stretem ol problem blong ol man blong olwe. (Luk 4:43; Jon 6:26, 27) Gavman blong heven ya we i stap long han blong Jisas Kraes bambae i rul antap long ful wol mo bambae i mekem olgeta promes blong Baebol oli kamtru se ol gudfala man mo wol ya we oli stap long hem, bambae oli kam gud bakegen blong olwe. (Revelesen 11:15) From samting ya nao, long prea we Jisas i tijim ol man long hem, hem i joenem Kingdom blong God we bambae i kam wetem samting we God i wantem long wol ya.—Matiu 6:10.

Fulap man we wan haf blong bodi blong olgeta i nogud, oli no moa krae from sore, be from glad, taem oli lanem gudfala promes ya blong God. (Luk 6:21) Bambae God i no jes tekemaot ol sik mo ol samting we oli mekem man i handikap nomo. Bambae hem i tekemaot stamba samting we i stap mekem ol man oli harem nogud, hemia sin. Aesea 33:24 mo Matiu 9:2-7, we yumi tokbaot finis, i joenem sik wetem sin we yumi gat long bodi blong yumi. (Rom 5:12) Taswe, taem sin i no moa stap, ol man bambae oli harem gud long “gudfala fasin fri, we i blong ol pikinini blong God,” wan fasin fri we i minim se tingting mo bodi i stret gud olgeta.—Rom 8:21, NW.

Olgeta we helt blong olgeta i oraet oli no ting hevi long samting ya. Be olgeta we oli harem nogud from wan haf blong bodi blong olgeta i nogud oli no olsem. Oli save se laef mo helt i sas tumas mo oli save se ol samting oli save jenis kwiktaem nomo. (Prija 9:11) Taswe, mifala i hop se samfala we oli ridim stori ya we wan haf blong bodi blong olgeta i nogud, bambae oli tingting gud long ol nambawan promes blong God we oli stap long Baebol. Jisas i givim laef blong hem blong mekem se ol promes ya oli kamtru. !I no gat wan narafala samting we i save mekem ol promes ya oli strong moa!—Matiu 8:16, 17; Jon 3:16.

[Futnot]