Laef Stori

Fasin Blong Stap Glad Long Samting We Mi Gat i Givim Paoa Long Mi

BENJAMEN IKECHUKWU OSUEKE I TALEM STORI YA

Afta we mi mi statem wok blong fultaem paenia, mi go luk papa mo mama blong mi. Be taem papa blong mi i luk mi, hem i holem sot blong mi mo i stat singaot se, “!Yu stilman!” Ale hem i tekem smol busnaef blong hem i kilim mi long flat saed blong naef ya. Ol man raonabaot, oli resis i kam blong luk wanem i stap hapen long haos blong mifala. ?Be wanem ya we mi mi stilim? Bambae mi eksplenem.

MI MI bon long 1930 long vilej ya Umuariam, long saot is blong Naejeria. Mi mi fasbon blong ol seven pikinini long famle. Faswan long ol sista blong mi i ded taem hem i gat 13 yia. Papa mo mama blong mi oli stap go long Anglikan Jos. Papa blong mi i wan fama, mo Mama i stap mekem smol bisnes blong hem nomo blong pem mo salem ol samting. Mama i stap wokbaot 30 kilometa i go kasem maket blong pem wan tin blong pam oel mo i kambak long let aftenun long sem dei. Nekis dei blong hem, hem i wokbaot 40 kilometa i go long ples blong ol tren, blong salem oel ya. Sipos hem i winim smol mane moa antap long praes we hem i bin pem oel ya long hem, plante taem hemia 20 vatu nomo, ale hem i pem sam kakae blong famle mo i kambak long sem dei. Hemia nao wok we hem i stap mekem blong 15 yia gogo kasem taem we hem i ded long 1950.

Mi mi go long wan skul we i blong Anglikan Jos long vilej blong mi nomo, be blong finisim edukesen blong mi long praemari skul mi mas go stap long wan narafala haos we i stap 35 kilometa longwe. Biaen, from we papa mo mama oli no gat mane blong pem hae skul blong mi, mi stat blong lukaot wok. Fastaem mi wok blong wan masta we i gad long ples blong tren long Lagos, long wes saed blong Naejeria, mo biaen mi wok blong wan man blong gavman long Kaduna, long not blong Naejeria. Afta, mi wok olsem wan klak blong wan loea long Siti blong Benin, long wes blong Naejeria, mo biaen bakegen mi wok long wan ples blong katem ol timba. Long 1953 mi go long Kamerun blong stap wetem kasin brata blong mi, mo hem i givhan long mi blong faenem wan wok long plantesen blong wokem kaojuk. Oli stap pem mi samwe long 1,000 vatu long wan manis. Olgeta wok ya we mi mekem mi no kasem big mane from, be mi glad nomo long kakae ya we i naf long mi.

Wan Puaman i Givim Wan Sas Samting Long Mi

Silvanus Okemiri i wan Witnes blong Jeova we i wok wetem mi. Silvanus i tekem evri janis we hem i gat blong serem save blong Baebol wetem mi taem mitufala i stap katem gras mo putum i goraon long ol tri blong kaojuk. Mi lesin long wanem we hem i stap talem be mi no rili tinghevi long ol tok blong hem. Taem kasin blong mi i faenemaot se mi bin storian wetem ol Witnes, hem i traem blong mekem tingting blong mi i foldaon. Hem i wonem mi se: “Benjamen. Yu no go luk Masta Okemiri. Hem i wan Jeova ya mo wan puaman. Man we i stap joen wetem hem bambae i kam puaman olsem hem nomo.”

Long stat blong yia 1954, mi no moa naf blong wok long kampani ya from wok i strong tumas, mekem se mi gobak long vilej. Long ol taem ya, Anglikan Jos i gat ol strong loa long saed blong fasin we i klin mo gud. Taswe, taem mi gruap mi no laekem nating fasin blong slip olbaot. Be, mi harem nogud long fasin tu fes we ol man we oli go long jos oli stap mekem. Oli stap talem se oli strong blong folem ol rul blong Baebol, be fasin we oli stap mekem i defren olgeta. (Matiu 15:8) Oltaem, mi mo papa blong mi, mitufala i rao long saed ya, mekem se mi no moa frengud wetem papa. Ale wan naet mi lego haos mo mi no moa gobak.

