3 Yu Mas Save Trutok Long Saed Blong Jisas

“God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”—Jon 3:16.

?WANEM SAMTING I SAVE BLOKEM BILIF BLONG YU? Sam man oli wantem mekem yu yu ting se Jisas i no wan trufala man. Sam narafala maet oli talem se Jisas i trufala man, be hem i man olsem yumi nomo, hem i no pikinini blong God, mo naoia hem i ded finis.

?OLSEM WANEM BLONG NO LETEM SAMTING YA I WINIM YU? I gud yumi folem fasin blong disaepol ya Nataniel.a Nataniel i gat wan fren we nem blong hem Filip. Filip i kam talem long hem se hem i ting se hem i faenem Mesaea, i se: “Hem i man Nasaret, i pikinini blong Josef nem blong hem Jisas.” Be Nataniel i no bilivim tok blong Filip. Hem i ansabak se: “?Wanem? ?Yu ting se wan gudfala samting i save kamaot long Nasaret?” Nating se hem i tok olsem, be hem i folem Filip taem Filip i talem long hem se: “Ale, yu kam traem luk.” (Jon 1:43-51) Sipos yu wan yu traem faenemaot wanem ol samting we oli pruvum se Jisas i tru, samting ya i save givhan bigwan long yu. ?Yu save mekem wanem?

Traem faenem ol pruf we oli soemaot se Jisas i wan trufala man. Plante man tede oli trastem hanraet blong tufala man ya Josephus mo Tacitus, we tufala i storebaot ol samting we oli bin hapen bifo. Tufala i laef long faswan handred yia mo tufala i no Kristin. Be tufala i tokbaot Jisas, se hem i wan trufala man we i bin laef bifo. Tacitus i storebaot Hedgavman blong Rom, we nem blong hem Nero, mo olsem wanem Nero i bin giaman se ol Kristin nao oli laetem faea we i bin bonem bigfala taon blong Rom long yia 64 K.T.b Tacitus i raetem se: “Nero i putum fol long wan grup blong man we oli stap kolem olgeta ol Kristin. Plante man oli no laekem ol Kristin from bilif blong olgeta i defren. Ale [Nero] i sanem ol man oli go holem ol Kristin ya mo oli mekem plante nogud samting long olgeta. Kristas [Kraes], we nem ya Kristin i kamaot long hem, hem tu i bin safa bigwan, oli bin givim panis long hem we i nogud olgeta long taem blong rul blong Taebirias. Man ya Ponjes Paelat nao i bin givim oda blong panis ya.”

Wan buk (Encyclopaedia Britannica, we oli wokem long 2002) i tokbaot wanem we sam man long ol faswan 200 yia oli raetem long saed blong Jisas mo ol faswan Kristin. Buk ya i talem se: “Ol defdefren samting we ol man ya oli raetem oli pruvum se, long taem bifo, ol man ya we oli agensem Kristin Skul bigwan, oli save se Jisas i wan trufala man we i bin laef long wol, oli neva tok agensem samting ya. Toktok ya se Jisas i no wan trufala man, i stat fastaem long en blong ol yia 17 handred, i gohed long ol yia 18 handred, kasem ol yia 19 handred. Be i no gat strong risen nating blong sapotem tingting ya.” Long 2002 wan niuspepa (The Wall Street Journal) i talem se: “Bighaf blong ol man we oli gat save, oli agri finis naoia se Jisas blong Nasaret hem i wan trufala man we i bin laef bifo, wanwan man nomo i no agri long saed ya from we oli no bilif long God.”

Tingbaot ol pruf se Jisas i laef bakegen. Taem ol man we oli agensem Jisas oli kam holem hem, ol gudfala fren blong hem oli ronwe long hem, mo wan long ol fren ya blong hem, hemia Pita, i fraet tumas long ol man ya nao i talem se hem i no save Jisas. (Matiu 26:55, 56, 69-75) Afta we ol man oli holem Jisas, ol man we oli bin biaenem hem, oli go wanwan olbaot. (Matiu 26:31) Nao wantaem nomo afta long ded blong Jisas, ol disaepol blong hem oli girap, oli wok strong. Pita mo Jon, tufala i no fraet nating blong tok long fored blong ol semfala man ya nomo we oli bin mekem plan blong kilim Jisas i ded. Ol disaepol blong Jisas oli gat strong tingting blong wok, taswe ol tijing blong Jisas oli go kasem plante kantri we Gavman blong Rom i rul long olgeta. Oli rere nomo blong ded, bitim we oli lego bilif blong olgeta.

?Wanem i mekem we wantaem nomo ol disaepol ya oli gat strong tingting olsem? Aposol Pol i eksplenem se Jisas i girap bakegen finis long ded mo “hem i kamtru long Pita, mo biaen, hem i kamtru long ol twelef man blong hem.” Pol i gohed i se: “Mo biaen, hem i kamtru long wan kampani blong ol man blong hem we oli moa long faef handred man, nao olgeta evriwan oli luk hem wantaem.” Bighaf blong ol man ya we oli luk samting ya stret long ae blong olgeta, oli laef yet long taem we Pol i raetem ol tok ya. (1 Korin 15:3-7) Sipos wan no tu man nomo oli bin luk Jisas afta we hem i laef bakegen, ating i isi nomo blong ol man oli talem se stori ya se Jisas i laef bakegen, i giaman. (Luk 24:1-11) Be from we i gat bitim 500 man we oli bin luk samting ya stret long ae blong olgeta, hemia strong pruf finis se i tru nomo we Jisas i laef bakegen long ded.

?WANEM GUDFALA SAMTING WE YU SAVE KASEM? Olgeta we oli bilif long Jisas mo oli obei long hem, bambae God i save fogivim sin blong olgeta mo oli save gat wan tingting we i klin long fes blong God. (Mak 2:5-12; 1 Timoti 1:19; 1 Pita 3:16-22) Sipos oli ded, Jisas i promes blong mekem oli laef bakegen long ‘lasdei.’—Jon 6:40.

Blong gat moa save long saed ya, ridim japta 4, “?Hu Ya Jisas Kraes?” mo japta 5, “Ransom—Beswan Presen We God i Givim,” long buk ya ?Wanem Samting We Baebol i Rili Tijim?c

[Ol futnot]

[Tok blong pija long pej 7]

I gud yumi folem fasin blong Nataniel we i traem faenem pruf se Jisas i Mesaea