?Yu Save Gat Lav We i No Jenis?

1, 2. ?Sing blong Solomon i save givhan long hu? ?From wanem yumi nidim stadi ya? (Yu luk pija long stat blong stadi.)

MAN mo woman, tufala i stanap rere blong mared. Tufala i lukluk stret long ae blong tufala, nao tufala i smael. Evriwan oli luksave se tufala i lavlavem tufala. Brata we i givim tok blong mared i luk we tufala i holholem tufala, nao hem i stap tingting se: ‘Long ol yia we oli kam, ?bambae tufala i lavlavem tufala moa, no lav blong tufala bambae i lus?’ Taem man mo woman tufala i gat lav we i tru, mared blong tufala i save stanap strong, nating se tufala i fesem bigfala trabol. Be plante man mo woman we oli mared, sloslo oli no moa glad nao oli seraot. Taswe, maet yu askem se: ‘?Lav i save stap olwe we i no jenis samtaem?’

² Long taem blong King Solomon tu, sam man mo woman nomo oli gat tru lav. ?From wanem? Solomon i talem se: “Long saed blong man, mi mi faenem we i gat wanwan nomo we mi save ona long olgeta, be long saed blong woman, mi no faenem wan woman nating we mi save ona long hem. Mi faenemaot se taem God i mekem yumi, yumi stret nomo, be yumi nomo, yumi stap mekem laef blong yumi i paspas olbaot.” (Prija 7:26-29) Sam woman blong ol narafala kantri we oli wosipim Bal mo oli mekem rabis fasin, oli stap wetem ol man Isrel. From samting ya, plante man mo woman Isrel oli stat blong mekem rabis fasin.a Be samwe long 20 yia bifo long taem ya, King Solomon i raetem stori blong wan man mo wan woman we tufala i gat tru lav. Sing blong Solomon i save givhan long yumi evriwan, nating se yumi mared no yumi no mared. Hem i save tijim yumi se: ?Wanem ya tru lav? ?Yumi soemaot lav ya olsem wanem?

!YU SAVE GAT LAV WE I TRU!

3. ?From wanem man mo woman tufala i naf blong gat tru lav?

³ Ridim Sing blong Solomon 8:6. Vas ya i talem se lav i olsem ‘faea we i stap bon strong tumas, i red we i red.’ Sam narafala Baebol oli talem se “faea blong Ja.” ?From wanem oli talem olsem? From we nambawan fasin blong Jehova, hemia lav. Mo hem i mekem yumi, we yumi naf blong folem fasin blong hem. (Jenesis 1:26, 27) Afta we Jehova i mekem fas man ya Adam, hem i givim wan naesfala woman long hem. Fastaem we Adam i luk Iv, hem i glad we i glad, nao i harem se hem i mas talemaot filing blong hem. Iv tu i laekem tumas man blong hem. Hemia i stret nomo, from we Jehova i yusum wan haf blong bodi blong Adam blong wokem Iv. (Jenesis 2:21-23) Stat long taem ya nao, Jehova i mekem rod blong man mo woman, tufala i save gat lav we i tru blong olwe.

4, 5. ?Sing blong Solomon i tokbaot wanem?

⁴ Sing blong Solomon i fulap long ol nambawan tok we i eksplenem lav blong man mo woman. Sing ya i tokbaot wan gel we i kam long vilej blong Sulam mo wan boe blong lukaot long sipsip. Stori ya i olsem: Ol brata blong gel ya oli gat wan plantesen blong grep we gel ya i stap wok long hem. Wan dei, King Solomon mo ol soldia blong hem, oli kam putumap ol haos tapolen blong olgeta klosap long plantesen ya, nao king i luk gel ya. Ale hem i talem long ol man blong hem blong oli go tekem gel ya i kam. Solomon i tok swit long gel ya, mo i wantem givim plante presen long hem. Be gel ya i lavem wan boe blong lukaot long sipsip, mo i talem klia se hem i wantem stap klosap long boe ya. (Sing blong Solomon 1:4-14) Nao boe ya i go long ples we oli stap long hem, hem i go blong lukaotem gel ya. Taem hem i faenem hem, tufala i talem ol nambawan tok blong lav long tufala.—Sing blong Solomon 1:15-17.

