Oli Pulum Ol Studen Blong Gilead Blong Tokbaot “Ol Bigbigfala Wok Ya We God i Mekem”
WAN bigfala grup blong 6,635 man we oli kamaot long 52 kantri, i stap taem oli givim ol setifiket long ol studen blong namba 115 klas blong Wajtaoa Baebol Skul blong Gilead, long Septemba 13, 2003.
Oli lesin long ol advaes we oli stanap long Baebol we ol brata oli givim long ol 48 studen blong klas ya, se oli mas tokbaot “ol bigbigfala wok ya we God i mekem” long ol man blong 17 kantri. (Ol Wok 2:11) Ol kantri ya, hemia ol ples we ol misinari ya bambae oli mekem wok blong olgeta olsem man blong tijing Tok blong God.
Long fastok blong hem, Brata Stephen Lett, we hem i wan memba blong Hed Kampani blong ol Witnes blong Jeova mo i presiden blong miting ya blong givimaot setifiket, i talem long ol studen se: “Taem yufala i go prij long niufala teritori blong yufala, nomata weples yufala i go long hem mo wanem i hapen long yufala, i gat plante moa man i stap wetem yufala i bitim ol man we i agensem yufala.” Brata Lett i yusum stori we i stap long nambatu buk blong King, japta 6, mo i talem long ol studen se oli save trastem Jeova God mo ol bilian enjel, we bambae oli givhan long olgeta taem oli go talemaot “ol bigbigfala wok ya we God i mekem.” (2 King 6:15, 16) Ol Kristin blong faswan handred yia oli fesem fasin agens mo ol man oli no intres long wok blong prij blong olgeta, mo tede ol misinari oli fesem ol semfala traem. Nating se i olsem, oli save trastem God mo ol enjel mo ogenaesesen blong Hem long wol ya, we bambae i sapotem olgeta long wok blong olgeta.—Ol Sam 34:7; Matiu 24:45.
Talemaot “Ol Bigbigfala Wok Ya We God i Mekem”
Harold Corkern, wan memba blong Branj Komiti blong Yunaeted Stet i givim namba tu tok blong miting ya. Tok blong hem se “Tingting Stret—Nao Bambae Yu Haremgud Mo Yu Karem Frut Long Wok Blong Misinari.” Brata Corkern i soemaot se man we i putum tingting blong hem i stap strong long wan samting we biaen i no kamtru, tingting blong man ya i save foldaon bigwan, olsem Ol Proveb 13:12 i talem. Plante taem, tingting blong man i foldaon from we hem i bin putum tingting blong hem i stap strong long wan samting we i no stret mo i neva kamtru. Ol misinari oli mas gat wan tingting we i stret long olgeta wan mo long ol narafala tu. Oli mas save se bambae oli mekem sam mastik, be oli no mas letem ol mastik ya i daonem tingting blong olgeta taem oli halpem ol narafala blong save “ol bigbigfala wok ya we God i mekem.” Brata Corkern i pulum ol niufala misinari blong trastem Jeova, God ya “we i stap mekem i gud long olgeta we oli stap traem faenem hem.”—Hibrus 11:6.
Biaen, Brata Daniel Sydlik, wan memba blong Hed Kampani i givim tok ya “?Wanem Ya Kristin Hop?” Hem i talem se: “Hop i wan nambawan fasin we ol Kristin oli mas gat. Hem i wan rul blong stret fasin we i mekem se man i kam fren blong God. Wan man we i no Kristin i no save gat semfala hop olsem yumi.” Brata Sydlik i tokbaot defren haf blong Kristin hop we i halpem wan man blong tingbaot ol gudfala saed nomo taem hem i fesem sam trabol long laef. “Hop i givim paoa long yumi mo i givim tingting blong win long laef blong evri dei.” Wan Kristin we i gat hop i luk Jeova olsem wan God we i gat wan stamba tingting mo hem i glad blong wok blong Hem.—Rom 12:12.
