Ol Kristin Woman We Oli Wosip Wetem Bilif—Oli Sas Long Ae Blong God
“Gudfala fasin blong woman i save trikim man isi nomo, mo fes we naes i no save stap longtaem. Be woman we i stap ona long Hae God, stret blong olgeta man evriwan oli stap leftemap nem blong hem.”—OL PROVEB 31:30.
1. ?Olsem wanem tingting blong Jeova long saed blong fasin naes idefren long tingting blong ol man blong wol?
OL MAN blong wol oli ting se i moa impoten blong gat naes fes mo bodi, speseli ol woman. Be Jeova i lukluk moa long ol gudfala fasin long hat blong yumi, we oli save kam moa naes taem yumi kam olfala. (Ol Proveb 16:31) Taswe, Baebol i givim advaes long ol woman se: “I nogud yufala i stap fasem hea blong yufala mo putum ol gol jen mo flas klos, blong flasem afsaed blong bodi blong yufala nomo. I moa gud we yufala i flasem man we i stap haed insaed long hat blong yufala. Yufala i save putum klos we oli no save kam nogud samtaem, hemia spirit we i kwaet mo kaen. Hemia nao fasin ya we God i tinghae tumas long hem.”—1 Pita 3:3, 4, NW.
2, 3. ?Olsem wanem ol woman long faswan handred yia oli givhan blong mekem gud nius i goaot moa, mo wanem profet tok blong Baebol we i talem samting ya?
2 Plante woman long Baebol oli gat gudfala fasin ya. Sam long olgeta ya long faswan handred yia, oli gat blesing blong givhan long Jisas mo ol aposol blong hem. (Luk 8:1-3) Biaen, plante Kristin woman oli wokhad blong talemaot gud nius. Sam woman oli givhangud long ol Kristin man we oli lidim kongregesen, olsem aposol Pol. Sam narafala woman oli soem kaen fasin, oli tekem ol narafala oli kam long haos blong olgeta. Mo samfala bakegen oli letem haos blong olgeta, blong kongregesen i mekem miting long hem.
3 Profet tok blong Baebol i talem se Jeova bambae i yusum ol woman long bigfala fasin, blong mekem ol stamba tingting blong hem oli kamtru. Olsem nao, profet tok blong Joel 2:28, 29 i talem se ol man mo ol woman tu, nating se oli yangfala no olfala, bambae oli kasem tabu spirit, mo bambae oli mekem wok ya blong talemaot gud nius blong Kingdom. Profet tok ya i stat kamtru long Pentekos long yia 33 K.T.a (Ol Wok 2:1-4, 16-18) Sam woman we tabu spirit i kamdaon long olgeta, oli kasem spesel paoa, olsem paoa blong talemaot ol profet tok. (Ol Wok 21:8, 9) Long faswan handred yia, ol woman blong bilif we oli olsem wan bigfala ami long saed blong spirit, oli gohed strong long wok blong prij, mekem se Kristin tijing i kasem plante ples long sot taem nomo. Taswe, samwe long yia 60 K.T., aposol Pol i raetem se gud nius ya, “ol man oli talemaot finis long olgeta man long wol.”—Kolosi 1:23.
Oli No Fraet, Oli Wok Strong, Mo Oli Tekem Ol Narafala Oli Kam Long Haos Blong Olgeta
4. ?From wanem Pol i presem sam woman long Kristin kongregesen long faswan handred yia?
4 Aposol Pol i gat bigfala tangkiu long ol woman we oli givhan long hem. Ol Kristin elda tede tu, oli gat bigfala tangkiu long ol woman we oli wok strong long wok blong prij. Sam woman we Pol i talem nem blong olgeta, i gat “Trifaena mo Trifosa, we tufala i stap mekem wok blong Masta blong yumi,” mo ‘Perisis, we hem i wan gudfala fren blong Pol. Woman ya i wok had tumas long wok ya blong Masta blong yumi.’ (Rom 16:12) Pol i tokbaot Yuodia mo Sintike tu, we ‘tufala i wok strong wetem hem long ol wok blong gud nius blong Kraes.’ (Filipae 4:2, 3) Prisila, wetem man blong hem, Akwila, tufala tu i wok wetem Pol. Tufala i “rere blong lusum laef blong tufala” from Pol, taswe Pol i talem se: “Mi mi wantem tumas blong talem tangkiu long tufala. . . Be i no mi nomo, long olgeta ples, ol grup blong ol Kristin man we oli no laen blong Isrel, olgeta tu oli glad long tufala.”—Rom 16:3, 4; Ol Wok 18:2.
