‘Go Pulum Ol Man Oli Kam Disaepol’

1-2. (1) Folem Matiu 28:18-20, ?wanem mak blong Kristin kongregesen? (2) ?Wanem ol kwestin we bambae yumi tokbaot long stadi ya?

AFTA we Jisas i laef bakegen, hem i talem long ol aposol blong oli mitim hem long bigfala hil long Galili. I sua se ol aposol oli harem gud tumas. (Mat. 28:16) Maet hemia taem ya we “hem i kamtru long bitim faef handred brata long semtaem nomo.” (1 Kor. 15:6) ?From wanem Jisas i singaotem olgeta blong oli kam long miting ya? Blong givim wan gudfala wok long olgeta, hem i se: “Yufala i mas go long ol man blong olgeta neson, yufala i pulum olgeta oli kam disaepol blong mi.”—Ridim Matiu 28:18-20.

² Ol disaepol we oli stap long taem ya mo oli harem ol tok blong Jisas, oli kam haf blong faswan Kristin kongregesen. Mo mak blong kongregesen ya i blong pulum moa man oli kam disaepol blong Kraes.b Tede i gat plante taosen Kristin kongregesen raon long wol, mo oli gat semfala mak olsem faswan Kristin kongregesen. Taswe long stadi ya bambae yumi tokbaot fo kwestin: ?From wanem wok ya i impoten? ?Yumi mas mekem wanem blong pulum ol man oli kam disaepol? ?Evri Kristin i save mekem wok ya? ?Mo from wanem yumi mas gat longfala tingting, taem yumi mekem wok ya?

?FROM WANEM WOK YA I IMPOTEN?

3. Folem Jon 14:6 mo 17:3, ?from wanem wok blong pulum man i kam disaepol i impoten?

³ ?From wanem wok blong pulum man i kam disaepol i impoten? From we ol disaepol blong Kraes nomo oli save fren wetem God. Mo tu, ol man we oli folem Kraes oli gat wan gudfala laef naoia, mo bambae oli kasem laef ya we i no save finis long fiuja. (Ridim Jon 14:6; 17:3.) Yes, Jisas i trastem yumi mo i givim impoten wok ya long yumi, be yumi no mekem wok ya yumi nomo. Aposol Pol i tokbaot hem wan mo olgeta we oli prij wetem hem se: “[Mifala] i joen wetem God blong mekem wok.” (1 Kor. 3:9) !Yumi haremgud tumas se Jehova mo Jisas oli givim wok ya long yumi nating se yumi sinman!

4. ?Yumi lanem wanem long stori blong Ivan mo Matilda?

⁴ Yumi kasem plante blesing taem yumi mekem wok blong pulum man i kam disaepol. Traem tingbaot Ivan mo waef blong hem, Matilda, long Kolombia. Tufala i prij long wan yangfala, nem blong hem Davier. Hem i talem long tufala se: “Mi wantem mekem sam jenisim long laef blong mi, be mi no naf.” Davier i wan man blong boksing, i tekem drag, i dring bitim mak, mo i stap wetem gelfren blong hem, Erika. Ivan i talem se: “Mitufala i stap go mekem stadi blong hem long wan vilej we i longwe. Mo mitufala yusum baskel nomo blong ron long rod we i sofmad blong go luk hem. Taem Erika i luk se Davier i mekem sam jenis long laef blong hem, hem tu i joen long stadi.” Davier i no moa tekem drag, dring, mo boksing mo hem i maredem Erika. Matilda i talem se: “Taem Davier mo Erika i baptaes long 2016, mitufala i tingbaot toktok we Davier i bin talem se, ‘Mi wantem mekem sam jenis, be mi no naf.’ Hemia i mekem mitufala i krae.” Yumi haremgud tumas taem yumi halpem ol man blong oli kam disaepol blong Kraes.

?YUMI MAS MEKEM WANEM BLONG PULUM MAN I KAM DISAEPOL?

5. ?Wanem faswan samting we yumi save mekem blong pulum man i kam disaepol?

⁵ Faswan rod blong pulum ol man oli kam disaepol hemia blong “faenem” ol man we oli wantem save Jehova. (Mat. 10:11) Taem yumi tokbaot Jehova long ol man we yumi mitim olgeta, yumi pruvum se yumi ol Witnes blong Jehova. Mo taem yumi obei long tok blong Jisas blong go prij, yumi pruvum se yumi ol tru Kristin.

6. ?Yumi save mekem wanem blong ol man oli lesin long samting we yumi talem?

⁶ Sam man oli wantem tumas blong lanem ol trutok blong Baebol, be maet plante man we yumi mitim olgeta oli no intres. Taswe yumi mas traehad blong pulum tingting blong olgeta blong oli wantem save moa. Mo blong mekem olsem, yumi mas rere gud fastaem. I gud yu tingbaot sam topik we i save pulum intres blong ol man we bambae yu mitim olgeta. Biaen yu tingbaot olsem wanem yu save yusum topik ya blong statem storian.