Brata Wallace Liverance, we i rejistarem ol studen blong Gilead Skul, i pulum ol studen blong folem advaes ya se, “Letem Tabu Spirit i Lidim Yufala.” (Galesia 5:16) Hem i eksplenem olsem wanem Baruk, sekretari blong Jeremaea, klosap hem i no moa wokbaot folem tabu spirit. Baruk i kam slak mo hem i stat lukaotem ol gudgudfala samting blong hem wan nomo. (Jeremaea 45:3, 5) Biaen Brata Liverance i talem se sam man oli stop blong folem Jisas mo oli sakemaot trutok, mekem se oli no save kasem laef. Oli mekem olsem from we oli no kasem save ol tijing blong Kraes, mo oli harem nogud from we oli no kasem ol samting we oli wantem long saed blong bodi long taem ya. (Jon 6:26, 27, 51, 66) Wok blong ol misinari i blong pulum tingting blong man i go long Man we i Wokem olgeta samting mo long stamba tingting blong Hem. ?Ol misinari oli lanem wanem from stori ya? Ol studen ya oli lanem se oli no mas wari se bambae oli gat wan posisen no nogat, bambae oli kasem bigfala tangkiu long ol man no nogat, mo oli no mas yusum wok blong olgeta olsem misinari blong kasem sam samting blong olgeta wan nomo.
Brata Mark Noumair, wan tija blong Gilead Skul, i askem kwestin ya se: “?Bambae Yu Yu Wan Man We i Givim No Wan Man We i Tekem?” Tok blong hem i stanap long Jajes 5:2 we i presem olgeta man Isrel wanwan from we oli volontia blong wok olsem soldia long ami blong Barak. Tok ya i presem ol studen blong Gilead we oli soem wan gudfala tingting taem oli ansa long Bigfala Barak, hemia Jisas Kraes, we i singaot olgeta blong joen long wan faet long saed blong spirit. Ol soldia blong Kraes oli mas traehad blong mekem lida blong olgeta i glad long olgeta. Brata Noumair i talem long ol studen se: “Taem yumi stat tingbaot yumi wan nomo, se olsem wanem bambae yumi haremgud, ale bambae yumi stop nao blong faet agensem ol enemi . . . Wok blong misinari i no wan bisnes long saed blong yu. Hem i wan bisnes long saed blong Jeova, hae rul blong hem, mo stamba tingting blong hem we i mas kamtru. Yumi no wok olsem misinari from we yumi wantem we Jeova i mekem yumi glad, yumi wok blong hem from we yumi lavem hem.”—2 Timoti 2:4.
Brata Lawrence Bowen, wan tija blong Gilead Skul, hem i givim nekis tok we taetel blong hem se, “Mekem Tok Blong Yu i Wok Long Laef Blong Olgeta, Blong Oli Tabu.” (Jon 17:17) Hem i talem se ol studen blong namba 115 klas oli tabu minista blong God. Taem oli skul long Gilead yet oli joen long wok blong prij, oli traem faenem ol man we hat blong olgeta i stret mo oli lavem trutok. Olsem Jisas mo ol disaepol blong hem, toktok blong ol studen ya ‘i no kamaot long olgeta nomo.’ (Jon 12:49, 50) Oli wokhad blong talemaot tok we i kamaot long God, hemia trutok ya we i givim laef. Ol pleplei mo ol stori blong ol studen i soemaot bigfala paoa we Baebol i gat long ol man we oli bin prij long olgeta.