5, 6. ?Wanem gudfala eksampol we Prisila i givim long ol sista tede?
5 ?Wanem i mekem se Prisila i wok strong mo i no fraet? Tok we yumi faenem long Ol Wok 18:24-26 i givhan long yumi blong ansa long kwestin ya. Ol vas ya oli soem se Prisila i wok wetem man blong hem blong givhan long Apolos, we hem i wan gudfala man blong toktok. Tufala i halpem Apolos blong kasem save long sam trutok we oli jes kamaot. Samting ya i soemaot klia se Prisila i wan woman we i stadigud long Tok blong God mo long ol tijing blong ol aposol. From samting ya, hem i gat ol nambawan fasin we i mekem se hem i sas long ae blong God mo long ae blong man blong hem, mo hem i givhan bigwan long faswan Kristin kongregesen. Tede tu, plante Kristin sista we oli stadigud long Baebol mo oli tekem ol kakae long saed blong spirit we Jeova i givim tru long “slef we i stret mo waes,” oli stap wokhad, mo olgeta tu oli sas.—Luk 12:42, NW.
6 Akwila mo Prisila i gat nambawan fasin blong tekem ol man oli kam long haos blong tufala. Long Korin, Pol i stap long haos blong tufala, taem hem i mekem smol bisnes blong hem blong somap haos tapolen. (Ol Wok 18:1-3) Taem tufala i muv i go long Efesas, mo biaen bakegen tufala i muv i go long Rom, tufala i gohed blong soemaot gudfala Kristin fasin ya blong tekem ol narafala oli kam long haos. Mo tu, tufala i letem haos blong tufala blong kongregesen i mekem miting long hem. (Ol Wok 18:18, 19; 1 Korin 16:8, 19) Long sem fasin, Nimfa mo Meri we i mama blong Jon Mak, tufala i letem haos blong tufala, blong kongregesen i mekem miting long hem.—Ol Wok 12:12; Kolosi 4:15.
Ol Woman Tede Tu Oli Sas
7, 8. ?Wanem gudfala tabu wok we plante Kristin woman tede oli stap mekem, mo oli save sua long wanem samting?
7 Long faswan handred yia, ol Kristin woman blong bilif, oli givhan bigwan blong mekem ol stamba tingting blong God oli kamtru, antap moa long saed blong wok blong talemaot gud nius. Tede, ol Kristin woman oli mekem sem samting. !Ol sista ya oli rili wok strong! Tingbaot Gwen, we hem i holemstrong long wok blong Jeova bitim 50 yia, go kasem we hem i ded long yia 2002. Man blong Gwen i talem se: “Olgeta man long taon ya oli save Gwen from we hem i prij oltaem. Hem i luk evri man olsem wan man we Jeova i save lavem hem mo we i save kasem ol promes blong Jeova. Gwen i stap tru long God, ogenaesesen blong God, mo long mifala ol prapa famle blong hem. Taem tingting blong mifala i foldaon, hem i talem ol gudfala toktok blong mekem mifala i haremgud bakegen. Ol fasin ya blong hem oli givhan bigwan long mi mo ol pikinini blong mitufala, long gudfala laef we mitufala i serem blong longtaem. Mifala i sore tumas we hem i no moa stap wetem mifala.” Gwen mo man blong hem, tufala i mared blong 61 yia.
