Samting We Yumi Lanem Long Jisas

Long Saed Blong Famle Laef

?Wanem tingting long saed blong mared we i save mekem famle i hapi?

Mared i wan tabu samting. Taem samfala oli askem long Jisas sipos wan mared man mo woman i save divos, Jisas i talem se: “?Ating yufala i no ridim tok blong Baebol? Baebol i talem se, ‘God we i mekem olgeta samting, fastaem, hem i mekem tu man nomo, wan we i man, wetem wan we i woman. . . . From samting ya, bambae man i mas aot long papa mo mama blong hem, i mas go joen wetem woman blong hem. Nao tufala bambae i kam olsem wan bodi nomo.’ . . . Mo from we God i joenem tufala olsem, man i no mas brekem mared blong tufala. . . . Sipos wan man i mekem divos long woman blong hem, we woman ya i no bin slip wetem narafala man, nao man ya i go mared long narafala woman, man ya i mekem sin.” (Matiu 19:4-6, 9) Taem wan man mo woman we tufala i mared, tufala i folem advaes blong Jisas mo tufala i stap tru long tufala, evriwan long famle bambae oli stap gud mo oli glad.

?Taem yumi lavem God, olsem wanem samting ya i save mekem famle i hapi?

Jisas i talem se: “‘Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.’ Hemia nao loa ya we i hae moa long ol narafala loa, mo i nambawan blong folem.” ?Wanem namba tu loa we i klosap sem mak? Jisas i talem se: “Yu mas lavem ol man we oli stap raonabaot long yu, yu mas mekem i gud long olgeta, [wetem olgeta we oli stap klosap moa long yu—hemia famle blong yu] olsem we yu stap mekem i gud long yu.” (Matiu 22:37-39) Taswe, impoten samting we i mekem famle i hapi, hemia fasin blong frengud wetem God, from we taem yumi lavem hem, samting ya i save pusum yumi blong lavem ol narafala.

?Olsem wanem hasban mo waef tufala i save mekem tufala i hapi?

Ol hasban oli save mekem waef blong olgeta i hapi sipos oli folem eksampol blong Jisas. Jisas i letem laef blong hem blong sevem kongregesen, we i olsem waef blong hem, from we hem i lavem kongregesen ya tumas. (Efesas 5:25) Jisas i talem se: “Mi mi Pikinini blong Man, be mi mi no kam blong bambae ol man oli mekem wok blong mi. Mi mi kam blong mekem wok blong olgeta.” (Matiu 20:28) Jisas i neva fosem olgeta we oli stap aninit long hem, mo i no mekem i strong tumas long olgeta, be hem i stap mekem olgeta oli haremgud. (Matiu 11:28) From samting ya, ol hasban oli mas yusum paoa blong olgeta long kaen fasin, blong givhan long evriwan long famle.

Eksampol blong Jisas i save givhan long ol waef tu. Baebol i talem se: “God, hem i hed blong Kraes.” Hem i talem tu se: “Man, hem i hed blong woman blong hem.” (1 Korin 11:3) Jisas i no ting se fasin blong stap aninit long God i daonem hem. Hem i gat bigfala respek long Papa blong hem. Hem i talem se: “Mi stap mekem ol samting we hem i wantem.” (Jon 8:29) Waef we i obei long hasban blong hem from we hem i lavem mo i respektem God, hem i save mekem famle blong hem i hapi.

?Papa mo mama i save lanem wanem long tingting blong Jisas long saed blong ol pikinini?

Jisas i spenem taem wetem ol pikinini mo hem i intres long tingting mo filing blong olgeta. Baebol i talem se: “Jisas i singaot ol pikinini ya blong oli kam long hem, nao i talem long ol man blong hem se, ‘Yufala i no blokem ol pikinini ya. Yufala i letem olgeta oli kam long mi.’” (Luk 18:15, 16) Wan taem ol man oli tok agensem sam boe we oli talemaot bilif blong olgeta long saed blong Jisas. Be Jisas i talem long ol man ya se: “?Ating yufala i no ridim wan tok long Baebol? . . . ‘Ol pikinini mo ol smosmol pikinini, be yu yu mekem we olgeta oli save presemgud yu.’”—Matiu 21:15, 16.

?Ol pikinini oli save lanem wanem samting long Jisas?

Jisas i soemaot wan gudfala eksampol long ol pikinini, blong oli save olsem wanem blong intres long ol samting long saed blong Baebol. Taem Jisas i gat 12 yia nomo, hem i stap “long haos blong God, i stap sidaon long medel blong ol tija blong ol laen blong Isrel. Hem i stap lesin long tok blong olgeta, mo i stap askem kwestin long olgeta.” ?Wanem samting i kamaot from? “Olgeta evriwan we oli harem hem oli sapraes tumas long save blong hem, mo long ol ansa blong hem.” (Luk 2:42, 46, 47) Nating se i olsem, Jisas i no flas from save we hem i gat. Defren olgeta, ol save ya oli pulum hem blong soem respek long papa mama blong hem. Baebol i talem se: “Oltaem hem i stap ona long tufala.”—Luk 2:51.

Blong save moa, lukluk japta 14 blong buk ya, ?Wanem Samting We Baebol i Rili Tijim?a

[Futnot]