Ol Yangfala Yufala i Save Mekem Papa Mama Blong Yufala i Glad Bigwan
OLFALA aposol Jon i raetem se: “Taem mi harem we oltaem ol pikinini blong mi oli stap folem ol tok we i tru, hemia i mekem mi mi harem gud moa, i winim we mi harem gud long ol narafala samting.” (3 Jon 4) Ol pikinini we Jon i tokbaot long vas ya hemia ol disaepol blong Kraes, be ol papa mama we oli laekem God ating olgeta tu oli harem save sem kaen filing ya we Jon i tokbaot. Ol desisen mo samting we papa mama i mekem, i save mekem i gud no i save spolem pikinini blong olgeta, long sem fasin ol desisen mo samting we ol pikinini tu oli mekem, i save mekem i gud no i save spolem papa mama blong olgeta.
King Solomon long Isrel i tokbaot olsem wanem wan pikinini i save gat paoa long filing blong papa mama blong hem. Hem i raetem se: “Pikinini we i waes, hem i stap mekem papa mo mama blong hem, tufala i glad long hem, be pikinini we i no gat hed, hem i stap mekem tufala i harem nogud nomo.” (Ol Proveb 10:1) Taswe, ol pikinini—nating se oli yang yet no oli bigman finis—oli mas tingting gud se olgeta aksen blong olgeta bambae i save mekem wanem long papa mo mama blong olgeta. ?From wanem i stret we pikinini i tingbaot samting ya?
Tingbaot olsem wanem papa mama blong yu we tufala i laekem God, tufala i lukaotgud long yu. Ating bifo we yu bon, tufala i stat tingting plante long yu finis mo tufala i stat prea from yu tu. Afta we yu bon, tufala i glad tumas long yu mo ating tufala i tangkiu long God from we yu yu wan gudfala presen long tufala, nating se presen ya i minim wan bigbigfala wok tu long tufala. Taem yu bebi nomo, yu smol, yu no save mekem wan samting nating yu wan, yu stap long han blong tufala, mo from we tufala i wosipim Jeova, tufala i tinghevi long wok ya se tufala i mas lukaotgud long yu.
From we papa mama blong yu, tufala i trufala Kristin, tufala i lukluk ol tok blong Baebol mo ol buk we oli tokbaot Baebol blong faenem advaes we oli save trastem blong lidim gud tufala, mo tufala i askem ol man we oli gat pikinini finis, blong givim advaes long tufala. Mo tu, tufala i gohed blong prea long God blong talemaot ol wari blong tufala long Hem. (Jajes 13:8) Taem yu stap gru, papa mama blong yu, tufala i luksave ol gudfala fasin blong yu, be tufala i luk tu se wanem fasin blong yu i nogud. (Job 1:5) Taem yu bitim totin yia blong yu, yu fesem sam niufala traem mo problem. Samtaem ating yu yu mekem stronghed, ale long taem ya papa mama blong yu i bin prea moa, rid moa, mo tingting moa tu, se olsem wanem bambae tufala i save halpem yu blong yu no lego wosip blong Jeova we i Papa blong yu long heven.
Papa mama blong yu bambae tufala i neva stop blong gat filing olsem papa mama. Tufala i wari long yu from we tufala i no wantem se yu sik, tufala i wantem se yu glad, yu harem gud long filing, mo yu strong gud long saed blong spirit, mo nating se yu yu bigman finis bambae tufala i stil wari long yu. Be tufala i save tu se yu yu fri blong mekem ol prapa desisen blong yu mo tufala i no save talem stret se laef blong yu long fiuja bambae i olsem wanem. Tufala i save se yu wan nomo bambae yu mas jusum rod blong yu.
Tru ya, taem papa mama tufala i harem se pikinini blong tufala i stap “folem ol tok we i tru,” samting ya i mekem tufala i ‘harem gud moa, i winim ol narafala samting.’ Be hemia i minim tu se sipos pikinini i mekem fasin olsem man we i no gat hed, hemia i save mekem tufala i harem nogud bigwan. Solomon i talem se: “Pikinini we i no gat hed, hem i mekem mama mo papa blong hem, tufala i harem i nogud we i nogud olgeta.” (Ol Proveb 17:25) !Soa we i kasem hat blong papa mama i bigwan tumas taem wan pikinini blong tufala i lego wosip blong trufala God!
I klia se ol samting we yu mekem i save gat paoa long famle blong yu mo ol narafala. Ol fasin blong yu oli save kasem filing blong papa mama blong yu. Sipos yu tanem baksaed long God mo ol rul blong hem, yu mekem tufala i safa. Be sipos yu stap tru long Jeova mo yu obei long Hem, papa mama blong yu bambae tufala i glad. I gud yu traem bes blong yu blong mekem hat blong papa mama blong yu i glad. Hemia beswan presen we yu save givim long tufala ya we tufala i lukaotem gud yu, tijim gud yu, mo lavem yu tumas.