⁵ Solomon i tekem gel ya i go long Jerusalem, be boe blong lukaot long sipsip i biaen long olgeta. (Sing blong Solomon 4:1-5, 8, 9) Solomon i traehad blong jenisim tingting blong gel ya, be nogat. Gel ya i lavem boefren blong hem nomo. (Sing blong Solomon 6:4-7; 7:1-10) Ale Solomon i letem gel Sulam ya i gobak long ples blong hem. Gel ya i singaot long switat blong hem, nao boe ya i resis i kam “olsem anamol ya gasel.”—Sing blong Solomon 8:14.

6. Long sing ya, ?from wanem i had blong save hu i stap toktok?

⁶ Sing blong Solomon i wan nambawan singsing. Samfala oli kolem se “Sing we i Gud Moa, i Winim ol Narafala Sing.” (Sing blong Solomon 1:1) Long sam ples long sing ya, i had blong makem se hu i stap toktok, from we Solomon i no talem. Hem i no talem plante smosmol samting olsem, from we hem i wantem se ol man oli harem gud nomo long gudfala singsing ya mo ol tok blong hem. Ol tok nomo oli soemaot hu i stap toktok.

OL TOK BLONG YU “I SWIT MOA I WINIM WAEN”

7, 8. ?Gel Sulam mo boe blong lukaot long sipsip, tufala i talem wanem long tufala? Yu talem sam eksampol.

⁷ Gel Sulam mo boe blong lukaot long sipsip, tufala i talem plante tok blong lav long tufala. Maet sam long ol tok ya i narakaen long tingting blong yumi. Hemia from we oli raetem 3,000 yia finis mo laef long taem ya i defren. Nating se i olsem, yumi kasem save long filing blong tufala. (Sing blong Solomon 1:2) Yu traem tingbaot tok we boe ya i talem long gel ya, se ae blong hem i olsem ‘ae blong sotleg.’ Hem i stap talem se taem hem i lukluk ae blong gel ya, hem i luksave se hem i kaen we i kaen, nao hem i lavem hem. (Sing blong Solomon 1:15) Mo gel ya i talem long boe ya tu se, ae blong hem i naes olsem sotleg. (Ridim Sing blong Solomon 5:12.)b Taem hem i luk ae blong boe ya, kala blong bi blong ae we i stap long medel blong waet, i mekem hem i tingbaot wan sotleg we i stap swim long melek.

⁸ Tufala i talem ol gudfala toktok from naes fes mo bodi blong tufala, be i no hemia nomo. Boe ya i lavem gel ya from we ol toktok blong hem tu oli kaen. (Ridim Sing blong Solomon 4:7, 11.) Hem i talem se: “Daling, maot blong yu i swit olsem hani, mo tang blong yu i swit olsem melek wetem hani.” Long tingting blong hem, ol tok blong gel ya i swit mo i gud olsem melek wetem hani. Boe ya i talem tu se gel ya i “naes tumas” mo “i no gat wan mak nating” long hem. Be hem i no stap tokbaot bodi blong gel ya nomo, hem i minim ol nambawan fasin blong hem tu.

9. (1) ?Wanem ol defren kaen lav we tufala i mas soemaot long tufala? (2) ?From wanem i impoten tumas we tufala i talemaot se tufala i lavlavem tufala?

⁹ Man mo woman we tufala i wosipim Jehova, tufala i no tingbaot mared olsem wan kontrak nomo we tufala i saenem. Tufala i lavlavem tufala mo tufala i soemaot samting ya. ?Be tufala i mas gat wanem kaen lav? Tufala i mas gat lav ya we Baebol i tokbaot, we man i tingbaot narafala fastaem long hem wan. (1 Jon 4:8) Mo tufala i mas gat lav ya we i stap insaed long famle, mo lav we ol gudfala fren oli gat. (Jon 11:3) Mo tufala i mas gat lav blong man wetem woman. (Ol Proveb 5:15-20) Yes, tufala i mas gat olgeta kaen lav ya evriwan. Ol samting we man i mekem mo i talem long woman i save mekem hem i sua se man ya i lavem hem mo i hapi. Sem mak long ol samting we woman i mekem mo talem long man. I impoten we tufala i talemaot se tufala i lavlavem tufala, nomata se tufala i bisi tumas. Long sam kantri, famle nomo i jusum boe no gel we pikinini blong olgeta bambae i mared long hem. Maet long dei blong mared nomo, i fastaem we tufala i toktok long tufala. Be taem tufala i save tufala moa, nao tufala i lavlavem tufala, tufala i mas talemaot filing blong tufala. Olsem nao, bambae tufala i fren moa, nao mared blong tufala bambae i stanap strong.

