STADI 46
?Yu Stap Lukaot Gud Long “Bigfala Sil” Blong Bilif?
“Bilif blong yufala i mas olsem wan bigfala sil we yufala i tekem.”—EFES. 6:16.
SINGSING 119 Yumi Mas Bilif Strong
BIGFALA TINGTINGa
1-2. (1) Folem Efesas 6:16, ?from wanem yu mas gat ‘bilif we i olsem wan bigfala sil’? (2) ?Wanem tufala kwestin we bambae yumi ansarem?
?YU YU gat ‘bilif we i olsem wan bigfala sil’? (Ridim Efesas 6:16.) I sua se yu gat. Olsem wan bigfala sil we i blokem bighaf blong bodi, bilif blong yu i blokem ol rabis fasin blong wol, olsem ol doti fasin blong seks, faet, mo ol narafala nogud fasin.
2 Be yumi stap laef long “ol las dei,” mo ol samting ya bambae i gohed blong traem bilif blong yumi. (2 Tim. 3:1) ?Olsem wanem yu save jekem gud sil blong bilif blong yu blong meksua se i stap strong? ?Mo olsem wanem yu save holemtaet sil blong yu? Bambae yumi tokbaot ansa blong tufala kwestin ya.
JEKEM GUD SIL BLONG YU
Afta we wan soldia i faet, hem i jekem mo fiksimap sil blong hem (Haf 3)
3. ?Ol soldia bifo oli mekem wanem long sil blong olgeta? ?From wanem?
3 Long taem bifo, ol soldia oli yusum ol sil we oli kavremap long skin blong buluk. Oli rabem oel long skin ya blong mekem i stap gud, mo oli putum oel tu long ol haf blong sil we oli wokem long aean, blong oli no rosta. Sipos wan soldia i luk se i gat wan samting i rong long sil blong hem, hem i hareap blong fiksimap, blong hem i rere blong yusum bakegen blong mekem faet. ?Olsem wanem pijatok ya i laenap wetem bilif blong yu?
4. ?From wanem yu mas jekem gud sil blong bilif blong yu, mo olsem wanem blong jekem?
4 Olsem ol soldia bifo, yu mas jekem gud mo fiksimap sil blong bilif blong yu, blong rere oltaem blong faet. Yumi ol Kristin yumi stap mekem wan faet, mo sam long ol enemi blong yumi, hemia ol rabis spirit. (Efes. 6:10-12) Yu nomo yu mas lukaot gud long bilif blong yu we i olsem wan sil, i no gat wan narafala man i save mekem samting ya. ?Olsem wanem yu save sua se yu rere blong fesem ol samting we i traem yu? Fastaem yu mas prea long God blong i givhan long yu. Afta, yu mas ridim Baebol blong traem kasem save tingting we God i gat long yu. (Hib. 4:12) Baebol i talem se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu.” (Prov. 3:5, 6) Traem tingbaot sam desisen we yu mekem long ol wik we i pas. ?Yu fesem wan bigfala trabol long saed blong mane? ?Yu yu tingbaot promes blong Jehova long Hibrus 13:5 we i se: “Bambae mi mi neva lego yu, mo bambae mi neva livim yu yu stap yu wan”? ?Promes ya i mekem tingting blong yu i strong se Jehova bambae i givhan long yu? Sipos yes, hemia i soemaot se yu stap lukaot gud long sil blong yu.
5. ?Maet yu faenemaot wanem taem yu jekem bilif blong yu?
5 Maet yu sapraes long samting we yu faenemaot taem yu jekem gud bilif blong yu. Maet yu luk se sam samting i stap mekem bilif blong yu i slak longtaem finis. Hemia ol samting olsem wari bitim mak, ol giaman toktok, mo tingting we i foldaon. Sipos i olsem, ?yu save mekem wanem blong blokem ol samting ya, bifo we oli spolem bilif blong yu fulwan?
