“!Yumi Faet Long Nem Blong Jeova Mo Long Nem Blong Gideon!”

OL ENEMI ya oli olsem ol lokis we oli plante tumas, oli mekem ol garen we i gat plante gudfala kakae long hem, oli kam olsem drae ples nomo. Hemia long taem we ol jaj oli stap rul long Isrel, mo ol man Isrel oli harem nogud from we oli no gat rod blong blokem ol enemi ya. Blong seven yia, taem ol kakae oli gru long garen, ol man Midian, ol laen blong Amalek, mo ol man blong draeples long saed i go long is, oli ron long kamel blong olgeta oli kam blong stil. Ol anamol we ol rabis man ya oli karem wetem olgeta, oli go long evri ples blong faenem gras, oli kakae evri samting we i gru. Ol man Isrel oli no moa gat dongki, buluk, no sipsip. Strong fasin ya blong ol man Midian i mekem ol pua man Isrel ya oli fraet tumas, nao oli go haed long ol hol blong ston mo ol ples aninit long graon long ol hil, mo ol ples we i no isi blong ol man oli faenem olgeta.

?From wanem trabol ya i kasem ol man Isrel? Ol man Isrel oli lego trufala wosip mo oli wosipim ol giaman god. Ale, Jeova i letem ol enemi oli kam mekem trabol long olgeta. Taem ol man Isrel oli harem se oli no moa save stanap strong agens long ol man ya, oli singaot i go long Jeova blong i givhan long olgeta. ?Olsem wanem? ?Jeova i lesin long krae blong olgeta? ?Stori ya blong ol man Isrel i save tijim yumi long wanem samting?​—Jajes 6:​1-6.

?Wan Fama We i Lukaotgud No Wan “Strong Man Blong Faet”?

Plante taem, ol fama long Isrel oli mekem wok ya blong klinim hed blong wit, long wan open ples we i gat win. Oli mekem se buluk i pulum wan hevi plang we oli putum ol aean aninit long hem, nao buluk ya i pas antap long hed blong ol wit blong i kilimaot ol kakae blong hem. Ale, win i karemaot doti blong wit mo kakae blong wit i stap. Be from we ol enemi oli wantem stilim evri samting we ol man Isrel oli gat, wok ya blong klinim wit i save pulum ae blong olgeta isi nomo. Taswe Gideon i wantem haedem kakae ya long ol man Midian, ale hem i stap kilim hed blong wit long ples we oli wokem waen long hem​—i luk olsem se hemia wan bigfala hol we oli katem long ston. (Jajes 6:11) Long ples ya, ating hem i tekem sam hed blong wit, ale i kilim hed blong olgeta wetem wan stik. From trabol we kantri blong Isrel i stap long hem, Gideon i mas yusum nomo ol samting we hem i save faenem.

Traem tingbaot olsem wanem Gideon i sek bigwan taem wan enjel blong Jeova i kamtru long hem mo i talem se: “!Strong man blong faet! !Naoia Hae God i stap wetem yu!” (Jajes 6:12) Gideon i stap haed long hol blong ston blong i save klinim wit, taswe ating hem i no harem nating se hem i wan strong man blong faet. Be ol tok ya oli soemaot we God i trastem Gideon se hem i save kam wan strong man blong faet we i save lidim ol man Isrel. Nating se God i trastem hem, be i nidim wan samting blong mekem tingting blong Gideon i strong.

Taem Jeova i givim wok ya long Gideon blong i ‘sevem ol man Isrel oli aot long han blong ol man Midian,’ wetem tingting daon hem i talem se: “?Masta, bambae mi mi sevem olgeta olsem wanem? Mifala ya ol laen blong Manase, be long laen ya, famle blong mifala ya we i laen blong Abiesa, hem i smol moa long ol narafala famle blong laen ya. Mo bakegen, mi, long famle blong mi, oli no kaontem mi nating.” Gideon i wan man we i kefulgud taem hem i tekem wan desisen, taswe hem i askem wan saen we bambae i soemaot se God i stap wetem hem taem hem i faet agens long ol man Midian. Jeova i save se Gideon i nidim wan pruf, taswe hem i agri nomo blong mekem saen ya. Nao Gideon i givim kakae olsem wan presen long enjel ya we i kam luk hem, mo faea i kamaot long wan ston, i bonem presen ya. Afta we Jeova i kwaetem tingting blong Gideon blong i no moa fraet, Gideon i bildim wan olta long ples ya.​—Jajes 6:​12-24.

“I Gud Bal i Faet From Olta Blong Hem”

Bigfala trabol we ol man Isrel oli gat, i no fasin agens blong ol man Midian nomo. Hem i fasin blong olgeta blong wosip long Bal. Jeova i ‘God we i jalus,’ i min se hem i no save agri long wosip blong wan man sipos man ya i stap wosipim ol narafala god. (Eksodas 34:​14, NW ) Taswe, Jeova i givim oda long Gideon blong i brekemdaon olta ya we papa blong hem i mekem blong wosip long god ya Bal, mo blong katemdaon tabu pos we i stanap klosap long hem. Gideon i no mekem samting ya long dei, from hem i fraet long samting we papa blong hem mo ol narafala oli save mekem sipos oli luk hem. Taswe, wetem help blong ten man blong hem, hem i wok long naet.