10. ?Ol tok blong lav i save mekem wanem narafala samting, blong mared i stap strong?

¹⁰ Ol tok blong lav i save mekem wan narafala samting tu, blong mared i stap strong. Long sing ya, King Solomon i wantem givim ol presen long gel ya, olsem ‘wan gol jen, we oli flasem long ol bidbid we oli wokem long silva.’ Hem i talem ol gudfala toktok long gel ya se, “hem i naes we i naes, mo fes blong hem i saen we i saen, olsem san mo mun.” (Sing blong Solomon 1:9-11; 6:10) Be gel ya i faenem finis boe we hem i lavem tru. ?Wanem i givhan long hem blong i stap tru long boe we i lukaot long sipsip? Taem boe ya i stap longwe long hem, ?wanem i mekem gel ya i harem gud? (Ridim Sing blong Solomon 1:2, 3.) Hem i tingbaot ol tok blong lav we boe ya i talem long hem finis. Long tingting blong hem, ol tok ya “i swit moa i winim waen.” Taem hem i stap long haos blong king, nao hem i tingbaot ol tok ya, hem i harem gud olsem we man i putum gudfala “senta” long hed blong hem. (Ol Sam 23:5; 104:15) Man mo woman we i mared, tufala i mas talem ol tok blong lav oltaem long tufala, hemia bambae i mekem se tufala i lavlavem tufala moa. Nao taem tufala i tingtingbak long ol tok ya, samting ya bambae i mekem se lav i stap strong.

NO WEKEMAP FILING “WE I NO TAEM BLONG HEM YET”

11. ?Ol tok we gel Sulam i talem long ol woman long haos blong king i tijim yumi long wanem?

¹¹ Sipos yu yu wantem mared, yu save lanem samting long stori blong gel Sulam ya. Hem i no gat filing nating long King Solomon. Hem i talem stret long ol woman long haos blong king se bambae oli no wekemap filing blong hem “we i no taem blong hem yet.” (Sing blong Solomon 2:7, futnot BLB; 3:5) Taswe, ?i stret blong frenem enikaen man no woman? Nogat. I waes blong wet gogo yu faenem man no woman we yu save lavem hem tru.

12. ?From wanem gel Sulam i lavem boe we i lukaot long sipsip?

¹² ?From wanem gel Sulam i lavem boe we i lukaot long sipsip? Hem i ting se boe ya i naes olsem “gudfala anamol ya gasel.” Han blong hem “i strong mo i naes,” olsem wan aean we oli kavremap long gol. Leg blong hem i naes mo i strong olsem “pos we oli wokem long gudfala ston ya alabasta.” Be i no bodi blong boe ya nomo we gel ya i laekem. Hem i save se boe ya i lavem Jehova, mo i gat ol gudgudfala fasin. Taswe hem i spesel, “olsem gudfala tri ya apol we i stap long medel blong ol narafala tri long bus.”—Sing blong Solomon 2:3, 9; 5:14, 15.

13. ?From wanem boe we i lukaot long sipsip i lavem gel Sulam?

¹³ Gel Sulam ya tu i naes we i naes tumas. Hem i pulum ae blong Solomon, nating se Solomon i gat ‘sikisti woman blong hem finis we oli kwin, mo eiti narafala woman blong hem, mo ol yang gel we oli plante we plante.’ ?Olsem wanem? ?Boe we i lukaot long sipsip i laekem gel ya nomo from we hem i naes? Nogat. Gel ya i lavem Jehova mo i gat ol gudgudfala fasin. Hem i soemaot se tingting blong hem i stap daon taem hem i talem se, hem i olsem “waelflaoa ya nomo we i stap gru long ples ya Saron.” Be boe ya i ting se gel ya i spesel, “olsem wan gudfala waelflaoa we i stap gru long medel blong rop we i gat nil.”—Sing blong Solomon 2:1, 2; 6:8.