BLOKEM WARI, OL GIAMAN TOKTOK, MO TINGTING WE I FOLDAON
6. ?Wanem sam samting we i stret blong wari from?
6 I gat sam samting we i stret blong wari from, olsem, mekem Jehova mo Jisas i glad. (1 Kor. 7:32) Sipos yu mekem wan bigfala sin, yu wari se yu no moa fren gud wetem Jehova, mo yu wantem fren bakegen wetem hem. (Sam 38:18, NW) Mo tu, yu wari long hasban o waef blong yu, yu wantem mekem hem i glad, mo yu wari long ol famle mo ol brata mo sista from we yu wantem lukaot gud long olgeta.—1 Kor. 7:33; 2 Kor. 11:28.
7. Folem Ol Proveb 29:25, ?yu mas mekem wanem blong yu no fraet long ol man?
7 Be sipos yu wari bitim mak, hemia i save spolem bilif blong yu. Maet yu stap wari oltaem se yu no gat naf kakae mo klos. (Mat. 6:31, 32) Blong mekem wari ya i godaon, yu traehad blong kasem plante samting. Be yu save kam olsem we yu laekem mane tumas. Nao bilif blong yu i save kam slak, mo bambae yu no moa fren gud wetem Jehova. (Mak 4:19; 1 Tim. 6:10) O maet yu wari bitim mak long tingting blong ol narafala man, from we yu wantem mekem olgeta oli glad. Ating yu fraet se ol man bambae oli jikim yu o mekem i nogud long yu, i bitim we yu fraet blong mekem Jehova i harem nogud. Blong blokem denja ya, i gud yu plis long Jehova blong i givim bilif mo strong tingting we yu nidim, blong yu no fraet long ol man.—Ridim Ol Proveb 29:25; Luk 17:5.
(Haf 8)b
8. Taem yu harem ol giaman toktok, ?yu mas mekem wanem?
8 “Papa blong ol giaman toktok,” Setan, i yusum ol man blong hem blong talemaot ol giaman toktok long saed blong Jehova mo ol brata mo sista. (Jon 8:44) I gat ol man blong apostasi we oli raetem ol giaman stori long saed blong oganaesesen blong Jehova long niuspepa o websaet, mo oli talemaot long TV o radio. Ol giaman toktok ya oli olsem ‘ol ara we faea i laet long olgeta.’ (Efes. 6:16) Sipos wan man i stap talem ol giaman toktok ya long yu, ?bambae yu mekem wanem? !Yu no mas lesin! ?From wanem? From we yu gat strong bilif long Jehova mo yu trastem ol brata mo sista. Taswe, yu no mas toktok nating long ol man blong apostasi. Yu no letem wan samting i pulum yu blong raorao wetem olgeta, mo yu no traem save moa long ol tingting blong olgeta.
9. Taem tingting i foldaon, ?wanem i save hapen?
9 Tingting we i foldaon i save mekem bilif blong yumi i slak. I tru, yumi no save ronwe long ol problem blong yumi, mo i no stret tu blong traem mekem olsem. Be samtaem tingting blong yumi i save foldaon. Long taem olsem, yumi no mas tingting tumas long ol problem blong yumi. Sipos yumi tingting tumas long olgeta, maet yumi fogetem nambawan hop we Jehova i givim long yumi. (Rev. 21:3, 4) Taem tingting i foldaon, yumi lusum paoa, mo yumi save lego wok blong Jehova tu. (Prov. 24:10) Be yumi no mas letem samting ya i hapen long yumi.
10. ?Yumi lanem wanem long leta we wan sista i raetem?