Fasin blong Gideon blong lukaotgud i stret nomo, from we taem ol man blong wosip long Bal oli faenemaot we hem i spolem “ol tabu samting ya,” oli wantem kilim hem i ded. Be Joas we i papa blong Gideon, i toktok gud blong mekem olgeta oli tingting. Hem i talem se sipos Bal i trufala God, hem wan bambae i naf blong faet from olta blong hem. Afta long hemia, Joas i putum nem we i stret nomo long pikinini boe blong hem, hemia Jerubal we i minim, “i gud Bal i faet from olta blong hem.”​—Jajes 6:​25-32.

God i blesem ol man blong wok blong hem oltaem sipos oli no fraet blong stanap long saed blong trufala wosip. Taem ol man Midian mo ol fren blong olgeta oli kambak bakegen, oli kavremap olgeta ples long Isrel, nao “[Spirit] blong Hae God i kam long Gideon.” (Jajes 6:34) Spirit blong God, no paoa blong hem, i kam long Gideon, nao Gideon i singaot ol man long laen blong Manase, Asere, Sebulun, mo Naftali, oli kam wanples blong oli rere blong faet.​—Jajes 6:35.

Rere Blong Faet

Nating se naoia Gideon i gat wan ami blong 32,000 man, be hem i askem long God blong i mekem wan saen. Sipos skin blong sipsip we hem i putum long graon long naet i wetwet, be graon raonabaot i drae, hemia i soemaot se God bambae i yusum Gideon blong sevem Isrel. Jeova i mekem merikel ya. Nao Gideon i askem wan narafala saen, hemia se skin blong sipsip bambae i draegud, be graon raonabaot long hem bambae i wetwet. Ale, God i mekem saen ya tu. ?Olsem wanem? ?Gideon i bitim mak long fasin blong hem blong lukaotgud? Nogat, from we Jeova i mekem samting we hem i askem. (Jajes 6:​36-40) Tede, yumi no save luk ol merikel olsem. Be Jeova i save lidim yumi yet, mo i save yusum Tok blong hem blong mekem tingting blong yumi i strong.

God i talem long Gideon se ami blong hem i bigwan tumas. Sipos olgeta evriwan oli go faet mo oli winim ol enemi blong olgeta, bambae ol man Isrel oli save tok flas se oli win long paoa blong olgeta nomo. Be olgeta oli mas leftemap Jeova taem bambae oli win long faet ya. ?Taswe, Gideon i mekem wanem? Gideon i folem Loa blong Moses, we i talem se olgeta we oli fraet blong go faet, oli mas gobak long ples blong olgeta. Taem Gideon i mekem olsem, 22,000 man blong hem oli gohom, mo 10,000 nomo oli stap.​—Dutronome 20:8; Jajes 7:​2, 3.

Long tingting blong God, i gat plante tumas man yet long ami ya. Gideon i mas talem long olgeta blong oli godaon long wota. Man Jiu we i raetem histri, Josephus, i talem se Gideon i mekem ol soldia blong hem oli wokbaot long dei long bigfala san, blong oli go long wan reva. Gideon i wajem gud olsem wanem oli dring. Tri handred man nomo oli kasem wota long wan han mo karem i go long maot blong dring, we long semtaem oli wajem gud se i no gat enemi klosap. Ol 300 man ya nomo we oli lukaot gud, bambae oli go wetem Gideon blong faet. (Jajes 7:​4-8) Traem tingbaot sipos yu yu stap wetem olgeta ya. !Namba blong ol enemi blong yufala oli kasem 135,000! !Bambae yu mas tingbaot se paoa blong Jeova nomo i save mekem se yufala i win long faet ya, i no long prapa paoa blong yufala!

God i askem long Gideon blong i tekem wan man blong wok blong hem, mo tufala i go lukluk kamp blong ol man Midian. Taem tufala i kasem ples ya, Gideon i harem wan man i stap tokbaot drim blong hem long wan fren blong hem. Kwiktaem nomo, fren blong man ya i talem mining blong drim ya se God i gat strong tingting blong letem ol man Midian oli go long han blong Gideon. Tok ya i leftemap tingting blong Gideon bigwan. Naoia hem i sua se Jeova bambae i letem hem mo ol 300 man blong hem oli winim ol man Midian.​—Jajes 7:​9-15.

Plan Blong Faet

Ol 300 man ya oli seraot i go long tri grup, we 100 man long wan grup. Gideon i givim pupu mo bigfala graonpot long wanwan long olgeta. Wan laet i laet smosmol insaed long ol graonpot ya. Gideon i givim faswan oda blong hem se: ‘Yufala i mas luklukgud mi. Wanem samting we mi bambae mi mekem, yufala tu bambae i mas mekem olsem. Taem mi blu pupu, bambae yufala tu i mas blu pupu, mo singaot bigwan se “!Yumi faet long nem blong Jeova mo long nem blong Gideon!” ’​—Jajes 7:​16-18, 20.