Mi muf i go long Omoba, wan smol taon we i gat tren stesen long hem. Long ples ya mi luk ol Witnes blong Jeova bakegen. Mi save gud Priscilla Isioch we hem i blong vilej blong mi, mo hem i givim tu smol buk long mi, hemia “This Good News of the Kingdom” mo After Armageddon​—God’s New World.a Mi laekem tumas ol toktok we mi ridim long tufala buk ya, mo mi luksave nao se mi faenem trutok. Long jos blong mi, mifala i neva stadi long Baebol; mifala i lanem nomo ol tijing blong man. Be ol buk blong ol Witnes i yusum plante vas blong Baebol.

I no bitim wan manis yet, mi askem long Brata mo Sista Isiocha se wetaem oli stap go long jos blong olgeta. Fastaem ya we mi go long miting blong ol Witnes blong Jeova, mi no kasem save long wan samting nating. Stadi blong Wajtaoa blong wik ya i tokbaot faet we ‘Gog blong Magog’ bambae i mekem, we buk blong Esikel i tokbaot. (Esikel 38:​1, 2) Fulap tok we oli yusum long miting ya, mi neva save bifo, be mi glad long kaen fasin we oli soem blong welkamem mi, mekem se long nekiswan Sande, mi wantem go bakegen long miting. Long namba tu miting oli tokbaot wok blong prij. Mi askem Priscilla se oli stap go long wok blong prij wetaem. Long namba tri Sande, mi karem wan smol Baebol mo mi joen wetem olgeta long wok blong prij. Mi no gat wan basket blong prij mo ol buk long saed blong Baebol. !Be nating, mi kam wan man blong talemaot Kingdom mo mi givim ripot long en blong manis!

I no gat man i stadi Baebol wetem mi, be taem mi stap go long haos blong famle Isiocha, mi lanem ol tok long Baebol we oli leftemap tingting mo we oli mekem bilif i strong, mo mi karem sam buk long saed blong Baebol. Long Disemba 11, 1954 long wan distrik asembli long Aba, mi soemaot se mi givim laef blong mi i go long Jeova taem mi tekem baptaes. Kasin brata we mi stap long haos blong hem long taon ya, hem i famle long saed blong papa, i no moa givim kakae mo trening long mi mo hem i no givim mane long mi from wok we mi mekem blong hem. Be mi no kros long hem; mi glad nomo from we mi gat wan gudfala fasin fren wetem God. Samting ya i mekem we mi haremgud mo mi gat pis long tingting. Ol Witnes we oli stap long ples ya oli givhan long mi. Famle Isiocha oli givim kakae long mi, mo sam narafala oli givim mane long mi blong yusum blong pem mo salem sam samting. Long medel blong yia 1955, mi pem wan sekenhan baskel, mo long Maj 1956, mi statem wok blong fultaem paenia. Smoltaem biaen, mi pem finis ol kaon blong mi. Mane we mi winim long bisnes blong mi i smol nomo, be mi naf blong lukaot long mi wan. Ol samting we Jeova i givim oli naf long mi.

Mi “Stilim” Ol Brata Mo Sista Blong Mi

Naoia we mi stap mi wan, mi gat strong tingting blong givhan long ol stret brata mo sista blong mi blong oli kasem save long saed blong spirit. Papa i no glad nating se mi kam wan Witnes. ?Taswe, olsem wanem mi save givhan long ol brata sista blong mi blong save trutok? Mi askem Papa blong mi blong yusum mane blong mi blong lukaot long smol brata blong mi, Ernest, ale papa i letem hem i kam stap wetem mi. Kwiktaem nomo, Ernest i laekem trutok mo hem i tekem baptaes long yia 1956. Ol jenis we Ernest i mekem long laef blong hem i mekem we papa i agensem mi moa. Nating se i olsem, wan long ol sista blong mi we i mared finis, hem tu i kam long trutok wetem man blong hem. Taem mi askem namba tu sista blong mi, Felicia, blong kam stap wetem mi taem hem i spel long skul, papa i no wantem nating, be hem i letem sista ya i kam. Ale, i no longtaem, Felicia tu i tekem baptaes olsem wan Witnes blong Jeova.

