Kingdom i Rul 100 Yia ?Hemia i Mekem Wanem Long Yu?

1, 2. ?Kingdom blong God bambae i mekem wanem, mo from wanem yumi save se Kingdom ya bambae i kam?

LONG yia 31, taem ol tri oli stap putum flaoa, Jisas mo ol man blong hem oli stap long wan hil klosap long Kapaneam. Ale Jisas i tijim olgeta blong oli prea se: “Plis, yu mekem Kingdom blong yu i kam.” (Mat. 6:10, NW) Tede, plante man oli no save sipos i tru se Kingdom bambae i kam, no nogat. Be yumi, yumi trastem fulwan se Kingdom ya we yumi stap askem bambae i kam.

² Jehova bambae i yusum Kingdom ya, blong mekem se famle blong hem long heven mo long wol i joen gud. Stamba tingting ya blong Jehova bambae i kamtru. (Aes. 55:10, 11) !Blong talem stret, Jehova i kam King finis long taem blong yumi! Ol nambawan samting we oli hapen long 100 yia we i pas, oli pruvum se hem i King. Jehova i stap mekem ol samting we oli gud tumas blong givhan long plante milian man blong hem. (Sek. 14:9; Rev. 15:3) Be taem ya we Jehova i kam King, hem i no sem mak long taem ya we Kingdom blong God i kam. ?Tufala taem ya i defren olsem wanem, mo tufala i save givhan long yumi olsem wanem?

KING WE JEHOVA I PUTUMAP I TEKEM AKSEN

3. (1) ?Jisas i kam King wetaem mo long weples? (2) ?Bambae yu yu pruvum olsem wanem se Jisas i stat rul long 1914? (Yu luk futnot.)

³ Klosap 20 yia bifo long ol yia 1900, ol man blong God oli stat blong kasem save long wan profet tok we Daniel i raetem 2,500 yia bifo. Profet tok ya i talem se: “Long taem blong ol king ya, God ya we i stap long heven bambae i stanemap wan king [“wan kingdom,” NW] we rul blong hem bambae i no save finis samtaem.” (Dan. 2:44) Ol Baebol Studen oli kasem save se Kingdom ya bambae i stat rul long heven long 1914. Plante man long taem ya, oli ting se fiuja blong ol man bambae i gud. Wan man blong raetem buk i talem se: “Long 1914, ol man long wol oli gat hop mo gudfala tingting long fiuja.” Be klosap long en blong 1914, faswan bigfala faet long wol i stat, mo profet tok blong Baebol i kamtru. Kakae i sot, graon i seksek, ol strong sik, mo ol narafala profet tok blong Baebol we oli kamtru, oli pruvum se Jisas Kraes i stat blong rul long heven olsem King long Kingdom blong God, long 1914.a Taem Jehova i putumap Pikinini blong hem olsem Mesaea King, Jehova i kam King long wan narafala fasin.

4. ?Wanem fas samting we Jisas i mekem taem hem i kam King? ?Wanem nekis samting we hem i mekem?

⁴ Fas samting we niufala King ya we God i putumap i mekem, hemia se hem i faet agensem Setan, we i enemi blong Papa blong hem. Jisas mo ol enjel blong hem oli sakemaot Setan mo ol rabis enjel blong hem, oli aot long heven. Samting ya i mekem olgeta long heven oli glad tumas. Be long saed blong wol, ol man oli safa moa i bitim bifo. (Ridim Revelesen 12:7-9, 12.) Biaen, King i stat blong mekem ol man blong hem long wol ya oli klin, i tijim olgeta, mo i mekem oli joen long wan ogenaesesen, blong oli mekem samting we God i wantem. Bambae yumi luk olsem wanem tede yumi save folem gudfala eksampol blong olgeta blong obei long ol samting we Jisas i talem.

MESAEA KING I MEKEM OL MAN BLONG HEM OLI KLIN

5. ?Wanem wok blong klinim i stat long 1914 go kasem stat blong 1919?

⁵ Afta we Jisas i klinim heven mo i karemaot Setan mo ol rabis enjel blong hem, Jehova i lidim Jisas blong hem i jekem ol man blong hem long wol ya, mo i mekem olgeta oli klin. Profet Malakae i tokbaot samting ya se i olsem wan wok blong klinim ol man, blong wosip blong olgeta i klin long fes blong God. (Mal. 3:1-3) Histri i soemaot se wok ya blong klinim i stat long 1914, i go kasem stat blong 1919.b Sipos yumi wantem stap long bigfala famle ya blong Jehova, yumi mas klin mo tabu. (1 Pita 1:15, 16) Yumi mas lukaotgud se ol doti fasin blong ol giaman skul mo blong politik oli no spolem wosip we yumi mekem long Jehova.

