‘Stap Klosap Long God, Nao Hem Bambae i Kam Stap Klosap Long Yu’
Bifo Mo Afta—Hem i Faenem Paoa Blong Jenisim Laef Blong Hem
SANDRA, wan woman long Meksiko, i talem se hem i defren long ol narafala memba blong famle blong hem. Hem i harem se i no gat man we i intres long hem mo i lavem hem, mo filing ya i spolem yangtaem blong hem. Sandra i talem se: “Taem mi yangfala, oltaem mi harem olsem se laef blong mi i emti, mi no save from wanem mi stap mo mi no save from wanem i gat laef long wol ya.”
Taem Sandra i stap long haeskul, hem i stat dring waen we papa blong hem i gat long haos. Biaen, hem i stat pem ol prapa botel blong hem gogo hem i nidim blong dring ol strong dring oltaem. Hem i talem se: “I no gat wan samting we i pulum mi blong wantem laef.” Sandra i no gat hop nating, ale hem i stat tekem drag. Hem i talem se: “Ol samting we oli halpem mi blong mi fogetem ol problem blong mi, oli stap long basket blong mi: i gat wan botel strong dring, sam tablet blong drag, no sam mariuana.”
Afta we Sandra i finisim medikol skul, hem i dipen moa long strong dring. Hem i traem kilim hem wan i ded plante taem. Be hem i laef yet.
Sandra i luk i go long defdefren jos blong oli halpem hem mo oli leftemap tingting blong hem, be oli no givhan long hem. Hem i no moa gat hop mo tingting blong hem i foldaon olgeta, ale hem i krae bakegen mo bakegen long God se: “?Yu yu stap wea? ?From wanem yu no givhan long mi?” Wan dei we hem i harem nogud bitim mak mo i ting nating long hem wan, wan Witnes blong Jeova i toktok wetem hem. Ale, Sandra i stat blong stadi long Baebol. Hem i haremgud tumas taem hem i lanem we Jeova “i stap klosap long ol man we tingting blong olgeta i kam nogud.”—Ol Sam 34:18.
Witnes ya we i stadi long Baebol wetem Sandra i halpem hem blong kasem save se, Jeova i save finis se from we yumi ol pikinini blong Adam, yumi sinman, mo yumi no stretgud olgeta, ale, i isi nomo blong samting i kam spolem yumi. Sandra i luksave se God i save se yumi no naf blong folem ol stret loa blong Hem long wan fasin we i stretgud olgeta. (Ol Sam 51:5; Rom 3:23; 5:12, 18) Hem i glad blong lanem we Jeova i no stap lukluk ol mastik blong yumi oltaem, mo i no askem yumi blong mekem ol samting we yumi no naf blong mekem. Man blong raetem Sam i askem kwestin ya se: “?Sipos yu yu stap raetemdaon ol sin blong mifala, hu bambae i save stanap long fes blong yu, we yu yu no save jajem hem?”—Ol Sam 130:3.
Wan impoten trutok blong Baebol we i mekem Sandra i haremgud, hemia ransom sakrefaes blong Jisas Kraes. Wetem sakrefaes ya, Jeova i soem sore long ol man we oli obei long hem mo i luk olgeta olsem stret man, nating se oli sinman. (1 Jon 2:2; 4:9, 10) Yes, God i save ‘fogivim yumi mo tekemaot ol sin blong yumi,’ mo halpem yumi blong winim nogud filing ya se yumi olsem nating nomo.—Efesas 1:7.
Sandra i lanem ol gudfala lesen from eksampol blong aposol Pol. Pol i tangkiu tumas long kaen fasin we God i soem long hem taem hem i fogivim ol mastik we hem i bin mekem, mo i givhan long Pol blong winim ol slak fasin blong bifo we oli stap kambak wanwan taem. (Rom 7:15-25; 1 Korin 15:9, 10) Pol i jenisim fasin blong laef blong hem, ‘i faetem gud bodi blong hem mo i bos long hem olsem we hem i wan slef nomo’ blong gohed blong folem ol loa blong God. (1 Korin 9:27, NW ) Hem i no letem ol nogud tingting blong hem oli bos long hem olsem we hem i wan slef nomo.
Ol slak fasin blong Sandra oli mekem tingting blong hem i trabol, be hem i gohed blong faet agensem olgeta. Hem i prea dip long Jeova blong i halpem hem blong winim ol nogud fasin ya mo blong i soem sore long hem. (Ol Sam 55:22; Jemes 4:8) Sandra i harem se God i rili intres long hem, ale hem i jenisim fasin blong laef blong hem. Hem i talem se: “Mi glad tumas blong tijim Baebol fultaem long ol narafala.” Sandra i gat janis ya blong halpem bigfala sista blong hem mo smol sista blong hem tu, blong tufala i save Jeova. Sandra i stap gohed long wok ya blong ‘mekem i gud long ol man,’ mo tu, from save blong hem long saed blong meresin, hem i stap givhan long olgeta we oli sik long taem blong ol asembli blong ol Witnes blong Jeova.—Galesia 6:10.
?Olsem wanem long ol samting ya we Sandra i dipen long olgeta bifo? Hem i naf blong talem se: “Tingting blong mi i klia. Mi no moa drong, mi no moa smok tabak, mo mi no moa tekem drag. Mi no nidim olgeta samting ya. Mi faenem finis, samting ya we mi bin lukaotem.”
[Tok blong makem poen pija long pej 9]
“Mi faenem finis samting ya we mi bin lukaotem”
[Bokis blong pija long pej 9]
Ol Rul Blong Baebol We Oli Wok
Ol stamba trutok blong Baebol we oli kam biaen oli bin halpem plante man blong oli kam fri long ol doti fasin we oli bos long olgeta bifo:
“Olgeta samting long bodi blong yumi mo long tingting blong yumi we oli stap mekem yumi doti long fes blong God, yumi mas sakemaot olgeta evriwan. Mo yumi mas traehad blong mekem fasin blong yumi i klin, i tabu, from we yumi stap ona gud long God, mo yumi man blong hem nomo.” (2 Korin 7:1) God i blesem ol man we oli bin sakemaot ol doti fasin blong olgeta, mo oli stap longwe long ol rabis fasin.
“Man we i stap ona long Hae God, hem i no laekem ol fasin nogud, i agens long olgeta.” (Ol Proveb 8:13) Wan man we i fraetgud long God, bambae hem i save kam fri long sam nogud fasin we oli stap holemtaet hem, olsem fasin blong tekem drag. Long rod ya nao, Jeova i save glad long man ya, be tu, man ya i blokem ol rabis sik we oli kasem ol man we oli stap tekem drag.
‘Stap aninit long han blong ol gavman mo ol haeman, mo obei long olgeta olsem we oli rula blong yu.’ (Taetas 3:1, NW ) Long plante kantri, man we i holem no i yusum sam drag i agensem loa. Ol trufala Kristin oli no holem no yusum ol drag we loa i putum tabu long olgeta.