?God i Gat Prapa Fasin Blong Hem Mo Ol Filing?
Ansa we plante man oli givim:
◼ “God i stap long evri ples mo long evri samting. Hem i sem mak olsem win.”
◼ “God i wan paoa nomo we i gat waes mo save.”
?Jisas i talem wanem?
◼ “Long haos blong Papa blong mi, i gat plante rum i stap.” (Jon 14:2) Jisas i yusum pijatok blong wan haos blong soem se God i gat prapa ples blong hem.
◼ “Mi mi aot long Papa blong mi, mi kam long wol ya. Mo bambae i no longtaem, mi mi aot long wol ya, mi gobak long Papa blong mi bakegen.” (Jon 16:28) Jisas i tokbaot God olsem wan man we i gat wan prapa ples blong hem.
JISAS i no talem se God i wan paoa nomo. Defren olgeta, hem i toktok long God mo i prea long hem. Plante taem hem i singaot Jeova se Papa blong hem long heven. Tok ya i soemaot se hem i frengud wetem Papa blong hem.—Jon 8:19, 38, 54.
I tru se “i no gat man we i luk God samtaem,” mo se “God, hem i Spirit.” (Jon 1:18; 4:24) Be hemia i no min se hem i no gat wan bodi nating. Baebol i talem se: “Sipos i gat bodi we i blong wol ya, be i gat bodi we i blong spirit man tu.” (1 Korin 15:44, NW) ?Olsem wanem? ?Jeova i gat bodi blong spirit man?
Yes. Taem Jisas i laef bakegen, “hem i go insaed long heven stret, mo naoia hem i stap stanap long fes blong God blong toktok long saed blong yumi.” (Hibrus 9:24) Hemia i tijim yumi long tu impoten samting long saed blong God. Faswan se, God i gat wan prapa ples blong hem long heven. Sekenwan se, hem i no wan paoa nomo we i stap long evri ples, be hem i wan spirit man.
Sipos God i wan spirit man we i stap long prapa ples blong hem long heven, ?olsem wanem hem i save gat paoa long ol samting we oli hapen long evri ples? God i save sanem tabu spirit blong hem, hemia paoa blong hem we i stap wok, i go long eniples long heven mo wol. Olsem wan papa we i yusum han blong hem blong holem pikinini blong hem blong mekem hem i haremgud mo blong givhan long hem, ale God i stap yusum tabu spirit blong hem blong mekem ol samting we hem i wantem.—Ol Sam 104:30; 139:7, NW.
From we God i wan spirit man, hem i gat ol fasin blong hem. I gat sam samting we hem i laekem, mo sam samting we hem i no laekem. Mo hem i save gat ol defren filing tu. Baebol i talem se hem i lavem ol man blong hem, hem i glad tumas long ol wok blong hem, hem i no laekem nating fasin blong wosipim aedol, mo hem i harem nogud taem i luk ol rabis fasin long wol. (Jenesis 6:6; Dutronome 16:22; 1 King 10:9; Ol Sam 104:31) Fas Timoti 1:11 i talem se God i “harem gud oltaem.” !Yumi kasem save nao from wanem Jisas i talem se yumi save lanem blong lavem God wetem olgeta hat blong yumi!—Mak 12:30.a
[Futnot]
a Blong kasem moa save long saed ya, ridim japta 1 blong buk ya we ol Witnes blong Jeova oli wokem, ?Wanem Samting We Baebol i Rili Tijim?
[Tok blong makem poen long pej 5]
Olsem wan papa we i yusum han blong hem blong holem pikinini blong hem blong mekem hem i haremgud mo blong givhan long hem, ale God i stap yusum tabu spirit blong hem blong mekem ol samting we hem i wantem