6. ?Hu i stap givimaot ol gudfala kakae we i blong mekem bilif blong yumi i strong? ?From wanem ol kakae ya oli impoten tumas?

⁶ Biaen Jisas i yusum raet blong hem olsem King, blong putumap wan ‘slef we i stret mo waes.’ Slef ya bambae i givimaot ol gudfala kakae oltaem, long olgeta man we oli mekemap “wan kampani nomo” blong ol sipsip we Jisas i lukaot long olgeta. (Mat. 24:45-47, NW; Jon 10:16) Stat long 1919, wan smol grup blong ol tabu brata oli stap mekem impoten wok ya blong givimaot kakae long “ol narafala man” blong Jisas. Slef we i stret mo waes i givimaot plante gudfala kakae long yumi, blong yumi save kam strong long bilif. Ol kakae ya oli halpem yumi blong yumi gat strong tingting blong mekem wosip blong yumi, ol fasin, tingting, bodi blong yumi, mo olting blong yumi, oli klin mo oli laenap gud wetem ol rul blong God. Mo tu, oli tijim mo oli rerem yumi blong wok strong long impoten wok ya blong prij. ?Olsem wanem? ?Yu yu stap tekem ol gudfala kakae ya oltaem?

KING I TIJIM OL MAN BLONG HEM BLONG OLI PRIJ LONG FULWOL

7. ?Wanem impoten wok we Jisas i statem taem hem i stap long wol, mo wok ya bambae i gohed kasem wetaem?

⁷ Taem Jisas i stat blong prij long wol, hem i talem se: “Mi mas go long ol narafala vilej tu, mi mas talemaot gud nius ya long olgeta, se God i stap kam King blong olgeta man long wol, from we God i sanem mi blong mi mekem olsem.” (Luk 4:43) Long ol tri yia haf we hem i stap long wol, wok blong prij i kam olsem impoten wok long laef blong hem. Hem i tijim ol disaepol blong hem se: “Taem yufala i go, yufala i mas talemaot se, ‘Taem blong God i kam King blong olgeta man long wol [“kingdom blong God,” NW], i kam klosap finis.’” (Mat. 10:7) Afta we Jisas i laef bakegen, hem i talemaot se ol man blong hem bambae oli talemaot gud nius ya gogo oli “finisim olgeta ples long wol.” (Wok 1:8) Hem i promes se bambae hem i givhan long olgeta blong oli mekem impoten wok ya, gogo kasem en blong ol rabis fasin blong wol ya.—Mat. 28:19, 20.

8. ?King i mekem wanem blong pulum ol man blong hem blong oli prij?

⁸ Long 1919, “gud nius ya blong Kingdom” i mekem wan narafala impoten samting i kamaot. (Mat. 24:14, NW) King i stap rul long heven, mo hem i hivimap wan smol grup blong ol man blong hem long wol ya, we hem i mekem olgeta oli klin finis. Grup ya i wantem tumas blong obei long ol klia tok blong Jisas, blong talemaot gud nius long olgeta man se Kingdom blong God i stap rul finis long heven. (Wok 10:42) Long Septemba 1922, klosap 20,000 man we oli sapotem Kingdom, oli joen long wan bigfala asembli long Cedar Point, Ohio, long Amerika. Yu traem tingbaot olsem wanem olgeta ya oli mas harem gud tumas taem Brata Rutherford i givim tok ya we stamba tok blong hem se “Kingdom,” mo i talemaot se: “!Yufala i luk! !King i stap rul finis! Yufala nao i man we hem i yusum blong talemaot hem long olgeta man. Taswe talemaot, talemaot, talemaot, King ya mo kingdom blong hem.” Long nekis dei, tu taosen long olgeta oli go prij. Mo samfala oli wokbaot 72 kilometa longwe long ples blong asembli, blong go prij. Wan brata i talem se: “!Bambae mi neva fogetem tok ya we i talem se ol man oli mas talemaot Kingdom, mo strong tingting tu we ol man long taem ya oli gat!” Plante narafala brata mo sista tu oli gat tingting olsem.

9, 10. (1) ?Wanem skul i trenem yumi blong prij? (2) ?Trening we yu kasem i givhan long yu olsem wanem?