10 Wan sista long Amerika i stap lukaot long hasban blong hem we i sik tumas. Sista ya i gohed blong holem strong bilif, mo i raetem wan leta i go long hedkwota, i se: “Samtaem mitufala i wari tumas mo tingting i foldaon, be hop blong mitufala i strong. Mi mi glad tumas long ol save we Jehova i stap givim blong mekem bilif blong yumi i strong mo blong leftemap tingting. Mitufala i nidim tumas ol advaes ya blong leftemap tingting. Hemia i givhan long mitufala blong gohed long wok blong Jehova, mo blong stanap strong taem Setan i traem slakem mitufala.” Ol tok blong sista ya i soemaot se yumi save winim tingting we i foldaon. ?Olsem wanem blong winim? Yumi mas tingbaot ol trabol we yumi kasem olsem samting we Setan i yusum blong traem yumi. Yumi mas trastem Jehova se bambae hem i leftemap tingting blong yumi. Mo yumi mas glad long ol save we hem i givim olsem kakae.
?Yu Stap Lukaot Gud Long “Bigfala Sil” Blong Bilif?”? (Haf 11)c
11. ?Wanem ol kwestin we yu save askem blong jekem bilif blong yu?
11 ?Yu yu luk se yu mas mekem sil blong bilif blong yu i kam strong moa? Long ol manis we oli pas, ?wari blong yu i godaon? ?Yu blokem tingting ya blong wantem lesin mo rao long ol man blong apostasi, we oli talemaot ol giaman toktok? ?Yu winim tingting we i foldaon? Sipos yes, bilif blong yu i strong. Be yu mas gohed blong lukaot gud, from we Setan i gat ol narafala tul we i save yusum agensem yumi. Bambae yumi tokbaot wan long olgeta.
BLOKEM FASIN BLONG RONEM OL SAS SAMTING
12. ?Wanem i save hapen sipos yu ronem ol sas samting?
12 Sipos yu ronem ol sas samting, bambae yu no moa tingbaot wok blong Jehova nao bilif i save kam slak. Aposol Pol i talem se: “Sipos wan soldia i wantem se man we i putum hem long wok ya i glad, hem i no save mekem ol prapa bisnes blong hem.” (2 Tim. 2:4) Ol soldia blong Rom oli no mas mekem wan narafala wok. ?Sipos wan soldia i no obei long rul ya, wanem bambae i hapen?
13. ?From wanem wan soldia i no save mekem wan narafala wok?
13 Traem tingbaot: Wan grup blong ol soldia oli tren ful moning blong yusum naef blong faet blong olgeta, be i gat wan soldia i no stap. Soldia ya i stap salem kakae long maket. Long naet, ol soldia oli jekem ol klos blong faet mo sil blong olgeta, mo oli sapenem naef blong faet. Be soldia we i salem kakae long maket, i stap rerem ol kakae blong nekis dei. Long nekis moning, oli sek se enemi i kam agensem olgeta. ?Hu ol soldia we oli rere blong faet mo oli mekem komanda blong olgeta i glad? ?Mo yu bambae yu wantem stap klosap long weswan soldia? ?Hemia we i rere blong faet o hemia we i stap salem kakae long maket?
14. From we yumi soldia blong Kraes, ?wanem i moa impoten?
14 Olsem ol gudfala soldia, yumi no letem eni samting i pulum tingting blong yumi i gowe long impoten samting long laef blong yumi, hemia blong mekem tufala Komanda blong yumi, Jehova mo Jisas, i glad. Yumi luk se hemia i gud moa i bitim eni samting we yumi save kasem long wol blong Setan. Yumi meksua se yumi gat taem mo paoa blong mekem wok blong Jehova, mo blong lukaot gud long sil blong bilif mo ol narafala klos blong faet.
15. ?Pol i givim wanem woning, mo from wanem?
15 !Yumi mas lukaot gud oltaem! ?From wanem? Aposol Pol i givim woning se taem yumi “stap traehad blong kam rijman,” samting ya i save ‘lidim yumi i gowe long bilif.’ (1 Tim. 6:9, 10) Tok ya ‘lidim yumi i gowe,’ i soemaot se ol sas samting we yumi no nidim oli save pulum tingting blong yumi i gowe long Jehova. Nao yumi stat blong wantem ‘ol krangke samting we i save spolem yumi.’ Taswe yumi mas luksave se Setan i stap yusum tingting ya blong wantem ol sas samting, olsem wan tul blong spolem bilif blong yumi.
