Baptaes Long Nem Blong Papa, Long Nem Blong Pikinini, Mo Long Nem Blong Tabu Spirit
‘Yufala i mas go long ol man . . . blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu spirit.’—MAT. 28:19.
1, 2. (a) ?Wanem samting i hapen long Jerusalem long dei blong Pentekos long yia 33 K.T.? (b) ?From wanem plante man oli wantem baptaes?
LONG lafet blong Pentekos long yia 33 K.T.,a taon blong Jerusalem i fas long ol man. Ol man ya oli aot long ol defdefren ples farawe, oli kam blong joen long lafet ya. Taem oli stap bisi long impoten lafet ya, wan narakaen samting i hapen, nao aposol Pita i givim wan tok long fored blong plante man. Toktok blong hem i stikim gud tingting blong olgeta. Ale samwe long 3,000 man Jiu mo proselaet oli tanem tingting blong olgeta from ol sin blong olgeta, mo oli baptaes long wota. Olgeta we oli baptaes long dei ya oli joen long niufala Kristin kongregesen we i jes stanap long taem ya. (Wok 2:41) !Tingbaot taem ol man ya oli hivap raon long ol pul blong wota olbaot long Jerusalem blong tekem baptaes! !Ating samting ya i pulum ae blong plante man mo i mekem bigfala toktok i goraon long taon!
2 ?Wanem i mekem we plante man oli wantem baptaes? Jes bifo we ol man ya oli baptaes, long sem dei ya nomo, “i gat wan noes i kamaot long skae, we i olsem wan bigfala win i blu.” Noes ya i kavremap olgeta ples long haos ya we 120 disaepol blong Jisas oli stap wanples long hem. Nao tabu spirit i kam fulap long ol disaepol ya mo i mekem we oli save “toktok long ol lanwis blong ol narafala man.” Plante man mo woman Isrel we oli man blong prea, oli kam long ol disaepol ya mo oli sapraes blong harem olgeta oli toktok olsem. Taem oli lesin long tok blong Pita, we hem i tokbaot ded blong Jisas, plante long olgeta oli harem we tok ya “i stikimgud olgeta.” Ale, oli wantem save se oli mas mekem wanem. Pita i talem long olgeta se: ‘Yufala i mas tanem tingting blong yufala from ol sin blong yufala, mo yufala evriwan i mas baptaes long nem blong Jisas Kraes . . . Nao bambae God i givim tabu spirit ya long yufala.’—Wok 2:1-4, 36-38.
3. ?Long dei blong Pentekos, ol man Jiu mo ol proselaet we oli tanem tingting blong olgeta from ol sin blong olgeta, oli mas mekem wanem?
3 Tingbaot ol man Jiu mo ol proselaet ya we oli harem tok blong Pita. Olgeta ya oli save finis se Jeova hem i God, mo oli bilif long hem. Oli ridim Hibru haf blong Baebol, taswe oli save finis se tabu spirit, hem i paoa blong God we God i yusum blong wokem olgeta samting long heven mo wol. Mo oli save se hemia paoa we God i gohed yet blong yusum blong mekem ol wok blong hem. (Jen. 1:2; Jaj. 14:5, 6; 1 Saml. 10:6; Sam 33:6) Be save ya we oli gat i no naf. Oli mas save tu se rod blong God blong sevem man, hemia Mesaea ya Jisas. Mo oli mas agri long rod ya we God i jusum. From samting ya nao Pita i talem se oli mas “baptaes long nem blong Jisas Kraes.” Sam dei nomo bifo long hemia, Jisas i talem tok ya long Pita mo ol narafala man blong hem se, oli mas baptaesem ol man long ‘nem blong Papa, long nem blong Pikinini, mo long nem blong tabu spirit.’ (Mat. 28:19, 20) Samting ya i impoten tumas long ol Kristin long faswan handred yia ya. Mo hem i impoten yet tede. ?From wanem?
Long Nem Blong Papa
4. ?Wanem samting i jenis long saed blong fasin blong man i kam fren blong God?
4 Olsem yumi talem finis, ol man we oli harem tok blong Pita, oli wosip long Jeova mo oli gat wan fasin fren wetem Hem finis. Oli traehad blong folem Loa blong hem, taswe oli aot long ol defdefren ples farawe oli kam long Jerusalem. (Wok 2:5-11) Be naoia, fasin blong God blong wok wetem ol man, i jenis. Ol man Isrel oli no moa stap olsem ol spesel man blong hem. Taswe fasin blong folem ol rul blong Loa ya, i no moa naf blong mekem we God i glad long man. (Mat. 21:43; Kol. 2:14) Sipos ol man ya we oli stap lesin long Pita, oli wantem gohed blong stap fren blong Jeova, oli mas mekem wan narafala samting.