Advaes Mo Ekspiriens i Leftemap Tingting
Brata Anthony Pérez mo Brata Anthony Griffin, we tufala i memba blong Sevis Dipatmen blong branj ofis long Yunaeted Stet, tufala i askem sam kwestin long sam memba blong ol Branj Komiti blong defren kantri long wol. Sam long olgeta oli wok olsem misinari. Oli tokbaot ol traem we ol niufala misinari oli fesem, mo oli givim sam advaes we i wokgud, we i stanap long prapa ekspiriens blong olgeta. Long ol traem ya, i gat kalja we i defren, weta we i hot lelebet ful yia, no sam skul no gavman we oli defren olgeta long samting we ol studen oli save bifo. ?Wanem bambae i halpem ol niufala misinari blong dil wetem niufala fasin ya blong laef? Oli mas lavem Jeova, oli mas lavem ol man, oli no mas lukluk biaen, mo oli no mas hareap blong tekem sam disisen we oli no tingting gud long hem fastaem. Wan memba blong wan branj komiti i talem se: “Ol man we oli stap long kantri we mifala i go prij long hem, oli bin stap long ples ya plante handred yia finis bifo mifala i kam. Sipos oli naf blong laef olsem, ale, mifala tu i save stap mo lan blong laef long ples ya. Evritaem mifala i bin fesem wan traem, mifala i luk ol traem ya olsem wan janis blong wokem ol gudfala fasin. Sipos yufala i stap prea oltaem mo trastem tabu spirit blong Jeova, nao bambae yufala i haremsave we tok ya blong Jisas i tru se, ‘mi stap wetem yufala oltaem.’ ”—Matiu 28:20.
Brata Samuel Herd, wan memba blong Hed Kampani, i givim stamba tok blong program ya se, “Gohed Blong Tokbaot Ol Bigbigfala Wok Ya We God i Mekem.” Taem ol disaepol blong Jisas oli kasem tabu spirit long Pentekos 33 K.T. samting ya i givim paoa long olgeta blong talemaot “ol bigbigfala wok ya we God i mekem.” ?Tede, wanem samting i save givim paoa long ol misinari blong oli wok strong blong talemaot Kingdom blong God? Semfala tabu spirit ya. Brata Herd i pulum ol studen blong ‘mekem wok blong Masta we tingting blong olgeta i glad long hem oltaem,’ oli mas glad long wok blong olgeta, mo neva fogetem bigfala wok we ol brata oli bin mekem blong trenemgud olgeta. (Rom 12:11) Brata Herd i talem se “Baebol i wan bigbigfala wok blong God. Yufala i mas neva ting nating long paoa blong hem. Mesej blong hem i wan samting we i laef. Hem i save go dip insaed long tingting blong man blong kasem ol samting we i impoten moa. Yufala i mas yusum hem blong stretem ol samting long laef blong yufala. Yufala i mas letem hem i jenisim fasin blong tingting blong yufala. Yufala i mas holemtaet fasin blong yufala blong tingting gud taem yufala i stadi, ridim, mo tingting dip long Baebol . . . Yufala i mas putum mak ya mo gat strong tingting blong yusum trening we yufala i kasem long Gilead blong talemaot ‘ol bigbigfala wok ya we God i mekem.’ ”
Oli ridimaot ol mesej we oli kam long ol brata sista raon long wol, oli givim ol setifiket, mo biaen wan studen i ridim wan leta we klas ya i bin raetem blong talem tangkiu from trening we oli kasem. Biaen Brata Lett i finisim nambawan miting ya, taem hem i tokbaot 2 Kronikel 32:7, 8 mo Dutronome 20:1, 4. Hem i joenem lastok blong hem wetem fastok blong hem, i talem se: “Dia studen, taem yufala i gohed, taem yufala i stap wokbaot long faet blong yufala long saed blong spirit long niufala teritori blong yufala, rimemba se oltaem bambae Jeova i stap wokbaot wetem yufala. Neva foget se i gat plante moa man i stap wetem yufala, i bitim ol man we i agensem yufala.”
[Tok blong pija long pej 25]
KAONTEM KLAS YA
Oli kamaot long hamas kantri: 7
Oli go wok long hamas kantri: 17
Hamas studen: 48
Oli gat hamas yia: 33.7
Hamas yia long trutok: 17.8
Hamas yia finis oli prij fultaem: 13.5
[Tok blong pija long pej 26]
Klas Namba 115 Blong Wajtaoa Baebol Skul Blong Gilead
Long ol nem aninit, yumi kaontem ol laen i stat long fored i gobak biaen, mo stat long lefsaed i go raetsaed.
(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3)Beckett, M.; Nichols , S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.