Yumi Kasem Paoa Blong Winim Ol Samting We Oli Traem Yumi Mo Tingting We i Foldaon
“Taem Tabu Spirit i kam kasem yufala, bambae yufala i gat paoa.”—WOK 1:8.
1, 2. ?Jisas i mekem wanem promes long ol disaepol blong hem, mo from wanem oli nidim samting ya?
JISAS i save se sipos ol disaepol blong hem oli dipen nomo long prapa paoa blong olgeta, bambae oli no naf blong mekem olgeta samting we hem i talem long olgeta blong oli mekem. Wok blong prij we ol disaepol ya oli mas mekem, i bigwan we i bigwan. Mo taem oli stap mekem wok ya, ol enemi blong olgeta bambae oli mekem se wok blong prij blong olgeta i no isi. Mo tu, samtaem ol disaepol we oli mekem wok ya, oli save kam taed from we bodi blong olgeta i no strong. Yes, i klia se oli nidim wan paoa we i bigwan moa i bitim prapa paoa blong olgeta. Taswe, bifo we Jisas i go antap long heven, hem i talem long ol disaepol blong hem se: “Taem Tabu Spirit i kam kasem yufala, bambae yufala i gat paoa. Nao bambae yufala i mas go talemaot mi long Jerusalem, mo long olgeta ples long Judia mo Sameria, gogo yufala i finisim olgeta ples long wol.”—Wok 1:8.
2 Promes ya we Jisas i mekem long ol disaepol, i stat kamtru long lafet blong Pentekos long yia 33 K.T., taem tabu spirit i kam fulap long olgeta, nao oli stap talemaot Jisas long olgeta ples long Jerusalem. I no gat wan samting we i save blokem wok blong olgeta. (Wok 4:20) Ol man blong Jisas we oli stap tru long hem, mo yumi tu, yumi nidim tumas paoa ya blong God “oltaem, gogo wol ya i finis.”—Mat. 28:20.
3. ?Paoa blong Jehova i save halpem yumi blong mekem wanem?
3 Jisas i mekem promes ya long ol disaepol blong hem se ‘taem tabu spirit i kam kasem olgeta, bambae oli gat paoa.’ Jehova i yusum tabu spirit blong hem blong givim paoa long ol man blong hem. Mo paoa ya i halpem wanwan long yumi, blong yumi holemstrong long promes ya we yumi mekem long Hem, hemia blong givim ful laef blong yumi long hem. Mo tu, taem ol nogud samting oli kam blong spolem yumi, paoa ya i save halpem yumi blong stanap strong.—Ridim Maeka 3:8; Efesas 3:16.
4. ?Bambae yumi tokbaot wanem long stadi ya, mo from wanem samting ya i impoten?
4 ?Wanem i soemaot se paoa blong tabu spirit i stap wok long yumi? ?Tabu spirit i save pulum yumi blong mekem wanem mo blong tingting olsem wanem? I gat plante samting we oli traem yumi, taem yumi stap traehad blong holemstrong long God. Maet ol samting ya oli kamaot long Setan, long rabis wol ya, mo long sin we i stap long yumi. I impoten we yumi winim ol samting ya we oli traem yumi, mo yumi gohed, yumi no lego ol Kristin fasin, yumi prij oltaem, mo yumi no lego gudfala fasin fren blong yumi wetem Jehova. Naoia, bambae yumi tokbaot olsem wanem tabu spirit i halpem yumi blong winim ol samting we oli traem yumi, mo olsem wanem hem i givhan long yumi blong stanap strong taem yumi taed, no tingting blong yumi i foldaon.
Yumi Winim Ol Samting We Oli Traem Yumi
5. ?Prea i save givhan long yumi olsem wanem?