8 Plante taosen Kristin woman, we samfala oli mared mo samfala oli no mared, oli stap mekem wok blong paenia mo misinari. Oli stap gohed blong talemaot tok blong Kingdom long ol bigbigfala taon mo long ol ples farawe long bus, mo oli stap glad long smol samting we oli gat we i naf nomo long olgeta. (Ol Wok 1:8) Plante long olgeta oli lego tingting ya blong gat pikinini mo wan haos blong olgeta, olsem nao, oli save spenem moa taem long wok blong Jeova. Sam long ol woman ya oli folem man blong olgeta we i seket no distrik elda, mo oli stap givhangud long hem. Plante taosen blong olgeta, oli wok long ol haos Betel long ol defren ples blong wol. Tru ya, ol woman ya we oli rere blong livim sam samting we olgeta nomo oli wantem, oli rili ‘ol gudgudfala samting blong ol narafala kantri’ we Jeova i stap fulumap haos blong hem long hem.—Hagae 2:7.
9, 10. ?Samfala oli talem wanem gudfala tok blong soemaot tangkiu long Kristin waef no mama blong olgeta?
9 Plante Kristin woman oli gat ol pikinini blong olgeta. Nating se oli mas lukaot long olgeta, oli gohed yet blong putum wok blong Kingdom long fasples long laef blong olgeta. (Matiu 6:33) Wan paenia sista we hem i no mared, i raetem se: “Bilif blong mama blong mi i strong we i strong, mo hem i givim wan gudfala eksampol long mi. Samting ya nao i pulum mi blong joen long wok blong fultaem paenia. Yes, mama blong mi i beswan patna we mi mi bin gat long wok blong paenia.” Wan man i tokbaot woman blong hem we i lukaot long faef gel blong tufala gogo oli bigwan. Hem i se: “Oltaem haos blong mifala i klin mo ol samting i stap long stret ples. Woman blong mi Bonnie, i no fulumap haos blong mifala wetem plante tumas samting, taswe i no nidim tumas taem blong klinim haos, mo famle i save spenem moa taem long ol samting long saed blong spirit. Mo tu, Bonnie i lukaotgud blong no westem mane olbaot, mekem se blong 32 yia, mi mi wok haftaem nomo, mo mi save spenem moa taem wetem famle blong mi mo long ol samting long saed blong spirit. Mo tu, woman blong mi i tijim ol pikinini blong mitufala blong wokhad. I no gat wan tok we mi save talem agensem hem, ol tok blong mi i blong presem hem nomo.” Tede, tufala ya i stap wok long hedkwota blong ol Witnes blong Jeova we i lukaot long wok blong ol Witnes long fulwol.
10 Wan narafala man we ol pikinini blong hem oli bigwan finis, i tokbaot woman blong hem, se: “Ol fasin blong Susan we mi laekem tumas, se, hem i lavem God mo ol man blong God, hem i traehad blong kasem save long tingting mo filing blong ol narafala, mo hem i no save giaman. Oltaem hem i holem tingting ya se i stret nomo we yumi givim bes blong yumi long Jeova. Mo hem i folem tingting ya long wok blong God mo long wok blong hem olsem wan mama.” Man ya i glad tumas long help we woman blong hem i givim long hem. Samting ya i mekem se man ya i save mekem ol bigfala wok long Kristin kongregesen, olsem wok blong elda, paenia, seket elda sam samtaem, mo wok long Hospital Liaison Committee. !Tru ya, ol woman olsem oli sas long ae blong man blong olgeta, long ae blong ol narafala Kristin, mo antap moa, long ae blong Jeova!—Ol Proveb 31:28, 30.
Ol Woman We Oli No Gat Man Blong Olgeta Oli Sas Tu
11. (a) ?Olsem wanem Jeova i soemaot se hem i tingbaot ol woman we oli holemstrong long hem, antap moa ol wido? (b) ?Ol Kristin wido mo ol narafala gudfala Kristin woman we oli no gat man blong olgeta, oli save sua long wanem samting?