16. ?Wanem ol kwestin we stori long Mak 10:17-22 i mas pulum yu blong tingbaot?
16 ?Olsem wanem sipos yu gat mane? ?I rong blong pem plante samting we yu no rili nidim? Maet i no rong. Be traem tingting long ol kwestin ya: ?Yu yu gat taem mo paoa blong yusum mo lukaot gud long ol samting we yu pem? ?Yu ting se yu save stat blong laekem tumas ol samting ya? ?Yu save kam olsem yangfala man we i laekem tumas ol sas samting, nao i no obei taem Jisas i singaot hem blong i biaenem hem? (Ridim Mak 10:17-22.) !I moa gud we laef blong yu i no fasfas, nao yu save yusum taem mo paoa blong yu blong mekem wok blong God!
HOLEMTAET SIL BLONG BILIF
17. ?Yu no mas fogetem wanem?
17 Yu no mas fogetem se yu stap long wan faet, mo evri dei yu mas rere blong faet. (Rev. 12:17) Ol brata mo sista oli no save karem sil blong yu. Yu wan yu mas holemtaet sil blong bilif.
18. ?From wanem ol soldia bifo oli holemtaet ol sil blong olgeta?
18 Ol soldia bifo oli kasem ona taem oli no fraet blong mekem faet. Be bambae oli sem sipos oli kambak long faet we oli no moa karem sil blong olgeta. Tacitus, wan man Rom we i raetem buk blong histri, i talem se: “Sipos wan soldia i lusum sil blong hem, bambae hemia i wan bigfala sem.” Taswe ol soldia oli meksua se oli holemtaet ol sil blong olgeta.
Blong holemtaet bigfala sil blong bilif, sista ya i prea mo i ridim Baebol, i go oltaem long ol miting, mo i joen fulwan long wok blong prij (Haf 19)
19. ?Olsem wanem blong holemtaet bigfala sil blong bilif?
19 Yumi holemtaet bigfala sil blong bilif taem yumi go long ol miting mo tokbaot nem blong Jehova mo Kingdom blong hem long ol narafala. (Hib. 10:23-25) Mo tu, yumi prea mo ridim Baebol evri dei, yumi folem advaes blong hem, mo yumi letem hem i lidim yumi long evri samting we yumi mekem. (2 Tim. 3:16, 17) Sipos yumi mekem olsem, eni tul we Setan i yusum agensem yumi bambae i no spolem yumi blong olwe. (Aes. 54:17) ‘Bigfala sil blong bilif’ bambae i protektem yumi. Bambae yumi stanap strong, mo wok gud wetem ol brata mo sista. Yumi naf blong winim faet blong yumi evri dei, be i no hemia nomo, yumi save gat bigfala blesing tu blong stap long saed blong Jisas, taem hem i winim faet agensem Setan mo ol man blong hem.—Rev. 17:14; 20:10.
SINGSING 118 ‘Plis Yu Mekem Bilif Blong Mi i Strong Moa’
a Ol soldia oli dipen long sil blong olgeta blong blokem ol samting we i save givim kil. Bilif blong yumi i olsem wan sil. Taswe, yumi mas lukaot gud long bilif blong yumi, blong i stap strong. Stadi ya i tokbaot samting we yumi save mekem, blong bilif blong yumi i strong oltaem olsem wan “bigfala sil.”
b PIJA: Taem wan nius i kamaot long TV long saed blong ol man blong apostasi we oli talem ol giaman toktok agensem ol Witnes, wan famle we i Witnes i hareap blong ofem TV.
c PIJA: Biaen, long famle wosip, Papa i yusum sam vas blong Baebol blong mekem bilif blong famle i strong.