?Yu Yu Wan Gudfala Man Blong Wok We ‘i Soemaot Gladhat Blong God’?

“Yufala i lavlavem yufala olsem wan brata nomo, ale yufala i mas kaengud long yufala. Mo yufala i mas faswan blong soem ona long yufala.”—ROM 12:10, NW.

1. ?Plante taem Jeova i talem wanem samting long Baebol?

LONG Baebol, Jeova i talem plante taem se bambae hem i givhan long yumi taem tingting blong yumi i foldaon no yumi harem nogud tumas. Tingbaot ol tok ya we i mekem yumi harem gud, i se: “[Jeova] i stap givhan long olgeta we oli stap long trabol, mo i stap leftemap olgeta we oli foldaon.” “Hem i stap mekem olgeta we oli harem nogud, oli harem gud bakegen, mo i stap fasem ol soa blong olgeta.” (Sam 145:14; 147:3) Mo Papa blong yumi long heven, hem wan i talem se: “!Mi mi Hae God, mi God blong yufala! Mi nao mi stap mekem yufala i strong [“holem raethan blong yufala,” NW], mo mi stap talem long yufala se, ‘!Yufala i no fraet! !Mi bambae mi givhan long yufala!’”—Aes. 41:13.

2. ?Olsem wanem Jeova i stap halpem ol man blong hem?

² Be Jeova i stap long heven we yumi no save luk hem. ?Taswe, olsem wanem hem i stap ‘holem raethan blong yumi’? ?Olsem wanem hem i ‘leftemap yumi taem yumi foldaon’ from we yumi harem nogud tumas? Jeova i mekem samting ya long plante defdefren rod. Wan rod we hem i yusum, hemia tabu spirit blong hem. Hem i givim ‘paoa ya we i bigwan tumas,’ long ol man blong hem. (2 Kor. 4:7; Jon 14:16, 17, NW) Ol man blong God oli kasem paoa tu long ol tok blong Baebol. (Hib. 4:12) ?I gat wan narafala rod bakegen we Jeova i yusum blong mekem yumi strong? Yumi save faenem ansa long buk blong Fas Pita.

“God i Soemaot Gladhat Blong Hem Long Plante Defdefren Rod”

3. (a) ?Aposol Pita i talem wanem long saed blong ol traem? (b) ?Pita i tokbaot wanem long en blong faswan leta blong hem?

³ Aposol Pita i raetem leta i go long ol Kristin we tabu spirit i makemaot olgeta. Hem i talem se oli save glad tumas from we presen we bambae oli kasem i sas tumas. Be hem i talem tu se: “Naoia yufala i mas harem nogud from plante samting we oli stap kam blong traem yufala.” (1 Pita 1:1-6) Makem tok ya “plante” samting. Hem i givim tingting se bambae yumi kasem plante defdefren traem. Be Pita i no wantem se ol Kristin brata blong hem oli wari se bambae oli naf blong stanap strong long plante defdefren traem olsem, no nogat. Hem i gohed, i talem klia long olgeta se oli save sua se Jeova bambae i halpem olgeta blong stanap strong nomata wanem kaen traem i kasem olgeta. Toktok ya i stap long lashaf blong leta blong aposol Pita, taem hem i stap tokbaot wanem bambae i hapen ‘klosap long taem we ol samting blong wol ya bambae i lus.’—1 Pita 4:7.

4. ?From wanem ol tok blong 1 Pita 4:10 i mekem yumi harem gud?