11 Jeova i talem plante toktok long Baebol blong soem se hem i tingbaot ol wido. (Dutronome 27:19; Ol Sam 68:5; Aesea 10:1, 2) Fasin blong hem i stap sem mak yet. Hem i stap tingbaot ol wido, wetem ol mama we oli no gat man blong olgeta, ol woman we oli jusum blong no mared, mo ol woman we maet oli wantem mared be oli no save faenem wan Kristin man we i stret long olgeta. (Malakae 3:6; Jemes 1:27) Sipos yu yu wan long ol woman ya we yu stap holemstrong long Jeova, nating se yu no gat wan Kristin hasban blong halpem yu, yu save sua se yu yu sas long ae blong God.
12. (a) ?Olsem wanem sam Kristin sista oli soemaot se oli stap tru long Jeova? (b) ?Sam long ol sista ya oli mas winim wanem filing?
12 Tingbaot ol Kristin sista we oli no mared yet, from we oli gat strong tingting blong folem advaes blong Jeova, se oli mas faenem wan “man blong Masta” nomo. (1 Korin 7:39; Ol Proveb 3:1) Tok blong God i mekem promes long ol woman ya se: “![Jeova]! Olgeta we oli stap obei long yu, oltaem, yu yu stap mekem i gud tumas long olgeta.” (2 Samuel 22:26) Be, plante long ol woman ya oli faenem i had blong stap olsem we oli no mared. Wan Kristin sista i talem se: “Mi mi mekemap tingting blong mi blong mared nomo long wan man blong Masta. Be plante taem, wota blong ae blong mi i ron, taem mi luk ol fren blong mi oli stap mared long ol gudfala Kristin man, be mi mi stap mi wan yet.” Wan narafala sista i talem se: “Mi mi mekem wok blong Jeova blong 25 yia finis. Mi gat strong tingting blong stap tru long hem, be plante taem mi harem nogud blong stap mi wan.” Hem i gohed se: “Ol sista olsem mi, oli nidim tumas we ol narafala oli leftemap tingting blong olgeta.” ?Olsem wanem yumi save givhan long ol woman ya we oli stap holemstrong long God?
13. (a) ?Olgeta we oli go luk gel blong Jeftaha long taem bifo, oli givim wanem eksampol long yumi? (b) ?Yumi save mekem wanem narafala samting bakegen blong soem se yumi tingbaot ol sista long kongregesen we oli no mared?
13 Blong givhan long ol sista olsem, yumi save folem eksampol blong samfala long taem bifo. Olgeta ya oli luksave se gel blong Jeftaha i lego tingting blong mared, blong hem i save mekem wok blong God. ?Ale, oli mekem wanem blong leftemap tingting blong hem? “Evri yia, ol gel Isrel oli go stap fo dei wetem gel blong man Gilead ya Jeftaha, blong oli talem ol gudfala toktok long hem.” (Jajes 11:30-40, NW ) Yumi tu, yumi save talem ol gudfala toktok we i kamaot long hat blong yumi, long ol sista we oli no mared, we oli stap holemstrong long God mo loa blong hem.b ?Wanem narafala samting bakegen we yumi save mekem blong soem se yumi stap tingbaot olgeta? Long ol prea blong yumi, yumi save askem long Jeova blong givhan long ol gudfala sista ya we oli gat bilif, blong oli gohed strong long wok blong hem. I stret nomo we yumi soem long olgeta se yumi lavem olgeta, mo se Jeova mo Kristin kongregesen long fulwol i tinghae long olgeta.—Ol Sam 37:28.
Ol Mama We Oli No Gat Hasban, Oli Save Win
14, 15. (a) ?From wanem ol mama we oli no gat hasban, oli mas singaot Jeova blong givhan long olgeta? (b) ?Olsem wanem ol mama we oli no gat hasban oli save wok folem prea blong olgeta?