⁹ Long 1922, bitim 17,000 pablisa oli stap talemaot gud nius long 58 kantri. Be ol pablisa ya oli nidim trening. Long taem blong ol fas Kristin, King ya we God i jusumaot, i talemaot sam klia save long ol disaepol blong hem. Hem i talemaot samting we bambae oli tokbaot taem oli prij, weples bambae oli prij long hem, mo olsem wanem blong prij. (Mat. 10:5-7; Luk 9:1-6; 10:1-11) Long sem fasin tede, Jisas i meksua se olgeta man we oli prij, oli kasem ol tijing mo oli gat ol samting we oli save yusum blong oli save kam ol gudfala tija. (2 Tim. 3:17) Jisas i stap yusum Kristin kongregesen blong trenem ol man blong hem blong prij. Hem i yusum Tiokratik Skul long bitim 111,000 kongregesen, blong trenem olgeta. Skul ya i tijim bitim seven milian pablisa blong oli save olsem wanem blong prij mo tijim man, long fasin we bambae i givhan long “ol man we oli gat ol defdefren kaen fasin.”—Ridim 1 Korin 9:20-23.

¹⁰ Mo i gat sam narafala Baebol skul tu blong trenem ol elda long kongregesen, ol paenia, ol brata we oli no mared, ol brata mo woman blong olgeta, ol memba blong Branj Komiti wetem woman blong olgeta, ol elda we oli goraon long ol kongregesen wetem woman blong olgeta, mo ol misinari.c Sam brata mo sista we oli bin joen long Baebol Skul Blong Ol Brata Mo Woman Blong Olgeta, oli talemaot glad we oli kasem long skul ya, oli se: “Spesel trening ya i mekem se mifala i lavem Jehova moa, mo i halpem mifala blong mifala i nafgud blong givhan long ol narafala.”

11. ?From wanem ol man blong Jisas oli naf blong gohed blong prij nating se Setan i agensem olgeta?

¹¹ Enemi ya Setan, hem i luk bigfala wok ya blong prij mo tijim man. Hem i wantem blokem wok blong prij, mo bambae hem i yusum enikaen rod blong agensem gud nius blong Kingdom, mo ol man we oli talemaot gud nius ya. Be Setan bambae i no save win. Jehova i leftemap nem blong Pikinini blong hem i “hae moa long nem blong olgeta enjel we oli haeman, mo long ol lida, mo long ol man we oli gat paoa.” (Efes. 1:20-22) Jisas i yusum raet blong hem olsem King, blong protektem mo lidim ol disaepol blong hem, blong meksua se samting we Papa blong hem i wantem i kamtru.d Wok blong prij i stap gohed yet, mo plante milian man we oli wantem save trutok oli stadi Baebol, nao oli mekem wosip long Jehova. !Hemia wan bigfala ona blong yumi joen long nambawan wok ya!

KING I REREM OGENAESESEN BLONG HEM

12. ?Stat long 1914, wanem sam jenis we ol man blong Jehova oli mekem?

¹² Taem Jisas i stat rul long 1914, hem i mekem sam jenis long ogenaesesen blong God, blong mekem ol man blong God oli save mekem samting we God i wantem. (Ridim Aesea 60:17.) Long 1919, oli jusum wan elda long ol kongregesen wanwan, blong hem i lidim wok blong prij. Long 1927, ol pablisa oli stat blong prij long evri Sande. Long 1931, ol man blong Jehova oli karem nem ya ol Witnes blong Jehova, mo hemia i pulum olgeta blong oli mekem moa long wok blong Kingdom. (Aes. 43:10-12) Stat long 1938, kongregesen i no moa vot blong putumap ol elda. Defren olgeta, blong wan brata i kam wan elda, hem i mas kasem ol mak we Baebol i talem. Long 1972, i no moa wan elda nomo we i lukaot long kongregesen, be i gat wan kampani blong ol elda we i mekem wok ya. Ol brata we oli naf blong kam elda no man blong givhan, oli mas wantem mekem wok ya blong givhan long ol sipsip blong Jehova long kongregesen. (1 Pita 5:2) Long 1976, Hed Kampani i stanemap sikis komiti blong lukaot long ol wok blong Kingdom long fulwol. Stat long taem ya, Jisas i gohed sloslo blong rerem ol man blong hem, blong oli save mekem samting olsem we God i wantem.

13. ?Ol samting we Mesaea King i mekem long 100 yia we hem i rul, oli givhan long yu olsem wanem?

