Wan Kwestin

?Yumi save stret, hamas profet tok long saed blong Mesaea oli stap long Hibru haf blong Baebol?

Taem yumi stadi gud long Hibru haf blong Baebol, yumi faenem plante profet tok we oli kamtru long Jisas Kraes. Ol profet tok ya oli talemaot plante samting long saed blong Mesaea, olsem: Laen we hem i kamaot long hem, stret taem we hem i kamtru, ol samting we hem i mekem, fasin we ol man oli mekem long hem, mo wok blong hem insaed long plan blong God. Ol profet tok ya oli joen blong mekem wan bigfala pija, we i givhan long yumi blong luksave se Jisas nao hem i Mesaea. Be sipos yumi traem talem stret hamas profet tok long saed blong Mesaea oli stap long Hibru haf blong Baebol, yumi mas lukaot gud.

Sam man oli ridim sam stori long Baebol, nao oli ting se ol stori ya oli ol profet tok long saed blong Mesaea. Be sam narafala oli no tingting olsem. Long buk blong Alfred Edersheim, (The Life and Times of Jesus the Messiah) hem i talem se, long ol hanraet blong ol tija blong Loa, oli makem 456 haf blong ol Hibru hanraet we oli ting se oli tokbaot Mesaea. Be plante long ol haf ya oli no talem wan samting long saed blong Mesaea. Taswe, taem yumi ridim gud ol 456 haf ya, i gat wan kwestin i kamaot long saed blong sam long olgeta ya, se: ?I tru we oli tokbaot Jisas Kraes no nogat? Yumi save tingbaot wan long ol haf ya. Ol man Jiu oli ting se Jenesis 8:11 i tokbaot Mesaea. Oli ting se “lif blong tri ya olif, we sotleg ya i karem i kam, hem i kamaot long hil blong Mesaea.” Mo tu, Masta Alfred i tokbaot rong tingting we ol man Jiu oli gat long vas ya blong Eksodas 12:42, i se: “Moses i kamaot long drae ples, mo long sem fasin Mesaea bambae i kamaot long Rom.” I klia se plante man blong hae save mo plante narafala man tu, bambae oli luk se i no stret blong joenem tufala vas ya wetem Jisas Kraes.

Nating sipos yumi lukluk ol profet tok ya nomo we oli kamtru finis long Jisas Kraes, be i had yet blong yumi talem stret namba blong olgeta. I gud yumi tingbaot buk blong Aesea japta 53, we i tokbaot plante profet tok long saed blong Mesaea. Aesea 53:2-7 i talem se: “Yumi no save talem se bodi blong man ya i naes we i save mekem yumi tinghae long hem . . . Yumi lukluk nogud long hem, yumi tanem baksaed long hem . . . Olgeta samting we i stap mekem yumi harem nogud, hem i karem olgeta evriwan . . . Ol man oli stap wipim hem from ol fasin nogud ya blong yumi . . . Hem i olsem smol sipsip nomo we oli stap tekem i go blong kilim blong kakae.” ?Olsem wanem? ?Yumi makem ol fasin ya long Aesea japta 53 se oli wan profet tok nomo, no ol fasin ya wanwan oli defdefren profet tok?

Mo tu, yumi save tingbaot vas blong Aesea 11:1 we i talem se: “Laen blong King Deved i olsem stamba blong wan tri we man i katemdaon finis. Be oltaem, stamba olsem i gat niufala gru i save kamaot long hem. Mo long sem fasin, bambae i gat wan niufala king i kamaot long stamba ya.” Sem profet tok ya i kamaot bakegen long vas 10, we long sam Baebol oli yusum tok we i klosap sem mak long vas 1. ?Olsem wanem? ?Bambae yumi makem tufala vas ya se tufala i wan profet tok nomo, no tu defren profet tok? Sipos yumi makem ol vas blong Aesea japta 53 mo japta 11 se oli defdefren profet tok, bambae fulnamba blong ol profet tok blong Mesaea i bigwan. Be sipos yumi makem tufala japta ya se oli tu profet tok nomo, bambae fulnamba blong ol profet tok blong Mesaea i smol moa.

Taswe, yumi no mas traem blong save stret se hamas profet tok long saed blong Mesaea we oli stap long Hibru haf blong Baebol. Long ol buk we ogenaesesen blong Jehova i wokem, i gat ol lis blong ol profet tok we oli kamtru long Jisas.a Ol lis ya oli save givhan long yumi long prapa stadi blong yumi, mo long famle stadi, mo long wok blong prij. Mo tu, nomata se yumi no save stret namba blong ol profet tok ya, be yumi save se i gat plante profet tok we oli pruvum se Jisas hem i Kraes no Mesaea.

[Futnot]