!Ol Studen We Oli Kasem Setifiket Long Gilead Oli Wok Strong Long Garen!

“IGAT plante kakae tumas i stap long garen we i rere finis, be smol man nomo oli stap blong karem i go long haos. Yufala i mas askem strong long masta blong garen ya, blong hem i save sanem sam moa man oli kam blong karem ol kakae ya i go long haos blong hem.” (Matiu 9:​37, 38) Ol tok ya oli gat wan spesel mining long ol studen we oli kasem setifiket blong olgeta long namba 116 klas blong Wajtaoa Baebol Skul blong Gilead, taem oli stap rere blong go wok olsem misinari long narafala kantri.

Long Sarede, Maj 13, 2004, i gat 6,684 man i joen tugeta blong folem program blong givim setifiket. Sam long olgeta oli stap long Watchtower Educational Center long Patterson, New York, mo sam long olgeta we oli stap long narafala ples oli folem program ya long televisin. Long program ya, ol studen oli kasem ol laswan advaes blong leftemap tingting blong olgeta bifo oli go. Yumi evriwan i save haremgud long ol advaes we ol studen oli bin kasem, from we yumi tu yumi wok strong blong karem ol kakae long garen ya long saed blong spirit.

Brata Theodore Jaracz, wan memba blong Hed Kampani we i bin kasem setifiket blong hem long namba seven klas blong Gilead, i givim fastok. Long tok ya, hem i makem gud ol tok blong Jisas se: “Yufala i mas go long ol man long olgeta ples long wol, blong pulum olgeta oli kam man blong mi.” (Matiu 28:​19, 20) !Tok ya i stret nomo, from we bambae oli sanem ol misinari ya oli go prij long 20 defren kantri! Hem i talem bakegen long ol studen se Tok blong God i tijim olgeta blong oli savegud ol rod blong wok strong long impoten wok ya blong karem ol kakae long garen.​—Matiu 5:16.

Ol Man Blong Karem Kakae We Oli Wokgud

Faswan brata we i givim wan tok long program ya, hemia Brata Robert Wallen, we i wok blong plante yia wetem Gilead Skul. Long tok blong hem, we taetel blong hem se “Nambawan Fasin Sore,” hem i talem long ol studen se: “Fasin sore hem i olsem wan lanwis we man i save harem nating se sora blong hem i fas, mo man i save luk nating se hem i blaen.” Jisas i kasem save long ol trabol blong narafala, mo hem i traehad blong halpem olgeta. (Matiu 9:36) Ol studen bambae oli gat plante janis blong soem semfala fasin sore​—long wok blong prij, insaed long kongregesen, long haos blong misinari, mo insaed long mared blong olgeta. Brata Wallen i talem long olgeta se: “Letem fasin sore i wok long laef blong yu taem yu wok blong ol narafala. Yu mas soem ol beswan fasin blong yu blong yu save laef evri dei long wan haos blong ol misinari. Taswe, yu mas gat strong tingting blong putum fasin sore olsem we hem i prapa klos blong yu.”​—Kolosi 3:12.

Biaen, Brata Gerrit Lösch, wan memba blong Hed Kampani we i bin kasem setifiket blong hem long namba 41 klas blong Gilead, i givim tok ya “Ol Man Blong Talemaot Rod Blong Sevem Man.” (Aesea 52:7) Ol man we oli wantem stap laef afta we God bambae i spolem rabis wol blong tede, fastaem oli mas kasem stret save long Tok blong God, oli mas talemaot bilif blong olgeta long narafala man, mo oli mas baptaes. (Rom 10:10; 2 Timoti 3:15; 1 Pita 3:21) Be faswan risen we i pulum yumi blong talemaot rod blong sevem man hemia from we yumi wantem presem God, i no blong sevem man. Taswe Brata Lösch i talem long ol niufala misinari se: “Yu mas karem gud nius blong Kingdom i go long olgeta ples long wol, yu mas wok strong olsem man blong talemaot rod blong sevem man, mo yu mas mekem samting ya blong presem Jeova.”​—Rom 10:18.

Brata Lawrence Bowen, wan tija blong Gilead Skul, i stanemap kwestin ya se: “?Yu Yu Saenaot Olsem Wanem Long Saed Blong Spirit?” Hem i tokbaot ol tok blong Jisas long Matiu 6:22 mo i leftemap tingting blong ol studen se oli mas gat ae we i “gud” blong oli save “saenaot long saed blong spirit long wan fasin we i presem Jeova mo i mekem ol man oli haremgud.” Taem Jisas i statem minista wok blong hem, hem i givim wan nambawan eksampol long saed blong fasin ya, mo ae blong hem i stap lukluk nomo long ol samting we God i wantem hem blong mekem. Jisas i tingting dip long ol bigbigfala samting we hem i lanem long Papa blong hem, mo samting ya i halpem Jisas blong stanap strong taem Setan i traem hem long draeples. (Matiu 3:16; 4:​1-11) Jisas i soem se hem i trastem Jeova fulwan taem hem i mekem olgeta samting we God i askem hem blong mekem. Long sem fasin, sipos ol misinari oli wantem stanap strong taem oli fesem ol traem, oli mas gohed blong stadi gud long Baebol mo trastem Jeova fulwan.

