Prea ?i Save Givhan Long Yu Olsem Wanem?

Bifo we yu stat blong mekem wan samting, maet yu stap tingbaot se, ‘?Wanem gudfala samting we bambae mi kasem long samting ya?’ ?I rong blong gat tingting olsem long saed blong prea? Nogat. Yumi wantem save sipos prea i save givhan long yumi no nogat.

Long ol haf we oli pas finis, yumi luk ol pruf we oli soemaot se prea hem i no wan fasin nomo blong ol man we oli stap go long jos, mo i no jes blong mekem man i harem gud nomo. Be, God i stap lesin long ol prea. Sipos prea blong yumi i laenap wetem samting we hem i wantem, hem bambae i lesin long yumi. Hem i wantem se yumi kam klosap long hem. (Jemes 4:8) Taswe, sipos yumi prea oltaem, ?hemia i save givhan long yumi olsem wanem? I gud yumi luk sam long ol gudfala samting we oli save kamaot taem yumi prea.

Gat pis long tingting.

?Yu yu wari tumas taem yu kasem plante trabol? Baebol i leftemap tingting blong yumi se ‘oltaem yumi mas prea,’ speseli taem yumi kasem trabol. Mo tu, yumi ‘mas askem samting long God.’ (1 Tesalonaeka 5:17; Filipae 4:6) Baebol i talem se sipos yumi prea long God, bambae ‘pis we hem i givim, we i bigfala moa, i bitim save blong yumi, bambae hem i putum long tingting blong yumi, blong lukaot gud long yumi.’ (Filipae 4:7) Taem yumi talemaot ol wari blong yumi long Papa blong yumi long heven, bambae yumi gat pis long tingting. Hemia nao samting we hem i leftemap tingting blong yumi blong mekem. Hem i talem long yumi long Ol Sam 55:22 se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala.”

I gat plante man long wol we oli kasem pis ya finis. Wan woman we nem blong hem Hee Ran, blong Saot Koria, i talem se: “Nating se mi mi kasem plante trabol, be taem mi prea mi harem gud bakegen mo mi kasem paoa blong stanap strong long ol trabol ya.” Wan narafala woman long Filipin we nem blong hem Cecilia, i talem se: “Mi mi wan mama mo mi wari tumas blong lukaot long ol gel blong mi, mo long olfala mama blong mi we i sik mo naoia hem i stap fogetem samting mo hem i no moa luksave mi. Be from we mi stap prea, samting ya i givhan long mi blong mi no moa wari tumas mo mi gohed blong mekem ol wok blong mi. Mi save se Jehova bambae i givhan long mi blong lukaot long famle blong mi.”

Givhan mo i givim paoa taem yu kasem trabol.

Taem yu kasem sam trabol we oli bigwan tumas, ?yu yu stap harem nogud? Taem yu prea long ‘God ya we i stamba blong fasin blong givhan,’ hem i save givhan long yu bigwan. Baebol i talem se hem i ‘stap givhan long yumi long olgeta trabol blong yumi.’ (2 Korin 1:3, 4) Eksampol, wan taem Jisas i harem nogud bigwan, “hem i nildaon, i prea.” ?Wanem samting i kamaot from? “Wan enjel i aot long heven i kam, nao i kamtru long Jisas, i mekem hem i strong bakegen.” (Luk 22:41, 43) Wan narafala man hemia Nehemaea, hem i harem nogud from ol nogud samting we ol man oli mekem long hem blong blokem hem blong no mekem wok blong God. Hem i se: “Nao mi mi prea, mi talem se, ‘God, plis yu mekem mi mi strong.’” Ol samting we oli hapen biaen oli soemaot se God i givhan long hem nao hem i naf blong mekem gud wok blong hem. (Nehemaea 6:9-16) Wan man long Gana we nem blong hem Reginald, i talem se: “Taem mi kasem ol trabol, mi prea mo mi harem se mi stap toktok long wan man we i naf blong givhan long mi blong winim ol trabol ya. Mo hem i mekem we mi harem gud mo mi no nid blong fraet.” God i save givhan long yumi taem yumi prea long hem.

Kasem waes blong God.

Ol samting we oli kamaot from sam desisen we yumi mekem, oli save stap longtaem mo oli save afektem yumi mo ol famle blong yumi. ?Olsem wanem yumi save mekem ol waes desisen? Baebol i talem se: “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem, from we fasin blong God, hem i no save tok nogud long man we i askem samting long hem, hem i stap givim ol samting long ol man long gladhat blong hem.” (Jemes 1:5) Sipos yumi prea blong yumi waes, God i save givim tabu spirit blong lidim yumi blong mekem ol desisen we oli waes. I gud blong save se, yumi save askem stret long God blong hem i givim tabu spirit long yumi from we Jisas i talem se, ‘hem i save givim tabu spirit long ol man we oli askem long hem.’—Luk 11:13.

Jisas tu i harem se hem i mas askem long papa blong hem blong givhan long hem taem hem i mas mekem sam desisen we oli impoten. Baebol i talem se taem Jisas i wantem jusum ol 12 man we bambae oli kam ol aposol blong hem, ‘hem i stap wan fulnaet, i stap prea long God.’—Luk 6:12.

Plante man tede oli gat strong tingting, taem oli luk olsem wanem God i ansa long ol prea blong olgeta, blong halpem olgeta blong mekem ol desisen we oli waes, olsem Jisas. Regina, long Filipin i kasem plante trabol. Hem i mas lukaot long famle blong hem afta we man blong hem i ded, hem i lusum wok blong hem, mo hem i faenem i had blong givhan long ol pikinini blong hem. ?Wanem i givhan long hem blong mekem ol waes desisen? Hem i talem se: “Mi prea long Jehova blong hem i givhan long mi.” Wan man long Gana we nem blong hem Kwabena, i talem from wanem hem i prea long God blong i givhan long hem. Hem i se: “Mi lusum gudfala wok blong mi we mi stap kasem bigfala mane from, hemia wok ya blong bildim ol haos.” Bifo we hem i jusum blong mekem wan narafala wok, hem i talem se, “oltaem mi prea long Jehova blong i givhan long mi blong mekem wan gudfala desisen.” Hem i gohed i se, “Mi luksave we Jehova i givhan long mi blong jusum wan gudfala wok. Wok ya i givhan long mi long wok blong Jehova mo long laef blong mi tu.” Taem yu prea from ol samting we oli laenap wetem tingting blong God, bambae yu tu yu save harem se hem i stap lidim yu.

Long haf ya, yumi bin tokbaot sam long ol gudfala samting we prea i save mekem long yu. (Yu luk sam moa eksampol long bokis ya, “Gudfala Samting We i Kamaot From Prea.”) Be blong yu kasem ol gudfala samting ya, fastaem yu mas save God mo samting we hem i wantem. Sipos hemia nao samting we yu wantem, mifala i leftemap tingting blong yu blong askem ol Witnes blong Jehova blong oli givhan long yu blong yu stadi Baebol.a Hemia faswan rod we yu save mekem blong kam klosap moa long man ya we i “stap ansa long ol prea.”—Ol Sam 65:2.