Baebol i Ansa

?Ol dedman bambae oli laef bakegen?

Jehova God hem i Stamba blong laef. (Ol Sam 36:9) Taswe, i stret nomo we hem i mekem ol dedman oli laef bakegen. Baebol i talem se bambae hem i mekem olsem long fiuja. (Ridim Ol Wok 24:15) Be, ?from wanem bambae hem i mekem samting ya?

Taem God i wokem man fastaem, hem i wantem se oli laef olwe long wol ya. (Jenesis 1:31; 2:15-17) Mo tingting ya blong hem long saed blong laef blong man i no jenis. Taswe, taem hem i luk we yumi kasem fulap trabol long laef blong yumi mo yumi ded, hem i harem nogud tumas.—Ridim Job 14:1, 14, 15.

?Olgeta we oli laef bakegen bambae oli stap wea?

?God i mekem man blong i stap long heven? Nogat. God i mekem ol enjel blong oli stap long heven. Hem i mekem ol man blong oli stap long wol. (Jenesis 1:28; Job 38:4, 7) Naoia we yumi save samting ya, i gud yumi tingbaot ol merikel we Jisas i mekem taem hem i stap long wol. Hem i mekem ol dedman oli laef bakegen long wol ya. Taswe, olgeta we bambae oli laef bakegen bambae olgeta tu oli stap long wol ya.—Ridim Jon 5:28, 29; 11:44.

Nating se i olsem, God i jusumaot sam man blong oli go long heven. Bambae olgeta oli gat wan bodi we i spirit. (Luk 12:32; 1 Korin 15:49, 50) Olgeta we oli go long heven bambae oli joen wetem Jisas blong rul olsem ol King, antap long ol man long wol.—Ridim Revelesen 5:9, 10.