5, 6. ?Plante man Jiu mo proselaet long faswan handred yia oli mekem wanem blong oli save stap fren blong God?
5 Ol man ya oli mas lukluk i go long Jeova, we hem nao i givim laef. (Wok 4:24) Tru ya, ol man we oli lesin long Pita, oli luksave moa klia nao, se Jeova i wan Papa we i mekem i gud tumas long ol man. Hem i sanem Mesaea i kam blong mekem oli fri, mo hem i glad nomo blong fogivim ol man ya we Pita i talem long olgeta se: “Yumi ol laen blong Isrel evriwan, yumi mas savegud se Jisas ya we yufala i nilim hem long [“pos,” NW], hem nao God i mekem hem i Masta blong yumi, mo i Mesaea tu.” Yes, tok blong Pita i pulum ol man ya blong oli gat bigfala tangkiu moa long ol samting we Papa Jeova i mekem blong givhan long ol man we oli wantem kam fren blong hem.—Ridim Ol Wok 2:30-36.
6 Yes, ol man Jiu mo ol proselaet ya oli kasem save nao, se sipos oli wantem stap fren blong Jeova, oli mas bilif se Jisas hem i rod we God i yusum blong sevem ol man. Taswe ol man ya oli mas tanem tingting blong olgeta from ol sin blong olgeta. Wan long ol sin ya we oli gat fol long hem, se oli sakemaot Jisas mo oli pat blong neson blong Isrel we i kilim Jisas i ded. Taswe, afta we ol man ya oli baptaes finis, oli spenem plante dei blong “lesin long ol tok ya we ol aposol oli stap tijim olgeta long hem.” (Wok 2:42) Naoia i no gat samting i blokem ol man ya blong oli kam “long fes blong God we hem i stap givhan long yumi long gladhat blong hem.” Mo from samting ya, olgeta ya oli mas wantem tu blong kam long God.—Hib. 4:16.
7. ?Wanem tingting long saed blong God we sam man oli gat fastaem, be naoia oli jenis mo oli baptaes long nem blong Papa?
7 Tede, plante milian man blong ol defdefren kantri oli lanem trutok blong Baebol long saed blong Jeova. (Aes. 2:2, 3) Fastaem, sam long ol man ya oli no bilif se God i stap, mo samfala oli ting se God i no kea long ol man we hem i wokem. Be naoia, ol man olsem, oli bilif se i gat wan God i stap we hem i Wokem Olgeta Samting, mo oli luksave tu se oli save kam fren blong God ya from we hem i kea long man. Sam narafala man, oli bilif se God i wan Triniti, mo samfala oli wosipim aedol. Be naoia, ol man ya oli save se Jeova nomo hem i God ya we i gat olgeta paoa. Ale, oli prea long hem stret, oli singaot hem long nem blong hem. Hemia i laenap gud wetem toktok ya we Jisas i talem, se ol disaepol blong hem oli mas baptaes long nem blong Papa.
8. ?Ol man we oli no save se yumi evriwan i bon wetem sin, oli mas luksave wanem long saed blong Papa?
8 Wan narafala samting tu we ol milian man ya oli lanem hemia se, from sin blong Adam, yumi evriwan i bon wetem sin. (Rom 5:12) Hemia wan samting we i niu long olgeta, mo oli mas agri long hem se i tru. Olgeta ya oli olsem wan man we i gat wan sik be hem i no save se hem i sik. Wanwan taem maet man ya i harem nogud, mo bodi blong hem i soa. Be from we hem i no go luk dokta, hem i no save se hem i gat wan sik. Ale hem i stap tingting se hem i oraet nomo i stap. Biaen, taem hem i go jekap, dokta i talem se hem i gat wan sik. (Skelem wetem 1 Korin 4:4.) ?Olsem wanem nao taem man ya i save se hem i gat wan sik? ?Bambae hem i agri blong folem wan tritmen we dokta i talem se i save winim sik blong hem? Man ya i waes sipos i mekem olsem. Pijatok ya i soemaot samting we i hapen taem man i lanem trutok ya se yumi evriwan i bon wetem sin. Baebol nao i soemaot trutok ya, mo plante man oli akseptem trutok ya. Oli luksave se God i wantem givhan long yumi blong yumi aot long sin. I olsem we hem i wantem givim wan tritmen long yumi. Yes, ol man we fastaem oli stap longwe long Papa, oli mas kambak long Hem we Hem nomo i save karemaot olgeta long sin.—Efes. 4:17-19.
