Amagedon—?Wan Bigfala Trabol Blong Finisim Wol Ya?
!AMAGEDON! ?Tok ya i mekem yu yu tingbaot wanem? ?Wan bigfala trabol we i spolem olgeta man long wol? ?Wan faea we i bonem heven mo wol? Long plante ples long wol, sam tok blong Baebol, olsem tok ya “Amagedon,” oli kam olsem ol tok we man i yusum evri dei long laef. Ol man oli yusum tok ya moa blong tokbaot laef blong ol man long fiuja we i nogud. Ol bisnes kampani we oli wokem ol stori long televisin mo vidio long saed blong “Amagedon,” oli fulumap tingting blong ol man wetem ol samting blong fraet nomo. Ol man oli gat rong tingting long saed blong tok ya mo oli no kasem klia mining blong hem tu. I gat plante tingting long saed blong mining blong tok ya, be klosap olgeta mining ya oli no laenap wetem wanem we Baebol—stamba ples we tok ya i kamaot long hem—i talem long saed blong Amagedon.
From we Baebol i joenem tok ya Amagedon wetem taem we bambae “wol ya i finis,” i impoten blong gat klia save long mining blong tok ya Amagedon. (Matiu 24:3) Mo i stret blong lukluk i go long Baebol, we i stamba blong trutok, blong faenemaot wanem ya Amagedon mo olsem wanem hem i save gat paoa long yu mo famle blong yu.
Wan stadi olsem long Baebol bambae i soemaot se Amagedon i no wan bigfala trabol blong finisim wol ya, be bambae i soemaot stat blong wan taem blong glad. Taem ya i blong ol man we oli wantem laef mo haremgud long wan wol we i stretgud olgeta. Bambae yu kasem klia save long saed blong impoten trutok ya blong Baebol, taem yu ridim nekis haf we i tokbaot stret mining blong tok ya Amagedon.
[Bokis/Foto blong pija long pej 3]
?YU YU TINGBAOT AMAGEDON OLSEM WANEM?
• Wan niuklia faet
• Wan bigfala trabol we i spolemgud evri samting
• Wan planet we i foldaon i kam spolemgud wol
• Faet blong God blong finisim ol rabis man