7. ?Olsem wanem yu save statem wan storian, mo from wanem i impoten blong lesin mo respektem man?

⁷ Eksampol, maet yu save askem long man blong haos se: “?Mi wantem save tingting blong yu long saed blong wan kwestin? Long olgeta ples long wol, ol man oli stap kasem ol semfala trabol. ?Yu ting se yumi nidim wan gudfala gavman we i save stretem olgeta trabol blong wol ya?” Biaen yu tokbaot Daniel 2:44. O maet yu save askem long neba blong yu se: ?Wanem beswan rod blong tijim pikinini blong i gat ol gudfala fasin? Mi wantem save tingting blong yu.” Biaen yu tokbaot Dutronome 6:6, 7. Nomata wanem topik yu jusum blong statem wan storian, yu mas tingbaot man we bambae yu prij long hem. Tingbaot olsem wanem save ya bambae i givhan long hem, taem hem i lanem samting we Baebol i rili tijim. Taem yu toktok long olgeta, i gud yu lesin long olgeta mo yu respektem tingting blong olgeta. Long rod ya, bambae yu kasem save long tingting blong olgeta, mo bambae oli glad moa blong lesin.

8. ?From wanem yumi mas traehad blong gobak visitim ol man?

⁸ Bifo we wan man i wantem blong stadi Baebol, maet yu mas go oltaem blong visitim hem. ?From wanem? From we maet oli no stap taem yumi gobak blong luk olgeta. Mo tu, maet yu mas gobak plante taem blong man blong haos i harem se hem i wantem stadi Baebol. Yumi mas tingbaot se wan tri bambae i gru gud sipos yumi wotarem oltaem. Long sem fasin, lav blong wan man long Jehova mo Jisas bambae i gru sipos yumi tokbaot Baebol oltaem wetem hem.

?EVRI KRISTIN I SAVE MEKEM WOK YA?

9-10. ?Olsem wanem evri Kristin oli joen long wok ya blong faenem ol man we oli wantem save trutok?

⁹ Evri Kristin oli joen long wok ya blong halpem ol man we oli wantem save trutok. Wok ya i sem mak long wok blong lukaotem wan pikinini we i lus. ?Hemia i minim wanem? Traem tingbaot stori blong wan smol boe we i gat tri yia we i lus. I gat samwe long 500 man we oli stap lukaotem hem. Ale, samwe long 20 aoa biaen, afta we pikinini ya i lus, wan man we i joen long wok ya i faenem smol boe ya long wan plantesen blong kon. Be man we i faenem smol boe ya i no wantem se ol narafala oli leftemap hem, nao hem i se: “From traehad blong yumi evriwan, hemia i mekem se yumi faenem pikinini ya.”

¹⁰ Plante man tede oli olsem pikinini ya. Oli harem se oli lus. Oli no gat hop, mo oli wantem se narafala i halpem olgeta. (Efes. 2:12) Be yumi ol Witnes blong Jehova we yumi moa long 8 milian, yumi joen long wok ya blong lukaotem ol man we oli wantem save trutok. Maet bambae yu no faenem wan man we i glad blong stadi Baebol wetem yu. Nating se i olsem, maet ol narafala pablisa we oli prij long semfala teritori ya, oli faenem wan man we i wantem save trutok blong Baebol. Taem wan brata o wan sista i faenem wan man we biaen i kam disaepol blong Kraes, yumi evriwan we i joen long wok ya, yumi glad.

11. ?Wanem sam narafala rod we yu save mekem blong pulum man i kam disaepol?

¹¹ Nating se yu no gat wan Baebol stadi, be yu save givhan blong pulum ol man oli kam disaepol long sam narafala rod. Eksampol, taem wan niuwan i kam long miting, yu save welkamem hem mo halpem hem. Taem yu mekem olsem, yu stap pruvum long hem se lav nao i makemaot yumi olsem ol tru kristin. (Jon 13:34, 35) Ol ansa we yu givim long ol miting, nating se oli sot, oli save halpem ol niuwan blong oli no fraet blong talemaot bilif blong olgeta. Mo tu, yu save prij wetem wan niufala pablisa mo halpem hem blong i yusum Baebol blong tijim ol man. Long rod ya, yu stap halpem hem blong i folem fasin blong Kraes.—Luk 10:25-28.

12. ?Yumi nidim blong gat bigfala save blong pulum ol man oli kam disaepol? Yu eksplenem.