Long 1959, mi go blong tekem namba tri sista blong mi, Bernice, blong i kam stap wetem Ernest. Long taem ya nao we papa i rao long mi, mo i talem se mi stap stilim ol pikinini blong hem. Hem i no luksave se olgeta wanwan oli mekem prapa disisen blong olgeta blong wosipim Jeova. Papa i tok strong se neva bambae i letem Bernice i kam stap wetem mi. Be han blong Jeova i no sot, from we long nekis yia blong hem, Bernice i kam stap wetem Ernest taem hem i spel long skul. Mo olsem ol narafala sista blong hem, Bernice tu i laekem trutok mo i tekem baptaes.

‘Lanem Fasin Blong Stap Glad Long Samting We Mi Gat’

Long Septemba 1957, mi statem wok blong spesel paenia, minim se evri manis mi spenem 150 aoa long wok blong prij. Mi mo fren blong mi, Sunday Irogbelachi, mitufala i wok long wan bigfala teritori long Akpu-na-abuo, Etche. Long faswan seket asembli we mifala i go long hem i gat 13 long grup blong mifala we oli tekem baptaes. !Mifala i glad blong luk se naoia i gat 20 kongregesen long ples ya!

Long 1958, mi mitim Christiana Azuike, wan fultaem paenia we i joen wetem kongregesen long is saed blong Aba. Mi laekem strong tingting we hem i gat long wok blong Jeova, mo long Disemba long sem yia ya mitufala i mared. Long stat blong yia 1959, oli putum mi long wok blong elda we i visitim ol kongregesen mo leftemap tingting blong ol brata long saed blong spirit. Mo stat long taem ya go kam kasem 1972, mi mo waef blong mi i visitim ol kongregesen blong ol man blong Jeova long Is mo Wes blong Naejeria.

Ol wanwan kongregesen oli stap longwe long narawan, mekem se mi yusum baskel blong go luk ol brata. Taem mifala i visitim ol kongregesen long ol bigfala taon, ol brata oli pem taksi blong karem mifala i go long nekis wan kongregesen. Long samfala ples mifala i slip long ol rum we oli wokem floa blong hem long graon nomo mo i no gat siling long hem. Mifala i slip long ol bed we oli wokem long wan kaen pamtri we oli kolem raffia. Sam long ol bed ya oli gat matres we oli wokem long gras mo we oli kavremap long mat; sam bed oli no gat matres nating. Mifala i rere blong kakae enikaen kakae nomo, mo mifala i no wari sipos mifala i kakae smol nomo, from we mifala i lan finis blong stap glad nomo long wanem we mifala i gat. Mifala i haremgud long wanem we mifala i kasem, mo samting ya i mekem we ol brata we mifala i stap long haos blong olgeta oli glad tu. Long taem ya, sam long ol taon oli no gat lektrik, taswe oltaem mifala i mas karem karsin laet blong mifala. Nating se i gat sam samting we i had, be mifala i glad taem mifala i joen wetem ol brata long kongregesen.

