Mekem Disisen Wan Samting We Yumi No Save Ronwe Long Hem
WAN dei, empera Napoleon Bonaparte we i rul long Franis long ol yia 1800, i talem se: “I no gat wan samting we i had moa i bitim fasin blong save mekem disisen, taswe fasin ya i wan samting we i sas tumas.” Ating yu agri wetem tufala tingting ya, from we bighaf blong ol man oli wantem bos long prapa laef blong olgeta. Be long sem taem we ol man oli wantem mekem olsem, oli lanem se samtaem i no isi nating blong jusum samting we oli mas mekem.
Nating se samting we yumi mas jusum i isi no i had, be yumi mas mekem disisen. Evri dei yumi mas mekem disisen long plante samting. Long moning taem yumi wekap, yumi mas jusum se bambae yumi werem wanem klos, bambae yumi kakae wanem, mo plante narafala disisen bakegen. Bighaf blong ol disisen ya oli no impoten. Ating yumi no nidim nating blong tingting plante bifo we yumi mekem ol disisen ya. Mo ating ol disisen ya oli no mekem se yumi wari tumas gogo yumi no slip, jes from we yumi wantem save se oli waes no nogat.
Defren olgeta, i gat sam disisen we oli impoten tumas. Long wol tede plante yangfala oli mas jusum se bambae oli mekem wanem long laef blong olgeta. Maet oli mas jusum wanem skul bambae oli go long hem, mo bambae oli skul go kasem hamas yia. Wan dei, bighaf blong olgeta bambae oli mas mekem disisen se bambae oli mared no nogat. Blong tekem wan gudfala disisen, olgeta we oli jusum blong mared oli mas askem ol kwestin olsem: ‘?Mi mi yang tumas yet? ?Mi mi bigman finis long tingting blong mi blong mi naf blong mared? ?Mi mi wantem mared wetem wanem kaen man no woman? No, samting we i moa impoten se, ?Mi mi nidim wanem kaen man no woman?’ Disisen we yumi mekem taem yumi jusum wan patna i impoten tumas from we bambae i gat paoa long ful laef blong yumi.
Taem i gat sam impoten disisen blong mekem, yumi nidim waes fasin from we glad blong yumi i dipen bigwan long wanem kaen disisen we yumi jus blong mekem. Sam man oli harem se oli naf blong mekem ol impoten disisen, mo maet oli sakemaot advaes we ol narafala oli wantem givim long olgeta. ?Be yu ting se i waes blong mekem olsem? Bambae yumi tokbaot samting ya long haf we i kam biaen.
[Foto Credit Line blong pija long pej 3]
Napoleon: From the book The Pictorial History of the World