Ol 300 man Isrel oli wokbaot we oli no mekem noes nating, oli go long ples we ol enemi oli stap long hem. Hemia samwe 10 klok long naet​—jes afta we oli jenisim ol gad. I luk olsem se hemia stret taem blong faet, from we bambae i tekem taem blong ae blong ol niufala gad i save luksave samting long tudak.

!Naoia ol man Midian oli fraet bigwan! Wantaem nomo bigfala noes i kamaot: 300 graonpot i brok, 300 pupu i krae, mo 300 man oli singaot bigwan. Ol man Midian oli sek nogud long noes ya, antap moa, taem oli harem tok ya “!Yumi faet long nem blong Jeova mo long nem blong Gideon!” Ol man Midian tu oli stat blong singaot strong, mekem se i gat moa noes. Long medel blong ol samting ya, oli no save luksave se hu i fren mo hu i enemi blong olgeta. Ol 300 soldia oli stap stanap long ples blong olgeta nomo, nao God i mekem ol enemi oli tekem prapa naef blong faet blong olgeta blong kilkilim olgeta bakegen. Ol man Midian oli lus olgeta, oli no gat rod blong ronwe, mo ol man Isrel oli ronem olgeta gogo oli finisimgud olgeta, nao ol man Midian oli no moa save mekem trabol bakegen. Naoia longfala rul blong olgeta we oli stap kilim i ded ol man, i kasem en blong hem.​—Jajes 7:​19-25; 8:​10-12, 28.

Gideon i holem tingting daon nating we hem i winim faet ya. Ol laen blong Efrem oli harem nogud from we Gideon i no singaot olgeta blong joen long faet. Be taem oli traem blong rao wetem Gideon, hem i ansa long olgeta long kwaet fasin. Gudfala ansa blong hem i mekem kros blong olgeta i godaon mo tingting blong olgeta i kam kwaet.​—Jajes 8:​1-3; Ol Proveb 15:1.

Naoia we pis i stap, ol man Isrel oli askem strong long Gideon blong hem i kam king blong olgeta. !Hemia wan traem! Be Gideon i talem ‘no.’ Hem i no fogetem hu Man ya we i winim faet agens long ol man Midian. Hem i talem se: “Mi bambae mi no save kam king blong yumi, mo pikinini blong mi tu bambae i no save kam king, Hae God nomo bambae i king blong yumi.”​—Jajes 8:23.

Be, from we Gideon i no stretgud olgeta, samtaem hem i mekem samting we i no stret. From wan risen we Baebol i no talem, Gideon i yusum ol samting we oli karemaot long ol man Midian long taem blong faet, mo i mekem wan efod wetem, mo i go putum efod ya long ples we ol man blong taon oli save luk. Baebol i talem se olgeta man Isrel oli go krangke, oli stap mekem wosip long efod ya nomo. Efod ya i kam wan trap long Gideon tu wetem ol famle blong hem. Nating se i olsem, Gideon i no kam wan man we i wosipim ol aedol fulwan, from Baebol i talem se hem i wan man we i bilif strong long Jeova.​—Jajes 8:27; Hibrus 11:​32-34.

Samting We Yumi Lanem

Stori blong Gideon i givim woning mo i leftemap tingting blong yumi. Hem i givim woning long yumi se Jeova bambae i tekemaot tabu spirit mo blesing blong hem long yumi, sipos yumi mekem rabis fasin. Laef blong yumi long saed blong spirit, bambae i kam olsem ol puaman we oli stap long wan ples we ol lokis oli spolemgud. Yumi laef long taem we laef i strong tumas mo yumi neva mas fogetem se blesing blong Jeova hemia nao samting we i ‘mekem man i kam rijman, mo hem i no save mekem man i trabol.’ (Ol Proveb 10:22) Yumi haremgud long blesing blong Jeova from we yumi ‘obei long hem, mo yumi wok blong hem long olgeta tingting blong yumi, we tingting blong yumi i glad.’ Sipos yumi no mekem olsem, hem bambae i lego yumi.​—1 Kronikel 28:9.

Stori blong Gideon i save leftemap tingting blong yumi, from we i pruvum se Jeova i save sevem ol man blong hem oli aot long enikaen trabol we i kasem olgeta, nating sipos hem i yusum olgeta we yumi luk olsem se oli slak no oli no save mekem wan samting. Taem Gideon mo ol 300 man blong hem oli naf blong winim ol 135,000 man Midian, hemia i pruvum se paoa blong God i bigwan tumas. Maet yumi stap long medel blong wan bigfala trabol mo yumi luk se ol enemi blong yumi oli plante tumas. Be stori blong Baebol long saed blong Gideon, i leftemap tingting blong yumi blong trastem Jeova, we bambae i blesem mo i sevem olgeta we oli bilif long Hem.