Long ol yia ya, mifala i luksave moa, mining blong ol tok ya blong aposol Pol: “Be sipos yumi gat kakae blong yumi mo klos blong yumi, hemia i naf, yumi save harem gud.” (1 Timoti 6:8) Pol i lanem wan nambawan fasin taem hem i kasem ol traem. ?Wanem fasin ya? Hem i talem se: “Sipos mi trabol, be mi save rod blong samting ya finis. Sipos mi gat plante samting, be mi save rod blong samting ya tu, from we mi gotru long ol samting ya finis. Nao long wanem rod mi pas long hem, be mi stap harem gud. Sipos mi fulap gud, no mi hanggri, sipos mi gat plante samting, no mi trabol, be nating.” Mifala i lanem semfala fasin ya. Mo Pol i talem tu se: “Mi save mekem evri samting, long paoa blong Kraes ya we i stap mekem mi mi strong.” (Filipae 4:​12, 13) !Samting ya i sem mak long mifala tu! Ol blesing we mifala i kasem hemia se mifala i naf blong stap glad long wanem samting we mifala i gat, mifala i joen long ol Kristin wok we oli leftemap tingting, mo mifala i gat pis long tingting.

Wok Olsem Wan Famle Long Ol Kongregesen

Long en blong 1959, faswan boe blong mitufala, Joel i bon, mo long 1962 namba tu boe blong mitufala, Samuel, i bon. Mi mo Christiana i gohed blong visitim ol kongregesen wetem ol boe blong mitufala. Long 1967, i gat wan bigfala faet i stat long Naejeria. Oli klosem ol skul from we ol plen oli no spel blong saksakem ol bom olbaot. Waef blong mi i wan skul tija bifo we hem i folem mi blong visitim ol kongregesen, mekem se long taem blong faet ya, hem i stap tijim ol pikinini long haos nomo. Taem Samuel i gat sikis yia blong hem, hem i save rid mo raet finis. Mo taem faet i finis mo hem i mas gobak long skul, oli putum hem long klas wetem ol pikinini we oli gat tu yia moa long hem.

Long taem ya we mifala i mekem wok ya blong visitim ol kongregesen, mifala i no luksave ol traem we bambae mifala i kasem taem mifala i gat pikinini. Be, from we long 1972 oli putum mifala long wok blong spesel paenia, samting ya i rili givhan long mifala. From we mifala i stap long wan ples nomo, mifala i gat moa taem blong tingbaot ol nid we famle i gat long saed blong spirit. Taem tufala boe i smol nomo yet, mitufala i tijim tufala se i impoten blong stap glad long samting we oli gat. Long 1973, Samuel i tekem baptaes, mo Joel tu i kam wan fultaem paenia long yia ya. Tufala boe blong mitufala oli mared long ol gudfala Kristin sista mo naoia evriwan oli stap long trutok.

Ol Nogud Samting From Faet Ya

Taem faet i stat, mi stap visitim wan kongregesen long taon ya Onitsha wetem famle blong mi. Faet ya i mekem mifala i tingbaot se, man we i hivimap ol sas samting hem i westem taem nomo. Mi luk ol man oli ronron olbaot blong oli sef​—oli lego ol sas samting blong olgeta olbaot long ol rod nomo.

Taem faet i kam strong moa, olgeta man oli mas joen long ami. Plante brata oli karem bigfala kil from we oli no wantem joen long ami. Mifala i no fri blong wokbaot. Kakae i sot long ful kantri. Praes blong 5 kilo maniok, we bifo hem i samting olsem 90 vatu, i kam antap kasem samwe long 1,700 vatu. Mo wan kap sol we praes blong hem bifo hem i samwe long 900 vatu, i go antap bitim 5,000 vatu. Mo ol samting olsem melek, bata, mo suga i no moa gat. Blong kakae, mifala i smasem popo we i no raep mo meksem wetem flaoa blong maniok. Mo tu, mifala kakae ol kriket, skin blong maniok, ol lif blong haebiskes mo wan kaen gras we oli stap yusum blong wivim basket no enikaen lif we mifala i save faenem olbaot. Mit i wan samting we i sas, mekem se mi lukaot bigae (lesed) blong ol pikinini oli kakae. Nating se ol samting oli nogud olsem, be oltaem Jeova i givim wanem we mifala i nidim.

