Ol Fo Man Long Hos Mo Yu !

Taem oli stap ron, leg blong olgeta i mekem bigfala noes! Baebol i tokbaot stori blong ol fofala hos ya mo ol man we oli sidaon long olgeta olsem se oli ril, mo oli stap resis i kam. Faswan hos i waet, mo man we i sidaon long hem i wan niufala king. Biaen, wan narafala hos i kamtru we i red olsem faea, mo man we sidaon long hem i kam blong karemaot pis long wol. Mo i gat namba tri hos, we i blak we i blak, mo man we i sidaon long hem i holem wan skel we i soemaot se bambae i gat hadtaem blong kasem kakae. Namba fo, i wan hos we i lusum prapa kala blong hem, mo hem i soemaot se bambae i gat ol strong sik mo ol narafala samting we i save kilim man i ded. Man we i sidaon long hem, nem blong hem Ded. Mo Beregraon i kam biaen long hem, mo tufala i kasem paoa blong kilim ol man.—Revelesen 6:1-8.

“Fastaem we mi ridim stori ya, mi mi fraet we. Mi harem se Jajmen Dei i stap kam mo mi no rere nating.”—Crystal

“Mi mi intres tumas long stori blong ol hos ya we kala blong olgeta i defdefren. Mi glad blong save mining blong vison ya.”—Ed

?Yu yu gat sem tingting olsem Crystal long saed blong stori ya? ?O yu gat sem tingting olsem Ed? Nomata wanem tingting we yu gat, plante man oli save stori ya we buk blong Revelesen i tokbaot. Mining blong vison ya i save givhan bigwan long yu. ?Olsem wanem i save givhan? God i promes se bambae yu kasem trufala glad sipos yu ridim, stadi mo folem ol samting we yu lanem long profet tok ya.—Revelesen 1:1-3.

Nating se samfala oli fraet long vison ya, be vison ya i no blong mekem yu yu fraet. Vison ya i mekem se bilif blong plante milian man i kam strong, mo i mekem se oli gat wan hop we i klia gud long saed blong fiuja. !Yu tu yu save gat wan hop olsem! Plis yu ridim ol nekis haf.