“Beswan Presen We Mi Kasem”

Wan gel we i gat 13 yia i talem tok ya taem hem i kasem wan dog olsem wan presen. Wan bisnes woman i talem se, kompiuta we papa blong hem i givim taem hem i stap long hae skul i wan presen we i jenisim laef blong hem. Wan hasban we i jes mared i harem se faswan aniveseri kad we waef blong hem i wokem i wan beswan presen we hem i kasem.

Evri yia, plante man oli spenem taem mo paoa blong lukaot wan “beswan” presen blong givim long wan fren o famle long wan spesel dei. Plante oli wantem harem olsem olgeta we yumi tokbaot finis. ?Yu tu yu wantem givim wan presen we narafala i glad tumas long hem? ?O yu wantem kasem wan presen we yu glad tumas long hem?

Taem man i givim presen hem i glad. I no from we man we i kasem presen i glad, be from we fasin ya blong givim presen i mekem man i glad. Baebol i talem tu se: “Man i harem gud moa taem hem i givim samting i go long narafala, i bitim we hem i kasem samting.” (Ol Wok 20: 35) Be, man we i givim presen i save glad nomo sipos man we i kasem presen i glad long presen we hem i kasem.

?Olsem wanem blong mekem se yu glad taem yu givim presen mo hemia we i kasem presen tu i glad? Mo sipos yu no naf blong givim wan “beswan” presen, ?yu save mekem wanem blong man we yu givim presen long hem i glad?