Be, samting we i moa wos hem i samting we faet i mekem long saed blong spirit. Plante brata oli ronwe blong go haed long dak bus, no long ol narafala vilej, mo from samting ya oli lusum klosap evri buk blong olgeta. Mo tu, ol ami blong gavman oli blokem ol buk we oli tokbaot Baebol blong man i no karem i kam insaed long ol eria raon long Biafra. Nating we ol kongregesen oli traem blong mekem ol miting, ol brata oli safa bigwan long saed blong spirit from we oli no save kasem advaes we oli mas folem long branj ofis.

Winim Hanggri Long Saed Blong Spirit

Ol elda oli traem bes blong olgeta blong gohed blong visitim ol kongregesen. From we plante brata oli ronwe long ples blong olgeta, mi mas faenem olgeta. Mi tingbaot wan taem we mi lego waef mo ol pikinini blong mi long wan sef ples mo mi wokbaot olbaot blong sikis wik blong lukaot ol brata long ol defdefren vilej mo long bus.

Taem mi wok long kongregesen long Ogbunka, mi harem se i gat wan grup blong ol Witnes oli stap long Isuochi long taon ya Okigwe. Ale mi askem wan man blong i talem nius long ol brata long ples ya blong oli kam hivap long wan plantesen blong tri ya cashew long vilej blong Umwaku. Mi mo wan olfala brata mitufala i ron long baskel 15 kilometa blong go kasem plantesen ya, mo i gat 200 Witnes, ol woman mo ol pikinini tu, oli wet long mifala. Afta, wan sista we i wan paenia i soem long mi wan narafala grup blong 100 Witnes we oli stap haed long ol bus long Lomara.

Lawrence Ugwuegbu i wan long ol brata ya we oli holem strong tingting long taon ya Owerri, we faet i spolem gud. Hem i talem long mi se i gat fulap Witnes long ples ya Ohaji. Oli no fri tumas blong wokbaot, from we ol ami oli putum kamp blong olgeta long ples ya. Taem ples i tudak, mitufala i ron long baskel i go kasem taon ya mo mitufala i luk 120 Witnes long yad blong wan brata. Mo tu mifala i tekem janis blong visitim sam narafala Witnes long ples we oli stap haed long hem.

Brata Isaac Nwagwu i putum laef blong hem long denja blong givhan long mi blong faenem ol narafala brata. Hem i karem mi long wan kenu i gokros long Reva Otamere blong luk 150 brata sista we oli stap long Egbu-Etche. Wan long ol brata i talem se: “!Hemia beswan dei long laef blong mi! Mi no ting se bambae mi laef blong luk wan seket elda bakegen. Naoia, sipos mi ded long faet ya, mi mi glad nomo.”

Mi harem oltaem se Jeova i stap protektem mi, taem mi stap long denja blong joen long ami. Wan aftenun, afta we mi luk samwe long 250 brata mo mi stap gobak long ples we mi slip long hem, wan grup blong ami wetem kapten blong olgeta, i blokem mi long rod. Oli askem mi se: “?From wanem yu no joen long ami?” Mi eksplenem se mi wan misinari we i stap talemaot Kingdom blong God. Mi luksave se oli wantem holem mi. Ale mi talem wan sot prea, mo mi talem long kapten blong olgeta se: “Letem mi mi gofri, plis.” Mi sapraes taem hem i talem se: “?Yu yu talem se mifala i mas letem yu yu gofri?” Mi ansa se: “Yes, letem mi mi gofri.” Mo hem i se: “Ale, yu save go.” Ol narafala soldia oli no talem wan samting nating.​—Ol Sam 65:​1, 2.

Fasin Blong Stap Glad Long Wanem We Yu Gat i Karem Blesing

Afta we faet i finis long 1970, mi gohed nomo long wok blong seket elda. Hemia wan blesing blong halpem ol kongregesen blong oli gohed strong bakegen. Biaen, mi mo Christiana i mekem wok blong spesel paenia go kasem 1976 taem mi kam seket elda bakegen. Klosap long medel long yia ya mi kam wan distrik elda. Afta we seven yia i pas, oli askem mi mo waef blong mi blong go wok long branj ofis blong ol Witnes blong Jeova long Naejeria, we mifala i stap long hem kam kasem naoia. Long branj ofis, mifala i glad oltaem blong luk ol brata mo sista we mifala i save olgeta long taem blong faet mo long ol narafala taem, we oli gohed yet blong stap tru long Jeova.