⁴ Pita i talem se: “God i soemaot gladhat blong hem long plante defdefren rod. Hem i givim presen long yufala wanwan we i stret long mak blong yufala. Ale, olsem ol gudfala man blong wok, yufala i mas yusum presen ya blong givgivhan long yufala.” (1 Pita 4:10, NW) Pita i yusum tok ya “plante” bakegen. I olsem se hem i stap talem se: ‘Yumi kasem plante defdefren traem, be God i givhan long yumi long gladhat blong hem long plante defdefren rod tu.’ ?From wanem ol tok ya i mekem yumi harem gud tumas? From we i givim tingting se nomata wanem traem we i kasem yumi, oltaem samting we God i mekem long gladhat blong hem bambae i mekem yumi naf blong stanap strong mo gotru long traem ya. ?Be long ol tok blong Pita, yu yu luk olsem wanem Jeova i stap soemaot gladhat blong hem long yumi? Hem i yusum ol narafala Kristin.

“Givgivhan Long Yufala”

5. (a) ?Evri Kristin oli mas mekem wanem? (b) ?Wanem sam kwestin blong yumi tingbaot?

⁵ Pita i toktok long olgeta we oli joen long Kristin kongregesen, i se: “Antap long ol narafala samting, yufala i mas stap laeklaekem yufala wetem wan lav we i strong gud.” Mo hem i gohed i se: “[God] i givim presen long yufala wanwan we i stret long mak blong yufala. Ale, . . . yufala i mas yusum presen ya blong givgivhan long yufala.” (1 Pita 4:8, 10, NW) Taswe, yumi evriwan long kongregesen i mas givhan blong mekem bilif blong ol narafala Kristin i strong. Jeova i givim wan sas samting blong hem long yumi, blong yumi lukaot long hem, mo i stap long yumi nao blong serem samting ya wetem ol narafala. ?Wanem sas samting ya we Jeova i putum long han blong yumi? Pita i talem se hem i wan “presen.” ?Presen ya hem i wanem? ?Olsem wanem yumi save ‘yusum presen ya blong givgivhan long yumi’?

6. ?Wanem sam long ol presen we God i givim long ol Kristin?

⁶ Tok blong God i talem se: “Evri samting we oli gud mo evri presen we oli nambawan we yumi kasem, oli kamaot long heven nomo.” (Jem. 1:17) Tru ya, ol presen we Jeova i givim long ol man blong hem oli stap soemaot gladhat blong hem. Wan nambawan presen we Jeova i givim long yumi, hemia tabu spirit. Presen ya i mekem se yumi naf blong wokem ol fasin we God i glad long olgeta, olsem lav, gud fasin, mo kwaet fasin. Ale, ol fasin olsem oli pusum yumi blong soem wetem fulhat blong yumi se yumi kaengud long ol Kristin brata sista blong yumi mo yumi rere blong halpem olgeta. Sam narafala gudfala presen we yumi save kasem taem tabu spirit i givhan long yumi, hemia trufala waes mo save. (1 Kor. 2:10-16; Gal. 5:22, 2333) Yes, yumi save tingbaot se paoa we yumi gat, save blong yumi, ol samting we yumi naf blong mekem mo gudhan we yumi gat, oli ol presen we yumi save yusum blong leftemap Papa blong yumi long heven mo ona long hem. God i givim wok ya long yumi blong yusum save mo ol gudfala fasin blong yumi blong soemaot gladhat blong hem long ol narafala Kristin.

?Olsem Wanem Blong ‘Yusum Presen Ya Blong Givgivhan Long Yumi’?

7. (a) ?Tok ya “stret long mak we yufala wanwan i kasem,” i minim wanem? (b) ?Wanem sam kwestin we i gud yumi askem, mo from wanem?

