Jisas—?Laef Blong Hem i Olsem Wanem?

“God i sanem mi mi kam, mo kakae blong mi, i blong mi mekem ol samting we hem i wantem blong mi mi mekem, mo blong mi finisim ol wok we hem i givim long mi.”—JON 4:34.

PLES we Jisas i stap long hem taem hem i talem tok ya antap, i soemaot samting we i moa impoten long laef blong hem. Long taem ya, Jisas mo ol disaepol blong hem oli stap wokbaot long Sameria, wan ples we i gat plante hil long hem. Oli wokbaot ful moning. (Jon 4:6) Ol disaepol blong Jisas oli ting se hem i hanggri, taswe oli wantem givim kakae long hem. (Jon 4:31-33) Long ansa we Jisas i givim long olgeta, hem i talemaot risen from wanem hem i laef. Yes, long tingting blong Jisas, i moa impoten we hem i mekem wok blong God i bitim we hem i kakae. Long toktok blong hem mo long wok blong hem, hem i soemaot se hem i laef blong mekem samting we God i wantem. ?Wanem ol samting we God i wantem blong hem i mekem?

▪ Hem i talemaot gud nius blong Kingdom blong God mo i tijim ol man long saed ya Baebol i tokbaot wok we Jisas i mekem taem hem i laef long wol, i talem se: “Jisas i stap wokbaot long olgeta ples long Galili, i stap tijim ol man . . . i stap talemaot gud nius ya we God i stap kam King [“gud nius blong kingdom,” NW].” (Matiu 4:23) Jisas i talemaot Kingdom blong God long ol man. Be i no hemia nomo. Hem i tijim ol man tu. Hemia i min se hem i givim save long olgeta, i eksplenem, mo i mekem olgeta oli yusum tingting blong olgeta, blong oli save bilif long ol tok blong hem. Stamba samting we Jisas i talemaot, hemia Kingdom.

Taem Jisas i stap prij long wol, hem i tijim ol man se Kingdom blong God hem i wanem, mo wanem samting we Kingdom ya bambae i mekem. Naoia bambae yumi tokbaot trutok long saed blong Kingdom, mo ol vas blong Baebol we oli soemaot ol tok blong Jisas long saed blong Kingdom.

▪ Kingdom blong God i wan gavman long heven, mo Jehova i jusumaot Jisas blong hem i King blong Kingdom ya.—MATIU 4:17; JON 18:36, NW.

▪ Kingdom ya bambae i leftemap nem blong God mo bambae i mekem samting we God i wantem i kamaot long wol ya olsem we i kamaot finis long heven.—MATIU 6:9, 10.

▪ Rul blong Kingdom blong God bambae i mekem ful wol i kam wan paradaes.—LUK 23:42, 43, NW.

▪ I no longtaem, Kingdom blong God bambae i kam, mo bambae i mekem samting we God i wantem i kamaot long wol.a—MATIU 24:3, 7-12.

▪ Hem i mekem plante merikel Ol man oli save gud Jisas olsem wan “Tija.” (Jon 13:13) Be long ol tri yia haf we hem i stap prij long wol, hem i mekem plante merikel tu. Ol merikel ya oli soemaot tu samting. Fas samting, oli pruvum se God nao i sanem Jisas i kam. (Matiu 11:2-6) Namba tu samting se, oli soemaot long smol fasin, samting we King blong Kingdom blong God bambae i mekem long niufala wol. Bambae yumi tokbaot sam long ol merikel we hem i mekem.

▪ Hem i mekem bigsi mo bigfala win oli kam kwaet.—MAK 4:39-41.

▪ Hem i mekem ol sikman oli kamgud bakegen, ol man we oli blaen, olgeta we sora blong olgeta i fas, mo olgeta we leg blong olgeta i nogud.—LUK 7:21, 22.

▪ Hem i mekem we kakae i naf blong fidim bigfala hip blong man we oli hanggri.—MATIU 14:17-21; 15:34-38.

▪ Hem i mekem tri dedman oli laef bakegen.—LUK 7:11-15; 8:41-55; JON 11:38-44.

!Yes, laef bambae i nambawan tumas taem King ya we i gat paoa i rul long wol ya!

▪ Hem i soemaot fasin blong Jehova God Stret Pikinini blong God we i kam man ya Jisas Kraes, hem i tijim ol man long saed blong Jehova, long fasin we i moa gud i winim ol narafala tija. Jisas i “fasbon long ol samting we God i mekem.” Hem i laef longtaem long heven. I no gat wan narafala enjel we i laef longtaem olsem wetem Jehova. (Kolosi 1:15, NW) Yu traem tingbaot. Jisas i gat janis blong savegud ol tingting blong Papa blong hem. Hem i kasem save long samting we Papa blong hem i wantem mekem. Mo hem i savegud ol rul mo ol fasin blong Papa blong hem.

I stret nomo we Jisas i talem se: “Mi mi Pikinini blong hem, mo i no gat man we i save mi, Papa blong mi nomo i save mi. Mo i no gat man we i save Papa blong mi, mi wetem ol man we mi mi jusumaot olgeta blong soemaot hem long olgeta, mifala nomo i save hem.” (Luk 10:22) Taem Jisas i laef long wol ya olsem wan man, hem i glad mo i wantem tumas blong soemaot ol tingting mo fasin blong Papa blong hem. Ol toktok mo tijing blong hem oli soemaot se hem i save God moa bitim eni narafala man. Hem i save tingtingbak long taem ya we hem i bin stap long heven, klosap long God ya we i Hae olgeta.—Jon 8:28.

Taem Jisas i stap long wol, hem i tijim ol man blong hem long ol save we hem i lanem long Papa blong hem long heven. Mo hem i mekem long fasin we i isi blong ol man ya oli kasem save long hem mo oli folem.

Yu traem tingbaot tu impoten rod we Jisas i yusum blong soemaot Papa blong hem long ol man.

▪ Jisas i tijim ol man long trutok long saed blong Jehova. Hem i tijim ol man long nem blong Papa blong hem, stamba tingting blong Hem, mo ol fasin blong Hem.—JON 3:16; 17:6, 26.

▪ Long ol wok we Jisas i mekem, hem i soemaot plante nambawan fasin blong Jehova. Jisas i soemaot gud fasin blong Jehova, ale i olsem we hem i talem se: ‘Sipos yu wantem save se Papa blong mi i olsem wanem, yu lukluk mi nomo.’—JON 5:19; 14:9.

Yumi sapraes long ol samting we Jisas i mekem long laef blong hem long wol. Be yumi save harem gud moa yet, sipos yumi savegud from wanem hem i ded, mo sipos yumi mekem samting we yumi lanem i wok long laef blong yumi.

[Futnot]