9. ?Jeova i mekem wanem blong yumi man i save kam fren blong hem?
9 Maet yu yu wan we yu givim laef blong yu finis long Jeova God mo yu baptaes. Sipos i olsem, yu save finis se i gud tumas blong stap olsem fren blong Jeova. Yu kasem save se Papa blong yu, Jeova, i gat bigfala lav. (Ridim Rom 5:8.) Nating se Adam mo Iv, tufala i sin agensem God, be God i mekemrere wan rod i stap blong ol pikinini blong tufala oli save kam fren blong hem. Taem God i jusum rod ya, hem i save se bambae hem i harem nogud bigwan from we bambae hem i luk gudfala Pikinini blong hem i safa mo i ded. Taem yumi save samting ya, yumi lavem God tumas, nao yumi obei long hem mo yumi wantem we hem i lidim yumi. Sipos yu yu no tekem desisen yet blong mekem olsem, i gud yu tingbaot ol gudfala risen from wanem yu mas givim laef blong yu long God mo baptaes.
Long Nem Blong Pikinini
10, 11. (a) ?Tangkiu we yu gat long Jisas i bigwan olsem wanem? (b) ?Taem yu tingbaot we Jisas i ded olsem wan ransom blong pemaot yumi, yu harem olsem wanem?
10 ?Yu tingbaot wanem we Pita i talem taem hem i toktok long ol hip man ya long Jerusalem? Hem i talem se oli mas bilif long Jisas. Mo blong soem se oli bilif, oli mas baptaes ‘long nem blong Pikinini.’ ?From wanem i impoten we ol man long taem ya oli mekem olsem? ?Mo from wanem samting ya i impoten yet long yumi tede? Sipos man i bilif long Jisas mo i baptaes long nem blong hem, i min se man ya i agri we Jisas i impoten man blong tekem yumi, yumi go long God we i Wokem Olgeta Samting. Jisas i mas hang long wan pos blong karemaot panis ya we ol man Jiu oli save kasem long fasin blong folem Loa. Be ded ya blong hem, i karem bigfala blesing i kam. (Gal. 3:13) Laef blong hem, we hem i givim olsem sakrefaes, hem i stret ransom ya we olgeta man oli nidim blong oli save fri long sin. (Efes. 2:15, 16; Kol. 1:20; 1 Jon 2:1, 2) Taem hem i givim laef blong hem, ol man oli mekem i nogud tumas long hem, oli tok nogud long hem, oli givim kil long hem, mo hem i safa gogo i ded. ?Tangkiu we yu yu gat long sakrefaes blong Jisas i bigwan olsem wanem? Traem tingbaot sipos yu yu wan smol boe we i gat 12 yia nomo mo yu stap long bigfala sip ya Titanic. Long yia 1912, sip ya i bangem wan bigfala aesbeg nao hem i draon long dipsi. Ale traem tingbaot se yu wantem jam long wan long ol laef bot, be ol laef bot ya oli fulap gud long man finis. Nao wantaem nomo yu luk wan man we i stap long wan long ol laef bot ya, hem i kisim woman blong hem finis, i jamaot long laef bot nao i putum yu long laef bot ya. ?Bambae yu harem olsem wanem? !Ating bambae yu tangkiu bigwan long man ya from samting we hem i mekem long yu! Hemia nao samting we i bin hapen long wan yangfala boe, mo hem i glad tumas long man ya we i sevem hem.b Be samting we Jisas i mekem blong givhan long yu i bigwan moa. Hem i givim laef blong hem blong mekem we bambae yu yu kasem laef we i no save finis.
11 ?Yu yu harem olsem wanem taem yu lanem se Pikinini blong God i givim laef blong hem blong sevem yu? (Ridim 2 Korin 5:14, 15.) Ating yu tangkiu bigwan. Samting ya i pulum yu blong wantem givim laef blong yu i go long God. Ale yu ‘no moa laef blong mekem wok blong yu nomo, be yu laef blong mekem ol wok blong hem.’ Taem yu baptaes long nem blong Pikinini, i min se yu luksave samting we Jisas i mekem blong givhan long yu mo yu agri we hem i “Haeman mo i Sevia” blong yu. (Wok 5:31) Bifo long samting ya, yu yu no fren blong God ya we i Wokem Olgeta Samting. Mo yu no sua gud se laef blong yu long fiuja bambae i olsem wanem. Be taem yu bilif long blad blong Jisas Kraes we i ron, mo yu baptaes, ale nao yu stat blong kam fren blong Papa Jeova. (Efes. 2:12, 13) Aposol Pol i raetem se: “Bifo, i no longtaem tumas, yufala i strenja long God, yufala i enemi long hem, from we tingting blong yufala i agensem hem, mo fasin blong yufala i nogud. Be naoia, from we Kraes i kam man olsem yumi, mo i ded, God i mekem yufala i fren blong hem bakegen long ded blong Kraes. God i mekem olsem, blong bambae hem i save tekem yufala i go stanap long fes blong hem, we yufala i tabu, yufala i klin gud, i no gat rabis poen long yufala nating.”—Kol. 1:21, 22.