⁷ Long saed blong ol presen we yumi kasem, Pita i talem tu se: “[God] i givim presen long yufala wanwan we i stret long mak blong yufala. Ale, . . . yufala i mas yusum presen ya blong givgivhan long yufala.” Ol tok ya “stret long mak we yufala wanwan i kasem,” i minim se yumi evriwan i gat ol defdefren fasin mo yumi gat gudhan long ol defdefren samting, mo tu, yumi wanwan i gat ol fasin ya go kasem ol defren mak. Nating se i olsem, yumi kasem advaes ya se yumi mas ‘yusum presen ya [nomata wanem presen we yumi kasem] blong givgivhan long yumi.’ Mo ol tok ya se yumi mas “yusum presen ya . . . olsem ol gudfala man blong wok,” hemia wan samting we God i talem se yumi mas mekem. Taswe, i gud yumi askem se: ‘?Mi mi rili stap yusum presen we God i givim long mi blong mekem bilif blong ol Kristin brata sista i strong?’ (Skelem wetem 1 Timoti 5:9, 10.) ‘?No plante taem mi stap yusum save mo gudhan we Jeova i givim long mi blong mi kasem samting blong mi nomo, olsem ol sas samting mo haenem?’ (1 Kor. 4:7) Sipos yumi yusum ol presen we yumi kasem blong ‘givgivhan long yumi,’ bambae yumi mekem Jeova i glad.—Prov. 19:17; ridim Hibrus 13:16.

8, 9. (a) ?Wanem sam rod we ol Kristin raonabaot long wol oli folem blong givhan long ol narafala Kristin? (b) ?Olsem wanem ol brata sista long kongregesen blong yu oli stap givgivhan long olgeta?

⁸ Baebol i tokbaot ol Kristin long faswan handred yia se oli givgivhan long olgeta long plante defren rod. (Ridim Rom 15:25, 26; 2 Timoti 1:16-18.) Tede tu, ol trufala Kristin oli glad blong obei long tok blong God se oli mas yusum presen we oli kasem blong givhan long ol Kristin brata sista blong olgeta. ?Wanem sam rod we oli stap folem blong mekem samting ya?

⁹ Plante brata oli spenem plante aoa evri manis blong rerem ol tok blong ol miting. Ale long ol miting, taem oli serem ol nambawan save ya we oli faenem long stadi we oli mekem long Baebol, tok blong olgeta i gat paoa long ol narafala long kongregesen blong oli traehad moa blong stanap strong. (1 Tim. 5:17) Plante brata sista oli gat nambawan fasin ya blong soem lav long ol narafala mo gat sore long olgeta. (Rom 12:15) Samfala oli spenem taem wetem olgeta we tingting blong olgeta i foldaon mo oli prea wetem olgeta. (1 Tes. 5:14) Sam narafala oli tingbaot ol Kristin brata sista we oli stap pastru long wan traem, nao oli raetem wan leta wetem ol naesfala toktok blong leftemap tingting blong olgeta. Mo sam narafala oli soem kaen fasin taem oli halpem ol Kristin brata sista we oli handikap blong oli kam long ol miting blong kongregesen. Plante taosen Witnes oli joen long wok blong givhan long ol narafala long taem blong disasta. Oli halpem ol Kristin brata sista blong olgeta blong bildim bakegen ol haos we disasta i spolem. Taem ol brata sista ya oli soem kaengud fasin mo givhan long ol narafala, oli stap ‘soemaot gladhat blong God long plante defdefren rod.’—Ridim 1 Pita 4:11.a

?Wanem Nao i Moa Impoten?

10. (a) ?Wanem tufala samting we Pol i luksave se hem i mas mekem long wosip blong hem long God? (b) ?Olsem wanem yumi save folem eksampol blong Pol tede?

¹⁰ I tru se God i givim presen long ol man blong hem, blong oli givhan long ol Kristin brata sista blong olgeta, be i no hemia nomo. God i givim wan nius long olgeta tu we oli mas talemaot long olgeta man. Aposol Pol i luksave tufala samting ya we hem i mas mekem long wosip blong hem long Jeova. Hem i raetem wan leta i go long kongregesen blong Efesas we i tokbaot se ‘God i stap givhan long hem long gladhat blong Hem, blong hem i mekem wok ya blong givhan long olgeta.’ (Efes. 3:2) Be Pol i talem tu se: “[God] i luk mifala se mifala i stret blong karem gud nius.” (1 Tes. 2:4) Olsem Pol, yumi luksave tu se God i givim wok ya long yumi blong talemaot Kingdom blong hem. Taem yumi wok strong long wok blong prij, yumi stap traehad blong folem eksampol blong Pol we hem i no spel long wok blong talemaot gud nius. (Wok 20:20, 21; 1 Kor. 11:1) Yumi save se wok ya blong talemaot gud nius blong Kingdom i save sevem laef blong narafala. Be yumi save tu se yumi mas gohed blong folem fasin blong Pol blong lukaot evri janis blong givhan long ol narafala Kristin blong oli “kasem paoa we tabu spirit i stap givim.”—Ridim Rom 1:11, 12; 10:13-15.

