?Ebraham—Hem i Hu?
OL JOS long wol oli tinghae long sam man we Baebol i tokbaot. Long skul blong ol man Jiu, Muslim, mo Kristin, ol man oli tinghae long Ebraham.a Samfala oli talem se Ebraham i “wan stamba man long Baebol” mo “fasin blong hem blong bilif strong i wan nambawan eksampol.” Baebol i talem se Ebraham i ‘stamba blong olgeta we oli bilif long God.’—Rom 4:11.
?From wanem ol man oli tinghae long Ebraham? Wan risen, hemia from we Baebol i singaot hem se i fren blong God. Hem nomo we Baebol i singaot hem olsem. !Yes, Baebol i talem tri taem se Ebraham i fren blong God!—2 Kronikel 20:7; Aesea 41:8; Jemes 2:23.
Be Ebraham i wan man olsem yumi. Plante trabol we oli kasem yumi oli kasem hem tu. Mo hem i stanap strong taem ol trabol ya oli kasem hem. ?Yu yu wantem save wanem i givhan long Ebraham blong i stanap strong? Bambae yumi luk wanem we Baebol i talem long saed blong nambawan man ya.
?Hem i Blong Wea Mo Hu Ol Famle Blong Hem?
Ebraham i bon long yia 2018 B.K.T.,b mo hem i gruap long taon ya Uru. (Jenesis 11:27-31) Uru i wan bigfala taon. Ol man long taon ya oli gat plante samting. Mo plante long olgeta oli strong blong wosipim ol aedol. Maet Tera, papa blong Ebraham, i wan long olgeta we oli stap bodaon long plante defren aedol. (Josua 24:2) Be Ebraham i no wosipim ol aedol ya we oli pija blong ol narafala god. Oli no save givhan long hem. Ebraham i mekem desisen blong wosipim Jehovac nomo.
?Wanem i pulum Ebraham blong mekem desisen ya? Ebraham i bon 150 yia bifo we Sem, boe blong Noa, i ded. Maet Ebraham i fren gud wetem olfala man ya Sem. Sipos i olsem, ?Sem i givhan long hem olsem wanem? Maet Sem i stori long Ebraham long taem we Bigfala Wota i Ron i kavremap fulwol, mo Sem i tokbaot olsem wanem Jehova i sevem ol man blong hem. Ating Ebraham i luk se hem i mas wosipim Jehova, God ya we i sevem Sem mo famle blong hem taem Bigfala Wota i Ron.
Maet hemia Sem we i givhan long Ebraham blong i save tru God no maet hemia wan narafala man bakegen. Be nomata hu i givhan long hem, yumi luk se Ebraham i folem ol samting we hem i lanem. Taem Jehova i lukluk “tingting” no hat blong Ebraham, hem i luk wan gudfala samting long Ebraham, mo hem i givhan long Ebraham blong kam gud moa long fasin blong hem.—Ol Proveb 17:3; 2 Kronikel 16:9.
Laef Blong Hem
Ebraham i mekem plante samting long laef blong hem mo hem i gat wan gudfala laef. I tru se plante taem laef blong hem i no isi, be hem i no harem se laef blong hem i blong nating. Yu traem tingbaot sam samting we i hapen long hem.
▪ Taem Ebraham i stap long taon ya Uru, God i talem long hem blong i aot long kantri blong hem, mo i go long wan kantri we bambae God i soemaot long hem. God i no talemaot evri samting long Ebraham mo Sera. Tufala i no save se niufala kantri ya we tufala i stap go long hem i stap wea. Mo tufala i no save from wanem God i askem long tufala blong aot long ples blong tufala. Be nating, tufala i obei long God. Ebraham mo Sera tufala i stap nomo long ol haos tapolen long kantri ya Kenan, mo tufala i strenja long kantri ya gogo tufala i ded.—Ol Wok 7:2, 3; Hibrus 11:8, 9, 13.
▪ Taem Ebraham mo Sera tufala i no gat pikinini, Jehova i promes long Ebraham se bambae wan bigfala neson i kamaot biaen long hem. Jehova i talem se bambae hem i yusum Ebraham blong blesem olgeta famle long wol. (Jenesis 11:30; 12:1-3) Biaen, Jehova i talemaot bakegen se bambae hem i mekem promes ya i kamtru. Hem i talem long Ebraham se ol pikinini we oli kamaot biaen long hem bambae oli plante we plante, olsem ol sta long skae.—Jenesis 15:5, 6.
