Wan Spesel Lafet We i Save Jenisim Laef Blong Yu

TAEM Jisas i stap long wol yet, hem i stanemap wan lafet we i givim ona long God. Hemia wan selebresen nomo we Jisas i talem long ol man blong hem se oli mas mekem. Lafet ya, ol man oli kolem hem se Lodsapa.

Tingbaot sipos yu yu stap mo yu luk ol samting we i bin hapen bifo lafet ya. Jisas mo ol aposol blong hem oli kam tugeta long wan rum antap, blong selebretem Pasova blong ol man Jiu. Oli finisim kakae blong Pasova, we i gat mit blong smol sipsip we oli rusum, ol lif we i konkon, bred we i no gat is long hem, mo red waen. Jisas i sanemaot Judas Iskariot, aposol ya we i no stap tru long hem, mo klosap nao bambae hem i letem Masta blong hem i go long han blong ol enemi. (Matiu 26:​17-25; Jon 13:​21, 26-30) Jisas i stap hem wan wetem ol 11 aposol we oli stap tru long hem. Matiu i wan long ol aposol ya.

Matiu i luk evri samting we i hapen long naet ya, mo hem i eksplenem olsem wanem Jisas i stanemap Lodsapa, i se: “Taem olgeta oli stap kakae, Jisas i tekem bred, i prea blong talem tangkiu long God from. Nao hem i brekem, i givim long ol man blong hem, i talem se, ‘Yufala i tekem, yufala i kakae. Hemia bodi blong mi.’ Mo hem i tekem kap waen, i talem tangkiu long God from, nao i pasem i go long olgeta, i talem se, ‘Yufala evriwan, yufala i dring long hem, from we hemia blad blong mi, we i blong mekem promes blong God i stanap. Blad blong mi bambae i ron blong tekemaot ol sin blong plante man.’ ”​—Matiu 26:​26-28.

?From wanem Jisas i stanemap Lodsapa? ?Long lafet ya, from wanem hem i yusum bred we i no gat is long hem, wetem red waen? ?Olgeta man we oli stap folem Kraes oli mas kakae bred mo dring waen ya? ?Ol man oli mas mekem lafet ya evri dei, no evri wik, no evri manis? ?Mo olsem wanem lafet ya i joen wetem laef blong yu?