¹² Yumi no nid blong gat bigfala save blong pulum ol narafala oli kam disaepol. ?From wanem? Traem tingbaot Faustina we i laef long Bolivia. Hem i no save rid taem hem i mitim ol Witnes blong Jehova. Be naoia, hem i save rid smol. Mo tu, hem i baptaes finis mo hem i laekem blong tijim trutok blong Baebol long ol narafala. Nating se Faustina i no save rid gud yet, be evri wik hem i stap mekem faef Baebol stadi. Mo hem i halpem 6 man finis we biaen oli tekem baptaes.—Luk 10:21.

13. Nating se yumi bisi, ?yumi save kasem wanem blesing taem yumi pulum man i kam disaepol?

¹³ Nating se plante Kristin oli bisi, be yet, oli traehad blong faenem taem blong mekem ol Baebol stadi, mo hemia i mekem olgeta oli glad tumas. Traem tingbaot Melanie we i wan singel mama long Alaska, mo hem i gat wan smol gel blong 8 yia. Hem i wok fultaem mo i mas lukaot long papa blong hem we i gat kansa. Melanie i laef long wan taon we i longwe, mo hem wan nomo i Witnes. Oltaem hem i prea blong kasem paoa blong hem i save gohed blong prij nating se ples i kolkol, from we hem i wantem faenem wan Baebol stadi. Nao hem i faenem Sera, we i glad blong save se God i gat wan nem. Smoltaem biaen, Sera i glad blong stadi Baebol. Melanie i talem se: “Long Fraede aftenun, mi harem se mi taed, be mi mo gel blong mi i go mekem Baebol stadi ya, mo hemia i mekem mitufala i haremgud. Mitufala i glad blong mekem risej long ol kwestin we Sera i stap askem, mo mitufala i glad blong luk we hem i wantem kam fren blong Jehova.” Sera i stanap strong taem hem i kasem fasin agens, hem i lego jos blong hem, mo i tekem baptaes.

YUMI MAS GAT LONGFALA TINGTING

14. (1) ?Olsem wanem wok blong pulum man i kam disaepol i sem mak long wok blong pulum fis? (2) ?2 Timoti 4:1, 2 i givhan long yu olsem wanem?

¹⁴ Yu mas gohed nomo blong lukaotem ol man we oli wantem kam disaepol, nating se yu no faenem wan yet. Jisas i talem se wok blong pulum man i kam disaepol i sem mak long wok ya blong pulum fis. Ol man blong pulum fis oli save spenem plante aoa bifo we oli kasem wan fis. Plante taem, oli wok long eli moning o let long naet, mo samtaem oli mas go longwe long dip solwota blong kasem fis. (Luk 5:5) Long sem fasin, sam Kristin oli spenem plante aoa blong “pulum fis” long ol defren taem mo long ol defren ples. ?From wanem? Blong oli save kasem plante moa man. Plante taem olgeta we oli traehad blong kasem ol man, oli faenem olgeta we oli glad blong lesin long gud nius. ?Yu yu traem blong prij long wan taem o long wan ples we yu save kasem plante moa man?—Ridim 2 Timoti 4:1, 2.

15. ?From wanem yumi nidim longfala tingting taem yumi mekem Baebol stadi?

¹⁵ ?From wanem yumi nidim longfala tingting taem yumi mekem Baebol stadi? Wan risen hemia blong halpem Baebol stadi blong i lanem mo i laekem ol tijing blong Baebol. Mo tu, yumi mas halpem hem blong i kasemsave mo i lavem Jehova. Yumi no mas tijim nomo ol samting we Jisas i talem long ol disaepol blong hem, be yumi mas halpem hem blong i folem ol tok ya long laef blong hem. Yumi mas gat longfala tingting blong givhan long hem, taem hem i stap traehad blong folem ol stamba trutok we hem i lanem long Baebol. Samfala oli kwik blong jenisim tingting mo fasin blong olgeta. Be samfala oli tekem longtaem moa blong oli jenis.

16. ?Yu yu lanem wanem long stori blong Raul?

¹⁶ Stori blong wan misinari long Peru i soemaot se gudfala frut i save kamaot taem yumi gat longfala tingting. Hem i talem se: “Mi stadi long tu buk wetem Raul. Be hem i gat sam bigfala problem long laef blong hem. Hem i gat trabol long mared laef blong hem, hem i stap swea, mo ol pikinini blong hem oli no respektem hem. Be hem i kam oltaem long ol miting, taswe mi gohed blong visitim hem blong halpem hem mo famle blong hem. Tri yia biaen, hem i tekem baptaes.”

17. ?Bambae yumi tokbaot wanem long nekis stadi?

¹⁷ Jisas i talem se yumi “mas go . . . pulum olgeta oli kam disaepol.” Be blong mekem wok ya, plante taem yumi mas toktok wetem ol man we oli no gat sem tingting olsem yumi, oli intres long jos o oli no bilif long God. Taswe long nekis stadi, bambae yumi tokbaot olsem wanem yumi save talemaot gud nius long ol man ya.