?Hu Nao i Stap Mekem Man i Safa?

Sipos i no God we i mekem man i safa, ?from wanem plante man oli no gat kakae, oli pua, mo i gat ol faet, sik, mo disasta? Baebol i soemaot tri samting we i stap mekem ol man oli safa:

1. Ol Man Oli Tingbaot Olgeta Nomo, Oli Wantem Tumas Samting, Mo Oli No Laekem Narafala. “Sam man oli gat paoa, mo ol narafala man oli stap aninit long olgeta, oli stap harem nogud.” (Prija 8:9) Sam man oli mekem ol narafala oli safa mo mekem i nogud long olgeta, from we oli tingbaot olgeta nomo, mo oli laekem blong spolem narafala.

2. Wan Trabol We Yumi No Tingbaot i Hapen. Plante taem yumi safa, from we “samting we yumi no tingbaot i save kamaot long yumi enitaem nomo.” (Prija 9:11, NW) Maet wan man i sek se wan aksiden i hapen long hem, o maet hem i no lukaot gud, o i mekem wan mastik.

3. Rabis Rula Blong Wol Ya. Baebol i talemaot hu i stap mekem ol man oli safa, i se: “Fulwol i stap long paoa blong Man ya we i rabis.” (1 Jon 5:19) “Man ya we i rabis” hemia Setan. Fastaem hem i wan enjel blong God be “hem i gowe long trutok.” (Jon 8:44) Sam enjel oli joenem Setan mo oli rebel agensem God blong kasem samting we olgeta nomo oli wantem, nao oli kam ol rabis enjel. (Jenesis 6:1-5) Mo oli gohed yet blong mekem ol man oli safa. Naoia Setan i kros tumas mo i gat ‘trabol long graon’ from we “hem i stap lidim olgeta man long wol oli go krangke.” (Revelesen 12:9, 12) I tru nomo se, Setan i wan rabis rula. Hem i harem gud nomo blong mekem man i safa. I no God we i stap mekem ol man i safa, be Setan nomo.

TINGBAOT: Wan man we i wantem mekem ol gudfala man oli safa, hem i rabis olgeta. Hem i no gat lav. Be Baebol i talem se: “God hem i lav.” (1 Jon 4:8) Ol fasin blong hem oli stret gud mo hem i gat lav. “God i no save mekem samting nogud. !God ya i gat olgeta paoa, mo hem i no save mekem samting we i no stret!”—Job 34:10, NW.

Samtaem maet yu stap tingting se: ‘?From wanem God i letem Setan i gohed blong rul?’ Yumi tokbaot finis se God i agensem ol nogud fasin, mo i no laekem blong luk we ol man oli stap safa. Mo tu, Baebol i talem se: “Yufala i mas lego ol wari blong yufala long hem, from we hem i stap tingbaot yufala.” (1 Pita 5:7) Hem i lavem yumi mo hem i gat paoa blong finisim ol samting we oli stap mekem yumi safa mo ol fasin we oli no stret. Bambae yumi tokbaot samting ya long nekis pej.a