5 Jisas i tijim ol man blong hem blong prea se: “Yu no letem ol samting oli kam traem mifala tumas, mo yu blokem Setan i no kam spolem mifala.” (Mat. 6:13) Jehova bambae i no lego ol gudfala man blong hem we oli askem samting ya long hem. Long wan narafala taem bakegen, Jisas i talem se: “Papa blong yufala long heven, . . . i save givim Tabu Spirit long ol man we oli askem long hem.” (Luk 11:13) !Yumi harem gud tumas from promes ya blong Jehova se bambae hem i givim paoa blong halpem yumi blong mekem ol fasin we oli stret! ?Olsem wanem? ?Hemia i min se Jehova bambae i blokem olgeta samting blong oli no traem yumi? Nogat. (1 Kor. 10:13) Be taem wan samting i kam traem yumi, hemia nao taem we yumi mas prea moa long Jehova.—Mat. 26:42.
6. ?Jisas i yusum wanem blong givim ansa long Setan taem Setan i traem hem?
6 Taem Jisas i ansa long Setan, hem i yusum ol vas blong Baebol. Tok blong God i stap klia long tingting blong Jisas taem hem i ansa se: “Baebol i talem se . . . Be Baebol i talem tu se . . . ‘!Setan! !Yu gowe long mi! Baebol i talem se, “Yu mas mekem wosip long Hae God we i God blong yu, mo bambae yu mas mekem wok blong hem nomo.”’” Lav we Jisas i gat long Jehova mo long Tok blong hem, i pulum Jisas blong sakemaot ol samting we Setan i yusum blong traem hem. (Mat. 4:1-10) Jisas i stanap strong agens long olgeta samting ya we Setan i mekem blong traem hem, biaen Setan i lego hem.
7. ?Baebol i save halpem yumi olsem wanem blong stanap strong agens long ol samting we oli traem yumi?
7 Jisas i dipen long Baebol blong stanap strong agens long ol samting we Setan i yusum blong traem hem. !I sua se yumi nidim moa blong mekem olsem! Yes, blong mekem we yumi naf blong winim ol samting we Setan i yusum blong traem yumi, fastaem yumi mas gat strong tingting blong save gud ol rul blong God long Baebol mo yumi mas folem ol rul ya fulwan long laef blong yumi. Plante man we oli stadi long Baebol, oli kasem save mo oli tinghae long waes blong God mo stret fasin blong hem. Samting ya i pulum olgeta blong oli wantem folem ol rul blong Baebol. Yes, “tok blong God” i gat paoa blong mekem man i luksave ‘ol samting we hem i wantem long tingting blong hem.’ (Hib. 4:12) Moa we man i ridim mo i tingting dip long ol tok blong Baebol, moa we bambae hem i ‘save fasin blong Jehova, blong i savegud hem.’ (Prov. 2:4, 5) From samting ya, yumi waes sipos yumi tingting dip long ol tok blong Baebol we oli stret long ol slak fasin blong yumi.
8. ?Yumi save mekem wanem blong kasem tabu spirit?
8 Jisas i stanap strong agens long ol samting we oli traem hem from we hem i save gud Baebol, be i no hemia nomo. Hem i stanap strong from we “Tabu Spirit i fulap long hem.” (Luk 4:1) Sipos yumi wantem gat paoa mo yumi wantem stanap strong olsem Jisas, yumi mas kam klosap long Jehova. Blong mekem olsem, yumi mas yusum fulwan ol rod we Jehova i stanemap blong givim tabu spirit long yumi. (Jem. 4:7, 8) Ol rod ya hemia, stadi long Baebol, prea, mo joen wetem ol Kristin brata sista. Plante brata sista oli luksave se taem oli bisi blong mekem ol samting we Jehova i wantem, samting ya i halpem olgeta blong oli putum tingting blong olgeta i stap long ol gudfala samting we i bildimap bilif blong olgeta.
9, 10. (a) ?Wanem sam samting long ples blong yu we oli save traem yu? (b) ?Tingting dip mo prea i givhan long yu olsem wanem blong yu gat paoa blong stanap strong nating se yu taed?