Long ol yia we oli pas, Christiana i wan fren we i sapotem gud mi mo i stap tru long mi oltaem. Tingting blong hem we i stap oltaem long ol samting we i gud mo we i strong tu, nating se hem i gat problem blong helt stat long 1978, i givhan long mi blong gohed blong mekem ol wok blong mi. Mifala i faenem se ol tok blong man we i raetem Sam ya i kamtru nomo, we i se: “Mo taem oli sik, hem bambae i givhan long olgeta i mekem olgeta oli oraet bakegen.”​—Ol Sam 41:3.

Taem mi tingting bak long ol yia we mi mekem ol tiokratik wok, mi tangkiu long Jeova from ol gudfala blesing we hem i givim. Taem mi stap harem gud long samting we hem i givim, mi save talem se mi mi faenem wan bigfala glad. Glad we mi gat blong luk we ol stret brata mo sista blong mi, ol pikinini blong mi, mo ol famle blong olgeta, oli wosip long Jeova wetem mi mo waef blong mi i wan blesing we i nambawan. Jeova i blesem mi wetem wan laef we i gud mo i gat mining long hem. Olgeta samting we mi wantem long laef, mi mi gat.

[Futnot]

[Bokis blong pija long pej 27]

Ol Plan We Oli Kamaot Long Stret Taem Oli Halpem Ol Brata

Long medel blong ol yia 1960, i gat wan rao i kamaot bitwin tu grup long Naejeria, wan long not mo wan long is, mo samting ya i mekem we fasin blong brekem loa mo fasin blong agensem gavman i kam antap wetem ol faet. Ol samting ya oli mekem we ol Witnes blong Jeova we oli gat strong tingting blong no joen long ol faet ya, oli safa bigwan. Oli kilim i ded 20 Witnes blong Jeova. Mo plante oli lusum olting blong olgeta.

Long Mei 30, 1967, is haf blong kantri blong Naejeria i seraot long federol gavman mo i kam Ripablik blong Biafra. Ol ami blong federol gavman oli blokem olgeta ol ples long Is. Ale, wan nogud faet i stat mo i mekem plante blad i ron.

From we ol Witnes blong Jeova oli no joen long ol rao blong Biafra, samting ya i mekem we ol man oli stat mekem trabol long olgeta nao. Ol niuspepa oli talemaot plante strong tok we i pulum tingting blong pablik blong oli agensem ol Witnes. Be, Jeova i gohed blong givim kakae we ol man blong hem oli nidim long saed long spirit. ?Hem i mekem samting ya olsem wanem?

Long stat blong yia 1968, gavman i sanem wan man i go wok long wan ofis blong gavman long Yurop mo wan narawan i wok long epot long Biafra. Tufala man ya tugeta oli Witnes. Wok blong tufala ya i mekem we ol samting long ol narafala kantri i save kam insaed long Biafra. Tufala Witnes ya putum laef blong tufala long denja blong karem ol kakae long saed blong spirit i kam long Biafra. Mo tu, tufala i givhan blong karem ol samting we ol brata long narafala kantri oli givim blong halpem ol brata long Biafra we oli gat nid. Oli naf blong mekem olsemia long ol yia we faet i gohed kasem 1970. Wan long tufala i talem se: “I no gat man long wol ya we i save mekem plan olsemia i wok long prapa paoa blong hem.”

[Tok blong pija long pej 23]

Long 1956

[Tok blong pija long pej 25]

Long 1965, wetem ol boe blong mitufala, Joel mo Samuel

[Tok blong pija long pej 26]

Blesing we mifala i kasem blong mekem wok blong Jeova olsem wan famle

[Tok blong pija long pej 27]

Tede, mi mo Christiana i wok long branj ofis blong Naejeria