Brata Mark Noumair, wan tija blong Gilead Skul we i bin kasem setifiket blong hem long namba 77 klas blong Gilead, i givim laswan blong ol tok ya, we taetel blong hem se, “Mifala i Stap Long Han Blong Yu Nomo.” (Josua 9:25) Hem i pulum ol studen blong oli folem eksampol blong ol man Gibeon bifo. Nating se Gibeon ‘i wan bigfala taon, . . . mo ol man blong hem oli gudfala man blong faet,’ be ol man Gibeon oli no wantem hae nem mo oli no gat tingting blong kasem samting olsem we olgeta nomo i wantem. (Josua 10:2) Oli glad blong wok olsem man blong “katem faeawud mo karem wota” aninit long ol Livaet, blong sapotem wosip blong Jeova. (Josua 9:27) Yes, ol studen blong klas ya oli bin talem long Bigfala Josua, hemia Jisas Kraes, se “Mifala i stap long han blong yu nomo.” Naoia we oli statem wok blong misinari long niufala teritori blong olgeta, oli mas akseptem eni wok we Bigfala Josua i givim long olgeta blong mekem.

Ol Ekspiriens Mo Ol Kwestin

Brata Wallace Liverance, we i kasem setifiket blong hem long namba 61 klas blong Gilead, i lidim tok ya “Talemaot Ol Tok Blong Baebol” wetem wan grup blong studen mo wan long ol tija. Oli talem mo oli aktem sam ekspiriens we oli bin kasem long wok blong prij long taem ya we oli stap mekem kos blong olgeta. Ol man oli luksave nomo se dip stadi blong Baebol mo trening we ol studen oli bin kasem long ol faef manis ya blong kos, i kasem hat blong olgeta mo i pulum olgeta blong serem ol samting we oli bin lanem wetem narafala. (Luk 24:32) Long ol faef manis kos ya, wan long ol studen i tokbaot save we hem i stap kasem wetem yangfala brata blong hem. Save ya i pulum yangfala man ya blong lukaotem wan kongregesen long ples blong hem mo blong statem prapa Baebol stadi blong hem. Naoia hem i wan pablisa we i no baptaes yet.

Afta long ol ekspiriens ya, Brata Richard Ashe mo Brata John Biggard oli askem sam kwestin long plante brata we oli wok longtaem finis blong Jeova, wetem sam seket elda we oli stap folem wan spesel trening long Watchtower Educational Center. Olgeta tu oli bin kasem setifiket blong olgeta long Gilead Skul bifo. Wan brata i talem bakegen samting we Brata Knorr i bin talem taem hem i folem kos blong Gilead se: “Long Gilead, bambae yu stadi plante. Be sipos yu finis long skul ya mo yu ting se yu yu gat hed, hemia i min se mifala i mestem long tijing blong yu. Mifala i wantem moa se taem yufala i finis long skul ya, hat blong yufala i fulap moa long lav.” Ol seket elda oli talem long ol studen blong klas ya se oli mas tingbaot ol man mo ol nid blong olgeta, oli mas folem eksampol blong Kraes long fasin blong olgeta wetem ol narafala, mo oli mas akseptem wetem tingting daon eni wok we bambae ol brata oli askem olgeta blong mekem. Sipos ol niufala misinari oli mekem ol advaes ya i wok long laef blong olgeta, bambae samting ya i halpem olgeta blong wokgud long teritori blong olgeta.

!Yufala i Mas Wok Strong Blong Karem Ol Kakae Long Garen!

Ol man we oli stap folem program ya oli gat janis blong lesin long tok blong brata Stephen Lett, wan narafala memba blong Hed Kampani. Hem i givim stamba tok blong program ya se, “!Yufala i Mas Wok Strong Blong Karem Ol Kakae Long Garen!” (Matiu 9:38) Taem ol man oli karem kakae long wan trufala garen, taem blong karem kakae ya i sot. Taswe ol man we oli karem kakae oli mas wokhad. !I impoten moa blong wokhad long taem blong yumi we en blong rabis wol ya i klosap! Long taem ya we yumi stap karem kakae long garen long saed blong spirit, laef blong plante man i stap long denja. (Matiu 13:39) Brata Lett i leftemap tingting blong ol studen blong oli no “les” be oli mekem wok blong God we tingting blong olgeta i glad long hem oltaem. (Rom 12:11) Hem i talem bakegen ol tok blong Jisas se: “Yufala i traem lukluk long ol kakae long garen. Naoia lif blong olgeta i drae finis, i taem blong go tekem kakae nao.” (Jon 4:35) Biaen hem i talem long ol studen se bambae oli soem we oli wantem wok strong blong karem kakae long garen, sipos oli traehad blong kasem ol man long taem mo long ples we oli save faenem man long hem, mo sipos oli tekem evri janis we oli gat blong talemaot gud nius. Sipos oli lukaotem ol janis blong mekem disaepol, bambae samting ya i karem ol gudfala frut long wok blong prij blong olgeta. Jeova i wan God we i wok strong, mo hem i wantem we yumi evriwan yumi folem eksampol blong hem mo yumi wokhad blong karem ol kakae long garen ya long saed blong spirit.​—2 King 19:31; Jon 5:17.

Long lastok blong program, Brata Jaracz we i jeaman, i givim ol griting we oli kamaot long plante defren branj ofis, mo hem i givim ol setifiket long ol studen. Wan long ol studen ya i ridim wan leta blong klas, blong talem bigfala tangkiu long trening we oli bin kasem. Yes, program blong givim setifiket blong namba 116 klas blong Gilead i pulum ol man we oli stap blong gat strong tingting blong wok strong moa long wok ya blong karem ol kakae long garen.

[Tok blong pija long pej 25]

KAONTEM KLAS YA

Oli kamaot long hamas kantri: 6

Oli go wok long hamas kantri: 20

Hamas studen: 46

Oli gat hamas yia: 34.2

Hamas yia long trutok: 17.2

Hamas yia finis oli prij fultaem: 13.9

[Tok blong pija long pej 26]

Klas Namba 116 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo stat long lefsaed i go long raetsaed.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J., C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.