14 Ol Kristin mama we oli no gat hasban, olgeta tu oli fesem plante traem. Be oli save lukluk i go long Jeova, blong i givhan long olgeta blong tijim ol pikinini blong olgeta folem ol rul blong Baebol. Sipos yu yu wan mama we yu no gat hasban, i tru se yu no save mekem evri wok blong mama mo papa wantaem. Nating se i olsem, sipos yu prea long Jeova wetem bilif, bambae hem i givhan long yu blong mekem bigfala wok blong yu. Tingbaot: Sipos yu go long garen, nao i gat plante kakae i stap blong yu karem i kam long haos. ?Bambae yu mekem wanem? ?Sipos i gat wan trak i stap we yu save yusum, bambae yu livim trak ya, yu karem ol kakae ya long solda blong yu go kasem haos? !Nogat! Long sem fasin, taem tingting mo filing blong yu i trabol tumas, yu no mas traem blong winim samting ya yu wan. Yu mas askem long Jeova blong i givhan long yu. Yes, hem i wantem se yu singaot long hem. Ol Sam 68:19 i talem se: “Yumi presem [Jeova], we evri dei, hem i stap karem ol hevi samting blong yumi.” Mo tu, 1 Pita 5:7 i talem se yu mas putum ol trabol blong yu long han blong Jeova, ‘from we oltaem hem istap tingbaot yu.’ Ale, taem ol trabol mo wari oli kam hevi tumas, yu mas talemaot olgeta long Papa blong yu long heven, mo yu mas mekem samting ya “oltaem.”—1 Tesalonaeka 5:17; Ol Sam 18:6; 55:22.
15 Olsem nao, yu we yu mama, ating yu wari long ol pikinini blong yu long skul. Maet yu wari long ol samting we i save traem bilif blong olgeta, mo long bigfala paoa we ol fren oli save gat long olgeta. (1 Korin 15:33) I stret nomo we yu wari long ol samting ya. Be yu save prea long saed ya tu. I gud yu prea wetem ol pikinini blong yu bifo we oli go long skul, maet long taem we yufala i mekem vas blong dei tugeta. Long prea blong yu, yu save tokbaot ol wari long saed blong olgeta ya. Taem ol yangfala oli harem prea we i kamaot long hat blong yu mo we i talem klia ol trabol we oli fesem, samting ya i save gat bigfala paoa long tingting blong olgeta. Antap moa, taem Jeova i luk we yu traehad wetem longfala tingting blong putum Tok blong Hem long hat blong ol pikinini blong yu, bambae hem i blesem yu from. (Dutronome 6:6, 7; Ol Proveb 22:6) Yu no mas fogetem se: “Hae God i stap lukluk long ol stret man, mo i stap lesin blong harem ol prea blong olgeta.”—1 Pita 3:12; Filipae 4:6, 7.
16, 17. (a) ?Wan boe i talem wanem blong tokbaot lav we mama blong hem i soem? (b) ?Gudfala tingting we mama ya i gat long saed blong spirit i mekem wanem long ol pikinini blong hem?
16 Tingbaot Olivia, we hem i mama blong sikis pikinini. Man blong hem we i no gat bilif, i lego olgeta taem laswan pikinini i bon, ale Olivia i traehad blong tijim ol pikinini blong hem long ol rod blong God. Boe blong Olivia we nem blong hem Darren, naoia i gat 31 yia blong hem, mo hem i wan Kristin elda we i mekem wok blong paenia. Taem papa blong famle ya i lego olgeta, Darren i gat 5 yia blong hem. Smoltaem biaen, wari blong Olivia i kam antap moa, taem Darren i kasem wan strong sik, we i stap givim trabol long hem yet. Darren i tingtingbak long taem ya we hem i sik bigwan, i se: “Mi tingbaot yet we mi sidaon long bed blong mi long hospital, mi wet nomo long Mama. Evri dei, hem i kam, i sidaon klosap long mi, i ridim Baebol long mi. Biaen, hem i singim wan sing blong Kingdom, nem blong hem, ‘Jeova, Mifala i Tangkiu Long Yu.’c Kam kasem tede, mi laekem sing ya bitim ol narafala sing blong Kingdom.”
