Yu Save Laef Olwe Long Wol

!HEMIA WAN NAMBAWAN PROMES! God we i wokem yumi i promes se bambae yumi laef olwe, long wol ya. Be plante man oli harem se i had blong bilivim tok ya. Oli talem se ‘Yumi evriwan i mas ded,’ o ‘Yumi bon mo yumi ded, i olsem nao.’ Sam narafala oli ting se oli save kasem laef olwe, be i no long wol ya. Oli talem se bambae oli kasem laef ya nomo afta we oli ded mo oli go long heven. ?Wanem tingting blong yu?

Bifo we yu ansa, i gud yu tingbaot samting we Baebol i talem long ol trifala kwestin ya: ?Olsem wanem bodi blong yumi i soemaot se God i wantem we yumi laef olwe? ?Wanem plan blong God long saed blong wol mo ol man? ?Olsem wanem ded i kasem ol man?

OL MAN OLI SPESEL

Long olgeta laef samting we God i wokem long wol ya, ol man oli spesel. ?From wanem? Baebol i talem se God i wokem man blong i “tekem fasin blong hem, i olsem hem.” (Jenesis 1:26, 27) ?Hemia i minim wanem? I min se man i naf blong gat ol fasin blong God, olsem lav mo stret fasin.

Mo tu, ol man oli save tingting, skelem samting, save ol fasin we i gud mo i nogud, mo kam fren blong God. Taswe yumi save harem gud long ol gudgudfala samting we God i wokem long skae mo long wol, mo tu yumi glad blong droem ol pija, lesin long miusik, mo wokem ol singsing. Antap long ol samting ya, ol man nomo oli save wosipim God. Ol fasin ya oli mekem se ol man oli defren olgeta long ol nara laef samting long wol ya.

Traem tingbaot: ?Sipos God i wokem man blong i gat ol gudfala fasin mo gudhan blong mekem samting, i min se hem i wantem we yumi laef sot taem nomo? Samting we i tru se, man nomo i gat ol fasin ya blong i save harem gud blong laef olwe long wol ya.

PLAN WE GOD I GAT FASTAEM

Samfala oli talem se, God i no mekem man blong i laef olwe long wol. Oli talem se ol man oli laef long wol ya blong smoltaem nomo, olsem wan ples blong traem olgeta, blong luk se hu i naf blong go long heven blong laef olwe wetem God. Sipos i olsem, i min se God nao i stamba blong ol nogud samting we oli hapen long wol. Be samting ya i agensem fasin blong God. Baebol i tokbaot God se: “Hem i stret olwe nomo . . . mo hem i tru. Oltaem, tingting blong hem bambae i stap strong long olgeta. Oltaem hem i stap mekem ol samting we i stret, mo i stap mekem sem mak nomo long olgeta man.”—Dutronome 32:4.

Baebol i talem plan blong God i klia nomo long saed blong wol ya, se: “Heven i ples blong Hae God nomo, be wol ya, hem i givim long man.” (Ol Sam 115:16) God i wokem wol ya olsem wan naesfala hom blong ol man, mo i mekem evri samting we man i nidim blong haremgud mo laef olwe.—Jenesis 2:8, 9.

“Heven i ples blong Hae God nomo, be wol ya, hem i givim long man.”—Ol Sam 115:16

Mo tu, Baebol i talem plan blong God i klia nomo long saed blong ol man. Hem i givim wok ya long fas man mo woman se tufala i mas ‘gat plante pikinini we oli save go stap long olgeta ples long wol, mo mekem evri samting long wol ya oli stap aninit long han blong olgeta, mo bos long ol fis, ol pijin, mo ol narafala samting we i gat laef.’ (Jenesis 1:28) !Hemia wan nambawan blesing blong tufala i lukaotgud long Paradaes mo mekem i kam bigwan moa! Tru ya, Adam mo Iv i save kasem blesing ya, mo tu, olgeta we bambae oli kamaot biaen long tufala oli save laef olwe long wol, be i no long heven.

?FROM WANEM YUMI STAP DED?

?From wanem ol man oli stap ded? Baebol i soemaot se wan spirit pikinini blong God we biaen i kam Devel Setan, i traem spolem plan blong God long Iden. ?Hem i mekem wanem?

Setan i trikim fas papa mo mama blong yumi Adam mo Iv, blong tufala i joen wetem hem blong agensem God. Setan i talem se God i stap blokem tufala, blong tufala i no save samting we i gud mo samting we i nogud. Tufala i jus blong folem Setan mo agensem God. ?Wanem i kamaot? Taem i pas, nao tufala i ded olsem we God i talem. Tufala i lusum janis ya blong laef olwe long Paradaes long wol.—Jenesis 2:17; 3:1-6; 5:5.

Stronghed fasin ya blong Adam mo Iv i mekem se trabol i kasem olgeta man long wol. Baebol i talem se: “Wan man [Adam] nomo i mekem se sin i kam long wol, mo ded i kamaot from sin. Mo ded i kasem olgeta man.” (Rom 5:12) Yumi ded from we yumi kasem sin blong Adam mo Iv, be i no from we i stap long ‘plan’ blong God.

YU SAVE LAEF OLWE LONG WOL

Samting we i hapen long Iden i no blokem plan we God i gat long wol ya mo ol man. From we God i gat lav mo stret fasin, hem i mekem rod blong ol man oli save kam fri long sin mo ded. Aposol Pol i eksplenem se: “Pei blong sin, hemia ded. Be presen we God i givim tru long Masta blong yumi Kraes Jisas, hemia laef we i no save finis.” (Rom 6:23) God i lavem ol man taswe “hem i givim stret Pikinini blong hem [Jisas], wan nomo we hem i gat, blong olgeta man we oli soemaot se oli bilif long hem, oli no ded be oli kasem laef we i no save finis.” (Jon 3:16) Jisas i rere blong givim laef blong hem olsem wan ransom sakrefaes blong givimbak long ol man evri samting we Adam i lusum.a

I no longtaem, promes blong God long saed blong Paradaes bambae i kamtru. Yu tu yu save kasem blesing ya sipos yu obei long tok blong Jisas se: “Yufala i mas pas long get ya we i smol, from we get we i bigwan mo rod we i isi, i lidim man i go long ded, mo plante man oli stap folem rod ya. Be get ya we i smol mo rod we i strong, i lidim man i go long laef, mo smol man nomo oli faenem.” (Matiu 7:13, 14) Yes, fiuja blong yu hem i jus blong yu. ?Bambae yu yu mekem wanem?