9 ?Wanem samting we i traem yu, we yu mas stanap strong agens long hem? ?Yu yu stap pleplei wetem filing blong wan narafala man no woman we i no hasban no waef blong yu? ?Sipos yu no mared, nao wan man we i no gat bilif olsem yu, i askem fren long yu, yu yu harem se yu wantem talem yes long hem? Maet wan Kristin i stap wajem televisin mo i yusum Intenet, nao tingting blong hem i pulum hem blong lukluk wan samting we i no stret blong wan Kristin i lukluk. ?Samting ya i hapen finis long yu? ?Yu mekem wanem? I waes sipos yu tingting gud fastaem, se wan smol mastik nomo i save lidim yu blong mekem wan narafala mastik bakegen, mo biaen yu mekem wan bigfala sin. (Jem. 1:14, 15) I gud yu tingbaot se bambae yu mekem Jehova, kongregesen, mo famle blong yu oli harem nogud tumas sipos yu mekem wan bigfala sin. Defren olgeta, sipos yu mekem tingting blong yu i strong blong folem ol rul blong God, bambae tingting blong yu i klin, i no stikim yu. (Ridim Ol Sam 119:37; Ol Proveb 22:3.) Nomata wanem samting i traem yu, yu mas gat strong tingting blong prea mo askem long God blong i givim paoa long yu blong stanap strong.
10 I gat wan narafala samting tu we yumi mas tingbaot long stori ya blong Jisas taem Setan i traem hem. Setan i traem Jisas, afta we Jisas i no kakae blong 40 dei long draeples. Ating Setan i tingting se hemia nao “taem we i stret” blong hem i traem fasin blong Jisas blong holemstrong long God. (Luk 4:13, Nyutesteman wetem Ol Sam long Bislama) Long sem fasin, Setan i lukaot wan taem we i stret blong traem fasin blong yumi blong holemstrong long God. Taswe, i impoten we yumi lukaotgud blong stap strong oltaem long saed blong spirit. Plante taem, Setan i traem wan man taem hem i luk we man ya i slak. From samting ya, taem yumi taed no taem tingting blong yumi i foldaon, yumi mas strong moa blong prea long Jehova bitim bifo, blong hem i lukaotgud long yumi mo i givim tabu spirit long yumi.—2 Kor. 12:8-10.
Yumi No Kam Slak Nating Se Yumi Taed Mo Tingting i Foldaon
11, 12. (a) ?From wanem tingting blong plante man i foldaon? (b) ?Wanem i save givim paoa long yumi blong stanap strong taem tingting blong yumi i foldaon?
11 From we yumi sinman, samtaem tingting blong yumi i foldaon. Maet i tru moa tede from we, taem we yumi stap laef long hem i fulap long ol samting we i mekem tingting blong yumi i no stap kwaet. Yumi stap gotru long wan taem we i had moa i bitim olgeta taem bifo. (2 Tim. 3:1-5) Taem Amagedon i stap kam klosap moa, ol problem long saed blong mane bambae oli kam antap bigwan, plante moa man bambae oli harem nogud, mo plante narafala problem bambae oli kam antap. Yumi no mas sapraes sipos sam man oli faenem i had blong lukaot mo givim samting we famle blong olgeta i nidim long saed blong bodi. Oli harem se oli taed, tingting i hevi, mo oli no moa gat paoa. ?Sipos yu yu harem olsem, yu save mekem wanem blong no kam slak?
12 Yu mas tingbaot promes we Jisas i mekem long ol disaepol blong hem, se bambae hem i givim wan samting blong halpem olgeta, hemia tabu spirit blong God. (Ridim Jon 14:16, 17.) Hemia wan paoa we i bigwan olgeta i bitim eni narafala paoa long heven mo long wol. Wetem paoa ya, Jehova i save mekem “ol bigbigfala wok long laef blong yumi we i bigfala tumas,” blong givim paoa we yumi nidim blong stanap strong taem enikaen samting oli traem yumi. (Efes. 3:20, Nyutesteman wetem Ol Sam long Bislama) Aposol Pol i talem se taem yumi dipen long tabu spirit blong God, yumi kasem “paoa ya we i bigwan tumas,” nating se ‘plante taem, yumi gat trabol.’ (2 Kor. 4:7, 8) Jehova i no talem se bambae hem i karemaot ol trabol blong yumi, be hem i promes se bambae hem i givim paoa we yumi nidim blong yumi no kam slak.—Fil. 4:13.
