Olsem Wanem Samfala Oli Kasem Ansa Long Ol Kwestin Blong Olgeta
PLANTE milian man oli stap prea. Sam oli sua se God i ansa long prea blong olgeta. Sam narafala oli no sua se God i rili stap lesin long ol prea. Sam narafala bakegen oli wantem faenem ansa long ol kwestin blong olgeta, be oli no tingbaot blong prea long God from.
Baebol i soem se trufala God i ‘man blong harem prea.’ (Ol Sam 65:2, NW) ?Sipos yu prea, yu yu sua se yu stap prea long trufala God? ?Ol prea blong yu oli ol prea we bambae God i glad blong ansa long olgeta?
!Plante man long evri ples long wol oli ansa se yes! ?Olsem wanem ol man ya oli kasem ansa long ol kwestin blong olgeta? ?Oli lanem wanem?
?God—Hem i Hu?
Wan woman Portugal we hem i wan tija, i kasem edukesen blong hem long ol sista mo pris blong Katolik jos. Hem i folem bilif blong hem wetem fulhat blong hem. Be afta we sam tijing blong jos i jenis mo jos i lego sam bilif we tija ya i lanem bifo se oli impoten, tingting blong tija ya i fasfas. Taem hem i wokbaot i go long ol narafala kantri hem i luk fasin blong wosip blong ol man long ol kantri blong Is. Nao hem i stat blong tingting sipos i rili gat wan trufala God nomo, no i gat plante. ?Wanem stret rod nao blong mekem wosip? Hem i go luk pris mo i askem ol kwestin long saed blong Baebol, be pris i no save ansarem olgeta, nao tingting blong tija ya i foldaon.
Long taem ya skul Katolik i seremaot wan pepa long taon we tija ya i stap tij long hem. Pepa ya i givim woning long ol man blong oli no toktok wetem ol Witnes Blong Jeova. Be, ol kwestin oli stap yet long tingting blong tija ya. Ale, wan dei, taem ol Witnes oli kam long haos blong hem, hem i lesin mo i intres tumas long samting we oli talem. Hemia fastaem we hem i storian wetem olgeta.
Blong kasem ansa long ol kwestin blong hem, woman ya i stat blong stadi Baebol wetem ol Witnes. Evri wik hem i gat plante kwestin blong askem. Hem i wantem save nem blong God, sipos i gat wan trufala God nomo i stap, sipos God i agri we man i yusum aedol long wosip blong hem, mo plante narafala kwestin bakegen. Olgeta ansa we hem i kasem oli kamaot long Baebol nomo, i no tingting blong man. Taswe hem i sapraes mo i glad tumas long samting we hem i stap lanem. Sloslo, hem i kasem ansa long ol kwestin we hem i gat. Tede, hem i stap wosip long Jeova wetem spirit mo trutok, olsem we Jisas Kraes i talem se ‘ol trufala man blong mekem wosip’ bambae oli mekem.—Jon 4:23, NW.
Wan famle long Sri Lanka oli stap ridim Baebol oltaem, be oli no kasem ansa long plante impoten kwestin. Nating se oli nidim help, pris blong olgeta i no save givhan long olgeta. Be, ol Witnes Blong Jeova oli visitim famle ya mo oli givim sam buk long olgeta we oli eksplenem Baebol. Biaen, taem ol Witnes Blong Jeova oli givim ol gudfala ansa long ol kwestin blong olgeta, oli agri blong stadi Baebol. Oli intres tumas long ol samting we oli lanem long stadi blong olgeta.
Nating se i olsem, ol tijing we waef i lanem long jos blong hem taem hem i smol, i blokem hem blong luksave se Papa blong Jisas Kraes nomo i “tru God,” olsem we Jisas hem wan i talem. (Jon 17:1, 3) Jos blong hem i tijim hem se Jisas i sem mak long Papa mo se hemia “wan tokhaed” we man i no mas kasem save long hem. Be woman ya i wantem tumas blong kasem klia save long saed ya ale, hem i prea long Jeova, i yusum nem blong hem, mo i askem Jeova blong soemaot klia se Jisas hem i hu. Biaen hem i lukluk bakegen long ol impoten vas blong Baebol we oli ansa long kwestin ya. (Jon 14:28; 17:21; 1 Korin 8:5, 6) Nao hem i lukluk klia, i olsem we skal blong fis i kamaot long ae blong hem, i foldaon. Hem i luksave se Jeova—Man We i Wokem Heven Mo Wol mo Papa blong Jisas Kraes—hem nomo i trufala God.—Aesea 42:8; Jeremaea 10:10-12.
?From Wanem—Ol Man Oli Stap Safa?