14. ?Boe we i lukaot long sipsip mo gel Sulam, i tijim olgeta we oli wantem mared long wanem samting?

¹⁴ Jehova i talem long ol man blong hem se oli mas mared long “man blong Masta” nomo. (1 Korin 7:39) Hemia i min se yumi mas frenem mo mared long man no woman we i baptaes finis. ?Samting ya bambae i givhan olsem wanem long mared? Tufala we i mared, tufala i fesem plante problem evri dei. Be taem tufala tugeta i fren gud wetem Jehova, i gat pis long mared mo tufala i hapi. Taswe, sipos yu yu wantem mared, yu mas folem eksampol blong boe we i lukaot long sipsip mo gel Sulam. Yu mas faenem wan man no woman we i gat ol gudgudfala fasin mo i lavem Jehova.

‘PLES BLONG SPEL WE STONWOL I GORAON LONG HEM’

15. ?Gel Sulam i soemaot wanem gudfala eksampol long ol Kristin we oli mekem plan finis blong mared?

¹⁵ Ridim Sing blong Solomon 4:12. ?From wanem boe blong lukaot long sipsip i talem se gel Sulam i olsem ‘ples blong spel we stonwol i goraon long hem’? Wan ples blong spel we stonwol i blokem i no open long enikaen man nomo. Gel ya i olsem ples blong spel ya, from we hem i lavem boe ya nomo we i lukaot long sipsip. Tufala i gat tingting finis blong mared, taswe hem i no letem king i pulum hem. Mo hem i no jenisim tingting blong hem. Hem i no olsem “doa” we i isi nomo blong openem, be hem i olsem “stonwol.” (Sing blong Solomon 8:8-10) Long sem fasin, tu Kristin we tufala i mekem plan finis blong mared, tufala i mas stap tru long tufala. Tufala i no mas gat filing long wan narafala bakegen.

16. ?Sing blong Solomon i tijim ol boe mo gel we oli stap fren, long wanem samting?

¹⁶ Taem boe blong lukaot long sipsip i wantem tekem gel ya i go wokbaot smol, ol brata blong gel ya oli no letem hem. Oli sanem hem i go gad long plantesen blong grep. ?From wanem? ?Oli no trastem hem? ?Oli ting se tufala i wantem mekem rabis fasin? Nogat. Oli wantem protektem sista blong olgeta. Oli no wantem se tufala i stap long wan ples we filing i save pulum tufala blong mekem samting we i no stret. (Sing blong Solomon 1:6; 2:10-15) Sipos yu yu stap frenem wan boe no gel, ?olsem wanem blong blokem ol samting we oli save pulum yutufala blong mekem rabis fasin? Yutufala i mas mekem desisen fastaem long ol fasin we bambae yutufala i blokem. Yutufala i no mas stap yutufala nomo, long wan ples we narafala i no save luk yutufala. Mo yutufala i mas soemaot filing long fasin we i klin.

17, 18. ?Stadi ya i givhan long yu olsem wanem?

¹⁷ Jehova i wantem se mared i stap olwe. Hem i wantem we man mo woman we i mared, tufala i lavlavem tufala. Yumi save se taem tufala i jes mared, tufala i lavlavem tufala. Be blong mared i stap olwe, lav ya i mas stap strong oltaem, olsem wan faea we i no save ded samtaem.—Mak 10:6-9.

¹⁸ Sipos yu yu wantem mared, yu mas lukaot wan man no woman we yu save lavem hem tru. Taem yu faenem hem, yutufala i mas wok tugeta blong mekem lav blong yutufala i stap strong oltaem. Sing blong Solomon i tijim yumi se yumi save gat tru lav we i stap olwe, olsem “faea we i red we i red,” from we hem i faea blong Ja.—Sing blong Solomon 8:6.