17 Olivia i trastem Jeova mo i lavem hem. Samting ya i mekem se hem i karem gudfala frut long wok blong mama, nating se hem i no gat wan hasban. (Ol Proveb 3:5, 6) Yumi luk gudfala tingting we hem i soem, taem yumi tingbaot ol mak we hem i wantem ol pikinini blong hem blong kasem. Darren i talem se: “Oltaem Mama i leftemap tingting blong mifala blong kasem mak ya blong prij fultaem. From samting ya, mi wetem fo long ol faef sista blong mi, mifala i joen long wok blong prij fultaem. Be Mama i no tokflas from. Tru ya, mama blong mi i gat ol nambawan fasin we mi mi stap traehad blong folem.” Maet i no evri pikinini we i gohed olwe blong mekem wok blong God, olsem ol pikinini blong Olivia. Be taem wan mama i mekem bes blong hem blong folem ol rul blong Baebol long laef blong hem, hem i save sua se Jeova bambae i lavem hem, i lidim hem, mo i givhan long hem.—Ol Sam 32:8.
18. ?Olsem wanem yumi save soem se yumi tinghae long Kristin kongregesen we Jeova i givim?
18 Plante taem, God i yusum Kristin kongregesen blong givhan long yumi. Long kongregesen, oltaem yumi kasem kakae long saed blong spirit, i gat ol Kristin brata sista we yumi save joen wetem olgeta, mo i gat ol man we oli strong long saed blong spirit we God i givim olgeta olsem “ol presen.” (Efesas 4:8) Ol gudfala elda ya oli wokhad blong mekem kongregesen i stanap strong, mo oli tingting speseli long “ol pikinini we oli no gat papa blong olgeta, mo ol widowoman, long ol trabol we i kasem olgeta.” (Jemes 1:27) Taswe, yu no mas stap yu wan oltaem, be yu mas kam klosap long ol man blong God.—Ol Proveb 18:1; Rom 14:7.
Woman We i Ona Long Man Blong Hem, i Naes
19. ?From wanem fasin blong obei long hasban i no daonem woman, mo olsem wanem Baebol i soemaot samting ya?
19 Jeova i wokem woman blong i givhan long man. (Jenesis 2:18) Taswe, taem woman i ona mo obei long man blong hem, fasin ya i no daonem hem se hem i no impoten olsem man blong hem. Nogat. Defren olgeta, fasin ya i leftemap woman, i givim janis long hem blong yusum waes blong hem mo ol gudfala fasin blong hem long rod we God i wantem. Ol Proveb japta 31 i tokbaot ol defdefren wok blong ol gudfala waef long Isrel bifo. Oli givhan long ol puaman, oli planem garen, mo oli pem graon. Yes, “woman olsem, man blong hem i stap putum tingting blong hem i stap strong long hem. Mo from we hem i mekem olsem, oltaem hem i no save sot long wan samting.”—Vas 11, 16, 20.
20. (a) ?Kristin woman i mas gat wanem tingting long saed blong waes mo paoa we God i givim long hem? (b) ?Wanem ol gudfala fasin blong Esta, mo from samting ya Jeova i yusum hem olsem wanem?
20 Wan woman we i gat tingting daon mo i onagud long God, i no save gat fasin tinghae mo i no save traem blong winim man blong hem. (Ol Proveb 16:18) Hem i no tingting moa long wan wok long wol we i save leftemap hem, be hem i yusum waes mo paoa we God i givim long hem, blong mekem i gud long ol narafala—olsem famle blong hem, ol Kristin brata sista, ol man raonabaot long hem, mo antap moa, Jeova. (Galesia 6:10; Taetas 2:3-5) Tingbaot Kwin Esta we Baebol i tokbaot. Nating se hem i naes we i naes, hem i no gat flas tingting, mo hem i rere blong obei oltaem. (Esta 2:13, 15) Afta we hem i mared, hem i soem bigfala respek long man blong hem, King Sekses. Hem i defren olgeta long Vasti, we hem i faswan woman blong king. (Esta 1:10-12; 2:16, 17) Mo tu, Esta i lesin long tingting blong bigfala kasen brata blong hem Modekae. Taem hem i kam kwin tu, hem i folem tingting blong Modekae long sam samting. !Be hemia i no min se Esta i wan slak woman! Hem i no fraet blong mekem rabis fasin blong haeman ya Haman i kam long klia ples. Man ya i wan had man we i mekem wan rabis plan blong kilim olgeta laen blong Isrel evriwan. Jeova i yusum Esta long bigfala fasin blong sevem ol man blong Hem.—Esta 3:8–4:17; 7:1-10; 9:13.
