Baebol i Ansa

?Wanem nem blong God?

Olgeta man oli gat prapa nem blong olgeta. Taem wan pikinini i bon, yumi putum nem blong hem. Taem yumi gat puskat no dog tu, yumi putum nem blong olgeta. ?Olsem wanem long God? ?Yu ting se hem i gat wan prapa nem blong hem? Baebol i talem se God i gat plante nem blong soemaot wok no posisen blong hem, olsem God we i gat olgeta paoa, Masta, mo God we i mekem olgeta samting. Be hem i gat wan prapa nem blong hem tu.​—Ridim Aesea 42:8.

Long plante Baebol, yu save ridim prapa nem blong God long Ol Sam 83:18. Long King James Version, vas ya i talem se: “Ol man oli mas save se yu nomo, we nem blong yu Jehova, yu yu hae olgeta, antap long olgeta samting long wol.”a

?From wanem yumi mas yusum nem blong God?

Taem yumi gat‵ ol gudfala fren blong yumi, oltaem yumi stap singaot olgeta long nem blong olgeta. Samtaem, man i gat sam spesel nem we i soemaot wok we hem i mekem, be hem i wantem we yumi singaot hem long prapa nem blong hem nomo. ?Olsem wanem taem yumi toktok long God? ?Yu ting se i stret blong talem prapa nem blong hem? God i wantem we yumi yusum prapa nem blong hem. Mo Jisas Kraes tu, i tijim ol man blong hem se oli mas talemaot nem blong God.​—Ridim Matiu 6:9; Jon 17:6.

Be sipos yumi wantem kam fren blong God, i no naf blong save prapa nem blong hem nomo. Yumi mas save ol fasin blong hem tu. ?Yu yu save ol fasin blong God? ?Yu ting se yu save kam klosap moa long God? Ansa blong ol kwestin ya i stap long Baebol..