Baebol i Ansa

?God i lesin long prea blong olgeta man?

God i stap lesin long ol man long olgeta ples long wol. (Ol Sam 145:18, 19) Baebol i leftemap tingting blong yumi se yumi mas prea long God, from enikaen samting we i mekem yumi wari. (Filipae 4:6, 7) Be i gat sam prea we God i no glad long hem. Yu traem tingbaot. God i no glad long ol man we oli talem ol prea baehat, mo oli talem sem samting bakegen mo bakegen.—Ridim Matiu 6:7.

Mo tu, Jehova i no save lesin long prea blong ol man we oli no wantem nating blong obei long ol loa blong hem. (Ol Proveb 28:9) God i no wantem lesin long prea blong ol man Isrel bifo, from we oli kilim plante man oli ded. I klia nomo se yumi mas mekem samting we God i wantem, blong hem i save lesin long ol prea blong yumi.—Ridim Aesea 1:15.

?Yumi mas mekem wanem blong God i lesin long prea blong yumi?

Yumi no save prea long God, sipos yumi no gat bilif. (Jemes 1:5, 6) Yumi mas bilif se hem i stap mo se hem i stap tingbaot yumi. Taem wan man i stadi long Baebol mo i trastem ol save ya, hemia i mekem se hem i gat bilif. Taswe sipos yumi wantem we bilif blong yumi i kam strong moa, yumi mas stadi long Baebol.—Ridim Hibrus 11:1, 6.

Taem yumi prea, yumi mas gat tingting daon mo yumi mas talemaot samting we i stap long hat blong yumi. Jisas tu i mekem olsem, taem hem i prea. (Luk 22:41, 42) Taswe, i moa gud we yumi traem kasem save samting we God i wantem yumi blong mekem, i bitim we yumi talem long God samting we yumi wantem. Blong mekem olsem, yumi mas ridim Baebol. Olsem nao, ol prea blong yumi bambae oli laenap wetem tingting blong Jehova.—Ridim 1 Jon 5:14.