21. ?Olsem wanem wan Kristin woman i save kam sas moa long ae blong Jeova?
21 Long taem bifo mo tede tu, i gat plante woman we oli onagud long Jeova mo holemstrong long wosip blong hem. Taswe, ol woman we oli onagud long Jeova, oli sas long ae blong hem. Ol Kristin sista, yufala i mas letem Jeova i jenisim fasin blong yufala sloslo. Bambae hem i yusum spirit blong hem blong mekem yufala i kam moa naes, olsem wan “plet” we i blong yusum long lafet. Olsem nao, bambae yufala “i rere blong mekem wanem gudfala wok we i stap.” (2 Timoti 2:21; Rom 12:2) Baebol i tokbaot woman blong wosip we i sas long ae blong God, i se: “Hadwok blong hem bambae i karem gudfala frut, mo ol man long get blong taon bambae oli luk wok blong hem nao bambae oli presem hem from.” (Ol Proveb 31:31, NW ) I gud we samting ya i kamtru long yufala evriwan, ol Kristin woman.
[Ol Futnot]
a K.T. i minim Kristin Taem.
b Blong save ol gudfala toktok blong talem long olgeta, lukluk Wajtaoa blong Maj 15, 2002, pej 26-28.
c Namba 212 long Mekem Singsing long Jeova, we ol Witnes blong Jeova oli wokem.
?Yu Yu Tingbaot?
• ?From wanem sam Kristin woman long faswan handred yia oli sas long ae blong Jeova?
• ?Wanem samting i mekem plante sista long taem blong yumi oli sas long ae blong God?
• ?Olsem wanem Jeova i stap givhan long ol mama we oli no gat man blong olgeta, mo ol narafala sista we oli no mared?
• ?Olsem wanem woman i save soem wetem fulhat blong hem se hem i respektem man olsem hed blong hem?
[Bokis blong pija long pej 17]
SAM EKSAMPOL WE YU SAVE TINGTING DIP LONG OLGETA
?Yu yu glad blong tingting dip long eksampol blong sam narafala woman blong bilif we Baebol i tokbaot? Ale, plis ridim ol vas ya, nao tingting dip blong traem luksave ol fasin mo rul we yu save traehad moa blong folem long laef blong yu.—Rom 15:4.
◆ Sera: Jenesis 12:1, 5; 13:18a, NW; 21:9-12; 1 Pita 3:5, 6.
◆ Ol woman Isrel we oli gat gladhat blong givhan long narafala: Eksodas 35:5, 22, 25, 26; 36:3-7; Luk 21:1-4.
◆ Debora: Jajes 4:1–5:31.
◆ Rut: Rut 1:4, 5, 16, 17; 2:2, 3, 11-13; 4:15.
◆ Woman blong Sunem: 2 King 4:8-37.
◆ Wan woman Kenan: Matiu 15:22-28.
◆ Mata mo Meri: Mak 14:3-9; Luk 10:38-42; Jon 11:17-29; 12:1-8.
◆ Tabita: Ol Wok 9:36-41.
◆ Fo gel blong Filip: Ol Wok 21:9.
◆ Fibi: Rom 16:1, 2.
[Tok blong pija long pej 15]
?Yu yu stap talem ol gudfala toktok long ol sista we oli no mared mo we oli holemstrong long loa blong God?
[Tok blong pija long pej 16]
?Yu save tokbaot wanem samting long prea blong yu bifo we ol pikinini oli go long skul?