13. (a) ?Wanem sam samting we oli givim paoa long wan yangfala blong stanap strong long wan hadtaem? (b) ?Yu yu save sam stori we oli klosap sem mak?
13 Traem tingbaot Stephanie, wan fultaem paenia we i gat 19 yia blong hem. Taem hem i gat 12 yia, hem i kasem strok nao ol dokta oli faenemaot se hem i gat kansa long bren. Stat long taem ya, dokta i katem hem tu taem finis, i yusum wan samting olsem laet we paoa blong hem i strong blong traem kilim kansa blong hem, mo Stephanie i kasem strok tu taem bakegen. Ol trabol ya oli mekem se lefsaed bodi blong hem i no moa save muvmuv, mo hem i no moa save lukluk gud tu. Stephanie i mas yusum smol paoa we hem i gat blong mekem ol samting we oli moa impoten, olsem go long ol Kristin miting mo long wok blong prij. Stephanie i harem save olsem wanem Jehova i yusum tabu spirit long plante defren rod, blong givim paoa long hem blong stanap strong. Taem hem i harem nogud, ol stori blong ol brata sista we oli stap long ol buk mo magasin we oli stanap long Baebol, oli leftemap tingting blong hem. Ol brata mo sista oli leftemap tingting blong hem taem oli raetem leta long hem, no taem oli talem ol gudfala tok long hem bifo mo afta long miting. Ol man ya we Stephanie i mekem Baebol stadi blong olgeta, oli kam long haos blong Stephanie blong stadi, from we oli glad tumas long ol samting we oli lanem. Olgeta samting ya oli mekem we Stephanie i talem tangkiu bigwan long Jehova. Wan vas we hem i laekem tumas hemia Ol Sam 41:3, from we hem i luksave se vas ya i kamtru long laef blong hem.
14. ?Taem tingting blong yumi i foldaon, yumi no mas mekem wanem, mo from wanem yumi no mas mekem olsem?
14 Taem yumi taed mo yumi kasem hadtaem, yumi neva mas ting se yumi mas lego sam samting long saed blong spirit, blong winim ol trabol ya. Hemia i wan nogud samting we yumi no mas mekem. ?From wanem? From we ol samting olsem prapa Baebol stadi blong yumi wan, Baebol stadi blong famle, wok blong prij, mo ol miting, oli ol rod we Jehova i yusum blong givim tabu spirit we yumi nidim blong gat paoa bakegen. Oltaem nomo ol Kristin wok oli mekem yumi harem gud bakegen. (Ridim Matiu 11:28, 29.) Plante taem, ol brata mo sista we oli kam long ol miting, oli taed tumas, be taem miting i finis, oli gobak we oli gat paoa, oli harem gud bakegen. !I olsem se ol miting oli givim paoa long olgeta bakegen!
15. (a) ?Olsem wanem? ?Jehova i promes blong mekem laef blong wan Kristin i isi nomo we hem i no nid blong traehad? Yusum Baebol blong eksplenem. (b) ?God i mekem wanem promes long yumi, mo promes ya i pulum yumi blong tingbaot wanem kwestin?
15 Hemia i no minim se wok we ol Kristin oli mekem i isi. Man i mas traehad blong stap olsem wan tru Kristin. (Mat. 16:24-26; Luk 13:24) Nating se i olsem, Jehova i save yusum tabu spirit blong hem blong givim paoa long man we i taed. Profet Aesea i raetem se: “Olgeta we oli stap luk long Hae God blong hem i givhan long olgeta, bambae oli luk we oltaem hem i stap givim paoa long olgeta i stap mekem olgeta oli strong bakegen. Bambae oli girap olsem we oli gat wing olsem bigfala pijin ya igel. Bambae oli save resis gogo, be leg blong olgeta i no save taed, mo oli save wokbaot i go longwe we longwe, be oli no save kam slak.” (Aes. 40:29-31) From samting ya, i gud we yumi wanwan i traem tingbaot kwestin ya se, ?Wanem risen i mekem mi mi harem se wok blong Jehova i hevi tumas, i mekem mi mi taed?
