Seken Giaman Tingting: Ol Rabis Man Bambae Oli Harem Nogud Long Helfaea
?Giaman tingting ya i kamaot long weples? “Long olgeta waes man blong Gris, Plato nao i gat bigfala paoa long tingting blong plante man long saed blong Hel.”—Histoire des enfers (The History of Hell), we Georges Minois i raetem, pej 50.
“Samwe long yia 150 K.T., ol Kristin we oli kasem tijing long saed blong ol waes blong Gris, oli stat blong harem se oli mas joenem ol waes ya wetem bilif blong olgeta . . . Waes we i stret moa long tingting blong olgeta, hemia waes blong Plato.”—The New Encyclopædia Britannica (1988), Buk namba 25, pej 890.
“Tijing blong Jos i talem se i gat wan helfaea we i stap blong olwe. Taem ol man we oli mekem bigfala sin oli ded, kwiktaem nomo sol blong olgeta i godaon long hel. Long ples ya oli kasem panis blong helfaea, hemia ‘faea we i stap blong olwe.’ Bigfala panis we helfaea i givim long ol man, i blong mekem se oli stap longwe long God blong olwe.”—Catechism of the Catholic Church, we oli raetem long 1994, pej 270.
?Baebol i talem wanem? “Ol man we oli laef oli save se bambae oli ded, be ol dedman oli no save wan samting, . . . from we i no gat wok mo tingting mo save mo waes long Sheol, ples ya we bambae yu go long hem.”—Prija 9:5, 10, Revised Standard Version.
Long sam Baebol, oli tanem Hibru wod ya Sheol, we i minim “ples blong ol dedman,” i kam “hel.” ?Vas ya i soemaot wanem long saed blong ol dedman? ?Oli stap harem nogud long Sheol, blong oli save kam klin long sin blong olgeta? Nogat, from we “oli no save wan samting.” Taswe, taem olfala Job i safa bigwan from wan strong sik, hem i askem strong long God se: “Yu putum mi long hel [Hibru, Sheol] blong lukaotgud long mi.” (Job 14:13; Douay-Rheims Version) Sipos Sheol i wan ples we man i harem nogud blong olwe, ?tok blong Job i minim wanem? Long Baebol, hel i minim nomo beregraon blong ol man, ples we i no moa gat wok long hem.
?Olsem wanem? ?Yu yu luk se mining ya blong hel i stret mo i laenap wetem Baebol? ?Wanem bigfala sin, nating sipos sin ya i nogud olgeta, we i save mekem se God ya we i lavem man bambae i mekem man i harem nogud blong olwe? (1 Jon 4:8) Be sipos helfaea i wan giaman tingting, ?hemia i min se laef long heven tu i wan giaman tingting?
Skelem ol vas ya blong Baebol: Ol Sam 146:3, 4; Ol Wok 2:25-27, NW; Rom 6:7, 23
SAMTING WE I TRU:
God i no panisim man long helfaea
[Credit Lines long pej 4]
Barrators—Giampolo/The Doré Illustrations For Dante’s Divine Comedy/Dover Publications Inc.