Man ya Job i safa bitim mak. Wan bigfala win i kilim olgeta pikinini blong hem oli ded, mo hem i lusum olgeta samting we hem i gat. Mo tu, hem i safa bigwan from wan nogud sik mo from ol giaman fren we oli toktok agensem hem. Olgeta trabol ya, oli pulum Job blong sakem sam tok we hem i no tingting gud fastaem. (Job 6:3) Be God i tingbaot ol trabol we Job i fesem. (Job 35:15) Hem i save wanem i stap long hat blong Job mo hem i givim advaes we i stret long nid blong Job. God i stap mekem sem mak long ol man tede tu.
Long Mosambik, Castro i gat ten yia nomo taem mama blong hem i ded. Hem i harem nogud tumas. Hem i askem se: “?From wanem mama i mas ded mo lego mifala?” Nating se hem i gruap long wan famle we papa mama oli onagud long God, tingting blong hem i trabol. ?Wanem samting i save mekem tingting blong hem i haremgud bakegen? Hem i stat ridim wan smol Baebol long lanwis Jikewa mo hem i luk se taem hem i tokbaot samting we hem i ridim long ol bigfala brata blong hem, hem i stat blong haremgud bakegen.
Sloslo, Castro i kasem save se mama blong hem i ded from sin blong Adam mo Iv, be i no from we God i mekem i no stret long hem. (Rom 5:12; 6:23) Promes blong Baebol long saed blong laef bakegen i mekem Castro i haremgud tumas. Hem i luksave se promes ya i givim hop long hem blong luk mama blong hem bakegen. (Jon 5:28, 29; Ol Wok 24:15) Sore tumas, i no bitim fo yia biaen, papa blong hem tu i ded. Be long taem ya, Castro i naf moa blong fesem hadtaem ya. Tede, hem i lavem Jeova mo i yusum laef blong hem blong mekem wok blong God. Ol man we oli save hem, oli luksave se naoia hem i faenem trufala glad.
Plante man we oli lusum wan fren no famle long ded oli save haremgud long ol trutok blong Baebol we oli mekem Castro i haremgud. Sam man we oli safa bigwan from ol nogud fasin blong ol rabis man oli askem, olsem Job se: “?From wanem God i stap letem ol man nogud oli stap laef?” (Job 21:7) Taem ol man oli rili lesin long ansa we God i givim long Baebol, oli lanem se rod we God i stap yusum blong stretem ol trabol i blong givhan long olgeta.—2 Pita 3:9.
Barbara, we i gruap long Yunaeted Stet, i neva fesem hadtaem we i kamaot from faet. Be taem hem i gruap, plante kantri long wol oli joen long faet. Evri dei hem i harem nius blong ol nogud samting we oli kamaot from ol faet ya. Taem hem i stadi long skul, hem i lanem plante long ol samting we oli bin hapen long histri blong man mo i luk olsem se ol man oli no luksave we bambae ol samting ya oli kamtru. ?Wanem i stap biaen long ol samting ya? ?God i kea long ol samting we oli stap hapen? Barbara i bilif se i gat wan God i stap, be hem no suagud se God i olsem wanem.
Tingting we Barbara i gat long saed blong laef i jenis afta we hem i joen wetem ol Witnes Blong Jeova. Hem i lesin long olgeta mo i stadi Baebol wetem olgeta. Hem i go long ol miting long Haos Kingdom. Mo tu, hem i go long wan bigfala asembli blong ol Witnes. Nating se hem i askem ol kwestin long ol defdefren Witnes, ol ansa we hem i kasem oli sem mak nomo. Yes, tingting blong ol Witnes i wan nomo from we hem i stanap long Baebol.
Ol Witnes oli soem wetem Baebol se wol ya i stap aninit long paoa blong Devel Setan. Hem i masta blong wol ya, mo ol man blong wol ya oli folem tingting blong hem. (Jon 14:30; 2 Korin 4:4; Efesas 2:1-3; 1 Jon 5:19) Oli eksplenem se ol samting we oli hapen long histri, we Barbara i traem kasem save long hem, Baebol i talemaot finis se oli mas kamtru. (Daniel, japta 2, 7, mo 8) God i save talemaot se ol samting olsem bambae oli kamtru from we, sipos hem i wantem, hem i gat paoa blong luk wanem samting we bambae i kamaot long fiuja. Sam long ol samting we oli hapen, God nomo i mekem oli kamaot. Sam narafala samting, God i letem nomo blong oli hapen. Ol Witnes oli soem long Barbara se Baebol i talemaot finis ol gudfala samting wetem ol nogud samting we oli kamaot tede tu. Mo Baebol i eksplenem mining blong ol samting ya. (Matiu 24:3-14) Ol Witnes oli soem promes blong Baebol long saed blong niufala wol we stret fasin nomo i stap long hem mo we i no moa gat fasin blong safa.—2 Pita 3:13; Revelesen 21:3, 4.
