‘Mi Krae Blong Yu Givhan Long Mi, ?Be Wetaem Bambae Yu Harem Mi?’
Wan woman we nem blong hem Jayne, i krae se: “!Mi wantem nomo se mi no moa harem i soa long bodi blong mi!” Woman ya i gat kansa, mo rabis sik ya i stap kam bigwan moa oltaem long bodi blong hem. !Ol famle mo fren blong hem oli wantem tumas blong tekemaot sik ya, mo mekem se hem i no moa safa! Oli prea long God blong i halpem hem. ?Olsem wanem? ?God i lesin long olgeta? ?Hem i kea long olgeta?
GOD i save ol trabol we oli stap spolem ol man tede. Tok blong hem, Baebol, i talem se: “Yumi save finis, we i kam kasem naoia, olgeta samting ya we God i mekem oli stap krae, from we olgeta oli stap harem nogud.” (Rom 8:22) God i save se i gat plante milian man olsem Jayne, we oli stap harem nogud evri dei long bodi, filing, mo tingting blong olgeta. God i stap luk ol 800 milian man we oli go slip evri naet we bel blong olgeta i emti. Hem i luk plante narafala milian man we oli safa from raf fasin we wan memba blong famle i mekem long olgeta, mo God i luk ol papa mama we oli wari from fiuja mo laef blong pikinini blong olgeta. ?Olsem wanem? ?Samtaem yu yu stap tingbaot sipos God bambae i mekem wan samting blong stretem ol trabol ya? Yumi ol man, yumi wantem tumas blong givhan long olgeta we yumi laekem olgeta tumas. ?Be olsem wanem long God? ?Ating hem tu i wantem givhan long ol man we hem i wokem olgeta, no?
Ating yu yu stap tingting dip long ol kwestin olsem, be i no yu wan nomo we i mekem samting ya. Bitim 2,600 yia bifo, wan man blong God we nem blong hem Habakuk, i gat sem filing olsem plante man tede oli gat. Hem i askem long God se: “Hae God. Naoia, long ples blong mifala, ol man oli stap faet, oli stap kilkilim olgeta oli ded. Oltaem, mi stap krae i kam long yu blong yu givhan long mifala. ?Be wetaem bambae yu harem mi, yu tekemaot mifala long ol trabol ya? ?From wanem yu letem mi mi stap luk ol trabol ya olsem? ?Bambae yu yu stap lukluk ol trabol ya gogo kasem wetaem? Naoia raonabaot long mi, ol man oli stap faet oli stap kilkilim olgeta, mo oli stap spolem olgeta samting. Olbaot long evri ples, ol man oli stap rao, mo oli stap faet.” (Habakuk 1:2, 3) Habakuk we i wan Hibru profet, i luk ol man long taem blong hem oli stap mekem raf fasin we i nogud bitim mak, mo oli stap faet. Tede, ol rabis fasin olsem oli kamaot evri dei long nius, mo ol man we oli gat sore oli harem nogud tumas from.
?Olsem wanem? ?God i mekem olsem se ol wari blong Habakuk oli no impoten? Nogat. Hem i lesin long ol impoten kwestin blong Habakuk, mo biaen, hem i toktok blong leftemap tingting blong hem mo mekem hem i harem gud bakegen. Jeova God i mekem bilif blong Habakuk i strong, taem hem i promes se bambae hem i finisim ol trabol we oli stap mekem ol man oli safa. Promes ya blong God i save mekem yu tu yu harem gud, olsem we i mekem Jayne mo famle blong hem oli harem gud. Ol haf we oli kam biaen, bambae oli ansa long ol kwestin ya: ?Olsem wanem yumi save sua se God i rili kea long yumi? ?God bambae i mekem wanem blong finisim ol trabol we oli stap mekem yumi safa, mo bambae hem i mekem samting ya wetaem?