Wan Kwestin

?Yumi kasem save wanem, taem yumi ridim ol namba long ripot blong seves yia?

Evri yia yumi glad blong kasem ripot blong seves yia long Yearbook. Yumi harem gud tumas blong luk bigfala wok we ol man blong Jehova long olgeta ples long wol, oli mekem blong talemaot Kingdom mo blong tijim ol man. Be ripot ya i save leftemap tingting blong yumi nomo sipos yumi kasem save se ol namba ya i soemaot wanem, mo tu, sipos yumi gat stret tingting long saed blong olgeta. Yumi traem tingbaot sam long olgeta:

Seves yia. Stat long Septemba long yia ya go kasem en blong Ogis nekis yia, hemia wan seves yia. Ripot we i kamaot long Yearbook i blong las yia. Taswe ripot we i kamaot long 2011 Yearbook, i blong seves yia 2010, we i stat long 1 Septemba 2009 go kasem 31 Ogis 2010.

Peak Pubs. mo Av. Pubs. “Pubs.” i minim ol pablisa, hemia ol Witnes blong Jehova we oli baptaes finis wetem olgeta we oli no baptaes yet, be oli stap mekem wok ya blong talemaot Kingdom. “Peak Pubs.” i minim namba blong ol pablisa we i hae moa long wan manis, i bitim ol narafala manis long yia. Insaed long namba ya, oli kaontem sam pablisa we oli let blong givim ripot blong manis bifo, nao kongregesen i no bin kaontem olgeta. Taswe, maet oli kaontem ol pablisa ya tu taem long manis blong “Peak Pubs.” Ol pablisa we oli prij be oli foget blong givim ripot, oli no stap insaed long namba blong “Peak Pubs.” From samting ya, i impoten we evri pablisa oli givim ripot blong olgeta kwiktaem long en blong evri manis. “Av. Pubs.” i minim namba we oli faenemaot taem oli seraotem ol ripot blong ful seves yia oli go long ol twelef manis wanwan.

Total Hours. 2011 Yearbook i talem se, ol Witnes blong Jehova oli spenem plante plante milian aoa (bitim 1,600,000,000) long wok blong prij. Be, namba ya i no soemaot olgeta aoa evriwan we yumi yusum long wosip blong yumi. Long namba ya, oli no kaontem ol aoa we ol elda oli yusum blong go luk ol brata blong leftemap tingting blong olgeta, mo ol aoa we yumi yusum blong go long ol miting, mo blong stadi yumi wanwan, mo blong tingting dip.

Mane we oli spenem. Long seves yia 2010, ol Witnes blong Jehova oli spenem bitim 15,159 milian vatu blong lukaot long ol spesel paenia, ol misinari, mo ol seket elda. Be long namba ya, oli no kaontem mane we oli spenem blong printim ol buk we oli tokbaot Baebol, wetem mane we oli spenem blong lukaot long bitim 20,000 brata mo sista we oli wok olsem ol volontia long ol Betel raon long wol.

Olgeta we oli kakae bred mo dring waen long Memoriol long fulwol. Hemia namba blong ol brata mo sista we oli baptaes finis mo we oli tekem bred mo waen long Memoriol. ?Olsem wanem? ?Hemia stret namba blong olgeta we tabu spirit i makemaot olgeta, we oli stap yet long wol? Maet i no olsem. Maet samfala oli ting se tabu spirit i makemaot olgeta blong oli go long heven, be oli rong. Oli save tingting olsem from bilif we oli gat fastaem, taem oli stap long giaman skul, no maet from tingting blong olgeta i giaman long olgeta bakegen. Taswe yumi no save talem stret namba blong ol man we tabu spirit i makemaot olgeta we oli stap yet long wol. Yumi no nid blong save samting ya tu. Hed Kampani i no holem wan lis blong nem blong olgeta we oli kakae bred mo dring waen. Olgeta ya oli stap wanwan olbaot long wol.a

Yumi save se taem ol enjel oli lego bigfala win ya we bambae i spolem ol samting long taem blong bigfala trabol, bambae i gat sam long “ol man blong wok blong God blong yumi” we tabu spirit i makemaot olgeta, oli stap yet long wol. (Rev. 7:1-3) Go kasem taem ya, olgeta ya bambae oli lidim bigfala wok ya we yumi luk long ripot blong seves yia, hemia wok blong prij mo blong tijim ol man we i bigwan moa naoia i bitim ol taem bifo.

[Futnot]