Kwestin Blong Olgeta We Oli Ridim Magasin Ya . . .

?From Wanem Ol Witnes Blong Jehova Oli Go Long Haos Blong Man Blong Storian Long Baebol?

▪ Baebol i talem se Jisas i givim wok ya long ol man blong hem, i se: “Yufala i mas go long ol man long olgeta ples long wol, blong pulum olgeta oli kam man blong mi. . . . Mo yufala i mas tijim olgeta.” (Matiu 28:19, 20) ?Olsem wanem? ?Olgeta Kristin oli mas mekem wok ya? Ol fas Kristin oli kasem save se olgeta evriwan oli mas mekem wok ya. Aposol Pita i talem se: “Jisas ya, hem i talem long mifala, se mifala i mas talemaot gud nius blong hem long ol man.” (Ol Wok 10:42) Aposol Pol tu i talem se: “Hemia i wok blong mi we mi mas mekem. Sipos mi no moa talemaot gud nius ya, hemia bigfala trabol blong mi ya, bambae mi harem nogud tumas from.”—1 Korin 9:16.

I no Pol mo Pita nomo we oli mekem wok ya, be olgeta Kristin long taem ya oli mekem. Wok ya i impoten moa long olgeta i bitim ol narafala wok. (Ol Wok 5:28-32, 41, 42) Ol Witnes blong Jehova oli traehad blong mekem olsem tu. Oli tokbaot sem samting we Jisas i tokbaot, hemia “kingdom blong heven.”—Matiu 10:7, King James Version.

?Oli mas talemaot gud nius blong Kingdom long hu? Jisas i talem se ol man long olgeta ples oli mas harem ol tok ya. Hem i talem long ol man blong hem se: “Bambae yufala i mas go talemaot mi . . . gogo yufala i finisim olgeta ples long wol.” (Ol Wok 1:8) Hem i talem tu se bifo we en blong rabis wol ya i kam, “bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man.” (Matiu 24:14) Ol fas Kristin oli traehad blong mekem olsem Jisas i talem. Oli prij long ol man we oli save olgeta, long olgeta we oli no gat skul, mo long ol narafala man tu. (Kolosi 1:23; 1 Timoti 2:3, 4) Long sem fasin, ol Witnes blong Jehova oli traehad blong talemaot gud nius blong Kingdom long olgeta man.a

?Olsem wanem blong talemaot gud nius blong Kingdom? ?Wanem rod i wok gud moa? Jisas i save gud olsem wanem blong talemaot gud nius long plante man. Hem i sanem ol man blong hem oli go long ol taon, long ol vilej, mo long ol haos blong ol man. (Matiu 10:7, 11, 12) Afta we Jisas i ded mo i laef bakegen, ol man blong hem oli gohed blong talemaot gud nius “insaed long ol haos blong ol man.” (Ol Wok 5:42) Olsem Jisas, oli go long ol ples we ol man oli stap long hem mo oli prij long fes blong olgeta man. (Jon 4:7-26; 18:20; Ol Wok 17:17) Tede, ol Witnes blong Jehova oli talemaot gud nius long sem fasin, oli traem kasem olgeta man.

Ol tok blong Jisas i soemaot se sam man bambae oli no glad blong lesin. (Matiu 10:14; 24:37-39) ?Hemia i mekem se ol Kristin oli lego wok ya? Yu traem tingbaot sipos yu yu givhan blong sevem ol man taem graon i seksek bigwan. Yu stap traem sevem ol man we oli fas aninit long ol haos we oli folfoldaon, be yu save faenem sam man nomo. ?Bambae yu stop? Nogat. Bambae yu traehad from we i gat janis yet blong sevem sam moa man. Jisas i talem se ol man blong hem oli mas gohed blong talemaot gud nius blong Kingdom from we i gat janis yet se sam man bambae oli lesin. (Matiu 10:23; 1 Timoti 4:16) Ol Witnes blong Jehova oli soemaot se oli lavem God mo oli lavem ol man raonabaot long olgeta. Oli go long haos blong ol man blong traem faenem olgeta we oli glad blong lesin long gud nius blong Kingdom. Ol man oli mas harem ol tok ya, from we God bambae i sevem ol man we oli obei long gud nius ya.—Matiu 22:37-39; 2 Tesalonaeka 1:8.

Magasin ya we yu stap ridim, i tokbaot gud nius ya we i stap long Baebol. Sipos yu wantem save moa, plis yu toktok wetem ol Witnes blong Jehova taem oli kam long haos blong yu. Sipos no, yu save sanem wan leta long olgeta we oli wokem magasin ya.

[Futnot]