12, 13. (a) ?From we yu baptaes long nem blong Pikinini, samting ya i mas mekem wanem long yu taem wan man i mekem yu yu kros? (b) ?Taem yu baptaes long nem blong Jisas, bambae yu traehad blong mekem wanem?
12 Nating se yu baptaes long nem blong Pikinini, yu luksave se yu sinman yet. Sipos yu tingbaot oltaem se yu yu sinman, samting ya i save halpem yu. ?I save halpem yu olsem wanem? Tingbaot sipos wan man i mekem yu yu kros. ?Yu yu tingbaot se, yu mo man ya we i mekem yu yu kros, yutufala i sinman? Yutufala tugeta i nidim we God i fogivim yutufala, taswe yutufala tugeta i mas fofogivim yutufala. (Mak 11:25) Jisas i wantem soemaot se i impoten blong tingbaot samting ya, ale hem i talem wan parabol. Hemia parabol blong wan masta we i sore long man blong wok blong hem we i gat bigfala kaon long hem (60 milian denarias). Masta ya i fogivim man blong wok ya mo i letem hem i go fri blong i no moa pemaot kaon ya. Ale, biaen, man blong wok ya i go luk wan narafala man blong wok we i kaon long hem long 100 denarias nomo, mo i stap jokem nek blong hem se i mas pemaot kaon ya blong hem. Nao Jisas i talem poen ya: Jeova i no save fogivim wan man sipos man ya i no wantem fogivim brata blong hem. (Mat. 18:23-35) Tru ya, taem yumi baptaes long nem blong Pikinini, yumi mas agri se Jisas i lidim yumi, ale yumi mas traehad tu blong folem eksampol blong hem mo ol tijing blong hem, olsem tijing ya se yumi mas rere blong fogivim ol man.—1 Pita 2:21; 1 Jon 2:6.
13 From we yumi sinman, yumi no naf blong folem Jisas long fasin we i stret gud olgeta. Be long fulhat blong yumi, yumi givim laef blong yumi finis long God, taswe yumi wantem traem bes blong yumi blong folem Jisas. Hemia i min se yumi gohed oltaem blong wok strong blong sakemaot olfala laef mo kam olsem ol niufala man. (Ridim Efesas 4:20-24.) Taem yu gat wan fren we yu gat bigfala respek long hem, ating yu traem folem eksampol blong hem mo ol gudfala fasin blong hem. Long sem fasin, yu wantem folem ol fasin blong Kraes.
14. ?Olsem wanem yu soem se yu agri long Jisas olsem King long heven we i rulum yu?
14 Sipos yu kasem save wanem we yu mas mekem taem yu baptaes long nem blong Pikinini, ale i gat wan narafala samting we bambae yu mekem. God i “putum olgeta samting oli stap daon finis, aninit long leg blong Kraes. Mo hem i putumap Kraes i hed blong olgeta samting long kongregesen.” (Efes. 1:22, NW) Taswe yu mas gat respek long rod we Jisas i jusum blong lidim ol man we oli givim laef blong olgeta long Jeova. Kraes i yusum ol man we oli no stret gud olgeta, blong mekem wok insaed long kongregesen. Ol man we hem i yusum plante hemia olgeta we oli bigman long saed blong spirit, ol elda. Kraes i mekem olsem blong “olgeta man blong hem bambae oli rere blong mekem ol wok blong hem, blong bambae olgeta ya we oli olsem bodi blong hem, oli strong moa.” (Efes. 4:11, 12) Sipos wan long ol sinman ya i mekem wan rong, be Jisas we hem i King long Kingdom long heven, bambae i stretem rong ya long stret taem blong hem mo long wei we hem i wantem. ?Yu yu trastem se bambae hem i mekem olsem?