11. ?Yumi mas gat wanem tingting long wok we God i givim long yumi blong prij mo wok blong bildimap bilif blong ol Kristin brata sista?

¹¹ ?Weswan long tufala Kristin wok ya i moa impoten? Kwestin ya i olsem we yumi askem se: ?Long tufala wing blong pijin, weswan i moa impoten? Ansa i klia nomo. Wan pijin i nidim tufala wing tugeta blong hem i save flae gud. Long sem fasin, yumi mas mekem tufala wok ya tugeta, blong yumi mekem ol samting we God i wantem se ol Kristin oli mas mekem. Taswe, i nogud yumi ting se wok blong prij i no joen nating long wok we yumi mekem blong bildimap bilif blong ol Kristin brata sista blong yumi. Yumi mas tingbaot tufala wok ya olsem aposol Pol mo Pita i tingbaot, hemia se tufala wok ya i joen. ?Olsem wanem tufala i joen?

12. ?Olsem wanem Jeova i stap yusum yumi blong mekem wok blong hem?

¹² Yumi ol man blong talemaot gud nius, yumi yusum olgeta save mo gudhan we yumi gat blong tijim narafala, blong traem mekem nambawan save blong Kingdom blong God i kasem hat blong ol man. Long rod ya, yumi wantem halpem olgeta blong oli kam ol disaepol blong Kraes. Be yumi yusum save, gudhan mo ol narafala presen we yumi kasem blong traem leftemap tingting blong ol Kristin brata sista tu, taem yumi talem ol gudfala toktok mo mekem ol samting blong givhan long olgeta. Yes ol samting ya tu oli soemaot gladhat blong God. (Prov. 3:27; 12:25) Olsem nao, yumi wantem halpem olgeta blong oli gohed olsem ol disaepol blong Kraes. Long wok blong prij mo long wok we yumi mekem blong ‘givgivhan long yumi,’ yumi gat nambawan blesing ya blong Jeova i yusum yumi blong mekem wok blong hem.—Gal. 6:10.

“Yufala i Mas Kaengud Long Yufala”

13. ?Wanem bambae i kamaot sipos yumi no ‘givgivhan long yumi’?

¹³ Pol i talem long ol Kristin brata blong hem se: “Yufala i lavlavem yufala olsem wan brata nomo, ale yufala i mas kaengud long yufala. Mo yufala i mas faswan blong soem ona long yufala.” (Rom 12:10, NW) Yes, kaengud fasin we yumi gat long ol Kristin brata sista blong yumi i pusum yumi blong wok wetem fulhat blong yumi olsem ol man blong wok we oli soemaot gladhat blong God. Yumi luksave se sipos Setan i save blokem yumi blong yumi no ‘givgivhan long yumi,’ bambae hem i mekem se yumi no moa joengud tugeta. (Kol. 3:14) Mo sipos yumi no joengud, bambae samting ya i mekem se yumi no moa wok strong long wok blong prij. Setan i save gud se hem i nidim nomo blong blokem yumi long wan haf blong wosip blong yumi nao bambae yumi lego narafala haf ya, hemia wok blong prij. Bambae yumi olsem pijin we sipos wan wing blong hem i nogud, pijin ya i no moa save flae.

