2 Yu Mas Kasem Stret Save Long Saed Blong God
“Laef ya [we i no save finis], hem i min se man i save yu, we yu nomo yu tru God.”—Jon 17:3.
?WANEM SAMTING I SAVE BLOKEM BILIF BLONG YU? Sam man oli talem se i no gat God. Sam narafala man oli talem se God i no wan man be i jes wan paoa we i bigwan. Mo olgeta we oli bilif long God, oli tijim plante defdefren kaen tijing long saed blong hem mo ol fasin blong hem.
?OLSEM WANEM BLONG NO LETEM SAMTING YA I WINIM YU? Wan rod blong save ol fasin blong God hemia blong lukluk ol samting we hem i wokem. Aposol Pol i tokbaot God i se: “Yumi no save luk ol fasin ya blong hem stret long ae blong yumi. Hem i God. Hem i stap oltaem, mo paoa blong hem i no save finis. Be i stat long taem ya we hem i mekem wol ya fastaem, i kam kasem tede, hem i bin mekem ol fasin ya blong hem oli klia, blong yumi luk. Yumi save faenemaot long ol samting blong wol ya we hem i bin mekem.” (Rom 1:20) Taem yu lukluk ol nambawan samting we oli stap raonabaot long yumi, yu save lanem plante samting we i soemaot waes mo paoa blong God ya we i Wokem yumi.—Ol Sam 104:24; Aesea 40:26.
Be, blong gat stret save long saed blong God, wanwan man i mas ridim Tok blong God, Baebol, mo i mas stadi long hem. I nogud yu letem narafala man i bos long tingting blong yu. I moagud yu folem advaes ya long Baebol we i se: “Yufala i no mas letem fasin blong yufala i kam olsem fasin blong ol man long wol. Yufala i mas letem God i jenisim tingting blong yufala, blong mekem tingting blong yufala i niuwan olgeta. Nao bambae yufala i save jusumaot ol fasin we God i wantem, wanem i gud, mo wanem hem i glad long hem, mo wanem i stret gud blong mekem.” (Rom 12:2) Tingbaot sam long ol trutok ya long saed blong God.
God i gat wan nem blong hem. Long ol faswan hanraet blong Baebol, nem blong God i stap plante taosen taem long ful Baebol. Plante Baebol tede oli putum nem ya long Ol Sam 83:18, we i talem se: “Ol man oli mas save se yu nomo, we nem blong yu Jeova, yu yu hae olgeta, antap long olgeta samting long wol.”—King James Version.
Ol fasin blong man oli save mekem Jeova God i glad no i harem nogud. Afta we Jeova i karemaot ol man Isrel long Ijip, i mekem olgeta oli fri, ol man Isrel oli no tinghae long ol waes advaes blong hem. Fasin blong olgeta blong tanem baksaed long God i mekem hem “i sore, i harem nogud.” Ol fasin blong olgeta i ‘mekem God ya we i Tabu, i harem nogud.’—Ol Sam 78:40, 41.
Jeova i kea long yumi wanwan. Jisas i toktok long ol man blong hem i se: “Ol smosmol pijin ya we man i stap salem sikisti vatu long tu, be sipos Papa blong yufala i no letem, i no gat wan long olgeta we i save foldaon long graon. Yufala i luk. Ol hea blong hed blong yufala, be hem i kaontem evriwan. From samting ya, yufala i no fraet. Long fes blong hem, yufala i gud moa, i winim plante smolfala pijin ya.”—Matiu 10:29-31.
God i no gat tingting ya se wan kala no kantri i moagud i bitim narawan. Taem aposol Pol i stap long Atens, hem i talem long ol man Gris se God “i mekem wan man nomo, nao olgeta man long wol oli kamaot long man ya, mo hem i putum olgeta oli stap long evri ples long wol.” Mo Pol i talem tu se God “i no stap longwe long yumi nating.” (Ol Wok 17:26, 27) Aposol Pita i talem se: “God i stap mekem i sem mak nomo long olgeta man. . . . Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.”—Ol Wok 10:34, 35.
?WANEM GUDFALA SAMTING WE YU SAVE KASEM? Sam man “oli strong blong mekem wosip long God. Be wosip blong olgeta i no stanap long stret save.” (Rom 10:2, NW) Sipos yu save samting we Baebol i rili tijim long saed blong God, bambae yu no save letem eni man i lidim yu yu gorong, mo bambae yu save kam “klosap long God.”—Jemes 4:8.
Blong gat moa save long saed ya, ridim japta 1, “?Wanem Trutok Long Saed Blong God?” long buk ya ?Wanem Samting We Baebol i Rili Tijim?a
[Futnot]
a Hemia wan buk we ol Witnes blong Jeova oli wokem.
[Tok blong pija long pej 6]
Wan rod blong kasem stret save blong God hemia blong lukluk ol samting we hem i wokem raonabaot long yumi