Sloslo, Barbara i stat blong kasem save se Jeova i no stamba blong fasin blong safa, be hem i no blokem trabol we man i kasem taem man hem wan i jus blong no obei long ol loa blong hem. (Dutronome 30:19, 20) God i wokem rod blong yumi save haremgud blong olwe. Be hem i givim janis long yumi naoia, blong soemaot sipos yumi wantem laef folem ol stret rod blong hem no nogat. (Revelesen 14:6, 7) Barbara i mekemap tingting blong hem blong lanem wanem samting we God i wantem hem blong mekem mo mekem ol samting ya i wok long laef blong hem. Mo tu, taem hem i kampani wetem ol Witnes Blong Jeova, hem i faenem lav ya we Jisas i talem se i makemaot ol trufala man blong hem.—Jon 13:34, 35.
Olsem Barbara, yu tu yu save kasem gudfala frut long rod we Jeova i wokem blong givhan long ol man blong hem.
Laef We i Gat Mining
Ol man ya tu we maet laef blong olgeta i gohedgud nomo, be oli gat sam bigfala kwestin we oli wantem faenem ansa long hem. Eksampol, Matthew, wan yangfala man long Inglan, i wantem faenemaot hu ya trufala God mo wanem mining blong laef. Taem Matthew i gat 17 yia nomo, papa blong hem i ded. Biaen, Matthew i go long Yunivesiti mo i kasem setifiket long miusik. Hem i stat blong luksave we fasin blong laef blong hem, we i blong ronem ol sas samting, i blong nating nomo. Hem i aot long famle blong hem mo i go stap long London. Long ples ya hem i stat blong tekem drag mo go long ol naetklab. Hem i stat blong intres long ol sta blong talem fiuja, wok blong rabis spirit, skul blong Sen Buda mo ol narafala waes blong man. Hem i mekem olgeta samting ya blong traem faenem laef we hem i save haremgud long hem. Taem tingting blong hem i foldaon olgeta, hem i prea long God blong halpem hem blong faenem trutok.
Tu dei biaen, Matthew i mitim wan fren blong hem blong longtaem mo hem i toktok wetem fren ya long saed blong problem blong hem. Fren ya i stadi Baebol wetem ol Witnes Blong Jeova. Taem hem i soem 2 Timoti 3:1-5, Matthew i sapraes tumas we Baebol i talem stret ol fasin blong wol ya. Ol tok we oli stap long Bigfala Toktok blong Jisas antap long Hil, i kasem hat blong hem. (Matiu, japta 5-7) Fastaem hem i fraet lelebet blong joen wetem ol Witnes from we hem i bin ridim sam buk we oli tok nogud long ol Witnes Blong Jeova. Be, biaen hem i mekemap tingting blong kam long ol miting blong Haos Kingdom long eria blong hem.
Matthew i glad tumas long samting we hem i harem long ol miting ya mo hem i stat blong stadi Baebol wetem wan elda long kongregesen. I no longtaem biaen, hem i luksave we samting we hem i stap lanem hemia nao samting we hem i bin lukaotem. Yes, God i ansa long prea we hem i bin mekem bifo. Taem hem i stat blong lego ol fasin we Jeova i no laekem, hem i kasem plante blesing. Fasin blong onagud long God, i pusum hem blong jenisim laef blong hem. Matthew i lanem se laef i gat trufala mining taem hem i laenap wetem ol loa blong God.—Prija 12:13.
God i no bin makemaot se Matthew no ol narafala man we haf ya i tokbaot olgeta, bambae oli faenem trufala glad long laef blong olgeta. Nating se i olsem, ol man ya oli lanem se Jeova God i gat wan stamba tingting long saed blong ol man we oli glad blong obei long ol loa blong hem. (Ol Wok 10:34, 35) Stamba tingting ya i joen wetem laef foreva long wan wol we i no moa gat faet, sik mo fasin hanggri, mo tu we i no moa gat man i ded. (Aesea 2:4; 25:6-8; 33:24; Jon 3:16) ?Hemia samting we yu yu wantem? Sipos yes, yu save faenem trufala glad taem yu lanem moa long saed blong Baebol long ol miting long Haos Kingdom blong ol Witnes Blong Jeova. Mifala i glad tumas blong singaot yu blong joen long ol miting ya.
[Tok blong pija long pej 7]
Prea long God wetem fulhat, mo yusum nem blong hem
[Tok blong pija long pej 7]
Stadi wetem olgeta we oli rili tijim samting we i stap long Baebol
[Tok blong pija long pej 7]
Go long ol miting long Haos Kingdom
[Foto Credit Line blong pija long pej 4]
Hiker: Chad Ehlers/Index Stock Photography