¹³ Yu traem tingbaot olgeta wok we Mesaea King i mekem finis, long 100 yia we hem i rul. Hem i mekem wan grup blong man i klin blong oli save wok long nem blong Jehova. Hem i lidim wok blong talemaot gud nius long 239 kantri, mo hem i tijim plante milian man blong oli mekem wosip long Jehova. Hem i pulum bitim seven milian man we oli glad blong mekem samting we Jehova i wantem, blong oli joen wanples long wan ogenaesesen. (Sam 110:3) Tru ya, Jehova i yusum Kingdom blong Mesaea blong mekem ol samting we oli nambawan. !Be i gat plante bigfala samting yet we bambae oli hapen!

OL BLESING WE BAMBAE OLI KAMAOT LONG KINGDOM BLONG MESAEA

14. (1) Taem yumi prea se Kingdom blong God i kam, ?yumi stap askem long God blong i mekem wanem? (2) ?Wanem stamba vas blong yia 2014, mo from wanem vas ya i stret?

¹⁴ Nating se Jehova i putumap Jisas Kraes, olsem Mesaea King long 1914, be hemia i no fulwan ansa blong prea we yumi stap mekem se: “Plis, yu mekem Kingdom blong yu i kam.” (Mat. 6:10, NW) Baebol i talemaot se Jisas bambae i “rulum ol enemi blong [hem].” (Sam 110:2) Ol gavman blong man we oli stap aninit long paoa blong Setan, oli gohed yet blong agensem Kingdom. Taem yumi prea se Kingdom blong God i kam, yumi stap askem long God, blong i mekem se Mesaea King mo ol 144,000 man we oli rul wetem hem long heven, oli finisim rul blong ol man mo oli tekemaot ol man we oli stap agensem Kingdom. Samting ya bambae i mekem profet tok blong Daniel 2:44 i kamtru, we i talem se Kingdom blong God bambae i “flatemgud paoa blong ol narafala king.” Bambae hem i spolemgud ol gavman we oli enemi blong Kingdom. (Rev. 6:1, 2; 13:1-18; 19:11-21) Klosap nao samting ya bambae i hapen. From samting ya, i stret nomo we stamba vas blong yia 2014, i kamaot long Matiu 6:10 (NW), we i se: “Plis, yu mekem Kingdom blong yu i kam.” !Wan handred yia nao we Jisas i rul long heven!

15, 16. (1) ?Wanem ol bigfala samting we bambae oli kamaot taem Kraes i rul blong wan taosen yia? (2) ?Wanem laswan samting we Jisas bambae i mekem? ?Mo samting ya i mekem wanem long stamba tingting blong Jehova?

¹⁵ Afta we King Mesaea i spolem ol enemi blong God, bambae hem i sakem Setan mo ol rabis enjel blong hem oli go long bigfala hol ya we i godaon we i godaon, blong oli stap long hem blong wan taosen yia. (Rev. 20:1-3) Nao taem Setan mo ol rabis enjel blong hem oli no moa stap, bambae Kingdom i save yusum sakrefaes blong Jisas blong givhan long ol man, mo blong karemaot trabol we sin blong Adam i mekem long ol man. King ya bambae i mekem plante milian man oli laef bakegen. Mo bambae hem i stanemap wan program, blong ol man blong hem oli tijim ol man ya we oli laef bakegen, blong oli save Jehova. (Rev. 20:12, 13) Fulwol bambae i kam paradaes olsem garen blong Iden bifo, mo olgeta gudfala man bambae oli kam stret gud olgeta.

¹⁶ Long en blong wan taosen yia we Kraes i rul, stamba tingting blong Jehova long saed blong wol bambae i kamtru. Biaen, Jisas bambae i givimbak Kingdom i gobak long Papa blong hem. (Ridim 1 Korin 15:24-28.) Ale bambae yumi no moa nidim wan man blong toktok long Jehova long saed blong yumi. Olgeta pikinini blong God long heven mo long wol, bambae oli stap olsem wan bigfala famle we oli joen gud wetem Papa blong olgeta long heven.

17. ?Yu yu gat strong tingting blong mekem wanem blong Kingdom?

¹⁷ Ol bigfala samting we oli hapen long 100 yia we Kingdom i rul, oli soemaot se Jehova i bos yet long ol samting we hem i mekem. Mo oli soemaot se stamba tingting blong Jehova long saed blong wol ya bambae i kamtru. I gud yumi gohed blong stap aninit long Kingdom ya, mo yumi talemaot King ya mo Kingdom blong hem. Yumi trastem fulwan se i no longtaem, Jehova bambae i ansa long prea blong yumi se: “Plis, yu mekem Kingdom blong yu i kam.”