?I Rili Impoten Blong Stap Tru Long Narafala?

KARL,a wan man we i wok long wan kampani blong insurens i talem long Jens se: “Insurens ya we yu tekem blong helt blong yu i sas tumas. Sipos yu kam pem insurens long kampani blong mi, bambae yu sevem samwe 2,000 vatu long wan manis, we hemia big mane ya.”

Jens i ansa long Karl i se: “Maet i tru, be mi mi pem insurens blong helt blong mi long kampani ya blong plante yia finis. Long ol yia ya, olgeta ya oli bin halpem mi bigwan mo mi wantem blong stap tru long olgeta.”

Karl i talem long hem se: “!I tru se fasin ya blong stap tru i wan gudfala fasin, be fasin ya i mekem we yu stap spenem moa vatu!”

Samting we Karl i talem i tru. Plante taem fasin blong stap tru i mekem we maet yumi mas spenem lelebet mane. I nidim taem, paoa mo trufala filing tu. ?Olsem wanem? ?Fasin blong stap tru i impoten?

Wan Gudfala Fasin Be i Nogat Plante Man i Wokem Fasin Ya

Wan stadi we oli mekem long Jemani (long Allensbach Opinion Research Institute) i soem se 96 pesen blong ol man oli talem se fasin blong stap tru i wan gudfala fasin. Namba tu stadi we Institut ya i mekem long sam yangfala we oli gat 18 go kasem 24 yia i soem se tu long evri tri yangfala ya oli talem se fasin ya blong stap tru i wan gudfala fasin.

I isi nomo long man blong talem se fasin blong stap tru i wan gudfala fasin be i no isi blong wokem fasin ya. Long sam ples long Yurop, ol mared man mo woman no ol memba blong wan famle oli no soem fasin ya blong stap tru long narafala. Ol man oli no stap tru long ol fren blong olgeta. Mo fasin blong stap tru we bifo, i strong bitwin bos mo ol wokman blong hem, no bitwin wan kampani mo ol kastoma blong hem, i no moa gat. ?From wanem?

Samtaem hemia from we laef i bisi tumas mekem se man i no gat taem no paoa blong mekem sam samting we i soemaot fasin blong stap tru. Ol man we tingting blong olgeta i foldaon, oli no moa wantem blong stap tru long eniman. Maet sam narafala man oli laekem moa blong yusum laef blong olgeta olsem we oli wantem, we i no nid blong stap tru long narafala.

Nomata wanem risen, plante man oli toktok gud long saed blong fasin ya blong stap tru be oli no wokem fasin ya. Taswe kwestin i stap se: ?Fasin blong stap tru long narafala i impoten, no nogat? ?Wanem gudfala frut i save kamaot taem man i gat fasin ya blong stap tru?

[Futnot]

[Tok blong makem poen long pej 3]

Plante man oli toktok gud long saed blong fasin ya blong stap tru be oli no wokem fasin ya