▪ Taem Ebraham i gat 99 yia mo Sera i gat klosap 90 yia, Jehova i promes se bambae tufala i gat wan pikinini boe. Long lukluk blong ol man oli ting se Ebraham mo Sera tufala i olfala tumas blong tufala i save gat pikinini. Be Ebraham mo Sera tufala i lanem se i no gat wan ‘samting we i strong tumas blong God i mekem.’ (Jenesis 18:14) Wan yia biaen, taem Ebraham i gat 100 yia, Sera i bonem wan pikinini boe we nem blong hem Aesak. (Jenesis 17:21; 21:1-5) God i talemaot klia se promes we hem i mekem wetem Ebraham bambae i kamtru long Aesak. Bambae God i yusum Aesak blong blesem olgeta man.
▪ Plante yia biaen, Jehova i talem long Ebraham blong mekem wan samting we i narakaen. Jehova i talem long Ebraham se bambae i kilim Aesak, pikinini blong hem we i lavem tumas, blong i mekem wan sakrefaes. Aesak i wan yangfala man we i no mared mo i no gat pikinini. Ating Ebraham i harem nogud tumas blong tingbaot se bambae i kilim pikinini blong hem i ded. Be nating, hem i obei. Hem i mekemrere ol samting blong kilim Aesak, blong mekem sakrefaes long God. Ebraham i bilif strong se God i gat paoa blong mekem Aesak i laef bakegen long ded, blong God i mekem promes blong hem i kamtru. (Hibrus 11:19) Long stret taem we Ebraham i rere blong kilim pikinini blong hem i ded, God i blokem hem mo Ebraham i no moa kilim Aesak i ded. God i talem gudfala toktok long Ebraham from nambawan fasin blong hem blong obei. Jehova i talem bakegen ol promes ya we hem i mekem finis wetem Ebraham.—Jenesis 22:1-18.
▪ Ebraham i gat 175 yia, nao hem i ded. Taem hem i ded, “hem i olfala we i olfala” mo Baebol i talem se “hem i gat wan gudfala laef.” (Jenesis 25:7, 8) Taswe, Ebraham i luk wan narafala promes blong God i kamtru, hemia se hem i laef longtaem, gogo kasem we hem i olfala gud, nao hem i ded we tingting blong hem i stap kwaet.—Jenesis 15:15.
Stori Blong Hem i Stap Yet Tede
Ebraham i wan man long histri we ol man blong jos oli tinghae long hem, be i no hemia nomo. Stori blong hem i givhan long yumi tede, mo i soemaot ol nambawan fasin we yumi save folem. (Hibrus 11:8-10, 17-19) Bambae yumi tokbaot fo gudfala fasin we Ebraham i soemaot. Faswan we bambae yumi tokbaot, hemia bilif. Plante man oli save Ebraham from fasin ya.
[Ol futnot]
a Fastaem, ol man oli save Ebraham long nem ya Ebram, mo oli save woman blong hem long nem ya Sarae. Biaen, God i jenisim nem blong Ebram i kam Ebraham, we i minim “Papa blong Bigfala Hip Man.” Mo God i jenisim nem blong Sarae i kam Sera, we i minim “Gel blong King.” (Jenesis 17:5, 15) Long ol haf ya, bambae yumi singaot tufala se Ebraham mo Sera. Olsem nao bambae i no fasfas.
b B.K.T. i minim Bifo Kristin Taem.
c Jehova i nem blong God long Baebol.
[Bokis blong pija long pej 4]
Wan Impoten Man We Baebol i Tokbaot
Long buk blong Jenesis, japta 1 kasem japta 10 i tokbaot laef blong plante man we oli bilif long God. Sam long olgeta hemia Ebel, Inok, mo Noa. Be ol 15 japta we oli kam biaen, klosap evriwan i tokbaot laef blong wan man nomo, hemia Ebraham.
Fas taem we yumi ridim sam bigfala tingting blong Baebol, hemia long stori blong Ebraham. Long stori blong Ebraham, yumi luk se . . .
▪ hemia fas taem we Baebol i tokbaot God olsem wan Sil, we i stap blokemgud ol man blong hem, i stap lukaot gud long olgeta.—Jenesis 15:1; lukluk Dutronome 33:29; Ol Sam 115:9; Ol Proveb 30:5.
▪ hemia fas taem we Baebol i tokbaot man we i bilif long God.—Jenesis 15:6.
▪ hemia fas taem we Baebol i yusum tok ya profet.—Jenesis 20:7.
▪ hemia fas taem we Baebol i tokbaot papa no mama we i lavem pikinini blong hem.—Jenesis 22:2.