?I Stret We Pikinini i Save God?

“Plante jos oli pulum yumi blong no laeklaekem yumi nating. Be smol jos nomo oli pulum yumi blong laeklaekem yumi.”—JONATHAN SWIFT, WAN MAN BLONG RAETEM BUK.

JONATHAN SWIFT i raetem ol tok ya long ol yia 1700. Tede tu, plante man oli gat sem tingting olsem hem. Samfala oli ting se ol papa mama oli no gat raet blong tijim pikinini blong olgeta long saed blong God. Oli ting se sipos pikinini i gruap long famle we i strong long jos, bambae hem i no save harem gud long laef blong hem.

?Wanem tingting blong yu? ?Weswan long ol tok ya we i kam biaen, i stret moa?

● Papa mama tufala i no gat raet blong tijim pikinini blong tufala long saed blong God.

● Papa mama tufala i mas wet go kasem we pikinini i kam bigwan, nao tufala i save tokbaot God long hem.

● Taem pikinini i smol yet, papa mama tufala i mas tijim hem blong i gat sem bilif olsem tufala. Be taem pikinini i kam bigwan, tufala i mas pulum hem blong i yusum tingting blong hem wan long saed ya.

● Pikinini i mas folem bilif blong papa mama blong hem long saed blong God. Hem i no mas gat tingting we i hafhaf se bilif ya i tru no i giaman.

?Tijing Blong Jos i Save Spolem Pikinini?

I no gat wan gudfala papa mama we i wantem spolem pikinini blong hem. ?Be olsem wanem? ?Tok blong ol man we oli wantem blokem pikinini blong i no save God, i tru no nogat? Blong plante handred yia, ol man blong lukaot save oli traem faenemaot se bilif blong ol papa mama i gat paoa olsem wanem long ol pikinini blong olgeta. ?Ale, oli faenemaot wanem?

Oli faenemaot se tijing blong jos i no spolem pikinini. Be tijing ya i givhan gud long hem blong i kam bigman. Long yia 2008, wan ripot we i kamaot long niuspepa ya Social Science Researcha i talem se: “Tijing blong jos i mekem se pikinini i lavem moa papa mo mama blong hem.” Ripot ya i gohed se: “I luk olsem se tijing blong jos mo fasin ya blong save God i impoten tumas long laef blong plante pikinini, mo evriwan long famle oli nidim samting ya blong oli joen gud.” Save ya we oli faenemaot i klosap sem mak long tok we Jisas i talem se: “Olgeta we oli stap lukaot God from we oli no gat paoa blong hem long laef blong olgeta, oli save harem gud.”—Matiu 5:3.

?Be olsem wanem long tingting ya se pikinini i mas kam bigwan fastaem, nao hem i save kasem tijing long saed blong God mo jos? Ol man we oli talem olsem, oli fogetem wan impoten samting. Hemia se tingting blong pikinini i olsem wan baket we i emti. Papa mama tufala i save mekem wan long tufala samting ya: Tufala i save fulumap “baket ya” long haos, i min se, tufala i tijim pikinini long ol gudfala fasin mo bilif we tufala i ting se oli stret. Sipos no, tufala i save lego nomo, nao ol tijing we pikinini i harem long ol narafala man afsaed long famle, oli fulumap tingting mo hat blong hem.

?Olsem Wanem Blong Tijim Pikinini Blong i Lavem Narafala?

Ol samting we oli hapen long ol yia we i pas, oli soemaot se man i save yusum ol tingting blong jos olsem wan eskius blong i no laekem narafala mo i agensem narafala. ?Taswe, ol papa mama oli save mekem wanem, blong samting ya we Jonathan Swift i tokbaot i no kamtru long famle blong olgeta? ?Oli save tijim pikinini long wanem tijing, blong givhan long hem blong lavem ol narafala?

Papa mama tufala i mas faenemaot ansa blong trifala kwestin ya: (1) ?Pikinini i mas lanem wanem? (2) ?Hu i mas tijim pikinini? (3) ?Wanem ol rod we i beswan blong tijim pikinini?

[Futnot]