Yangfala, Yufala i Mas Givim Wan Gudfala Wetnes Long Skul
1 Sipos yumi mekem wok blong Jeova taem yumi yangfala mo yumi gat bigfala tankyu from ol nambawan promes blong hem, yumi save haremgud tumas. (Ekles. 12:1) Ol yangfala, yufala i gat bigfala jans blong talemaot trutok long ol fren mo ol tija blong yufala long skul. Skul i wan ples blong prij we i hadwok blong ol bigman blong oli go talemaot gud nyus long hem. ?Olsem wanem long yufala, yangfala? ?Yufala i yusum ol kaen rod blong prij long skul?
2 ?From wanem samfala oli ting se i hadwok blong talemaot trutok long skul? ?Ating samfala oli fraet se ol fren blong olgeta oli jikim olgeta sipos olgeta oli tokbaot God? (Ridim Mak 8:38) Maet yu yu fraet olsem taem yu stat blong prij. Be sipos long tingting blong yufala i klia nomo se ol narafala yangfala oli nidim trutok mo from we yufala i pablisa yufala mas talemaot mesej blong Kingdom long ol narafala, bambae yufala i tekem evri jans blong talemaot gud nyus ya blong Kraes long ol narafala. (Mat. 9:36-38; Luk 12:8,9) Sipos yufala i wantem givim wan gudfala wetnes long skul, i impoten tumas we yufala i rere gud mo yufala i mekem wan plan.
?Yufala i Save Mekem Wanem?
3 Evri dei, taem i gat spel long 15 menet, wan yangfala gel i stap ridim My Book of Bible Stories. Wan dei, wan fren blong hem i askem long hem wanem buk hem i stap ridim, nao yangfala Kristin ya i singaot hem i kam sidaon mo tufala i ridim wan store blong buk ya tugeta. Biaen, fren blong smol gel ya i no wet blong fren blong hem i talem se tufala i stadi, be hem nomo i kam mo tufala i ridim wan nyufala store bakegen. Yangfala gel ya i tokbaot ol samting we hem i lanem long mama blong hem mo woman ya tu i tekem disisin blong stadi long Baebol, mo hem i go long ol miting long haos-Kingdom wetem gel blong hem.
4 ?From wanem yufala i no tokbaot My Book of Bible Stories long ol fren blong yufala? Maet yufala i save talem se: “Buk ya i soemaot se God i lukaotgud long ol man blong hem. [Openem buk ya long store namba 79.] Jeova i protektem Daniel taem hem i stap long hol blong ol laeon. ?Taswe, yu ting se i no longtaem God bambae i finisim ol nogud fasin we i stap long wol?” Lego man ya i ansa, nao biaen yufala i save soemaot store 104. Store ya i mekem i klia se i no longtaem Jeova bambae i finisim ol nogud fasin mo hem i save sevem ol man blong hem.
5 Yufala i save traem putum buk Creation long tebel blong yufala blong ol narafala oli luk buk ya. No maet taem yufala i gat jans, yufala i save openem buk ya long pej 83 mo yufala i save askem long wan fren no maet long tija blong yufala se: “?Yu yu ting se ol bubu blong yumi oli olsem?” Lego olgeta oli ansa ale yufala i save tokbaot ol poen we i stap long pej 89, haf 19 mo 20 blong buk Creation. Sipos yufala i soemaot lis we i stap long pej 5 blong buk, maet samfala bambae oli intres long sam poen we i stap long buk ya. Yufala i mas lesin gud long ol ansa we bambae oli talem from we long fasin ya, bambae yufala i save yusum sam moa gudfala poen i stap long buk ya. No maet yufala i save soemaot rod blong stadi long buk ya. Talem long hem se buk ya i gud blong stadi from we i gat ol haf blong ridim mo i gat kwestin long en blong evri pej.
6 Wan yangfala pablisa we i go long ‘Lycée’ i putum mak blong statem wan Baebol-stadi long ples ya. Wan narafala gel we i stap skul wetem gel ya i gat tumas trabol wetem papa mama blong hem. Ale gel ya we i trabol tumas i tokbaot ol trabol blong hem long yangfala Kristin ya. Nao pablisa ya i soemaot haf ya, Youg People Ask . . . blong magasin Wekap! Fren blong hem i sapraes tumas long ol tok we hem i faenem long haf ya mo hem i askem plante narafala kwestin bakegen. Ale pablisa ya i seremaot buk Yu Save Laef Foreva Long Wan Paradaes mo hem i talem long fren blong hem se insaed long buk ya i gat evri ansa blong ol kwestin we hem i gat, mo tufala i statem wan Baebol-stadi long buk ya.
7 Sipos yumi rili wan trufala Wetnes blong Jeova, yumi mas tokbaot hem long ol narafala man. (Aes. 43:10-12) ?Olsem wanem long yufala, yangfala? ?Yufala i yusum evri rod blong talemaot trutok long ol fren mo tija blong yufala long skul? Yufala i save mekem i rere sam gudfala smol tok mo biaen, yufala i save go toktok wetem olgeta. Yufala i mas traehad oltaem blong mekem i gud moa long saed ya. Yufala i save askem long papa mama blong yufala no maet, long sam narafala pablisa blong oli givhan long yufala blong mekem olsem. Yufala i save prea long Jeova blong hem i blesem ol hadwok we yufala i mekem. Yes, Jeova i blesem oltaem ol yangfala we oli givim wan gudfala wetnes long skul.—Kol. 1:9,10.