16. ?Yumi save mekem wanem blong yumi no kam taed tumas, mo blong tingting blong yumi i no foldaon?
16 Tok blong Jehova i talem long yumi se yumi mas jusumaot “ol samting we oli impoten moa.” (Fil. 1:10, NW) Baebol i tokbaot gudfala Kristin fasin blong yumi se i olsem wan longfala resis. Tabu spirit i pulum Pol blong talem se: “Yumi mas lego ol samting we oli stap blokem yumi, . . . nao yumi mas mekem tingting blong yumi i strong, blong yumi resis long rod ya we i stap long fes blong yumi.” (Hib. 12:1) Poen we Pol i wantem makem long tok blong hem hemia se, yumi no mas traem kasem ol samting we oli no impoten, we bambae oli mekem yumi taed tumas. Maet sam long yumi oli traem mekem plante tumas samting wantaem, nating se oli bisi finis. Taswe, sipos yu harem se yu taed mo yu wari, maet i gud yu lukluk bakegen long laef blong yu. Yu skelem gud se hamas taem yu spenem long wok blong winim mane, hamas taem yu mekem ol trip blong go spel long narafala ples, mo hamas taem yu spenem blong plei spot mo mekem narafala pleplei. Yumi mas rere blong lego samting we yumi nomo i wantem mo yumi mas gat tingting daon tu blong luksave samting we yumi naf blong mekem mo yumi no spenem tumas taem long ol samting we oli no rili impoten.
17. ?From wanem tingting blong samfala i foldaon? ?Be Jehova i mekem yumi sua long wanem samting?
17 Mo tu maet, tingting blong sam long yumi i foldaon from we en blong rabis fasin blong wol ya i no kam kwik olsem we oli wantem. (Prov. 13:12) Olgeta we oli harem olsemia oli save harem gud long ol tok we i stap long Habakuk 2:3 we i talem se: “Taem blong ol samting ya i no kam yet, be bambae oli mas kamtru i no longtaem. Olgeta samting we mi mi soemaot long yu long vison ya bambae oli mas olsem. Maet yu luk se i tektaem tumas blong kam, be bambae i mas kamtru long stret taem blong hem, mo yu yu mas wet long hem.” Yumi sua fulwan se en blong rabis fasin blong wol ya bambae i mas kamtru long stret taem we Jehova i makemaot finis.
18. (a) ?Wanem ol promes we oli givim paoa long yu? (b) ?Nekis stadi bambae i givhan long yumi olsem wanem?
18 Yes, olgeta gudfala man blong Jehova oli wantem tumas blong luk taem ya we ol man bambae oli no moa harem se oli taed mo oli no moa harem se tingting blong olgeta i foldaon. Bambae oli glad blong luk taem ya we olgeta man bambae oli harem gud olsem we oli “yangfala nomo.” (Job 33:25) Tede, tabu spirit i stap halpem yumi blong yumi gat strong tingting blong mekem ol wok we Jehova i wantem yumi blong mekem. (2 Kor. 4:16; Efes. 3:16) Yu no mas letem taed i blokem yu nao yu no moa kasem ol blesing blong olwe. Olgeta trabol we yumi kasem, nomata se oli kamaot from ol samting we oli traem yumi, ol samting we oli mekem yumi taed mo tingting we i foldaon, be bambae oli lus evriwan. Nating se oli no lus kwiktaem, be bambae oli mas lus yet taem niufala wol i kam. Long nekis stadi bambae yumi tokbaot olsem wanem tabu spirit i givim paoa long ol Kristin blong oli stanap strong taem ol man oli agensem olgeta, taem ol fren oli traem pulum olgeta, mo taem sam narafala trabol bakegen i kasem olgeta.
?Bambae Yu Yu Ansa Olsem Wanem?
• ?Fasin blong ridim Baebol i save givim paoa long yumi olsem wanem?
• ?Prea mo tingting dip i save givim paoa long yumi blong mekem wanem?
• ?Yu save mekem wanem blong blokem ol samting we oli mekem tingting blong yu i foldaon?