Baebol i Ansa

?God i olsem wanem?

Yumi no save luk God from we hem i spirit. Hem i mekem heven, wol, mo olgeta laef samting. I no gat man i mekem hem. (Ol Sam 90:2) God i wantem se ol man oli lukaot hem mo oli save trutok long saed blong hem.—Ridim Ol Wok 17:24-27.

God i wantem se yumi singaot hem long nem blong hem. Yumi save faenemaot sam long ol fasin blong hem, taem yumi lukluk ol samting we hem i mekem. (Rom 1:20) Be sipos yumi wantem save gud God, yumi mas stadi long Baebol. Long rod ya, bambae yumi save ol fasin blong hem.—Ridim Ol Sam 103:7-10.

?Wanem tingting blong God taem i no gat stret fasin?

Jehova i no laekem nating fasin we i no stret. (Dutronome 25:16) Mo hem i mekem ol man oli naf blong tekem ol fasin blong hem. From samting ya, plante man oli no laekem taem man i mekem i no stret long narafala. God i no stamba blong ol trabol we oli stap hapen tede. God i letem ol man oli jusum samting we oli wantem. Be sore tumas, plante man oli no jus gud, ale oli mekem i no stret long ol narafala. Samting ya i mekem Jehova i harem nogud tumas.—Ridim Jenesis 6:5, 6; Dutronome 32:4, 5.

Jehova i laekem ol fasin we i stret. (Ol Sam 37:28, 29) Baebol i promes se klosap nao, God bambae i spolem ol man we oli stap mekem fasin ya.—Ridim 2 Pita 3:7-9, 13.