14. ?Taem yumi ‘givgivhan long yumi,’ samting ya i mekem i gud long hu? Talem wan eksampol.

¹⁴ Taem yumi ‘givgivhan long yumi,’ samting ya i mekem i gud long olgeta we oli kasem gladhat ya blong God, mo tu i mekem i gud long olgeta we oli soemaot gladhat ya. (Prov. 11:25) Tingbaot Ryan mo woman blong hem Roni, we tufala i stap long Illinois, long Yunaeted Stet. Taem tufala i harem nius se hariken Katrina i spolem plante handred haos blong ol Witnes, lav we tufala i gat long ol brata sista blong tufala i pusum tufala blong lego wok blong tufala mo haos blong tufala, ale tufala i pem wan olfala smol haos wetem wil we trak i pulum. Tufala i fiksimap smol haos ya, biaen tufala i ron 1,400 kilometa long trak blong kasem Louisiana. Tufala i stap long ples ya bitim wan yia mo tufala i givim taem, paoa, mo mane blong tufala blong halpem ol Kristin brata sista. Ryan, we i gat 29 yia blong hem, i talem se: “Taem mi joen long wok ya, mi kam klosap moa long God. Mi luk olsem wanem Jeova i stap lukaotgud long ol man blong hem.” Hem i talem tu se: “Taem mi stap wok wetem ol olfala brata, mi lanem plante samting we i halpem mi blong lukaotgud long ol brata. Mi lanem tu se i gat plante wok we mifala ol yangfala i save mekem long ogenaesesen blong Jeova.” Roni, we i gat 25 yia blong hem, i talem se: “Mi mi talem bigfala tangkiu we mi save givhan long narafala. Mi glad moa naoia i bitim eni narafala taem long laef blong mi. Mi sua se long ol yia we i kam, bambae mi gohed blong kasem ol blesing from nambawan wok ya we mitufala i gat janis blong mekem naoia.”

15. ?Wanem ol gudfala risen we yumi gat blong gohed olsem ol gudfala man blong wok we oli soemaot gladhat blong God?

¹⁵ Tru ya, taem yumi obei long tok blong God blong talemaot gud nius mo blong mekem bilif blong ol Kristin brata blong yumi i strong, yumi evriwan i kasem blesing from. Olgeta we yumi halpem olgeta, oli kasem paoa blong gohed blong mekem wok blong Jeova, mo yumi kasem trufala glad we i kamaot taem man i givim samting long narafala. (Wok 20:35) Lav i kam bigwan moa insaed long kongregesen taem wanwan memba i intres long narafala. Mo tu, lav mo kaengud fasin blong yumi i soemaot se yumi ol trufala Kristin. Jisas i talem se: “Nao from we yufala i stap lavlavem yufala, bambae olgeta man oli luksave se yufala i man blong mi.” (Jon 13:35) Antap long ol samting ya, yumi ol man blong Jeova, yumi ona long Papa blong yumi we i lukaotgud long yumi, taem yumi soemaot fasin blong hem blong wantem tumas blong mekem bilif blong ol brata sista blong yumi i strong moa. !Yes, yumi gat ol nambawan risen blong yusum presen blong yumi blong ‘givgivhan long yumi olsem ol gudfala man blong wok we oli soemaot gladhat blong God’! ?Olsem wanem? ?Bambae yu yu gohed blong mekem samting ya?—Ridim Hibrus 6:10.

[Futnot]

?Yu Yu Tingbaot?

• ?Wanem sam rod we Jeova i yusum blong mekem ol man blong hem oli strong bakegen?

• ?God i givim wanem long yumi?

• ?Wanem sam samting we yumi save mekem blong givhan long ol Kristin brata blong yumi?

• ?Wanem bambae i pusum yumi blong gohed blong yusum presen blong yumi blong ‘givgivhan long yumi’?

[Tok blong pija long pej 18]

Yumi talemaot gud nius long narafala mo yumi halpem ol narafala Kristin