Namba Sikis Giaman Tingting: God i Agri Long Fasin Blong Wosip Long Pija Mo Aedol
?Giaman tingting ya i kamaot long weples? “Ol faswan Kristin oli no yusum aedol long wosip blong olgeta . . . Long ol yia 3 mo 4 handred K.T., jos i letem ol man oli yusum aedol long wosip blong olgeta. Oli talem eskius ya se ol aedol oli save givhan long ol man we oli no gat save blong oli kasem save long Kristin Skul, i bitim ol tok mo ol buk blong jos.”—Cyclopedia of Biblical, Theological, and Ecclesiastical Literature, we McClintock mo Strong tufala i raetem, Buk namba 4, pej 503 mo 504.
?Baebol i talem wanem? “Bambae yufala i no mas mekem pija blong ol samting long heven, no long wol, no long solwota we wol ya i stanap long hem, blong yufala i mekem wosip long hem. Bambae yufala i no mas bodaon long aedol olsem blong mekem wosip long hem.” (Eksodas 20:4, 5) Aposol Jon i raet long ol Kristin long faswan handred yia se: “Ol pikinini blong mi. Yufala i mas lukaot gud blong yufala i no go mekem wosip long ol giaman god.”—1 Jon 5:21.
?Olsem wanem? ?Ol aedol oli jes blong mekem ol man oli kam klosap moa long ol god we oli stap wosipim? ?Oli mekem rod blong ol man oli ona long ol god ya? Buk ya, The Encyclopedia of Religion, i talem se: “Long stat, ol man oli yusum ol aedol olsem wan rod blong tijim man nomo mo blong flasem jos. Hemia nao wanem we ol man oli talem olsem eskius. Be i no longtaem afta, ol man oli wosipim ol aedol ya. Samting ya i tru moa long ol pija we oli kam olsem bigfala haf blong wosip blong Otodoks jos long ol kantri blong Medel Is.” Be profet Aesea i askem se: ‘?Bambae yumi save talem se God i olsem hu? ?Sipos yumi wantem makem hem, bambae yumi save talem olsem wanem?’—Aesea 40:18.
Skelem ol vas ya blong Baebol: Aesea 44:13-19; Ol Wok 10:25, 26; 17:29; 2 Korin 5:7
SAMTING WE I TRU:
God i no glad long fasin blong yusum aedol mo pija long wosip
SAKEMAOT OL GIAMAN TINGTING, HOLEMTAET TRUTOK
?Yumi save talem wanem long saed blong ol giaman tingting ya we plante jos oli stap tijim? Ol “storian olbaot” ya [Grik, my’thos] oli no save winim ol trutok blong Baebol. Ol trutok ya oli isi nomo blong man i kasem save long olgeta, mo oli mekem man i haremgud.—2 Pita 1:16.
Taswe, i gud yu openem tingting blong yu mo yu no fraet blong skelem Tok blong God, we i stamba blong trutok, wetem tijing we yu yu bin kasem. (Jon 17:17) Sipos yu mekem olsem, promes ya bambae i kamtru long yu, se: “Bambae yufala i save trutok, mo trutok ya bambae i mekem yufala i fri man.”—Jon 8:32.
[Foto Credit Line long pej 9]
Pictorial Archive (Near Eastern History) Est.