15. ?Sipos yu yu no baptaes yet, i gud yu tingbaot wanem ol gudfala samting we yu save kasem taem yu baptaes?
15 Sam long yumi maet oli no givim laef blong olgeta long Jeova yet, mo oli no baptaes yet. ?Yu yu wan long olgeta ya? Ale i gud yu tingbaot ol save we yumi tokbaot antap. Ol save ya oli soemaot long yu se i stret blong givim laef mo tekem baptaes, from we hemia nao rod blong soem se yu yu tangkiu long samting we Jeova i mekem. Taem yu baptaes long nem blong Pikinini, i olsem se yu rerem yu wan blong kasem ol nambawan blesing long fiuja.—Ridim Jon 10:9-11.
Long Nem Blong Tabu Spirit
16, 17. ?Wanem gudfala samting we yu save kasem taem yu baptaes long nem blong tabu spirit?
16 ?Baptaes long nem blong tabu spirit i minim wanem? Ol man ya we oli harem toktok blong Pita long dei blong Pentekos, oli save se tabu spirit i wanem. Oli luksave tu long taem ya se God i stap yusum tabu spirit yet. Pita hem i wan long olgeta disaepol ya we ‘tabu spirit i kam fulap long olgeta, nao oli stat toktok long ol lanwis blong ol narafala man.’ (Wok 2:4, 8) Tok ya we i talem se “long nem blong” i no min se tabu spirit i gat nem blong hem. Tede, i gat plante samting we ol man oli stap mekem long “nem blong loa.” Be hemia i no min se loa i wan man we i gat nem blong hem. Nogat. Hemia i minim nomo se ol man ya oli gat raet folem loa, blong mekem ol samting ya we oli stap mekem. Long sem fasin, taem yumi baptaes long nem blong tabu spirit, hemia i min se yumi luksave se tabu spirit i paoa blong Jeova we i stap wok, be i no wan man. Mo tu, yumi luksave wanem wok we tabu spirit i gat insaed long stamba tingting long God.
17 Taem yu stadi Baebol, yu lanem se tabu spirit hem i wanem. Yu kasem save se God i yusum tabu spirit nao blong putum tingting blong hem long ol man bifo blong oli raetem long Baebol. (2 Tim. 3:16) Moa we yu frengud wetem God, moa we yu kasem save se tok ya i tru tumas we i se: ‘Papa blong yumi long heven i save givim tabu spirit long ol man we oli askem long hem.’ Ol man ya i minim yu tu. (Luk 11:13) Ale maet yu harem save finis se tabu spirit i stap wok long laef blong yu. ?Be olsem wanem nao sipos yu no baptaes yet long nem blong tabu spirit? Ale ol tok ya blong Jisas se Papa bambae i givim tabu spirit, i mas mekem yu yu sua se sipos yu kasem spirit ya bambae yu save kasem plante trufala blesing.
18. ?Wanem ol blesing we man i save kasem taem hem i baptaes long nem blong tabu spirit?
18 I klia nomo se tede tu, Jeova i stap lidim Kristin kongregesen wetem tabu spirit blong hem. Mo tu, tabu spirit ya i halpem yumi wanwan long evri dei laef blong yumi. Taem yumi baptaes long nem blong tabu spirit, yumi agri se hem i lidim yumi, mo yumi wok tu, folem wanem we spirit ya i soem long yumi blong mekem. Be sam long yumi maet oli gat tingting se, olsem wanem yumi save holemstrong long promes ya we yumi mekem finis, se yumi givim laef blong yumi long Jeova. Mo maet yumi wantem save tu se, olsem wanem tabu spirit i save halpem yumi blong holem promes ya. Bambae yumi tokbaot samting ya long nekis stadi.
[Ol futnot]
a K.T. i minim Kristin Taem.
b Yu save ridim stori ya long Wekap! blong Oktoba 22, 1981, pej 3-8 long Inglis.
?Yu Yu Tingbaot?
• ?Sipos yu baptaes long nem blong Papa, hemia i min se yu agri long wanem?
• ?Taem yumi baptaes long nem blong Pikinini, hemia i minim wanem?
• ?Olsem wanem yu save soem se yu kasem save long mining blong baptaes long nem blong Papa mo Pikinini?
• ?Taem yumi baptaes long nem blong tabu spirit, hemia i minim wanem?
[Tok blong pija long pej 10]
By permission of the Israel Museum, Jerusalem
[Tok blong pija long pej 10]
?Afta long dei blong Pentekos long yia 33 K.T., ol niufala disaepol oli kasem wanem spesel samting?